“Ia Outou o Mai ia te Au, . . .o Aʻu Foi e Malolo ai Outou”

O Talavou o Ē e Pei o le Sau e Faafouina Ai

E MAUTINOA sa faaaofia e Iesu ona soo laiti ina ua ia fetalai atu: “Ia outou o mai ia te au, . . . o aʻu foi e malolo ai outou.” (Mataio 11:28) Ina ua aumaia e tagata a latou fanau talavou iā te ia, sa taumafai ona soo e taofi i latou. Ae na fetalai atu Iesu: “Ina tuu mai ia o tamaiti e o mai ia te au; aua le vavao ia te i latou.” Sa “siitia e ia [Iesu] i latou i ona lima, ua faaee foi ona aao i luga ia te i latou, ma faamanuia ia te i latou.” (Mareko 10:14-16) E mautinoa lava, sa tāua talavou i le silafaga a Iesu.

Ua taʻua i le Tusi Paia tane ma fafine talavou faamaoni, o tauleleʻa ma tamaiti laiti, o ē na faataatitia ni faaaʻoaʻoga e sili ona lelei o le auauna atu i le Atua. Ua valoia i le Salamo “le sau o lou taulealea” e faafouina ai. Ua taʻua ai foʻi “taulelea” atoa ma “teine,” o loo vivii atu i le suafa o Ieova.—Salamo 110:3; 148:12, 13.

Se Nofoaga e Tupuolaola ai Talavou

Ua fetaui lelei le faatusaina o talavou i le sau, auā ua fesootaʻi le sau ma faamanuiaga. (Kenese 27:28) O le sau e mālū, ma faafouina ai. E matuā toʻatele talavou Kerisiano ua lotomalilie e tuuina atu ma le naunau i latou lava i le auaunaga i lenei taimi o le faatasi mai o Keriso. E pei lava o le sau e faafouina ai, e toʻatele tane ma fafine talavou o loo auauna atu ma le lotofiafia i le Atua ma fesoasoani i o latou uso tapuaʻi.—Salamo 71:17.

E lē o avea talavou Kerisiano o se vai mālū mo na o nisi; ae ua faafouina i latou lava i la latou auaunaga. Ua saunia e le faalapotopotoga a le Atua se siʻomaga e mafai ona latou tupuolaola ai. I le tausisia o tapulaa maualuluga tau amio, ua olioli ai tane ma fafine talavou i se faiā māfana ma le Atua. (Salamo 119:9) E latou te auai foʻi i gaoioiga mamā a le faapotopotoga, ma maua ai uō lelei, o itu na e maua ai se olaga faamalieina ma le uigā.

‘Se Mea e Malosi ma Faafouina Ai’

Faamata o lagona e talavou Kerisiano le pei o i latou lava o le “sau”? Seʻi feiloaʻi atu iā Tania, o se tamaʻitaʻi talavou sa faia ma le maelega se sao i galuega a le faapotopotoga, ma tuuina atu ma le fiafia le sili atu i le 70 itula i le faiva i le masina. O le ā sona lagona? Ua ia faapea mai: “O se mea e faafouina ma faagaeetia ai aʻu. O le faaaofiaina o Ieova ma lana faalapotopotoga faalelalolagi i loʻu olaga, ua avea o se mea e ‘malosi ma faafouina ai.’”—Faataoto 3:8.

Ua faaalia e Ariel, o se tasi foʻi o faifeʻau faataimi atoa le talisapaia o meaʻai faaleagaga ia e fafagaina ai o ia i le faapotopotoga. Ua ia mātauina e faapea: “Pe a ou alu i sauniga faa-Kerisiano, tauaofiaga, ma fonotaga, ma fafagaina aʻu i le laoʻai faaleagaga a  Ieova, e matuā faafouina ai lava aʻu i le itu faaleagaga. Ma e faagaeetia ai foʻi i le iloa o loo iai ni oʻu uso i le lalolagi atoa o loo matou galulue faatasi.” I le faamatalaina o le pogai autū e faafouina ai, ua ia faapea mai: “O se mea e matuā faafouina ai le avea o Ieova ma aʻu uō, aemaise lava pe a ou faalogo ma vaai atu i āuga mataʻutia ua oo i tagata ona o lenei faiga o mea.”—Iakopo 2:23.

