Pe E te Manatua?

Pe na e talisapaia le faitauina o lomiga talu ai nei o Le Olomatamata? Ia seʻi vaai la pe mafai ona e taliina fesili o loo mulimuli mai:

• O le ā le agaga malamalama, ma aiseā e ao ai ona atiina aʻe e Kerisiano?

O le tomai e tuuina ai e se tasi o ia i le tulaga o le isi tagata, e pei o lo tatou lagonaina i o tatou loto ia tigā o le isi tagata. Ua fautuaina Kerisiano e faaalia “[‘lagona faaleuso,’ NW] ia alolofa i le au uso, ia mutimutivale i le alofa.” (1 Peteru 3:8) Ua faataatia e Ieova le faaaʻoaʻoga mo i tatou e mulimuli ai i le faaalia o le agaga malamalama. (Salamo 103:14; Sakaria 2:8) E mafai ona faateleina lo tatou malamalama e tusa ai o lenei tulaga e ala i le faalogo, mātau, ma faaata i le mafaufau.—4/15, itulau 24-26.

• Ina ia maua le fiafiaga moni, aiseā e tatau ai ona muamua le faamālōlōga faaleagaga a o leʻi oo mai le vaifofō mulimuli o tulaga lē atoatoa o le malosi o le tino?

O le toʻatele o tagata e mālōlōina faaletino e lē fiafia, ona ua lofitūina i faafitauli. I sona eseesega, o le toʻatele o Kerisiano o loo iai i tulaga lē atoatoa o le malosi o le tino i aso nei, o loo auauna ma le matuā fiafia iā Ieova. O i latou o loo maua aogā mai faamālōlōga faaleagaga, o le a maua lo latou avanoa e aveesea ai tulaga lē lelei atoatoa o le malosi o o latou tino i le lalolagi fou.—5/1, itulau 6-7.

• Aiseā ua faavasega ai e le Eperu 12:16 Esau o sē e faitaaga?

Ua faailoa mai i le tala a le Tusi Paia le faaalia e Esau o se ituaiga o mafaufauga sa taulaʻi atu i ni taui e vave maua ma le faatalalē i mea paia. Pe afai e faatagaina e se tasi i aso nei le atiina aʻe o lea ituaiga o mafaufauga, e mafai ona taʻitaʻiina atu ai i agasala matuiā, e pei o le faitaaga.—5/1, itulau 10-11.

• O ai Tetuliano ma o le ā na iloga ai o ia?

O ia o se tusitala ma o se tagata atamai i mataupu faalelotu, na soifua i le senituri lona lua ma le lona tolu T.A. Na iloga o ia i le lomiaina o le tele o tusitusiga e puipuia ai le Faa-Kerisiano faatagāfai. A o ia faia se mea e puipuia ai, na ia faaofi mai ai ni manatu ma aʻoaʻoga faafilosofia lea na faataatia ai se faavae mo aʻoaʻoga sesē faalelotu, e pei o le Tolutasi.—5/15, itulau 29-31.

• Aiseā e lē tuuaʻia atoatoa ai le auala na faia ai i tatou mo faamaʻi, uiga, ma le oti o le tagata?

Ua faia e saienitisi se faaiʻuga e faapea e foliga mai e māfua mai faamaʻi faaletagata i le auala na foafoaina ai, ma e talitonu isi o amioga e māfua mai i le vaega o le sela lea e faatonutonuina ai le tuputupu aʻe o le tagata. Peitaʻi, ua saunia mai e le Tusi Paia le malamalamaga i le amataga o le tagata, e aofia ai le auala na faaaafia ai e le agasala ma le lē lelei atoatoa le tagata. E ui atonu e fafauina aʻe e le vaega o le sela lea e faatonutonuina ai le tuputupu aʻe i se tasi ia uiga faaletagata, ae o lo tatou tulaga lē lelei atoatoa ma mea o loo siʻomia ai i tatou ua avea ma aafiaga autū.—6/1, itulau 9-11.

• Ua faapefea ona faasusulu atu e manusikulipi na tusia i paʻu laau lea na mauaina i Oxyrhynchus, i Aikupito, le malamalama e tusa ai o le faaaogāina o le suafa o le Atua?

O le kopi o le Iopu 42:11, 12 mai le Septuagint faa-Eleni, o loo iai le Tetakalamatone (mataʻitusi Eperu e fā o le suafa o le Atua). O se faamaoniga faaopoopo lea o le iai o le suafa o le Atua i le gagana Eperu i le Septuagint, lea e masani ona sii mai e tusitala o Tusitusiga Paia Eleni.—6/1, itulau 30.

• O taaloga sauā ma le mataʻutia a tagata tau a le Emepaea o Roma, ua faatusaina i ā taaloga o loo maimoaina e tagata i aso nei?

O se faaaliga talu ai nei i le Colosseum (fale sa faia ai fetauiga anamua) i Roma, ma Italia, na faamanatu mai ai mea i ona pō nei e talitutusa i ai e ala i le faaalia o ni ata vitiō o taugā povi poʻa, o faipelega faapolofesa, tuuga a taavale ma uila afi, ma fetauiga a le ʻaumaimoa i isi o taaloga faaonapōnei. Sa teulotoina e uluaʻi Kerisiano e faapea, e lē finagalo Ieova i faiga sauā po o tagata sauā, ma e tatau foʻi ona faapena Kerisiano i aso nei. (Salamo 11:5)—6/15, itulau 29.

• A o tatou taumafai e avea ma ni faiaʻoga uigā, o le ā tatou te aʻoaʻoina mai le faaaʻoaʻoga a Esera?

Ua faamatilatila mai e le Esera 7:10 mea e fā na faia e Esera, e mafai ona tatou taumafai e faataʻitaʻi. Ua faapea mai: “Na [1] saunia e Esera lona loto [2] e saili i le tulafono a Ieova ma [3] fai ai ma [4] aʻoaʻo atu i Isaraelu i le tulafono, ma faamasinoga.”—7/1, itulau 20.

• O ā tulaga e lua e talafeagai ai mo se fafine Kerisiano ona fai se ufiulu?

O le tasi o tulaga e tulaʻi mai lea i totonu o le aiga. O lona faia o se ufiulu e faaata atu ai lona amanaʻiaina o lana tane e ana le tiute tauave o le taʻitaʻi i se tatalo ma tuuina atu taʻiala faale-Tusi Paia. O le isi tulaga o totonu o le faapotopotoga, lea e faaalia ai lona amanaʻiaina o tane papatiso ua iai le tofiga faale-Tusi Paia e aʻoaʻo atu ma taʻimua. (1 Korinito 11:3-10)—7/15, itulau 26-27.

• Aiseā e manatu ai Kerisiano i le yoga o se mea e mataʻutia ma e sili atu na i lo le na o ni faamalositino?

O le fuafuaga o le yoga lea e puleaina le tagata, o le taʻitaʻia lea o ia e mauaina se malosi e sili atu i lo le malosi faaletagata. E ese mai i le taʻitaʻiga a le Atua, e aofia ai i le yoga le taofia o le tomai e mafaufau ai. (Roma 12:1, 2) E mafai ona tuuina atu e le yoga se tasi i lamatiaga o faiga faaagaga ma faiga faataulāitu. (Teuteronome 18:10, 11)—8/1, itulau 20-22.