Po o le a E Tausisia Lou Faamaoni?

E FIA ni manu iti na mamate ananafi? E leai se tasi na te iloa, ma atonu e toʻaitiiti foʻi ni tagata e manatu mamafa i ai, ona o le tele naʻuā o manu felelei. Ae peitaʻi, e manatu mamafa i ai Ieova. I le faasino atu i nei manufelelei e foliga mai e lē tāua, na taʻu atu e Iesu i ona soo: “E leai foi so laua e paū i le eleele e aunoa ma [le silafia e] lo outou Tamā.” Na ia faaopoopo mai: “Aua tou te matatau ai; e sili outou i manu iti e tele.”—Mataio 10:29, 31.

Mulimuli ane, sa malamalama lelei le ʻausoo i le maʻeu o le tāua o i latou iā Ieova. Na tusi ai le tasi o i latou, le aposetolo o Ioane e faapea: “O le mea lava lenei ua faaalia mai ai le alofa o le Atua ia te i tatou, ina ua auina mai e le Atua lona Alo e toatasi i le lalolagi, ina ia tatou ola ia te ia.” (1 Ioane 4:9) E lē gata ina saunia e Ieova le togiola, ae ua faamautinoaina foʻi ana auauna uma e faapea: “Ou te le tuua lava oe, ou te le tuulafoai lava ia te oe.”—Eperu 13:5.

E manino lava, e tumau le alofa o Ieova i ona tagata. Ae peitaʻi, ua lāgā le fesili, ‘Po o lo tatou pipiimau tele atu ea iā Ieova o le a lē mafai ai lava ona tatou tuulafoaʻia o ia?’

O Loo Taumafai Satani e Faavaivaia lo Tatou Faamaoni

Ina ua faatepa e Ieova Satani i le ala faamaoni o Iopu, na faitio atu Satani: “Ua mataʻu fua ea Iopu i le Atua?” (Iopu 1:9) Sa ia tausisi atu e faapea, o le faamaoni o tagata i le Atua, e faalagolago atoatoa i ‘mea e mafai ona latou maua mai ai.’ Pe afai e moni lenei mea, e ono faavaivaia ai la le faamaoni o se Kerisiano, pe afai e malosi tele le tofotofoga.

I le tulaga o Iopu, na muaʻi faapea atu Satani, o le a mou atu le faamaoni o Iopu i le Atua pe afai e leiloloa ana mea e sili ona pele iā te ia. (Iopu 1:10, 11) Ina ua faamaonia le sesē o lenei tuuaʻiga, na toe faapea atu Satani: “O mea uma foi ua i ai i le tagata, e avatua e ia e sui aʻi lona ola.” (Iopu 2:4) Atonu na moni le tuuaʻiga a Satani i nisi, a o Iopu sa lē faagutugutulua o ia i lona faamaoni. Ua faamaonia lenā mea i faamaumauga o tala faasolopito. (Iopu 27:5; 42:10-17) Pe e faapena lou faamaoni? Po o le a faavaivaia e Satani lou faamaoni? Manatunatu e uiga iā te oe lava a o tatou iloiloina nisi o mea moni ia o loo aafia ai Kerisiano uma.

Na talitonu le aposetolo o Paulo e faapea, o le faamaoni o Kerisiano moni, e mafai ona matuā malosi. Na ia tusi mai e faapea: “Ua ou mautinoa, e le mafaia e le oti, po o le ola, . . . po o mea i nei ona po, po o mea atali, . . . po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.” (Roma 8:38, 39) E mafai ona iā i tatou se mautinoa faapena pe afai e malosi lo tatou alofa mo Ieova. O lenā alofa o se fusi e lē mafai ona faaleagaina, e oo lava i le oti e lē mafai ona manumalo ai.