O le 20 o tausaga o Abishai, na auauna ai o ia o se faievagelia faataimi atoa ma o se auauna o le faiva i le faapotopotoga. E faapenei ona ia faamatalaina le mea na tupu: “Ua faafouina lava aʻu, talu ai ua oʻu iloa le auala e feutagaʻi ai ma le tele o faafitauli ia o loo fesagaʻi ma talavou i aso nei. Ua fesoasoani upu moni o le Tusi Paia iā te aʻu e taulaʻi ai loʻu manatu i mea e manaʻomia ona ou faia, ina ia ou auauna ai ma le tagata atoa iā Ieova.”

A o faatoʻā sefulu ma ona tupu tausaga o Antoine, sa iai sona uiga o le itaitagofie. Na ia tāina se tamaitiiti aʻoga i se nofoa, ma ia tuiina le isi tamaitiiti i se penitala. Sa faigatā ona avea Antoine o se tagata e faafouina ai! Ae o faatonuga mai le Tusi Paia na suia ai lana amio. Ua 19 nei ona tausaga, ma ua avea o se auauna o le faiva ma o se faifeʻau faataimi atoa i le faapotopotoga, ua faapea mai o ia: “Ou te faafetai iā Ieova ona ua mafai ona ou mauaina le poto e uiga iā te ia, ma ua ia fesoasoani iā te aʻu e iloaina e manaʻomia ona puleaina aʻu ma suia oʻu ala. O le auala lenei ua mafai ai ona ou ʻalofia le tele o faafitauli.”

E mātau e isi uiga lelei o talavou Kerisiano. O Matteo, o se Molimau talavou i Italia. Na faia e le faiaʻoga se faaiʻuga e faapea, e so o se tasi i le vasega e faia se upu leaga, e tatau ona tuu iai sina faasalaga. Ae peitaʻi, na talosaga mulimuli ane tamaiti ina ia tatala le sā, talu ai ua latou faapea mai, “e matuā lē mafai ona taofia le tautala i upu leaga.” Ua faamatala mai e Matteo e faapea, “Ae peitaʻi, na fai mai le tamaʻitaʻi faiaʻoga e lē mafai, ma na ia faaaogā aʻu o se Molimau a Ieova e fai ma faataʻitaʻiga, na ia viiviia aʻu i luma o le vasega ona o laʻu gagana mamā.”

I se potu aʻoga i Taialani i se vasega lē pulea, na valaaulia ai e le faiaʻoga i luma o le vasega ia Racha e 11 tausaga ma faamālō atu iā te ia ona o lana amio lelei, i le faapea atu: “Aiseā tou te lē faaaʻoaʻo uma ai iā te ia? E filigā i ana suʻesuʻega ma amio lelei.” Ona ia fai atu lea i tamaiti aʻoga: “Ou te manatu e tatau ona avea outou o ni Molimau a Ieova e pei o Racha, ina ia faaleleia ai a outou amio.”

O se mea e fiafia ai le vaai atu i le faitau afe o Kerisiano talavou ua oo ina iloa lelei Ieova, ma faia lona finagalo. Ua faaalia e na talavou amiolelei le atamai e pei ona iai i tagata matutua. Ua mafai ona fesoasoani le Atua iā i latou ina ia taulau manuia i o latou olaga i le taimi nei, ma avatu foʻi iā i latou se lumanaʻi matagofie i le lalolagi fou o loo fotuaʻi mai. (1 Timoteo 4:8) Ua pei i latou o ni oase i se nuu lafulafuā faaleagaga o lenei faiga o mea, ua faatumulia i talavou e lē o mauaina le lotomalie ma le fiafia!