“Ia Faaauau Ona Mulimuli Mai iā te Aʻu”

“Auā na valaauina outou ona o lea lava mea; auā na tigaina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.”—1 PETERU 2:21, LF.

1, 2. Aiseā e lē faigatā naʻuā ai mo i tatou ona faataʻitaʻi i le faaaʻoaʻoga lelei atoatoa a Iesu o se faiaʻoga?

E MAUTINOA lava o Iesu o le Faiaʻoga silisili lea ua soifua mai i le lalolagi. E le gata i lenā, sa lelei atoatoa o ia, e leʻi agasala lava i lona soifuaga atoa o se tagata. (1 Peteru 2:22) Po o lona uiga ea o lenā mea, ua maualuga naʻuā le faaaʻoaʻoga a Iesu ma ua lē faigofie ai iā i tatou o tagata agasala ona faataʻitaʻi i ai? E matuā leai lava.

² E pei ona tatou mātauina i le mataupu na muamua atu, sa faavae le aʻoaʻoga a Iesu i le alofa. Ma o le alofa o se mea e mafai uma lava e i tatou ona ati aʻe. E lē o aunoa ona matuā faalaeiauina i tatou e le Afioga a le Atua ina ia tutupu aʻe ma ia faaleleia lo tatou alofa mo isi. (Filipi 1:9; Kolose 3:14) E lē taitai ona faatalitali e Ieova mai i ana foafoaga ni mea latou te lē lavatiaina. Ma o le mea moni, ona o le “Atua, o le alofa lava ia” ma ua ia faia i tatou i lona faatusa, e mafai la ona faapea atu na ia foafoaina i tatou ina ia faaalia le alofa. (1 Ioane 4:8; Kenese 1:27) Pe a tatou faitau la i upu a le aposetolo o Peteru o loo faamauina i le tatou mau autū, e ao ona tatou tali atu ma le mautinoa. E mafai ona tatou mulimuli tuʻi i tulagāaao o Keriso. O le mea moni, e mafai ona tatou usitai i le faatonuga a Iesu lava ia: “Ia faaauau ona mulimuli mai iā te aʻu.” (Luka 9:23, NW) Seʻi tatou iloiloina nei la le auala tatou te faataʻitaʻia ai le alofa sa faaalia e Keriso, muamua mo le upu moni sa ia aʻoaʻoina, atoa ma tagata na ia aʻoaʻoina.

Ia Atiina Aʻe le Alofa mo Upu Moni ua Tatou Aʻoaʻoina

3. Aiseā e faafaigatā ai i nisi ona suʻesuʻe, peitaʻi o le ā le timaʻiga o loo maua i le Faataoto 2:1-5?

³ Ina ia alofa pe fiafia i upu moni ia o loo tatou aʻoaʻoina ai isi, e ao foʻi iā i tatou ona fiafia e aʻoaʻoina na upu moni. I le lalolagi i aso nei, e lē faigofie i taimi uma ona atiina aʻe lenā fiafia. O tulaga e pei o le lē lelei o aʻoaʻoga atoa ai ma masaniga leaga sa ati aʻe a o talavou, ua tumau ai  le lē fiafia o isi e suʻesuʻe. Peitaʻi, e tāua tele le aʻoaʻoina o i tatou e Ieova. Ua faapea mai le Faataoto 2:1-5, LT: “Loʻu atalii e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua.”

4.O le ā le uiga o le “faasaga atu i ai” o le loto, ma o le ā le vaaiga o le a fesoasoani iā i tatou e faia ai faapea?