Pe afai e iai sa tatou faiā faapena ma le Atua, o le a lē taitai lava ona tatou fesili faapea, ‘Faamata o le a faaauau pea ona ou auauna iā Ieova mo ni nai tausaga o muamua atu?’ O le lē mautonu faapena, o le a faaalia ai e faalagolago lo tatou  faamaoni i le Atua i se mea e ono tupu iā i tatou i le faagasologa o o tatou olaga. O le faamaoni aʻiaʻi e lē faatosinaina i ni uiga vaaia. E faalagolago i lo tatou tagata i totonu. (2 Korinito 4:16-18) Afai tatou te alolofa iā Ieova ma o tatou loto atoa, o le a tatou lē faia la se mea e lē fiafia ai o ia.—Mataio 22:37; 1 Korinito 13:8.

Ae peitaʻi, e tatau ona tatou manatua o loo saʻiliʻili pea Satani e faavaivaia lo tatou faamaoni. Atonu e na te ono tofotofoina i tatou ina ia lolo atu i tuʻinanauga o le tino, lolo atu i omiga mai aumea, pe e tatou te lafoaʻia ai foʻi le upu moni ona o nisi o mafatiaga. O le uō mamae lava a Satani i lenei osofaʻiga, o le lalolagi ua vavae ese mai le Atua, e ui lava ua faafaigofie lenei gaoioiga ona o o tatou lava lē lelei atoatoa. (Roma 7:19, 20; 1 Ioane 2:16) Ae peitaʻi, o loo iai ni avanoa lelei mo i tatou i lenei taua, o se tasi o ia avanoa sili, ona e tatou te lē o vālea i togafiti a Satani.—2 Korinito 2:11.

O ā togafiti a Satani? Ua faamatalaina e Paulo na togafiti i lana tusi i Kerisiano i Efeso e faapea, o “togafiti,” po o “faiga faaʻoleʻole.” * (Efeso 6:11; faamatalaga i lalo) Ua tuu e Satani mailei faaʻoleʻole i lo tatou ala ina ia faavaivaia ai lo tatou faamaoni. E faafetai ai ona ua tatou iloa nei togafiti faaʻoleʻole talu ai ua faamaumauina mo i tatou i le Afioga a le Atua auala faatogafiti a le Tiapolo. O taumafaiga a Satani e faavaivaia le faamaoni o Iesu ma Iopu, ua faaalia ai nisi o auala ua ia saʻili ai e faavaivaia lo tatou faamaoni faa-Kerisiano.

Sa Lē Mafai Ona Faavaivaia le Faamaoni o Iesu

I le amataga lava o le faiva a Iesu, sa faaalia e Satani le lē migao i le tofotofoina o le Alo o le Atua i lona luʻia o ia ina ia faaliu areto se maa. Pagā le faitogafiti! Sa leʻi taumafa Iesu mo le 40 aso, o lea, e lē taumatea lava lona matelāina i le fia taumafa. (Luka 4:2, 3) Sa fautuaina e Satani le vave loa ona faamalieina o le manaʻoga masani faaletagata o Iesu, i se auala na feteenaʻi ma le finagalo o Ieova. E faapena foʻi aso nei, ua faalaeiauina e gaoioiga a le lalolagi le faamalieina vave o o tatou faanaunauga e aunoa ma le mafaufau i iʻuga e oo i ai. Ua latou faapea mai, ‘E tatau lelei lava lenā mo oe i le taimi nei,’ po o le, ‘Fai loa lava!’

Pe ana faapea e faamalie e Iesu faalogona tigā o le fia taumafa e aunoa ma le muaʻi mafaufau i iʻuga, semanū e taulau Satani i le faia o Iesu ina ia faagutugutulua i lona faamaoni. Sa silasila Iesu i mataupu i le itu faaleagaga, ma na ia tali atu ma le mautinoa e faapea: “Ua tusia e lē na o meaʻai e ola ai le tagata.”—Luka 4:4; Mataio 4:4.

Ona sui foʻi lea o le auala na faalatalata atu ai Satani. I le faatatausesēina o le mau lea na sii atu e Iesu, na uunaʻia ai foʻi e le Tiapolo Iesu ina ia oso ifo mai le tumutumu o le malumalu. Na faapea atu Satani. ‘O le a faasao oe e se agelu.’ Sa leʻi faanaunau Iesu e talosagaina se puipuiga faavavega mai lona Tamā seʻi tau ina uaʻi atu ai manatu iā te ia. Na fetalai atu Iesu e faapea: “Aua e te tofotofo i le Alii [Ieova] lou Atua.”—Mataio 4:5-7; Luka 4:9-12.

