E Faapefea Ona Tatou Vaai i Tofotofoga?

TOFOTOFOGA! Puapuaga! E fesagaʻi e tagata uma lava na tulaga. Atonu e māfua mai ona o le eseese o uiga, tulaga faigatā tau tamaoaiga, le lē lelei o le soifua mālōlōina, tofotofoga, omiga mai aumea ina ia fai le mea sesē, sauāga, o luʻi i lo tatou tulaga solitū pe e faasaga i le ifo i tupua, ma le tele lava o isi mea. Po o ā lava ituaiga o puapuaga e oo mai, e masani lava ona faapogaia ai le tele o popolega. E mafai faapefea ona tatou faafesagaʻia ma le manuia na tofotofoga? Pe e iai se auala e mafai ona tatou maua mai ai ni aogā?

Le Lagolagosua Aupito Sili

Sa soifua le Tupu o Tavita o aso anamua i se olaga sa tumu i puapuaga, ae peitaʻi, na maliu o ia a o faamaoni pea. Na mafai faapefea ona ia tumau? Sa ia faasino atu i le pogai o lona malosi i le faapea mai: “O Ieova, o loʻu leoleo mamoe o ia; e leai se mea ou te mativa ai.” Ona ia toe faapea mai lea: “E ui lava ina ou savali i le vanu o le ata o le oti, ou te le fefe lava i se mea leaga; auā o oe ta te faatasi ma aʻu; o lau laau ma lou tootoo e faamafanafanaina ai aʻu.” (Salamo 23:1, 4) Ioe, o Ieova o le puna e leai se mea e gata mai ai lana lagolagosua. Sa ia leoleoina Tavita i ni taimi na sili ona mafatia ai, ma o loo nofo sauni o ia e faia lea lava mea mo i tatou i aso nei pe afai e tatau ai.

E mafai faapefea ona tatou maua le lagolagosua a Ieova? Ua faasino mai e le Tusi Paia le auala i le faapea mai: “Ina tofotofo ia outou, ma ia outou iloa e lelei Ieova.” (Salamo 34:8) O se valaaulia alofa lenā, ae o le ā lona uiga? O se faalaeiauga le auauna iā Ieova ma ia ōgatasi atoatoa o tatou olaga ma lona finagalo. O se auala faapena, o lona uiga o le tuu o mea o loo tatou mananaʻo i ai e fai, ae faia ni faataulagaina. I nisi o tulaga, e mafai foʻi ona oo ai i ni tofotofoga, sauāga ma mafatiaga. Ae peitaʻi, o i latou e talia ma le loto atoa le valaaulia a Ieova, e lē tatau lava ona faanoanoa ona o le faia o lenei mea. O le a agalelei Ieova iā i latou. O le a ia taʻitaʻia ma tausia i latou i le itu faaleagaga. O le a ia lagolagoina i latou i le taimi o tofotofoga e ala i lana Afioga, lona agaga paia, ma le faapotopotoga Kerisiano. Ma i le iʻuga, o le a ia tauia i latou i le ola e faavavau.—Salamo 23:6; 25:9; Isaia 30:21; Roma 15:5.

O i latou ua filifili e faia suiga i o latou olaga ina ia auauna iā Ieova ma pipiimau i lenā faaiʻuga, ua latou iloa ua faataunuuina e Ieova ana folafolaga uma. O le mea lenā na oo i  tagata Isaraelu o ē na mulimuli iā Iosua i le Nuu Folafolaina. I le taimi na latou sopoʻia ai le Ioritana, sa iai tofotofoga na manaʻomia ona latou onosaia, o taua na tauina, ma ni lesona faigatā sa manaʻomia ona aʻoaʻoina. Ae sa sili atu ona faamaoni o lenā tupulaga nai lo o latou tamā, o ē na ō mai nai Aikupito ma oti ai i le vao. I lea sa lagolagoina e Ieova ē na faamaoni, ma e tusa ai ma lo latou tulaga ina ua iʻu le soifua o Iosua, ua faapea mai faamaumauga a le Tusi Paia: “Ona avatua lea e Ieova o le mapusaga ia te i latou i itu uma, e pei o mea uma na ia tauto ai i o latou tamā . . . E lei iuvale se upu i upu lelei uma na fetalai mai ai Ieova i le aiga o Isaraelu; ua taunuu uma lava.” (Iosua 21:44, 45) E mafai foʻi ona oo lenā mea iā i tatou pe afai e tatou te faalagolago atoatoa atu iā Ieova pe a oo mai tofotofoga ma i taimi uma lava.