⁴ Mātau le mea o loo fai mai ai le fuaiupu 1 e oo i le 4, o loo uunaʻia e lē aunoa i tatou ina ia fai taumafaiga, e lē gata ina ia “talia” ma ‘teu i le loto’ ae e ao foʻi ona “sailiili” i ai. O le ā la e ao ona faagaeeina ai i tatou e fai mea uma e manaʻomia i lenei galuega? E lelei ona mātau le faaupuga “e faasaga atu ai lou loto i le faautauta.” Na taʻua i se tasi tusi e faapea o le timaʻiga lenei “e lē na o se faatauanau ia tau o le uaʻi mai; ae o se uunaʻiga faamalosi mo se ituaiga faanaunauga faalemafaufau: o se naunautaʻiga e talia mea ua aʻoaʻoina.” Ma o le ā e mafai ona fai ina ia tatou naunau ai ma talia mea ua aʻoaʻoina ai i tatou e Ieova? O la tatou vaaiga i mea. E manaʻomia ona tatou manatu i le “poto i le Atua” e pei o le “ario” ma e pei o “le oloa lilo.”

5, 6. (a) O le ā e ono tupu i se taimi, ma e faapefea ona tatou ʻalofiaina le tupu o lenei mea? (e) Aiseā e ao ai ona faaauau ona faaopoopo pea i ʻoa o le poto lea ua tatou maua i le Tusi Paia?

⁵ E lē faigatā ona maua le ituaiga vaaiga lenā. Mo se faaaʻoaʻoga, o le “poto i le Atua” lea ua e aʻoaʻoina atonu e aofia ai le mea moni e faapea ua fuafuaina e Ieova mo le fanau a tagata faamaoni ina ia ola e faavavau i le Parataiso i le lalolagi. (Salamo 37:28, 29) Ina ua e muaʻi aʻoaʻoina lenā upu moni, e lē taumatea sa e vaai i ai o se oloa, o se poto sa faatumuina ai lou mafaufau ma le loto i le faamoemoe ma le olioli. Ae faapefea le taimi nei? A o faagasolo taimi, pe ua amata ea ona mou atu lou talisapaia o lau ʻoa? Taumafai la e fai mea e lua. Muamua, ia toe faafou lou talisapaia, o lona uiga, toe faamanatu e lē aunoa i lou mafaufau le māfuaaga na e faatāuaina ai upu moni taʻitasi na aʻoaʻoina ai oe e Ieova, e oo lava i upu moni na e aʻoaʻoina i le tele o tausaga talu ai.

⁶ O lona lua, ia faaauau ona faaopoopo atu i au ʻoa. Manatu foʻi i le mea lenei, afai ae teʻi ua e eliina aʻe se maa tāua, pe o le a na ona e tago atu loa i le fafao i lau taga ma e savali ese ua faamalieina oe? Pe o le mea ea o le a e eli atili e faamautinoa o iai nisi maa tāua? O loo tumu le Afioga a le Atua i maa tāua ma vala tautele o le upu moni. E tusa lava po o le ā le tele ua uma ona e mauaina, ae e  mafai lava ona e toe mauaina isi mea e tele atu. (Roma 11:33) Pe a e aʻoaʻoina se vala o le upu moni, fesili ifo iā te oe lava: ‘Aiseā ua avea ai o se oloa? Pe o aumaia ai ea iā te aʻu se malamalamaga i uiga o Ieova po o ana fuafuaga? Pe o ofoina mai ai ni taʻiala aogā lea e mafai ona fesoasoani iā te aʻu ina ia savali ai i tulaga aao o Iesu? O le manatunatu loloto i fesili faapena o le a fesoasoani ai iā te oe e ati aʻe lou alofa mo upu moni ua aʻoaʻoina ai oe e Ieova.

Ia Faaalia le Alofa i Upu Moni o Tatou Aʻoaʻo Atu

7, 8. O ā nisi o auala e mafai ona tatou faaalia ai i isi e tatou te faataʻuaina upu moni ua tatou aʻoaʻoina mai le Tusi Paia? Aumai se faaaʻoaʻoga.