O le mailei mulimuli lava na faaaogā e Satani sa tuusaʻo. Sa ia taumafai e fai se fuafuaga i le va  o ia ma Iesu i le ofoina atu iā te ia o malo uma o le lalolagi ma o latou matagofie, i le tau lava ina faapaʻū tasi mai o Iesu e ifo mai iā te ia. Na toetoe lava ofoina atu e Satani mea uma. Ae e faapefea ona ifo atu Iesu i le fili sili o lona Tamā? Sa leai lava se manatu faapena o Iesu! Na tali atu Iesu: “E tatau ona e ifo atu iā Ieova lou Atua, e na o ia foʻi e tatau ona e tuuina atu i ai le auaunaga paia.”—Mataio 4:8-11, NW; Luka 4:5-8.

Ina ua lē taulau na taumafaiga e tolu, ‘ona alu ese ai lea o Satani ia te ia seia oo i se aso.’ (Luka 4:13) Ua faaalia i lenei mea e faapea, sa mataʻitūina pea e Satani se avanoa e tofotofoina ai le faamaoni o Iesu. Na oo mai se taimi talafeagai ina ua mavae le lua ma le ʻafa tausaga mulimuli ane, ina ua amata ona sauniunia e Iesu ona soo mo lona maliu ua latalata. Na faapea atu le aposetolo o Peteru: “Le Alii e, ia mamao ia te oe lea mea; e le oo lena mea ia te oe.”—Mataio 16:21, 22.

Pe faamata sa fiafia Iesu i sea fautuaga lelei ae taufaasesē, lea na sau mai se tasi o ona soo? Sa vave lava ona silafia e Iesu e faapea, o na upu, na atagia mai ai manatu o Satani ae lē o Ieova. Na tali maumauaʻi atu Keriso: “Satani e, ina alu ia oe i oʻu tua, ua fai oe ma mea ou te tausuai ai; auā e le o mea a le Atua ua e loto i ai, a o mea a tagata.”—Mataio 16:23.

Ona o le alofa lē mavae o Iesu mo Ieova, na lē mafai ai e Satani ona faavaivaia lona faamaoni. E leai se mea na mafai ona ofoina atu e le Tiapolo, leai ni puapuaga ogaoga na mafai ona faavaivaia ai le faamaoni o Iesu i lona Tamā faalelagi. Po o le a tatou faia ni faaiʻuga maumauaʻi faapena pe a tulaʻi mai ni tulaga e faafaigatā ai ona tausisia lo tatou faamaoni? O le a fesoasoani le faaaʻoaʻoga a Iopu iā i tatou, e malamalama lelei ai i ni tulaga faigatā atonu e tatou te fesagaʻi.

Ia Faamaoni i le Feagai ai ma Puapuaga

E pei ona iloa e Iopu, e mafai ona oo mai puapuaga iā i tatou i so o se taimi. O ia o se tamāloa sa faaipoipo lelei ma sa iai sana fanau e toʻasefulu ma sa soifua foʻi i se olaga e atoatoa ona mamā faaleagaga. (Iopu 1:5) Ae sa leʻi iloa e Iopu, o lona faamaoni i le Atua na avea ma mataupu o fefinauaʻiga i le lagi, ma na taumafai ai Satani i so o se auala na ia mafaia ina ia faavaivaia ai lona faamaoni.

Sa vave lava ona leiloloa ʻoa faaletino a Iopu. (Iopu 1:14-17) Ae peitaʻi, sa tumau le faamaoni o Iopu i lalo o le tofotofoga auā sa leʻi faalagolago o ia i tupe. I le manatuaina o le taimi na mauoloa ai o ia, na faapea mai: “Afai ua ou fai auro ma mea ou te faalagolago i ai, . . . afai ua ou olioli ina ua tele loʻu oloa, . . . o le agasala lava lea. . . , aua o le tuua lea e aʻu o le Atua o i luga.”—Iopu 31:24, 25, 28.