O le ā se mea e ono faavaivaia ai lo tatou mautinoa iā Ieova? Na taʻua e Iesu se tasi o mea i lona faapea mai: “E leai se na te mafaia ona auauna i alii e toalua . . . Tou te le mafaia ona auauna i le Atua atoa ma le oa.” (Mataio 6:24, LF) Afai e tatou te faatuatua iā Ieova, o le a tatou lē saʻili atu i meafaitino ia o loo saʻili atu i ai le toʻatele o le lalolagi. Na fautuaina e Iesu ona soo: “A ia outou muai saili lona malo ma lana amiotonu; ona faaopoopoina atu lea o ia mea uma [faaletino e manaʻomia] ia te outou.” (Mataio 6:33) O se Kerisiano e iai pea se vaaiga paleni i meafaitino ma faamuamua le Malo o le Atua i lona olaga, ua ia faia le filifiliga saʻo. (Failauga 7:12) O le mea moni, e mafai ona leiloloa ai nisi o ana mea. E na te ono faataulagaina ai ni meafaitino. Ae peitaʻi, e tele ni taui o le a ia maua mai ai. Ma o le a lagolagoina o ia e Ieova.—Isaia 48:17, 18.

Mea ua Tatou Aʻoaʻoina Mai Puapuaga

O le filifili e “tofotofo ma iloa e lelei Ieova” o le mea moni, e lē puipuia ai se tasi mai mea e faafuaseʻi ona tutupu i le olaga; e lē malu atoatoa ai foʻi i tatou mai osofaʻiga a Satani ma tagata o loo ʻau ma ia. (Failauga 9:11) O le iʻuga, e ono tofotofoina ai foʻi le faamaoni ma le filifiliga maumauaʻi a se Kerisiano. Aiseā ua tuua ai e Ieova ona tagata tapuaʻi e aafia i na tofotofoga? Na taʻua e le aposetolo o Peteru se tasi o māfuaaga i lona tusi mai e faapea: “E ui lava ona faanoanoa o outou i nai aso nei, i tofotofoga eseese. O le tofotofo foi o lo outou faatuatua, e silisili ona aoga i le auro e faaumatia, e ui lava ina tofotofoina i le afi, e avea ma mea e iu ai i le viiga, ma le mamalu, ma le manuia pe a faaalia mai Iesu Keriso.” (1 Peteru 1:6, 7) Ioe, o tofotofoga ua mafai ona faaalia ai le uiga o lo tatou faatuatua ma lo tatou alofa mo Ieova. Ma ua fesoasoani tofotofoga e aumaia ai se tali i le taufaifai ma tuuaʻiga a Satani le Tiapolo.—Faataoto 27:11; Faaaliga 12:10.

Ua fesoasoani foʻi tofotofoga iā i tatou e atiina aʻe ai isi uiga faa-Kerisiano. E pei o se faaaʻoaʻoga, seʻi manatunatu i upu a le faisalamo e faapea: “Auā o loo maualuga Ieova, a e silasila mai o ia i le ua faamaulalo; a o le ua faamaualuga, e silafia mamao mai e ia.” (Salamo 138:6) O le toʻatele o i tatou e lē o se uiga masani le lotomaulalo, ae o puapuaga ua fesoasoani iā i tatou e atiina aʻe ai lenā uiga manaʻomia. E manatua ai le mea na tupu i tuā i aso o Mose ina ua fiu nisi tagata Isaraelu e ʻai le manai i lea vaiaso ma lea vaiaso, i lea masina ma lea masina. E mautinoa lava, sa avea lenā mea o se puapuaga iā i latou, e ui lava o manai sa saunia faavavega. O le ā le fuafuaga o le tofotofoga? Na taʻu atu e Mose iā i latou e faapea: “Na ia [Ieova] fafaga ia te oe i le manai i le vao . . . ina ia na faatigaina oe, ina ia na tofotofo foi ia te oe.”—Teuteronome 8:16.