⁷ A o tatou aʻoaʻoina isi, e mafai faapefea ona tatou faaalia tatou te alolofa i upu moni ua tatou aʻoaʻoina mai le Afioga a le Atua? I le mulimuli atu i le faaaʻoaʻoga a Iesu, tatou te matuā faalagolago ai lava i le Tusi Paia i la tatou talaʻiga ma le aʻoaʻo atu. I vaitaimi e leʻi leva tele atu, sa faamalosia ai tagata o le Atua i le lalolagi atoa ina ia matuā faaaogā le Tusi Paia i la latou faiva i le lautele. A o e faatatauina lenā fautuaga, saʻili auala e iloa ai e le tagata o le aiga e te faatāuaina foʻi e oe mea o loo e taʻuina atu mai le Tusi Paia.—Mataio 13:52.

⁸ O se faaaʻoaʻoga, ina ua faatoʻā uma lava le osofaʻiga a tagata faatupu faalavelave i le Aai o Niu Ioka i le tausaga na teʻa nei, sa faitau atu ai e se tasi tuafafine Kerisiano le Salamo 46:1, 11 i tagata sa feiloaʻi i ai i lana faiva. E muamua ona ia fesili atu i tagata po o faapefea ona latou fesagaʻia le mala na seʻi faatoʻā mavae atu. Sa ia faalogologo ma le faaeteete i a latou tali mai, ma faamālō atu i ai, ona ia faapea atu lea: “E mafai ona ou faitauina ma outou se mau lea sa faamāfanafanaina moni ai lava aʻu i nei taimi faigatā?” E itiiti lava na teena, ma na iʻu ai i le tele o ni talanoaga lelei. I le talanoa atu i tagata talavou, sa masani i le tuafafine lava lea ona faapea atu: “Ua tusa nei ma le 50 tausaga o oʻu aʻoaʻoina le Tusi Paia, ae tou te silafia? Ou te leʻi tau lava i se faafitauli e faapea ua lē maua i le Tusi Paia se fesoasoani e faaleleia ai.” E ala i le faalatalata atu ma le naunau ma ia fiafia moni, tatou te faaalia ai i tagata e tatou te faatāuaina ma faapelepele i mea ua tatou aʻoaʻoina mai le Afioga a le Atua.—Salamo 119:97, 105.

9, 10. Aiseā e tāua ai le faaaogā o le Tusi Paia pe a tali atu i fesili e faatatau i o tatou talitonuga?

 ⁹ Pe a fesili mai se tagata iā i tatou i fesili e faatatau i o tatou talitonuga, tatou te maua ai se avanoa lelei e faaali atu ai i tagata e tatou te alolofa i le Afioga a le Atua. I le mulimuli atu i le faaaʻoaʻoga a Iesu, e lē faavaeina a tatou tali i o tatou lava manatu. (Faataoto 3:5, 6) Na i lo lenā, tatou te faaaogāina le Tusi Paia e tali atu ai. Pe e te fefe ea neʻi fai atu e se isi se fesili o le a lē mafai ona e taliina? Manatu foʻi i laasaga aogā nei e lua e mafai ona e uia.

¹⁰ Fai le mea e te mafaia e sauniuni ai. Na tusi le aposetolo o Peteru e faapea: “Ae ia faapaiaina Keriso le Alii i o outou loto, ia saunia pea lava outou e tali puipui atu iā i latou uma o ē fesili mai iā te outou i le uiga o le faamoemoe o loo iā te outou, ia faia ma le loto agamalu ma le faaaloalo loloto.” (1 Peteru 3:15, NW) Pe ua e sauni e puipui ou talitonuga? Mo se faaaʻoaʻoga, pe a manaʻo se tasi e fia iloa le māfuaaga o lou lē auai i nisi o aganuu po o faiga e lē faale-Tusi Paia, aua le tau lava ina faapea atu, “E faasa e laʻu tapuaʻiga.” O se tali faapena e ono aliali atu ai o loo e tuu atu i isi e faia au filifiliga mo oe ma o lona uiga la o oe o se sui o se lotu mavae. E sili ai ona faapea atu, “E faasāina e le Afioga a le Atua, le Tusi Paia” ia pe faapea foʻi, “E lē finagalo malie i ai loʻu Atua.” Ia ona fai atu lea o se faamalamalamaga talafeagai i le māfuaaga ua faapea ai.—Roma 12:1.

