“Na te Taʻitaʻi ia te Aʻu i Tafatafa o Vai e Tafe Lemu”

I LE vevela o le tau i nuu o le Tusi Paia, e manaʻomia ai ona faafeinu mamoe i aso uma. O lea la, o le vaega tāua o le galuega a se leoleo mamoe, o le saunia lea o vai mo lana lafu. I nisi taimi, e faafeinu ai e leoleo mamoe a latou lafu i vai e asuina mai i se vaiʻeli ma sasaa i totonu o faatanoa. (Kenese 29:1-3) Aemaise lava i tau o timuga, i vaipanoa i tafatafa o ālia laiti ma vaitafe, sa maua ai ni nofoaga toʻafilemu, ‘e iai le vaomuʻa lafulemu e mālōlō ai.’—Salamo 23:2.

O le leoleo mamoe lelei, e tatau ona ia iloa se nofoaga e maua ai vai, ma se vao lafulemu e talafeagai e aai ai lana lafu. O lona masani lelei i sea vaipanoa, e faamautinoa ai o le a faasaoina ana mamoe. O Tavita, o lē sa tele tausaga o leoleoina mamoe i atumauga o Iutaia, sa ia faatusaina le taʻitaʻiga faaleagaga a le Atua i le taʻitaʻiga a se leoleo mamoe, o lē na te taʻitaʻiina ana mamoe i vao lelei e aai ai ma vai e maua ai le ola. Na faapea mai Tavita: “Na te taʻitaʻi ia te au i tafatafa o vai e tafe lemu.”—Salamo 23:1-3.

I tausaga mulimuli ane, na faaaogā ai e Ieova se faata’ita’iga tali tutusa e ala i lana perofeta o Esekielu. Sa Ia folafola atu e na te faapotopotoina ona tagata mai nuu na faataapeapeina ai i latou, e pei ona faapotopotoina e se leoleo mamoe o ana mamoe. Ua ia faamautinoa atu iā te i latou e faapea: “Ou te . . . aumaia i latou i lo latou lava laueleele, ma fagaina i latou i mauga o Isaraelu, i tafatafa o vaitafe.”–Esekielu 34:13.

E manatu mamafa foʻi Ieova le Atua e uiga i le saunia o vai faaleagaga. Ua faamatalaina i le tusi o Faaaliga se “vaitafe manino o le vai o le ola,” e tafe mai i le nofoalii o le Atua. (Faaaliga 22:1) Ua faasalafa atu nei le valaaulia i tagata uma lava ina ia feinu mai lenei vaitafe. “Atoa ma lē manao i ai, ina ave fua ia le vai o le ola.”—Faaaliga 22:17.

O lenei vai o le ola faafaatusa, ua fai ma sui o le sauniuniga a le Atua mo le ola e faavavau. E mafai lava e so o se tasi ona inu mai lenei vai e ala i le ‘aveina i fale o le poto e uiga i le Atua moni e toʻatasi ma lē ua ia auina mai, o Iesu Keriso.’—Ioane 17:3.