O Ai e Tatau Ona E Faamaoni i Ai?

“O lo tatou atunuu: . . .Talosia ia saʻo ai pea; ae e tumau ona avea pea ma o tatou atunuu, tusa lava pe saʻo pe sesē.”—Stephen Decatur, o se tagatatau o le fuāvaa a le Iunaite Setete, 1779-1820.

O LE faamaoni lē masalomia o se tasi i lona lava atunuu, ua manatu i ai le toʻatele o sa latou avega tauave tāua. Ua toe faaupuina e isi ia upu a Stephen Decatur e faapea: ‘O laʻu lotu, talosia ia saʻo ai pea; ae e tumau ona avea pea ma aʻu lotu, tusa lava pe saʻo pe sesē.’

O le mea mautinoa, e faalagolago le atunuu po o le lotu o loo manaʻomia ona e faamaoni i ai i le nofoaga na e fanau ai, ae e sili atu ona tāua le filifiliga po o ai e tatau ona e faamaoni i ai i lo lenā tulaga. Peitaʻi, o le fesiligia o le faamaoni o se tasi i le atunuu na ola aʻe ai e manaʻomia ai le lototele ma e aumaia ai ni luʻi.

Tofotofoga o le Faamaoni

Ua faapea mai se fafine na ola aʻe i Zambia: “Sa ou naunau i le lotu mai lava i loʻu laʻitiiti. Na avea le faia o tatalo i aso taʻitasi i le potu tatalo o lo matou aiga, o le faamanatuina o aso faamanatu faalelotu, ma le auai e lē aunoa i le  malumalu ma vaega o loʻu olaga tuputupu aʻe. Sa fealumi faatasi laʻu lotu ma le tapuaʻiga ma aganuu, faiga faalenuu ma le aiga.”

Peitaʻi, ina ua latalata i le luasefulu o ona tausaga, na amata ai loa ona ia suʻesuʻeina le Tusi Paia ma Molimau a Ieova, ma e leʻi umi mulimuli ane ae filifili loa e suia lana lotu. Pe sa avea ea lea ma gaoioiga o le lē faamaoni?

Na ola aʻe Zlatko i Bosnia, ma na iai se vaitaimi na ia auai ai i se fetauaʻiga na aafia ai lona atunuu. Na ia amata ona suʻesuʻeina le Tusi Paia ma Molimau a Ieova. I le taimi nei, ua musu o ia e toe auai i se fetauaʻiga ma nisi. Pe ua ia lē faamaoni ea?

E faalagolago le auala e taliina ai na fesili i lau vaaiga o loo iai. Ua faapea mai le fafine na muaʻi taʻua: “I loʻu vaipanoa, o le suia o se tapuaʻiga a se tasi e ō mai faatasi ma se faailoga e lē mafaamagaloina; e manatu i ai o se gaoioiga o le lē faamaoni, o le faalataina e se tasi o lona aiga ma lona vaipanoa.” O le vaaiga foʻi lenā na vaai ai i se fitafita o le vaegāʻau a Zlatko, na manatu i ai o sē e faalata pe a musu e tau mo la latou itu. Ae na tau fai manatu uma lenā fafine ma Zlatko e faapea o le ituaiga o faamaoni e sili ona maualuga—o le faamaoni lea i le Atua—lea e uunaʻia ai a latou gaoioiga. E sili atu ona tāua, pe faapefea ona silasila le Atua iā i latou o ē mananaʻo e faamaoni iā te ia?

O le Faamaoni Moni —O se Faailoaga o le Alofa

Na faapea atu le tupu o Tavita iā Ieova le Atua: “E te faamaoni oe i lē ua faamaoni.” (2 Samuelu 22:26, NW) O le upu Eperu ua faaliliuina i inei i le “faamaoni,” ua faaalia ai le manatu o le agalelei, lea e pipii atu ai o ia i se mea seʻia faataulauina le fuafuaga o lenā mea. I se uiga e faapei o se tinā ma sana tamameamea, e pipii atu ma le agaalofa Ieova i ē o loo faamaoni iā te ia. Na fetalai Ieova i ana auauna faamaoni i taimi o Isaraelu anamuā: “E galo ea i le fafine lana tama ua susu, na te le alofa i le tama a lona lava manava? ai lava e galo ia te i latou, a e le galo lava oe ia te au.” (Isaia 49:15) O i latou e lotomalilie e faamaoni atu i le Atua e sili atu na i lo o isi mea uma, ua mautinoa i lana tausiga alofa.

O le faamaoni iā Ieova e faavae aʻe i le alofa. E uunaʻia le tagata e fiafia i mea e fiafia i ai le finagalo o Ieova ma ʻinoʻino i mea leaga ia e inosia e Ieova. (Salamo 97:10) Talu ai o le uiga autū o Ieova o le alofa, o le faamaoni la i le Atua, e fesoasoani e taofia ai se tasi mai lona gaoioi i se auala lē alofa i isi. (1 Ioane 4:8) O lea pe afai o le faamaoni i le Atua e suia ai e se tasi ona talitonuga faalelotu, e lē tatau ai ona faauiga faapea e lē o toe alofa i lona aiga.