11. O le ā le meafaigaluega mo saʻiliʻiliga loloto e ono fesoasoani iā i tatou e sauni ai e tali fesili e faatatau i upu moni o le Afioga a le Atua?

¹¹ Afai e te lagona e te leʻi sauni, aiseā e lē faaalu ai se taimi e suʻesuʻe ai le tusi Reasoning From the Scriptures pe afai o maua i lau gagana? * Ia fili ni nai mataupu lea e ono lāgā mai i le fanua, ona taumafai lea e manatua ni manatu faale-Tusi Paia. Ia tuufaatasi lau Tusi Paia ma lau tusi o le Reasoning. Aua le faatalatū e faaaogā faatasi nei tusi e lua, ia taʻu i le tagata o loo fesili mai o loo iai lau tusi mo saʻiliʻiliga loloto e te manaʻo e faaaogā, e fesoasoani i le mauaina o tali faale-Tusi Paia i fesili e pei ona lāgā.

12. E faapefea ona tatou tali atu pe a tatou lē iloa le tali i se fesili faale-Tusi Paia?

¹² Taumafai e aua le soona popolevale naʻuā. E leai se tagata lē lelei atoatoa e na te manatua uma ni tali. A fesiligia la oe i se fesili faale-Tusi Paia e lē mafai ona e taliina, e mafai lava ona e tali atu faapenei: “Faafetai lava mo le lāgā o lenei fesili tāua. E faamalie atu, ou te lē iloaina le tali, ae ou te talitonu o loo talanoaina e le Tusi Paia le mataupu. Ou te naunau tele e fai saʻiliʻiliga loloto i le Tusi Paia, o le a ou iloiloina lau fesili ona ou toe foʻi mai lea ma se tali.” O se tali tuusaʻo atu ma le lotomaulalo faapena, e ono saunia ai le auala mo nisi talanoaga atili.—Faataoto 11:2.

Ia Alolofa i Tagata Tatou te Aʻoaʻoina

13. Aiseā e ao ai pea ona iā i tatou se vaaiga saʻo e faatatau iā i latou o loo tatou talaʻi atu i ai?

¹³ Sa faaalia e Iesu le alofa i tagata sa ia aʻoaʻoina. E faapefea ona tatou ono faataʻitaʻia o ia i lenei tulaga? Aua lava neʻi o tatou atiina aʻe se vaaiga lē saʻo agaʻi i tagata o loo tatou faatasi. Ua matuā luluti le talo ma ua lalata le vaivaa ona oo mai lea o le “aso tele o le Atua e ona le malosi uma lava,” ma e toʻatele mai i le faitau piliona o le fanau a tagata o le a faaumatia ai. (Faaaliga 16:14;  Ieremia 25:33) Peitaʻi, tatou te lē iloa po o ai o le a faasaoina a o ai o le a faaumatia. O lenā faaiʻuga e faatoʻā fai i le lumanaʻi ma e fai e lē na tofia e Ieova, o Iesu Keriso lea. A o leʻi oo la i le taimi o le faamasinoga, tatou te vaai i tagata taʻitoʻatasi, o loo iai le avanoa e avea ai o se auauna a Ieova.—Mataio 19:24-26; 25:31-33; Galuega 17:31.

14. (a) E faapefea ona tatou iloiloina i tatou lava pe faamata o iā i tatou le lagona alofa i tagata? (e) O ā ni auala aogā tatou te ono faaalia ai le lagona alofa ma le naunau totino i isi?

