“Pe Tou te Iloa le Pogai ua Ou Toe Faafoʻi Mai ai la Outou Tupe?”

‘PAGĀ loʻu fia maua o se tupe!’ na manatunatu ai ia Nana, o se tinā nofo toʻatasi e toʻatolu lana fanau tama, ma e nonofo i Kaspi i le Itumalo o Georgia. I se tasi taeao, na taunuu ai ona moomooga i le fia mauaina o se tupe. Na ia mauaina se tupe e tusa ma le 300 lari (150 tala Amerika) e latalata i le ofisa o leoleo. Sa leai lava se tasi na iai. Ma o se tupe telē foʻi. O le mea moni, talu lava ona avea le lari ma tupe a le atunuu talu mai le lima tausaga ua mavae, e leʻi vaai lava Nana i se tupe pepa e 100 lari. E lē mafai e le ʻaufaioloa i le atunuu ona maua se tupe telē faapena e tusa lava pe faigaluega mo ni tausaga.

‘O le ā le mea ou te manaʻomia ai lenei tupe ae leiloa ai loʻu faatuatua, mataʻu i le Atua, ma loʻu tulaga faaleagaga?’ Sa manatunatu ai Nana. Sa ia atiina aʻe na uiga faa-Kerisiano, ma tumau ai i sauāga ogaoga ma le sasaina o ia ona o lona talitonuga.

Ina ua alu atu i le ofisa o leoleo, na vaaia ai e Nana ni leoleo se toʻalima o saʻili ma le popole se mea. Sa ia iloa o loo latou saʻili mo le tupe, o lea na ia faalatalata atu ai iā i latou ma faapea atu: “Sa iai sa outou mea na leiloa?”

Na latou tali mai: “O le tupe.”

“E fia?”

“E toluselau lari!”

Na faapea atu Nana, “O lea na ou maua la outou tupe.” Ona ia fesili atu lea: “E tou te iloa le pogai ua ou toe faafoʻi mai ai la outou tupe?” E latou te leʻi iloa.

Sa ia faaauau atu e faapea: “Ona o aʻu o se tasi o Molimau a Ieova. Pe ana lē o aʻu o se Molimau, ou te lē toe faafoʻi maia la outou tupe.”

Na avatu e le taʻitaʻi leoleo lea na leiloa lana tupe, le 20 lari iā Nana ona o lona faamaoni.

Na vave ona salalau atu le tala i le itumalo atoa o Kaspi. I le aso na sosoo ai, na sau ai i fafo mai le ofisa o leoleo se tamaʻitaʻi e faigaluega teufale ma faapea mai iā Nana: “E teu lava e le taʻitaʻi leoleo a outou lomiga i lona ofisa. Atonu la o le a sili atu ona ia talisapaia tusi ia i le taimi nei.” Na oo foʻi ina faapea mai se tasi alii leoleo: “Afai e avea tagata uma ma Molimau a Ieova, o ai la o le a toe faia ni solitulafono?”