Fesili Mai le ʻAufaitau

• Po o Lusifelo o se igoa na faaaogā e le Tusi Paia mo Satani?

E faatasi ona aliali mai le igoa o Lusifelo i le Tusi Paia ma ua na o nisi o faaliliuga o le Tusi Paia o loo iai. Mo se faaaʻoaʻoga, ua faaupuina e le King James Version le Isaia 14:12 e faapea: “Pagā lou paʻū mai le lagi, Lusifelo e, le atalii o le taeao.”

O le upu Eperu ua faaliliuina o “Lusifelo” o lona uiga “o lē pupula.” O loo faaaogāina e le Septuagint le upu Eleni o lona uiga o “lē aumaia le malama o le vaveao.” O le māfuaaga lea, ua faaliliuina ai i nisi faaliliuga le uluaʻi upu Eperu o le “fetu o le taeao” po o le “Fetuao.” Ae o loo faaaogāina e le Vulgate faa-Latina a Ierome “Lusifelo” (o lē e faasusuluina le malamalama), ma ua faamatalaina ai le māfuaaga ua faaaogāina ai lenei upu i faaliliuga eseese o le Tusi Paia.

O ai Lusifelo? O le faaupuga “o lē pupula,” po o “Lusifelo,” o loo maua i le faatonuga faavaloaga a Isaia i tagata Isaraelu ina ia faalauiloa o se “faataoto i le tupu o Papelonia.” O lea, o se vaega o le faamatalaga na faasino tuusaʻo atu i tupu na soloaʻi ane i Papelonia. O le faamatalaga o “lē pupula,” e iloa atili na faasino atu i se tagata ae lē o se meafaiola agaga i le fuaitau lea: “A ua aveina ifo oe i seoli i itu o le lua.” O Seoli o le tuugamau masani mo le fanau a tagata, ae e lē o se nofoaga na iai Satani le Tiapolo. E lē gata i lenā, o i latou na vaaia le oo atu o Lusifelo i lenā tulaga e fesili e faapea: “O le tagata ea lenei sa faagateteina le lalolagi?” Ua manino mai la, o loo faasino atu Lusifelo i se tagata, ae e lē o se meafaiola agaga.—Isaia 14:4, 15, 16.

Aiseā ua avatu ai lenā faamatalaga mamalu i le soloaʻiga a tupu o Papelonia? E tatau ona tatou iloa e faapea na faatoʻā taʻua tupu na soloaʻi o Papelonia o “lē pupula” ina ua mavae lona paʻū ma i se auala faalumaina. (Isaia 14:3) O le faamaualuga manatu faapito na uunaʻia ai tupu o Papelonia e faamaualuga aʻe i latou na i lo isi na siʻomia ai i latou. O le tele o le faasausili o tupu na soloaʻi ane sa faaalia lea i se uiga faualuga: “Ou te alu ae i le lagi, ou te siitia i luga loʻu nofoālii ia sili i fetu a le Atua, ou te nofo foi i le mauga o le faapotopotoga i le itu i matu; . . . ma te tutusa ma lē Silisili ese.—Isaia 14:13, 14.

O “fetu a le Atua” o tupu ia o le gafa tautupu o Tavita. (Numera 24:17) Iā Tavita ma faasolo mai ai, na pule ai nei “fetu” mai le Mauga o Siona. Ina ua māeʻa ona fausia le malumalu i Ierusalema, na faatatau atu ai le igoa o Siona i le aai atoa. I le feagaiga o le Tulafono, na tatau ai i tane Isaraelu uma ona faimalaga atu e faatolu i le tausaga i Siona. O lea, na oo ai ina avea ma “mauga o le faapotopotoga.” I le filifili e faatoʻilaloina tupu o Iutaia ma aveesea i latou mai lenā mauga, na folafola mai ai e Nepukanesa lona faanaunauga e faamaualuga aʻe o ia na i lo o na “fetu.” Na i lo le viia o Ieova mo le manumalo iā i latou, na ia tuuina o ia ma le faasausili i le tulaga o Ieova. O lea ina ua mavae lona matuā toʻilalopopo, na faasino atu ai ma le faifai i tupu o Papelonia e pei o “lē pupula.”

O le mea moni, o le faamaualuga o taʻitaʻi Papelonia na faaataina mai ai le uiga o “le atua o le lalolagi nei”—Satani le Tiapolo. (2 Korinito 4:4) E tuʻinanau foʻi o ia i le pule ma faananau ina ia sili atu lona tulaga i lo Ieova le Atua. Peitaʻi, o Lusifelo e lē o se igoa faale-Tusi Paia na tuuina atu iā Satani.

• Aiseā ua faasino atu ai le 1 Nofoaiga a Tupu 2:13-15 iā Tavita o le atalii lona fitu o Iese, ae o le 1 Samuelu 16:10, 11 o loo faaalia ai o ia e lona valu?

Ina ua mavae le liliu ese o le tupu o Saulo mai le tapuaʻiga moni, na auina atu ai e Ieova le Atua le perofeta o Samuelu e faauuina se tasi o atalii o Iese e avea ma tupu. O faamaumauga faagaeeina o lenei mea na tupu i le talafaasolopito, lea na tusia e Samuelu lava ia i le senituri lona 11 T.L.M., o loo taʻua ai o Tavita o le atalii lona valu o Iese. (1 Samuelu 16:10-13) Peitaʻi, o faamatalaga na tusia e Esera le faitaulaga i le pe ā ma le 600 tausaga mulimuli ane ai o loo faapea mai: “Na fanaua foi e Iese lana ulumatua o Eliapo, o Apinatapa o lona toalua lea, o Sama o lona toatolu lea, o Natanielu o lona toafa, o Ratai o lona toalima, o Osema o lona toaono, o Tavita o lona toafitu.” (1 Nofoaiga a Tupu 2:13-15) O le ā le mea na tupu i se tasi o uso o Tavita, ae aiseā na lē taʻua ai e Esera lona igoa?

Ua faapea mai le Tusi Paia e ‘toavalu atalii’ o Iese. (1 Samuelu 17:12) E foliga mai o se tasi o ona atalii sa maliu a o leʻi faaipoipo ma fai sana fanau. O le leai o ni ē tupuga mai ai, na leai ai foʻi sona tofi o le ituaiga pe taʻua i faamaumauga o le gafa o Iese.

O lea la, seʻi o tatou mafaufau i aso o Esera. Seʻi iloilo nofoaga na ia tusia ai Nofoaiga. Na faaiʻuina le tafeaga i Papelonia i le pe ā ma le 77 tausaga na muamua atu, ma na toe nofoia ai e tagata Iutaia lo latou laueleele. Na faatagaina e le tupu o Peresia Esera e tofia ni faamasino ma ni aʻoaʻo o le tulafono a le Atua ma faamatagofie le maota o Ieova. Na manaʻomia se faasologa saʻo o nofoaiga a tupu ina ia faamautinoa ai tofi o le ituaiga ma faamaonia ai sa na o tagata na filifilia e auauna ai i le faiva faaositaulaga. O lea na sauniunia ai e Esera se tala atoa o le talafaasolopito o le nuu, e aofia ai ma se faamaumauga manino ma le maufaatuatuaina o gafa o Iuta ma Tavita. Sa lē aogā ona taʻua le igoa o le atalii o Iese lea na maliu ae leʻi iai sana fanau. O lea, na lē taʻua ai e Esera lona igoa.