Le Naunau o Tagata i “Sagato” i Aso Nei

“Po o manatua le taimi na foliga mai ai ua tatou fiu e faalogo e faatatau i ni tagata taʻutaʻua? Na aliali mai sa lē o le tulaga lenā na oo i le 4.2 miliona o tagata Amerika na maimoaina le falelauasiga o le Faatinā o Teresa iā Setema 13. Talu mai lona maliu iā Setema 5, na talosagaina ai ma le malosi e tagata le Vatikana ina ia filifili aloaʻia o ia e avea ma sagata. E toʻaitiiti ni tagata na masalomia le lē taulau ona faataunuuina o lenā mea.”—Sun-sentinel, IUNAITE SETETE, OKETOPA 3, 1997.

O GALUEGA alofa ma le fesoasoani i tagata a le misionare Katoliko, le Faatinā o Teresa, sa manatu i ai le toʻatele o le uiga lenā o le avea moni ma sagato. E iai foʻi tagata taʻutaʻua o isi lotu. Peitaʻi, atonu e leai se tasi ua taliaina aloaʻia e pei o i latou ua faapaiaina e avea ma sagato e le Lotu Katoliko Roma.

Na faapaiaina e Pope Ioane Paulo II le sili atu ma le 450 tagata a o faagasolo lana pulega faapope. E sili atu foʻi i le aofaʻi o i latou na faapaiaina e fai ma sagato e isi pope uma, pe a tuufaatasi o le lona 20 senituri. * Aiseā ua faaauau ai pea ona tuutoina atu i “sagato,” le toʻatele o i latou e lē silafiaina e le toʻatele o tagata lotu Katoliko?

Na faamatala mai e Lawrence Cunningham o se tagata e aʻoaʻoina mataupu faalotu o le Iunivesite i Notre Dame e faapea: “E naunau tagata i le manatu o lo o iai ni ē mamalu i le lalolagi. O le iloaina o loo iai nisi e avea ma sagato e faaalia ai le mafai e se tasi ona ono faia ni galuega taʻutaʻua tetele, e oo lava i aso nei.” E lē gata i lenā, e iai le taofi e faapea o “sagato” e fesootaʻi faapitoa ma le Atua, e avea i latou ma fautua aogā mo ē o loo soifua. Pe afai e maua se meatotino po o se vaega o le tino o se “sagato,” e faatāuaina nei mea i le talitonuga e mafai ona ala mai ai le mana.

Na faapea mai se iʻugāfono na lomiaina e le Catechism of the Council i Trent na faia i le senituri lona 16 e faamautūina ai talitonuga o le Katoliko: “Ua talafeagai ona matou filifili e faapea o le faaaloalogia o sagato po ‘o ē ua maliliu o i le Alii,’ o le ole atu lea i ai mo la latou fautua, ma le faatāuaina o a latou meatotino paia ma o latou efuefu, ma na i lo le faaitiitia ai o le viiga mo le Atua, ua matuā faateleina, e faatupu ma faamalosia ai le faamoemoe o se Kerisiano, ma e naunau ai o ia e faaaʻoaʻo i o latou uiga lelei.” (The Catechism of the Council of Trent, 1905) E mautinoa le mananaʻo o Kerisiano moni e ola i ni olaga e lelei, e faalatalata atu i le Atua i se auala talafeagai, ma maua le fesoasoani tauatua. (Iakopo 4:7, 8) O lea la, e tusa ai o le Afioga a le Atua, o ai e agavaa e avea ma sagato moni? Ma o le ā le matafaioi e latou te faia?

[Faamatalaga pito i lalo]