¹⁴ I le faapei o Iesu, tatou te saʻili ia alolofa i tagata. Tatou te ono fesili ifo iā i tatou lava: ‘Pe ou te manatu mamafa ea i tagata o ē ua faasesēina i pepelo e faia ma le atamai ma le taufaasesē e taʻitaʻi lotu, le ʻaufaipolotiki, ma le ʻaufaipisinisi o lenei lalolagi? Afai e foliga latou te lē o fiafia mai i le feʻau o loo tatou avatua iā i latou, pe o oʻu taumafai ea e malamalama i le pogai ua latou manatu ai faapea? Pe o oʻu amanaʻiaina ea e faapea o aʻu, po o isi foʻi o loo auauna nei ma le faamaoni iā Ieova, sa uluaʻi manatu foʻi faapena? Pe ua fetuunaʻi ea le auala ou te talaʻi ai ina ia talafeagai ma lenei tulaga? Pe ua ou teea nei tagata e faapea e lē mafai ona toe faia ni suiga?’ (Faaaliga 12:9) Pe afai e mātauina e tagata lo tatou alolofa moni, e ono faafaigofie ai ona latou tali mai i la tatou feʻau. (1 Peteru 3:8) E ono uunaʻia foʻi i tatou e le alofa, e faaalia le naunau atili i tagata tatou te feiloaʻi i ai i la tatou faiva. Tatou te ono faia ni faamaumauga o a latou fesili ma mea o latou manatu mamafa i ai. Pe a tatou toe asia, tatou te ono faaalia i ai, sa tatou manatunatu i mea sa latou talanoa mai ai i lau asiasiga muamua. Ma ia taʻu atu i ai afai o iai se manaʻoga faanatinati i le taimi nei, atonu tatou te ono mafai ona fai se fesoasoani talafeagai.

15. Aiseā e ao ai ona tatou mātauina uiga lelei o loo i tagata, ma e faapefea ona tatou faia faapea?

¹⁵ I le pei o Iesu, tatou te mātauina uiga lelei o loo i tagata. Atonu po o se matua nofo toʻatasi o loo faia ni taumafaiga mataʻina e tausia aʻe lana fanau. Atonu o se tane o loo tauivi e tausia aʻe lona aiga. O se tagata ua afu le soifua o loo faaalia le naunau i mea faaleagaga. Pe tatou te mātauina na uiga i tagata tatou te feiloaʻi ma avatu i ai le faamālō talafeagai? O le faia faapea, tatou te faamalosia ai se faiā lelei i le va ma i latou ma e ono tatalaina ai le auala mo le avatuina o se molimau e faatatau i le Malo.—Galuega 26:2, 3.

E Manaʻomia le Lotomaulalo i le Faaalia o le Alofa

16. Aiseā e tāua ai le tausia o le lotoagamalu ma faaaloalo agaʻi iā i latou o tatou talaʻi atu i ai?

¹⁶ O le alofa i tagata tatou te aʻoaʻoina o le a uunaʻia ai i tatou e utagia le lapataʻiga atamai a le Tusi Paia e faapea: “E faafefete le ʻpoto’, a o le alofa e faamafanafana [ati aʻe] lea.” (1 Korinito 8:1) E anoanoaʻi le poto sa iā Iesu, peitaʻi, e leʻi avea ma mea na ia faamaualuga ai. O lea la, a o e faailoa atu ou talitonuga, ʻalofia se leo e pei ua finau po o le faafoliga atu foʻi e faasausili. O lo tatou faanaunauga o le pāʻia o loto ma ia faatosina mai tagata i le upu moni lea tatou te matuā alolofa lava i ai. (Kolose 4:6) Ia manatua, ina ua fautuaina e Peteru Kerisiano ina ia sauni e tali puipui atu, sa ia faaaofia ai ma le faamanatu mai e faapea e ao ona tatou faia ma le “loto agamalu ma le faaaloalo loloto.” (1 Peteru 3:15) Afai tatou te loto agamalu ma faaaloalo, e ono faigofie la ona tatou tataʻi maia tagata i le Atua lea tatou te auauna i ai.

17, 18. (a) E ao faapefea ona tatou tali atu i uiga faitio e faatatau i o tatou agavaa i le avea ai ma faifeʻau? (e) Aiseā e lē tāua ai se poto i le gagana anamua a le Tusi Paia mo tagata aʻoga o le Tusi Paia?