I aso nei, e mafai foʻi ona leiloloa faafuaseʻi mea aogā uma ua tatou maua. O se tamāloa faipisinisi o ia o se Molimau a Ieova, na leiloa sana tupe telē lava ona o ni faiga taufaasesē, ma na toetoe lava a gau ai lana pisinisi. Na ia ioe mai ma le faamaoni e faapea: “Na toetoe lava a pē loʻu fatu. O le mea moni, semanū e pē moni lava loʻu fatu pe ana lē seanoa la ma faiā ma le Atua. Ae peitaʻi, o lenei mea na tupu na ou iloa lelei ai le mea moni, ou te lē o faamuamuaina mea faaleagaga i loʻu olaga. O le fiafia i le saʻilia o tupe na tauau ai ina punitia isi mea uma lava.” Talu mai lenā taimi, na faaitiitia ai e lenei Molimau ana gaoioiga faapisinisi i se tulaga tatau, ma ua auauna nei e lē aunoa o ia o se paeonia lagolago, ma tuuina atu le 50 itula pe e sili atu foʻi i masina taʻitasi i le faiva faa-Kerisiano. Ae peitaʻi, e iai foʻi isi faafitauli e sili atu ona faaleagaina ai na i lo o le leiloloa o meatotino a se tasi.

Sa faigatā ona talitonu Iopu i le tala e uiga i le leiloloa o ana ʻoa, ae oo mai loa foʻi ma le tala e faapea ua maliliu lana fanau e toʻasefulu. Sa ia tausisi atu pea e faapea: “Ia faamanuina [pea] le suafa o Ieova.” (Iopu 1:18-21) Po o le a tumau pea lo tatou faamaoni pe a maliliu faafuaseʻi nisi o lo tatou aiga? O Francisco, o se ovasia Kerisiano i Sepania, na maliliu lana fanau e toʻalua i se faalavelave faafuaseʻi na tupu i se pasi. Sa faamāfanafanaina o ia i lona fesootaʻi vavalalata atu iā Ieova ma faateleina ana gaoioiga i le faiva faa-Kerisiano.

E ui ina ua mavae le maliliu o lana fanau na faateʻia ai, ae sa leʻi mavae ai i inā puapuaga o  Iopu. Na taia o ia e Satani i se maʻi papala leaga. O le taimi lenā na fai atu ai e le avā a Iopu se fautuaga sesē. Na ia faapea atu iā te ia: “Ina faifai ia e oe o le Atua, ma e oti ai.” Sa leʻi amanaʻia e Iopu lana fautuaga, ma e leʻi “agasala Iopu i nei mea uma i ona laugutu.” (Iopu 2:9, 10) E leʻi faalagolago lona faamaoni i le lagolagosua a lona aiga, ae i lana faiā ma Ieova.

O Flora, o lē na tuulafoaʻia e lana tane ma lana tama matua le ala faa-Kerisiano i le sili atu ma le sefulu tausaga ua mavae, e malamalama o ia i faalogona atonu na oo iā Iopu. Ua faapea mai o ia: “O se mea e mafatia tele ai pe a faafuaseʻi ona lē toe lagolagosua mai faaleagaga lou aiga. Ae sa ou iloa e lē mafai ona ou maua le fiafia i fafo atu o le faalapotopotoga a Ieova. O lea, sa ou tūmausalī ai ma faamuamua Ieova i loʻu olaga, a o taumafai e faaauau pea ona avea aʻu o se avā ma se tinā lelei. Ou te tatalo pea iā Ieova, ma na ia foaʻi mai iā te aʻu le malosi. O aʻu o se tagata fiafia, auā e ui lava i le tetee maumauaʻi o laʻu tane, ae ua ou iloa e tatau ona ou faalagolago atoatoa atu iā Ieova.”

O le isi togafiti a Satani ina ia faavaivaia ai le faamaoni o Iopu, e aofia ai ana uō e toʻatolu. (Iopu 2:11-13) Pagā le tigā atonu na oo iā Iopu ina ua latou faitioina o ia. Ana faapea na talia e Iopu a latou finauga, semanū ua leai sona mautinoa e uiga iā Ieova le Atua. O a latou fautuaga lē faalaeiau, sa ono faavaivaia ai lona loto ma lona faamaoni, ma na semanū e taulau ai faufauga a Satani.

