Lipoti a Ē Faalauiloa le Malo

Se Pine e Faailoa ai le Maota o le Malo

NA atofaina e le Matagaluega o le Siʻosiʻomaga i Finilani le tausaga e 2000, o se “Tausaga e Faamatagofieina ai Laufanua.” Na taʻua e se tasi o lea matagaluega e faapea, o le “fuafuaga ua avea ai le faamatagofieina o laufanua ma matua autū o le tausaga, ina ia faamanatu mai ai iā i tatou uma le aogā ua aumaia e le lanulauʻava o le siʻosiʻomaga i o tatou olaga i aso faisoo ma mo lo tatou lelei.”

Iā Ianuari 12, 2001, na oo atu ai i le ofisa o le lālā o Molimau a Ieova i Finilani se tusi mai le Faalapotopotoga e Faamatagofieina Laufanua i Finilani. Na faamatala atu i le tusi e faapea, ua tuuina atu i le Maota o le Malo o Molimau a Ieova i Tikkurila se tasi o pine mo le matua o le tausaga, le faamatagofieina o laufanua, ona o le matuā matagofie o le faatulagaina o lona siʻomaga ma le teuteuina lelei o le togālaau. Na taʻua atili i le tusi, “o se mea e faafiafia loto foliga vaaia o le laufanua i le tau māfanafana ma le tau mālūlū, e matuā matagofie ma lelei ona saunia.”

Na tuuina atu le pine i Molimau a Ieova i le Faletalimālō o Rosendahl i Tampere i Finilani, i se sauniga na auai ai le 400 o tagata faigaluega atamamai ma le ʻaufaipisinisi. Na tuuina atu foʻi e le Faalapotopotoga mo le Faamatagofieina o Laufanua i Finilani se faamatalaga ina ia faasalalauina i nusipepa ma isi alāleo e faapea: “I vaega eseese o le atunuu, e toetoe lava o Maota o le Malo uma a Molimau a Ieova e matuā matagofie ona fuafuaina. O le teuina lelei o le laufanua, e faaoso ai le fiafia o tagata uma e ui ane ai. O le togālaau i le Maota o le Malo i Tikkurila, o se tasi lenā o faaaʻoaʻoga i togālaau matagofie uma. E fetaui lelei le telē o le fale ma le telē o le laufanua e faaalia ai le toʻafilemu ma le paleni lelei.”

I Finilani e 233 Maota o le Malo o loo iai, o le tele e siʻomia e togālaau matagofie. Ae peitaʻi, o le mea ua sili ona matagofie ai nei nofoaga, ona o le ogatotonu lea o le tapuaʻiga moni ma aʻoaʻoga faale-Tusi Paia. Mo le silia i le ono miliona Molimau a Ieova i le lalolagi aoao, e tusa lava pe telē pe laʻitiiti se Maota o le Malo, ae o se nofoaga e tausia lelei lava. O le pogai lenā ua latou naunau ai e tausia ia mamā lelei lea maota. E talia ma le fiafia i le Maota o le Malo tagata uma i lou nuu.