O le Faamaoni i le Atua —O se Uunaʻiga Aogā

Na faamatala mai e le fafine na taʻua muamua ana gaoioiga i lenei auala: “E ala i loʻu suʻesuʻeina o le Tusi Paia, na oo ai ina ou iloa Ieova o le Atua moni, ma na ou atiina aʻe ai se faiā totino ma ia. O Ieova e paleni lona alofa, e faamasinotonu, e atamai, ma malosi, e lē pei o atua ia na ou tapuaʻi i ai. Talu ai e manaʻomia e Ieova le tuutoina atu atoatoa iā te ia, o lea na tatau ai ona ou tuua isi atua.

“Na faapea mai soo oʻu mātua iā te aʻu, ua la matuā lē fiafia iā te aʻu ma ua ou faalumaina i laʻua. Na ou iloa le faigatā o lenei mea, ona sa matuā tāua iā te aʻu le maliega mai oʻu mātua. Ae ina ua tuputupu aʻe loʻu poto i le upu moni o le Tusi Paia, na oo ina manino mai ai le filifiliga mo aʻu. Sa lē mafai ona ou fulitua iā Ieova.

“O le filifili ina ia faamaoni iā Ieova na i lo tū faalotu, e lē uiga ai ua ou lē faamaoni i loʻu aiga. Na ou taumafai e faailoa atu iā i latou e ala i aʻu upu ma gaoioiga, o loo oʻu malamalama i o latou faalogona. Ae afai ou te lē faamaoni iā Ieova, ona ou taofia ai lea o loʻu aiga mai le iloaina o ia, ma o le a avea lenā ma gaoioiga moni o le lē faamaoni.”

O le tulaga lava e tasi, e lē avea se tasi ma faalata pe afai e manaʻomia e le  faamaoni i le Atua ona solitū i faiga faapolotiki ma lē auai i ni fetauaʻiga ma isi. O le auala lenei na faamatalaina ai e Zlatko lana gaoioiga na fai: “E ui lava na ou ola aʻe o sē na faapea o se Kerisiano, ae na ou faaipoipo atu i se tasi e lē o se Kerisiano. Ina ua gāpā le tāua, na manaʻomia ai e itu uma e lua lou faamaoni. Na faamalosia aʻu e filifili po o lē fea itu e tau ai. Na ou tau i le taua mo le tolu ma le ʻafa tausaga. Na mulimuli ane o matou sosola atu ma laʻu avā i Croatia lea na matou feiloaʻi ai ma Molimau a Ieova.

“Mai i lo matou suʻesuʻeina o le Tusi Paia, na oo ai ina matou talisapaia e faapea e na o Ieova e toʻatasi e tatau ona tatou faamaoni i ai, ma e finagalo o ia tatou te alolofa atu i o tatou tuaoi tusa lava po o le ā le lotu po o le ituaiga e iai. I le taimi nei, ua autasia ai aʻu ma laʻu avā i la ma tapuaʻiga iā Ieova, ma ua ou aʻoaʻoina ai e faapea e lē mafai ona ou faamaoni i le Atua ma tau ma loʻu tuaoi.”

E Fafau Aʻe e le Poto Saʻo le Faamaoni

Talu ai o Ieova o Lē na Foafoaina i tatou, o le faamaoni la iā te ia e tatau ona faamuamua na i lo isi lava manatu e tusa ai o lo tatou faamaoni. (Faaaliga 4:11) Peitaʻi, ina ia taofia lo tatou faamaoni i le Atua e avea o se uunaʻiga maelega valea ma faaleagaina ai, e tatau ona fafauina aʻe e ala i le poto saʻo. Ua apoapoaʻia i tatou e le Tusi Paia: ‘Ia toe fuataiina manao o o outou loto, ma ia oofu outou i le tagata fou ua faia e foliga i le Atua, i le faamaoni moni.’ (Efeso 4:23, 24) Na iai i le tagata taʻutaʻua o lē na tusia nei upu faagaeeina le lototele e fesiligia ai le faamaoni i mea na ola aʻe ai. O ana suʻesuʻega na taʻitaʻia atu ai i se faaliliuga aogā.

Ioe, na feagai Saulo ma se tofotofoga o le faamaoni, e pei ona sa faia e le toʻatele i o tatou taimi. Na tausia aʻe Saulo i ni tū masani i lona aiga, ma na matilatila lona faamaoni i lana lotu na ola aʻe ai. O le faamaoni i lana lotu na uunaʻia ai o ia e faia ni faiga sauā iā i latou sa lē ioe i lona manatu. Na mātaulia Saulo i le osofaʻia o fale o Kerisiano ma tatoso ese mai i latou e faasala ma e oo lava ina fasioti.—Galuega 22:3-5; Filipi 3:4-6.

