O le ā ua Tupu i Tuaoi?

“Ua leiloa e tagata i aso nei le tulaga o le avea ma tuaoi.”—Benjamin Disraeli, o se faipolotiki Egelani o le senituri lona 19.

E IAI se auala e lē masani ai a tagata matutua o Cuba mo le faaauilumaina o le tulaga sologa lelei: o ni mafutaga faaletuaoi a ni tagata o se vaipanoa, po o le círculos de abuelos (mafutaga a tagata matutua) e pei ona faaigoa ai i latou. E tusa ai o le lipoti o le 1997, pe ā ma le 20 pasene o tagata matutua o Cuba e iai i na mafutaga, lea latou te maua ai ni faauōga, le lagolagosua ma se fesoasoani aogā e tausia ai se olaga soifua mālōlōina lelei. Ua faapea mai le mekasini o le World-Health: “Po o le ā lava le taimi e manaʻomia ai e ni fomaʻi a ni aiga o lenā vaipanoa se fesoasoani i le faia o tui puipui, e lotomalilie ia mafutaga a tagata matutua e lagolagosua.”

E ui i lea, e faanoanoa ona ua lē o toe maua i vaipanoa i le tele o vaega o le lalolagi ni mafutaga e faaalia ai le fia fesoasoani. Mo se faaaʻoaʻoga, seʻi iloilo foʻi le mea mataʻutia na tupu iā Wolfgang Dirks, o lē na nofo i se fale mautotogi i Europa i sisifo. I ni tausaga ua mavae, na lipotia mai e le Canberra Times e faapea, e ui lava ina mātauina le lē toe vaaia o Wolfgang e aiga e 17 ia na latou mautotogi i le fale e tasi, ae “sa leʻi mafaufau lava se tasi e alu atu e faatatagi le logo o lana faitotoʻa.” Mulimuli ane ina ua asiasi ane lē e ana le falemautotogi, “na ia mauaina ai le auivi o loo saofaʻi i luma o le televise.” Sa fofola i luga o vae o le auivi le faasologa o polokalame o le televise o Tesema 5, 1993. Ua lima ai na o tausaga talu ona maliu Wolfgang. Pagā se molimau faanoanoa o le leai o se naunau faaalia ma se manatu mamafa i tuaoi! E lētioa ona taʻua e se tusitala o le mekasini o le New York Times e faapea o ona tuaoi, e pei lava o le toʻatele o isi, na avea ma “vaipanoa o tagata ese.” Po o le tulaga ea foʻi lenā i ou tuaoi?

E moni i nisi o nuu i tua o loo olioli pea e faaalia se uiga faaleuō moni i o latou tuaoi, ma i nisi o vaipanoa i le taulaga o loo taumafai e faaalia le manatu mamafa i o latou tuaoi. Ae ui i lea, e toʻatele tagata e nonofo i le taulaga e latou te lagona le lē vavalalata atu ma le lamatia i o latou lava tuaoi. Ua latou faaesea i latou i le mumusu e faamasani atu i o latou tuaoi. E faapefea?

Taofia Mai le Faamasani Atu

O le mea moni, o le toʻatele o i tatou e iai tuaoi e nonofo felataʻi. O le ola a le televise, o le minoi o ataata e iloa atu i faamalama, o  molī e faaola ma toe tapē, o le ūū a taavale e ō mai ma ō, o le paʻō o le savali i le poletito o le fale, o le tatagi o ki e tatala ma toe loka ai faitotoʻa, o faailoga uma ia e iloa ai o loo “feola” pea tuaoi. Peitaʻi, e mou ese atu so o se uiga o le avea ma tuaoi pe afai e taofiofia e i latou o loo nonofo felataʻi ma isi le fefaamasaniaʻi po o le lē amanaʻia e le tasi o le isi, ona o se olaga saosaoa o loo ola ai lea e faananati ai i mea uma. Atonu e manatu tagata e lē manaʻomia ona faalavelave fua i tuaoi po o le manatu e tatau ona latou faaalia le agalelei mo i latou i so o se auala. Ua taʻutino mai e le nusipepa a Ausetalia o le Herald Sun e faapea: “Ua tele ina lē mananaʻo tagata taʻitoʻatasi e faamasani atu i ē latou te nonofo felataʻi, ma lē matuā saisaitia ai i ni galuega e faia mo isi. Ua sili atu ai ona faigofie ona lē amanaʻiaina pe lē faaaofiaina tagata e lē fiafia i ni mea e fai faatasi ma isi.”

E lē o se mea e faateʻia ai lenei tulaga. I se lalolagi o loo iai tagata e “alolofa i latou ia i latou,” ua seleseleina ai e i latou o loo nonofo latalata i isi ia āuga o le ituaiga o olaga manatu faapito o loo ola ai le toʻatele. (2 Timoteo 3:2) Ua iʻu ai ina salalau atu le tuua toʻatasi ma le faaesea o le tagata lava ia. O le faaesea lea ua fofoaina mai ai le lē talitonuina, aemaise lava pe a faamataʻuina pea i faiga sauā ma solitulafono. O le iʻuga, e vave lava ae aveesea ai uiga alofa faaletagata.

Ae po o le ā lava le tulaga o iai i ou tuaoi, e mautinoa o le a e ioe e faapea o tuaoi lelei o ni tagata aogā ia i se vaipanoa. E tele ni mea e faataulauina pe afai e tau fai galulue uma tagata i se sini masani. O tuaoi lelei e mafai foʻi ona avea ma faamanuiaga. O le a faaali mai e le mataupu o loo sosoo ai le auala e faia ai faapea.