Faamāfanafanaga i Taimi Faigatā

E MAUTINOA le leai o ni faamāfanafanaga mai tala fou o aso nei. Na tusi mai se tasi tagata e faapea: “O mea o loo tutupu i aso nei ua avea ma mea e matuā faanoanoa ai, lea e masani ona faigatā ai ona filifili pe e ao ona matamata i tala fou o le ono pe leai. Ua lofia le lalolagi i taua, gaoioiga e faamataʻuina ai, puapuaga, solitulafono, ma faamaʻi—o mea leaga ia atonu ua toeitiiti ae tatou aafia moni ai pe afai e leʻi oo mai.

Ua valoia mai ma le saʻo e le Tusi Paia nei tulaga. I le faamatalaina o o tatou taimi, na fetalai mai ai Iesu e faapea o le a iai taua tetele, faamaʻi, o oge i meaʻai, ma mafuiʻe. (Luka 21:10, 11) Na faapena foʻi ona tusi mai le aposetolo o Paulo e uiga i “aso faigata,” lea o le a avea ai tagata ma ē faasauā, o ē mananaʻo i tupe, ma le leai o se alofa mo ē amio lelei. Na ia taʻua lenā vaitaimi o “aso e gata ai.”—2 Timoteo 3:1-5.

O lea, i le faamatalaina o tulaga o le lalolagi, ua faaalia ai o mea o loo taʻua i tala fou e talitutusa ma mea ua valoia mai e le Tusi Paia. Ae e na o mea o loo tutupu i le lalolagi e tutusa ai. Ua aumaia i le Tusi Paia se vaaiga e lē o aumaia i tala fou. E ala i le Afioga faagaeeina a le Atua, ua mafai ai ona tatou malamalama e lē gata i le māfuaaga ua tele ai le amioleaga ae faapena foʻi i le tulaga o le a iai i le lumanaʻi.

Le Silasila a le Atua i le Amio Leaga

Ua faamatalaina mai e le Tusi Paia le auala o loo silasila ai le Atua i tulaga mafatia o o tatou  aso. E ui na ia muaʻi silafia faafitauli o loo iai nei, ae e lē gata na te leʻi faamaonia ae e leʻi finagalo foʻi e tumau ona iai nei tulaga e faavavau. Ua tusi le aposetolo o Ioane: “O le Atua, o le alofa lava ia.” (1 Ioane 4:8) O loo manatu mamafa mai Ieova mo tagata ma e inosia e ia mea leaga uma. E matuā talafeagai ai la ona tatou sulu i le Atua mo faamāfanafanaga, talu ai e lelei o ia ma alofa, e iai lona mana ma e finagalo e tafiesea le amioga leaga mai le lalolagi. Na tusi le faisalamo: “E laveai e ia [le tupu tofia faalelagi a le Atua] o lē mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva. E laveai o ia ia i latou ai le saua ma le faamalo; e silisili foi o latou toto i lona manatu.”—Salamo 72:12-14.

Pe e te manatu alofa ea mo i latou o loo puapuagatia? Atonu o lou lagona lenā. O le tigā alofa o se uiga na tuuina e Ieova i totonu o i tatou, auā na foafoaina i tatou i lona faatusa. (Kenese 1:26, 27) O lea, e mafai ai ona tatou mautinoa e silafia e Ieova mafatiaga o tagata. Na aʻoaʻoina e Iesu o lē na sili ona vavalalata atu iā Ieova na i lo se isi lava e faapea, e matuā naunau mai Ieova iā i tatou ma e tumu i le agaalofa.—Mataio 10:29, 31.

Ua faamaonia mai e ana foafoaga lava ia e faapea e manatu mamafa mai Ieova mo tagata. Na fetalai Iesu, o le Atua e na te “faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” (Mataio 5:45) Na faapea atu le aposetolo o Paulo i tagata o Lusa: “Ua le tuu e ia o ona faailoga, i lona agalelei mai, ma foai mai o ua mai le lagi ia te i tatou, ma tausaga o fuata a le tau, ma ona ua faamalilie i o tatou loto i le mea e ʻai ma le olioli.”—Galuega 14:17.

O Ai la e Tuuaʻia?

Ia mātau na faapea atu foʻi Paulo i tagata o Lusa: “Na tuufaitalia [e le Atua] nuu uma lava o augātupulaga ua mavae atu, latou te sāvavali i o latou lava ala.” O lea, e matuā tuuaʻia nuu po o tagata lava latou mo le tele o tulaga leaga ua latou aafia ai. E lē o le Atua e tuuaʻia.—Galuega 14:16.

Aiseā la ua faataga ai e Ieova mea leaga e tutupu? Pe o le a ia faia ea se mea i ai? E na o le Tusi Paia e mafai ona maua ai tali o nei fesili. Auā e aofia ai i le tali se tasi o meafaiola agaga faatasi ma se luʻi na ia lāgā i le nofoaga o agaga.

[Ata i le itulau 4]

E iai faalogona alofa o tagata mo isi. Pe e lē tigā alofa foʻi la le Atua ona o mafatiaga o tagata?

 [Faamatalaga i Ata i le itulau 2]

FAAVAA: Tanetau: UN PHOTO 158181/J. Isaac; mafuiʻe: San Hong R-C Picture Company

[Faamatalaga i Ata i le itulau 3]

Agavale i le pito i luga, Croatia: UN PHOTO 159208/S. Whitehouse; tamaitiiti matelāina: UN PHOTO 146150 BY O. MONSEN