Faamāfanafanaga Mai le Poto Saʻo e Uiga i le Atua

I NISI tagata, o mea o loo taʻua e le Tusi Paia e uiga i le agalelei ma le alofa mutimutivale o le Atua, ua lāgā ai ni fesili e atuatuvale ai. Ua latou faapea mai: Pe afai e finagalo le Atua e aveese le amioleaga,silafiaina le auala e fai ai, ma iai le mana e faataunuuina ai, aiseā la ua faatuputupulaʻia ai pea le amioleaga? Iā i latou, o le faafitauli e māfua mai i le lē ōgatasi o faamatalaga nei e tolu: (1) O le Atua e ona le malosi uma; (2) e agaalofa ma lelei le Atua; ma le (3) o loo faaauau pea ona tutupu mea leaga. Ua latou faapea mai e lē masalomia le moni o le manatu mulimuli, atonu la o se tasi o isi manatu e lua e lē moni. Iā i latou, a lē o le lē mafai e le Atua ona taofia mea leaga, po o le lē manatu mamafa mai o ia.

Ina ua mavae ni nai aso o le faatamaʻiaga o le Ogatotonu o Fefaatauaʻiga i Niu Ioka, na faapea mai ai se taʻitaʻi lotu lauiloa i le Iunaite Setete: “Ua tele taimi . . . ou te tuufesili ai pe aiseā ua faataga ai e le Atua mala ma puapuaga. E ao ona ou taʻutino atu e faapea ou te matuā lē iloa lava le tali, e lē o faamalieina foʻi aʻu.”

I le tali atu e tusa ai o lenei manatu, na tusi ai se polofesa i mataupu faalelotu e faapea, na ootia o ia i “le manatu e faatatau i le Atua” lea na folafola mai e lenei taʻitaʻi lotu. Na ioe foʻi o ia i le manatu o se alii atamai o lē na tusi e faapea: “O le lē mafai ona malamalama e tusa ai o mafatiaga, o se vaega lea o le lē mafai ona malamalama e uiga i le Atua.” Ae pe e moni ea e lē mafai ona malamalama i le pogai ua faatagaina ai e le Atua le amioleaga?

Le Amataga o Amioga Leaga

E ese ma mea o loo fai mai ai taʻitaʻi lotu, e lē o taʻua i le Tusi Paia le lē mafai ona malamalama i le faatagaina e le Atua o le amio leaga. O le manatu autū e manino ai i le fesili e uiga i le iai o le amioleaga, o le iloaina lea e leʻi faia e Ieova se lalolagi amioleaga. Na ia foafoaina le uluaʻi tagata ia lelei atoatoa, e aunoa ma le agasala. Na silasila mai Ieova i ana galuega na foafoaina ma iloa ai ua “matuā lelei lava.” (Kenese 1:26, 31) O lana fuafuaga na iai mo Atamu ma Eva o le faalautele atu lea o le Parataiso o Etena i le lalolagi atoa, ma faatumuina i tagata fiafia i lalo o le puipuiga a lana pule silisili ese agaalofa.—Isaia 45:18.

Na amata mai le amio leaga i se meafaiola agaga o lē e ui sa faamaoni i le Atua i le amataga, ae na atiina aʻe se faanaunauga ina ia tapuaʻia o ia. (Iakopo 1:14, 15) Na faaalia lona fouvale i le lalolagi ina ua ia taaʻina le uluaʻi ulugalii e ʻau ma ia e tetee atu i le Atua. Na i lo le usitai atu i le faatonuga manino a le Atua ina ia lē ʻaina pe paʻi atu i le fua o le laau e iloa ai le lelei ma le leaga, na ave e Atamu ma Eva le fua o le laau ma la ʻaina. (Kenese 3:1-6) I le faia faapea, e lē gata sa la lē usiusitai ai i le Atua, ae na faaalia ai foʻi lo la faanaunau e tuese mai iā te ia.

 Se Finauga na Lāgā

O lenei fouvalega i Etena na lāgā ai se finauga, o le luʻia lea o le pule a le Silisili Ese i le lagi ma le lalolagi atoa. O le fouvalega a le tagata na fesiligia ai pe faamata o faatinoina ma le tonu e Ieova lana taʻitaʻiga i ana meafaiola. Pe na iai i Lē na Foafoaina Mea le aiā e tāpā ai le usiusitai atoatoa atu o tagata? Pe atonu sa sili atu ona lelei mo tagata pe ana ola lava i latou?