¹⁷ E lē manaʻomia ona tatou faaofo tagata i lo tatou poto po o a tatou aʻoaʻoga. Afai e iai nisi i la outou oganuu e lē fia faalogo mai i soo se tasi lava e leai ni o latou tikeri ma ni taʻu na maua mai i ni iunivesite, aua le faalotovaivaia ai oe i o latou uiga. E leʻi amanaʻiaina e Iesu faitioga sa iai e faapea o ia e leʻi auai atu i le aʻoga maualuga faa-Rapi i ona aso, e leʻi lolo atu foʻi i faiga faaituʻau sa masani ai e ala i lona faaofoina o tagata i le tele o mea ua ia aʻoaʻoina.—Ioane 7:15.

¹⁸ E sili mamao atu ona tāua le lotomaulalo ma le alofa i faifeʻau Kerisiano na i lo le tele o ni aʻoaʻoga faalelalolagi nei. O le Aʻoaʻo Sili, o Ieova, ua ia taʻuagavaaina i tatou mo la tatou faiva. (2 Korinito 3:5, 6) Ma e tusa lava po o le ā o fai mai ai nisi o taʻitaʻi lotu o atunuu Kerisiano, e lē manaʻomia ona tatou aʻoaʻoina gagana anamua a le Tusi Paia ina ia avea ai ma faiaʻoga o le Afioga a le Atua. Sa faagaeeina e Ieova le Tusi Paia ina ia tusia i ni faaupuga manino, ma tumau ona aogā ma e  mafai e so o se tagata ona malamalama i ona upu moni tautele. O na upu moni o loo tumau pea e lē suia e ui ina ua faaliliuina i le faitau selau ma selau o gagana. O lea la, e ui e aogā i nisi taimi le poto i gagana anamua o le Tusi Paia, ae e lē manaʻomia. E lē gata i lenā, o le faamaualuga i le iai o le tomai i le gagana e mafai ona faapogaia ai le lē maua e tagata o le uiga lea e tāua i Kerisiano moni—o le aʻoaʻogofie.—1 Timoteo 6:4.

19. I le ā le uiga e avea ai la tatou faiva faa-Kerisiano o se auaunaga?

¹⁹ E aunoa lava ma se masalosalo, o la tatou faiva faa-Kerisiano o se galuega e manaʻomia ai se uiga lotomaulalo. Tatou te tuuina e lē aunoa i tatou i teteega, le lē fiafia mai, e oo lava i sauāga. (Ioane 15:20) Peitaʻi, e ala i le faia ma le faamaoni o la tatou faiva, ua tatou faia ai se auaunaga tāua. Afai e faaauau ona auauna i isi ma le lotomaulalo e ala i lenei galuega, ua tatou faataʻitaʻia ai le alofa sa faaalia e Iesu Keriso agaʻi i tagata. Manatu i le mea lenei. Afai e manaʻomia ona tatou talaʻi i le afe o tagata o ē e lē manatu mamafa mai po o tagata tetee foʻi, ina ia oo ai i se tagata e toʻatasi e pei se mamoe, pe e lē ua aogā ea taumafaiga? O le mea moni lenā! O lea la e ala i le maumauaʻi i le galuega e aunoa ma le taofia, ua tatou auauna ai ma le faamaoni i ē e pei ni mamoe lea tatou te leʻi oo atu i ai. E aunoa ma se masalosalo o le a faamautinoa e Ieova ma Iesu le mauaina o le toʻatele o nei tagata taʻitoʻatasi ma fesoasoani i ai aʻo lumanaʻi le oo mai o le iʻuga.—Hakai 2:7.

