Se Lalolagi ma ni Vaaiga Sesē i le Faamaoni

I SE afiafi māfanafana o se Aso Faraile i Tel Aviv i Isaraelu, na faatasi atu ai se alii talavou i se vaega o talavou o loo faatalitali i fafo o se fale kalapu. E leʻi umi lava ae pasae faafuaseʻi aʻe se mea ma faatamaʻia ai le tumutumu o tagata.

O se tasi tagata na lotomalie e oti i se pomu na faapāina ma faaumatia ai ma ola o isi talavou e toʻa 19. Na faamatala mai e se alii tusitala e faapea: “Na paepae solo vaega o tino o tagata, o i latou uma lava o ni talavou e ese le laiti, ma na avea o se vaaiga e pito sili ona mataʻutia faatoʻā ou vaai lea i ai.”

Na tusi mai Thurstan Brewin i le Lancet e faapea: “O se uiga e viiviia e tagata uma, e pei o le faamaoni . . . , ua mafai ona faatupuina ai taua ma atili faigatā ai ona faaiʻuina.” Ioe, mai Taua Paia a lotu ua faapea mai o lotu Kerisiano e oo atu i fasiotiga tagata na faamaopoopoina e le ʻau Nasi o Siamani, ua pisipisia ai le talafaasolopito o le fanau a tagata i le toto masaa o i latou na maliliu ona o le faaalia o le faamaoni.

Faateleina i Latou e Aafia Fua Ona o le Lē Faamaoni

E lē mafaafitia le tulaga e faapea o le faamaoni valea e mafai ona faaleagaina ai, ae o le augapiu foʻi ma se faamaoni e mafai ona faamalepeina ai se sosaiete. Ina ia faamaoni, o lona uiga ia faamaoni i se tagata pe ona o se māfuaaga, ma e aofia ai le maumauaʻi o le tagata lava ia e tuutoina atu, a o feagai ai ma so o se tofotofoga ina ia lafoaʻia pe faalataina. A o faapea mai le toʻatele o tagata latou te viiviia lenei ituaiga o faamaoni, ua mafatia tagata i le matuā augapiu ma se faamaoni i le liʻo o le aiga. Ua oso maualuga le aofaʻi o talaga faaipoipoga, ua atili ona o le faamamafa o le faamalieina o manaʻoga o le tagata lava ia, o mafatiaga ma popolega o le olaga i aso taʻitasi, ma aafiaga o le taatele o le lē faamaoni i feusuaiga faaleituaiga. Ma e pei o i latou na feoti i le pomu na pā i Tel Aviv, ua masani ona faapena ona aafia fua talavou ae lē sala.

Ua faapea mai se tasi o lipoti: O le tulaga tau aʻoaʻoga o se tamaitiiti e masani ona lē taulau, e māfua mai ona o le lē mautū o aiga ona ua tatalaina se faaipoipoga, teteʻaga, ma le toʻatasi o se matua.” O fanau tama i aiga e na o le tinā e iai, e foliga mai e sili ona aafia i le lē lelei o aʻoaʻoga, pule i le ola ma le faia o solitulafono e aafia ai tamaiti laiti. I tausaga taʻitasi, e oo i le miliona tamaiti e aafia ona o le tatalaina o faaipoipoga a o latou matua, ma i so o se tausaga e faailoa mai, o le ʻafa o tamaiti uma e fananau mai i mātua faaipoipo i lenā atunuu, o le a faatalitalia le oo aʻe i le taimi ua taʻi 18 ai tausaga le matutua, ua tatala faaipoipoga a o latou mātua. Ua faaalia i fuainumera faamaumauina le avea o lenei lava vaaiga ma tulaga e tasi o loo lotomafatia ai foʻi le toʻatele o talavou i isi vaega o le lalolagi.

 Po o le Faamaoni o se Tapulaa Maualuga e Faigatā Ona Ausia?

O le lē taulau o loo iai nei o le faaalia o le faamaoni, ua sili atu ai ona talafeagai upu a le Tupu o Tavita i le taimi lenei na i lo o se isi lava taimi: “Ieova e, ia e faaola mai; auā ua uma tagata amio Atua; auā ua mavae e ua faamaoni nai le fanau a tagata.” (Salamo 12:1) Aiseā ua taatele ai le aunoa ma se faamaoni? Ua tusi Roger Rosenblatt i le mekasini o le Time e faapea: “E ui ina avea le faamaoni ma tapulaa e matuā lelei, ae faigatā ona tausisia ona o loo iai le tele o le mataʻu, le lē mautinoa o le tagata iā te ia lava, ma le manatu faapito faapea e tatou te faatalitalia le iai o o tatou vaivaiga faaletagata lea e lē mafai ai ona faamaoni.” I le faamatalaina o le taimi o loo tatou ola ai, ua faapea mai ai ma le tonu le Tusi Paia: “E avea tagata ma e alolofa i latou ia i latou, . . . [o ē e lē faamaoni,” NW], o e le lotoaiga.”—2 Timoteo 3:1-5.

I le iloiloina o le taaʻiga malosi a le faamaoni po o le aunoa foʻi ma se faamaoni i manatu ma gaoioiga a se tagata, tatou te ono fesili ai, ‘O ai e tatau iai lo tatou faamaoni?’ Mātau po o le ā o fai mai ai le mataupu o loo sosoo ai e uiga i lenei fesili.

[Faamatalaga i Ata i le itulau 3]

Ata i luga: © AFP/CORBIS