Peitaʻi, ina ua maua e Saulo le poto saʻo e uiga i le Tusi Paia, na ia faia le tele o mea na manatu ana tupulaga e lē mafai ona faia. Na suia lana lotu. O Saulo o lē na mulimuli ane lauiloa o le aposetolo o Paulo, na filifili e faamaoni i le Atua na i lo o tū masani. O le faamaoni i le Atua e faavae i le poto saʻo na uunaʻia ai Saulo e faapalepale, e agaalofa, ma faalaeiau, e ese mai i lana amio e faaleagaina ai ma le maelega valea na iai muamua.

Aiseā e Faamaoni Ai?

O le faaaogāina o tapulaa a le Atua e faaleleia ai lo tatou faamaoni, e manino le aumaia ai o aogā. Mo se faaaʻoaʻoga, i se lipoti o le 1999 mai le Institute of Family Studies a Ausetalia e faapea, i faavae mo faaipoipoga e umi ona tumau ma faamalieina o le “talitonuina ma faamaoni . . . [ma] se tulaga faaleagaga.” Na mauaina foʻi e le suʻesuʻega lava lea e faapea e saosaolaumea “faaipoipoga e mautū ma faamalieina” i le sili atu ona fiafia, soifua mālōlōina lelei, ma le umi  ona soifua o tane ma fafine ma avatua ai i fanau se avanoa e sili atu e mauaina ai se olaga fiafia.

I le lalolagi lē mautonu i aso nei, ua pei ai le faamaoni o se maea o loo pipii ai se tagata o loo taumafai e aau mai i se vaafaaola. Pe afai e lē faamaoni le tagata aau, o le a oo ina felafoaʻiina solo o ia e peau ma matagi. Ae afai foʻi e leiloa atu lona faamaoni, e tai pei lava o loo nonoa atu le maea lea o loo pipii ai i se vaa ua goto. E pei lava o Saulo, na oo ina ia iloaina o loo tosoina atu o ia i se ala o gaoioiga e oti ai. Peitaʻi, o le faamaoni iā Ieova, e faavae aʻe i le poto saʻo, o se maea faaola lea e aumaia ai iā i tatou se tulaga mautū ma taʻitaʻiina atu ai i le faaolataga.—Efeso 4:13-15.

Na faia e Ieova lenei folafolaga iā i latou o ē e faamaoni iā te ia. “Auā e fiafia Ieova i le faamasinoga, na te le tuua foʻi ona tagata amio Atua, e leoleoina i latou e faavavau.” (Salamo 37:28) E lē o toe umi, ae ulu atu i latou uma e faamaoni iā Ieova i le lalolagi parataiso, lea o le a latou mauaina ai se saʻolotoga mai faanoanoaga ma tigā, ma o le a olioli ai i ni faiā e saʻoloto ai i fevaevaeaʻiga faalelotu ma faapolotiki.—Faaaliga 7:9, 14; 21:3, 4.

E oo lava i le taimi nei, e faitau miliona tagata i le lalolagi atoa ua latou iloaina e faapea e na o lo latou faamaoni iā Ieova e auala mai ai le fiafiaga moni. Aiseā e lē faataga ai Molimau a Ieova e fesoasoani iā te oe e iloiloina lau vaaiga o iai i le faamaoni e ala i le malamalamaga o upu moni o le Tusi Paia? Ua taʻu mai e le Tusi Paia iā i tatou: “Ina tofotofo ia outou ia te outou, po ua outou i le faatuatua; ina suesue ifo ia ia te outou; pe tou te le iloa ea o outou loto.”—2 Korinito 13:5.

E manaʻomia le lototele e tofotofoina ai lo tatou faatuatua ma le māfuaaga e tatou te faamaoni ai, ae o taui e maua mai ai o le a lē maʻimauina ai le taimi na faaaluina pe afai e iʻu ai ina tatou vavalalata atu iā Ieova le Atua. Ua faamatalaina mai e le fafine na taʻua muamua faalogona o le toʻatele o tagata i lona faapea mai: “Na ou aʻoaʻoina ai o le faamaoni iā Ieova ma ana tapulaa e fesoasoani iā i tatou e faapaleni ai a tatou feutagaʻiga ma o tatou aiga, ma avea o ni tagata e sili ona lelei i lo tatou vaipanoa. Tusa lava po o le ā le faigatā o tofotofoga, ae afai tatou te faamaoni iā Ieova, o le a faaauau pea ona faamaoni iā i tatou.”

[Ata i le itulau 6]

O le poto saʻo na uunaʻia ai Saulo e suia lē e faamaoni atu i ai

[Ata i le itulau 7]

Aiseā e lē iloiloina ai lou faamaoni i le malamalamaga o le upu moni o le Tusi Paia?

[Faamatalaga i Ata i le itulau 4]

Churchill, agavale i le pito i luga: ata a le U.S. National Archives; Joseph Göbbels, faasiʻusiʻuga i le itu taumatau: Library of Congress