Pe e Tatau Ona E Faifaimālie?

ATONU o le a lagona e le toʻatele o tagata e faapea, o se viiviiga le manatu iā te oe o se tagata faifaimālie, o sē e iai uiga toʻafilemu, agamalu, ma faapalepale. Ae peitaʻi, e iai le isi vala o le faifaimālie. Ua faapea mai le Tusi Paia: “O le faifaimālie o ē valelea, e faaumatia ai i latou.” (Faataoto 1:32, NW) O le ā le uiga o lenei mea?

Ua faaaogā i isi faaliliuga o le Tusi Paia le upu autū o le gagana Eperu i faaupuga e pei o le “faatamala” (American Standard Version), “lē manatu mamafa” (The New American Bible), ma le “faatalanoa.” (The New English Bible) I lenei uiga, ua fesootaʻi i ai le faifaimālie ma le paiē, le faatamala, ma le valea.

I le uluaʻi senituri, sa lē iloa pe sa lē manatu mamafa Kerisiano o le faapotopotoga i Laotikaia i o latou uiga lē lelei faaleagaga. Sa latou gugutu mai ma le faualuga e faapea, e latou te leʻi “mativa lava i se mea e tasi.” Sa faasaʻoina i latou e Iesu Keriso, e faapea, e manaʻomia ona toe faafouina lo latou maelega faa-Kerisiano.—Faaaliga 3:14-19.

O le faifaimālie e aunoa ma le manatu mamafa, o le isi lea uiga o tagata i aso o Noa. Sa mua ona pupū i latou i mea o le olaga nei, “ua latou aai ma inu, ua latou fai avā foi ma faaavaga, . . . , na le iloa foi e i latou ina seia oo le lolo, ma aveesea i latou uma.” Ona faaopoopo mai lea o Iesu: “E faapea foi pe a sau le Atalii o le tagata.”—Mataio 24:37-39.

Ua faaalia i valoaga ua faataunuuina o le Tusi Paia, ua tatou ola i le vaitaimi o “le sau o le Atalii o le tagata,” o Iesu Keriso. Seʻi aua lava la neʻi o tatou faatalanoa, faatamala, lē manatu mamafa, ma faifaimālie.—Luka 21:29-36.