20. O ā nisi o auala e mafai ona tatou aʻoaʻo atu ai e ala i faaaʻoaʻoga?

²⁰ O le aʻoaʻo atu e ala i faaaʻoaʻoga, o se tasi lea o auala e faaalia ai lo tatou lotomalie e auauna i isi? O se faataʻitaʻiga, tatou te mananaʻo e aʻoaʻo tagata e faapea, o le auauna iā Ieova “le Atua manuia [fiafia],” o le auala sili lea ona lelei lea ma faamalieina e mafai ona ola ai. (1 Timoteo 1:11) A o latou mātauina a tatou amio ma a tatou feutagaʻiga ma o tatou tuaoi, aumea i le aʻoga, ma aumea i galuega, pe o mafai ona latou mātauina o loo tatou fiafia ma faamalieina? O le tulaga lava e tasi e pei o lenei, tatou te aʻoaʻoina tagata aʻoga o le Tusi Paia e faapea o le faapotopotoga Kerisiano o se nofoaga e maua ai le alofa i lenei lalolagi sauā. Pe e mafai e a tatou tagata aʻoga ona mātauina tatou te alolofa i tagata uma i le faapotopotoga ma galulue mamafa e faatumauina le filemu ma tagata taʻitoʻatasi?—1 Peteru 4:8.

21, 22. (a) O le iloiloina e le tagata o ia lava e faatatau i la tatou faiva e mafai ona taʻitaʻia atu ai i tatou i ā avanoa? (e) O le ā o le a talanoaina i mataupu o sosoo mai i le isi lomiga o Le Olomatamata?

²¹ O se uiga lotomalie agaʻi i la tatou faiva, atonu i se taimi, e ono faagaeeina ai i tatou e toe iloilo i tatou lava. O le faia faapea ma le faamaoni, e toʻatele ua manatu ai o loo iai le avanoa e faalautele ai la latou auaunaga i le auai i le faiva faataimi atoa, po o le alu atu e auauna i se nofoaga o tele ai le manaʻoga. O isi ua aʻoaʻoina se isi gagana ina ia auauna atu ai i se vaega o faatuputupulaʻia ai tagata mai isi atunuu ua nonofo ma faamautū i la latou oganuu. Afai e tulaʻi mai ni avanoa faapena iā te oe, ia iloilo ma le faaeteete faatasi ai ma le tatalo. O se olaga o le auauna atu e aumai ai le olioli tele, lotomalie, ma le filemu o le mafaufau.—Failauga 5:12.

²² Po o le a lava le tulaga, ia faaauau ona tatou faataʻitaʻi iā Iesu Keriso, i le atiina aʻe o lo tatou alofa mo upu moni o loo tatou aʻoaʻoina atu, atoa ma tagata o loo tatou aʻoaʻoina. O le atiina aʻe ma faatumauina o le alofa i nei vala e lua, o le a fesoasoani iā i tatou e atiina aʻe se faavae lelei i le avea ma faiaʻoga e pei o Keriso. E mafai la faapefea ona tatou ati aʻe i lenā faavae? I le isi lomiga o sosoo mai o Le Olomatamata, o le a talanoaina ai i se faasologa o ni mataupu, ia nisi o metotia tau aʻoaʻo atu sa faaaogā e Iesu.

[Faamatalaga pito i lalo]

E Faapefea Ona E Tali?

• O le ā le faamautinoaga ua iā i tatou e faapea o le faaaʻoaʻoga a Iesu o se faiaʻoga e lē maualuga naʻuā mo i tatou e faataʻitaʻi i ai?

• E faapefea ona tatou faaalia e tatou te naunau i upu moni ua tatou aʻoaʻoina mai i le Tusi Paia?

• Aiseā e tāua ai le tumau i le lotomaulalo a o tatou tuputupu aʻe i le poto?

• O ā nisi o auala e tatou te ono faaalia ai le alofa mo tagata o tatou taumafai malosi e aʻoaʻo?

[Fesili mo le Suʻesuʻega]

[Ata i le itulau 16]

Fai le mea e te mafaia ina ia sauniuni ai

[Ata i le itulau 16, 17]

Afai e te faatāuaina “le poto i le Atua” e mafai ona e faaaogāina lelei le Tusi Paia

[Ata i le itulau 18]

Tatou te faaalia le alofa i tagata e ala i le taʻu atu o le tala lelei iā i latou