Na i lo o lea, na fai atu ma le maumauaʻi Iopu: “Seia oo lava i loʻu oti ou te le faateaina lava laʻu amio sao.” (Iopu 27:5) E leʻi fai atu o ia faapea, ‘Ou te lē tuuina atu iā te outou e aveesea loʻu faamaoni!’ Sa iloa e Iopu, o lona faamaoni, sa faalagolago iā te ia lava ma lona alofa mo Ieova.

Se Togafiti Faaʻoleʻole ua Leva e Puʻea ai Tagata Fou

O loo faaaogāina pea e Satani fautuaga sesē po o faaupuga lē mafaufau mai uō ma uso talitonu ina ia faavaivaia ai lo tatou mautinoa. O fautuaga e lē faalaeiau mai totonu o le faapotopotoga, e faigofie ai lava ona faavaivaia lo tatou mautinoa na i lo o sauāga mai fafo atu o le faapotopotoga. O se toeaina o le na vaai muamua i fetauaʻiga a vaegāʻau, sa ia faatusatusa lenā mea ma le tigā na oo iā te ia ona o upu lē mafaufau ma gaoioiga a uō ma uso talitonu. E faatatau i faaupuga a uso ma tuafafine, na ia faapea mai: “O se mea e sili ona faigatā lea ua oo iā te aʻu.”

O le isi itu, e faigofie lava ona tatou lē fiafia ona o uiga lē lelei atoatoa o uso talitonu, ma ua tatou lē toe talanoa atu ai i nisi tagata pe oo ai foʻi ina tatou misia sauniga faa-Kerisiano. O le faateʻaeseina o o tatou faalogona tigā e ono foliga mai ua avea ma mea e aupito sili ona tāua o le mataupu. Ae pagā se faanoanoa pe afai e iai sea vaaiga lē magafagafa ma oo ai ina faavaivaia le mea e aupito sili ona tāua lea ua tatou maua, o la tatou faiā ma Ieova, ona o mea ua faia po o tala a nisi tagata. Afai e tatou te faatagaina lenā mea e tupu, o le a faasesēina la i tatou i se tasi o mailei ua leva ona fafau a Satani.

E saʻo, e tatou te faatalitalia tapulaa maualuluga mai le faapotopotoga Kerisiano. Ae afai e tatou te faatalitalia nisi mea e sili atu mai o tatou uso talitonu, o ē e lē lelei atoatoa pea, o le mea moni lava, o le a tatou lagona le lē fiafia. I le faaeseesega, e lē faamoemoe Ieova i ni mea se tele e manaʻomia mai ana auauna. Afai e tatou te faataʻitaʻi i lana faaaʻoaʻoga, o le a tatou nofo sauni la e onosaia o latou lē lelei atoatoa. (Efeso 4:2, 32) Na fautua mai le aposetolo o Paulo: “A outou ita, aua le agasala ai; aua neʻi goto le la o ita pea outou. Aua foi neʻi tuuina atu e outou se mea e mautu ai le tiapolo.”—Efeso 4:26, 27.

E pei ona faaalia manino i le Tusi Paia, o loo faaaogāina e Satani le anoanoaʻi o mailei faaʻoleʻole eseese, ina ia iloa ai le auala e na te faavaivaia ai le faamaoni o se Kerisiano pe afai na te mafaia. O nisi o ana togafiti e fiafia i ai le tino agasala, a o isi e tigā ai. Mai lava i le amataga o le mataupu, e mafai ai ona e iloa le auala e lē mafai ai ona puʻea faamanu i ofaga oe. O le mausalī o le alofa i le Atua i lou loto, e te faia ai se faaiʻuga ina ia faamaonia atu le pepelo o le Tiapolo, ma faafiafia ai le finagalo o Ieova. (Faataoto 27:11; Ioane 8:44) Ia manatua, o le faamaoni o le Kerisiano moni e lē tatau lava ona faaluafesasi, e tusa lava po o ā mafatiaga e oo mai iā i tatou.

[Faamatalaga pito i lalo]