Na tauaaoina e Ieova lenei luʻi e ala i lana pule i se auala e faataʻitaʻia ai lona paleni lelei atoatoa i le alofa, le faamasinotonu, poto ma le malosi. Sa ono mafai ona faaaogā lona mana e faasaʻoina ai le fouvalega i lenā lava taimi. Atonu sa ono foliga mai o le mea tonu lea, auā sa iai iā te ia le aiā e faia ai faapea. Ae o le faia faapea o le a lē taliina ai le fesili na lāgā. I le isi itu, sa ono mafai e le Atua ona lē amanaʻiaina le agasala. E manatu nisi i aso nei, e foliga mai o se faiga alofa lenā. Peitaʻi, o le a lē taulau ai foʻi la ona taliina le tuuaʻiga a Satani e faapea, e sili atu mo tagata ona pulea i latou lava. E lē gata i lenā, pe o le a lē avea ea lenā ma mea e uunaʻia atili ai tagata e tuese mai i ala o Ieova? O le a iʻu ai i le lē faaiʻuina o mafatiaga.

I lona atamai, ua faataga ai e Ieova tagata ina ia pule i latou iā i latou lava mo sina taimi. E ui lava ua faatagaina pea amioga leaga mo se taimi e lē tumau, ae ua iai i tagata le avanoa e faaalia ai pe faamata e mafai ona latou pulea ma le manuia i latou lava pe a tutoʻatasi mai i le Atua, o le ola lea iā latou lava tapulaa o le saʻo ma le sesē. O le ā ua iʻu i ai? Ua faaauau pea ona iloga le talafaasolopito faaletagata i taua, le lē faamasinotonu, puapuaga, ma mafatiaga. O le lē taulau o le fouvalega iā Ieova, o le a foʻia ai e faavavau finauga na lāgā i Etena.

I le taimi e tasi, ua faaalia e le Atua lona alofa e ala i le saunia o lona Alo, o Iesu Keriso, o lē na ofoina mai lona ola e fai ma taulaga togiola. Ua mafai ai e lenei tulaga ona tuusaʻoloto mai tagata usiusitai mai le faasalaga a le agasala ma le oti, le iʻuga o le lē usiusitai o Atamu. Ua tatalaina e le togiola le auala i le ola e faavavau  mo i latou uma e faaalia le faatuatua iā Iesu.—Ioane 3:16.

Ua iā i tatou le faamautinoaga faamāfanafana a Ieova e faapea e lē faaauau pea ona mafatia tagata. Na tusi le faisalamo: “E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava. A o e agamalu, e fai mo latou le nuu; e faafiafia foi i latou ia te i latou ona o le manuia e tele.”—Salamo 37:10, 11.

Se Lumanaʻi Saogalemu ma le Fiafia

Ua faaalia i le faataunuuga o valoaga a le Tusi Paia e faapea ua lata mai le taimi a le Atua e faaiʻuina ai maʻi, le faanoanoa, ma le oti. Seʻi mātau se faaataga ofoofogia o mea o le a oo mai, lea na tuuina atu i le aposetolo o Ioane i se vaaiga. Na ia tusi: “Ona aʻu iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami . . . e ia te i latou [le fanau a tagata] le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” I se faamatalaga na faamamafa ai le maufaatuatuaina o nei folafolaga, na taʻu atu ai iā Ioane: “Ia e tusi; auā o upu nei e moni ma le faamaoni ia.”—Faaaliga 21:1-5, LF.

Ae faapefea le faitau piliona o tagata amiotonu o ē na maliliu talu mai le fouvalega i Etena? Na folafola mai e Ieova o le a ia toe faafoʻisia mai i le ola tagata o loo momoe i le oti i le taimi nei. Na faapea mai le aposetolo o Paulo: “O loo ia te au le faamoemoe i le Atua. . . . o le a toe tutū mai e ua amiotonu atoa ma e ua amioletonu.” (Galuega 24:15) O nei tagata o le a iai le faamoemoe o le ola i se lalolagi lea o le a “mau ai le amiotonu.”—2 Peteru 3:13.

E pei lava ona faatagaina e se tamā alofa lona atalii e faia se taotoga tigāina pe afai na te iloaina o le a umi ona aogā, ua faapena foʻi ona faataga e Ieova tagata e fesagaʻia le iai moni o le amio leaga i le lalolagi mo sina taimi. Peitaʻi, o faamanuiaga e faavavau o loo faatalitali mai mo i latou uma o ē saʻili e faia le finagalo o le Atua. Na faamatalaina e Paulo e faapea: “Ua faatoilaloina mea uma na faia i le iu vale, (e le o lona loto lea, a e peitai ona o ia na na faatoilaloina ai,) ma le faamoemoe ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai.”—Roma 8:20, 21.

O le tala fou moni lava lenei, e lē o le ituaiga o tala fou lea o loo vaaia i le televise po o loo faitau ai foʻi i le nusipepa, ae o le tala lelei. O le tala silisili mai “le Atua foi e ana le faamafanafanaga uma.”—2 Korinito 1:3.

[Ata i le itulau 6]

O le faagasologa o taimi ua iloa ai e lē mafai e tagata ona pulea ma le manuia i latou lava e aunoa ma le Atua

[Faamatalaga i Ata]

Se Aiga i Somalia: UN PHOTO 159849/M. GRANT; pomu atomika: USAF photo; nofoaga o faasalaga: U.S. National Archives photo