E ono mafai foʻi ona tofotofoina faapena lo tatou lotomaulalo. E faapefea? Mo se faaaʻoaʻoga, o ā o tatou uiga faaalia i fesuiaʻiga e faia i  le faalapotopotoga? (Isaia 60:17) Pe e tatou te lagolagosua ma le loto atoa i le galuega talaʻi ma le aʻoaʻo atu? (Mataio 24:14; 28:19, 20) Pe e tatou te naunau e talisapaia faamalamalamaga o upu moni o le Tusi Paia e pei ona saunia e “le auauna faamaoni ma le mafaufau”? (Mataio 24:45-47; Faataoto 4:18) Pe e tatou te teena omiga ia e uunaʻia ai i tatou e fia maua ni meaaogā fou, āʻega fou o teuga ma lavalava, po o se taavale e aupito fou lona fausaga? E mafai e se tagata lotomaulalo ona tali atu ma le mautinoa i na fesili.—1 Peteru 1:14-16; 2 Peteru 3:11.

E fesoasoani foʻi tofotofoga e atiina aʻe ai iā i tatou se isi uiga tāua—o le onosai. Na faapea mai le soo o Iakopo: “Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.” (Iakopo 1:2, 3) O le tumau ma le onosai i tofotofoga eseese, ma le faalagolago atoatoa atu iā Ieova e tupu ai le tutumau, le maumauaʻi, ma le faamaoni. E faamalosia ai i tatou ina ia tetee atu i ni osofaʻiga o loo foufou mai a Satani, le atua o lenei lalolagi o loo ita tele.—1 Peteru 5:8-10; 1 Ioane 5:19; Faaaliga 12:12.

Ia Saʻo Pea le Vaai e Uiga i Tofotofoga

Na fesagaʻi le Alo lelei atoatoa o le Atua, o Iesu Keriso ma le tele o tofotofoga a o iai i le lalolagi, ma na ia maua ai le tele o aogā ona o le onosaia o na tofotofoga. Na tusi Paulo e uiga iā Iesu e faapea, “o mea sa tiga ai o ia na aʻoaʻoina ai o ia ia usiusitai.” (Eperu 5:8) O lona faamaoni e oo i le oti, na viia ai le suafa o Ieova, ma mafai ai e Iesu ona ofoina atu le tāua o lona soifua lelei atoatoa faaletagata e fai ma togiola mo le fanau a tagata. O lenā mea na mafai ai e i latou o ē faaalia le faatuatua iā Iesu ona maua le faamoemoe o le ola e faavavau. (Ioane 3:16) Talu ai sa tumau le faamaoni o Iesu i tofotofoga, ua avea ai nei o ia ma o tatou Ositaulaga Sili ma Tupu ua faauuina.—Eperu 7:26-28; 12:2.

Ae faapefea i tatou? O lo tatou faamaoni i le feagai ai ma tofotofoga, o le a faapena foʻi ona maua ai faamanuiaga sili. Iā i latou e iai le faamoemoe faalelagi, ua faapea mai le Tusi Paia: “Amuia le tagata o lē onosai i le faaosoosoga; aua a uma ona tofotofoina e maua e ia le pale o le ola, ua folafolaina mai e le Alii [o Ieova] i e alolofa atu [pea] ia te ia.” (Iakopo 1:12) Ua uma ona faamautinoa atu iā i latou o ē e iai le faamoemoe faalelalolagi e faapea, afai e tumau lo latou faamaoni, o le a latou maua le ola e faavavau i se lalolagi parataiso. (Faaaliga 21:3-6) Ma o le mea e sili ona tāua, o lo latou tumau faamaoni e viia ai le suafa o Ieova.

A o tatou mulimuli i tulaga aao o Iesu, e mafai ona tatou mautinoa e faapea, e mafai lava ona tatou manumalo i tofotofoga uma tatou te fetaiaʻi i lenei faiga o mea. (1 Korinito 10:13; 1 Peteru 2:21) E faapefea? E ala i lo tatou faalagolago iā Ieova, o lē na te foaʻiina mai “le matua tele o le mana” iā i latou o ē faalagolago atu iā te ia. (2 Korinito 4:7) Tau ina ia pei lo tatou mautinoa o Iopu, o lē na onosaia tofotofoga matuitui, ua ia taʻutino mai ma le mautinoa e faapea: “[Pe a uma ona ia] tofotofoina aʻu, ou te sao atu ai e pei o le auro.”—Iopu 23:10.

[Ata i le itulau 31]

O le tofotofoina o le faamaoni o Iesu, na viia ai le suafa o Ieova. O lea, e mafai foʻi ona tatou faia faapea