Fesili Mai le ʻAufaitau

Pe faamata o le faatauina o se fale mai se isi lotu ma avea ma Maota o le Malo e faapea ai ua tatou faifaimea faatasi ma isi tapuaʻiga?

O le tulaga masani, e lē faia ni feutagaʻiga pe faifaimea faatasi Molimau a Ieova ma isi lotu. Ae peitaʻi, o le faia o lenei tulaga e lē faapea ai ua faifaimea faatasi ma isi lotu. E mafai ona manatu i ai, e na o se feutagaʻiga faapisinisi. E lē o faifaimea faatasi le faapotopotoga a Molimau a Ieova ma se isi lotu i le fauina o se nofoaga mo le tapuaʻiga e faapea, e mafai ona faaaogā e lotu uma e lua.

I le silafaga a Ieova, o le ā e aofia i le faifaimea faatasi ma isi lotu? Seʻi manatu i le faatonuga a le aposetolo o Paulo: “Aua tou te amo faalēgatasi ma ē lē talitonu; aua pe faapefea ona faatasi o lē amiotonu ma lē amio leaga? Pe faapefea foʻi ona mafuta o le malamalama ma le pōuliuli? Pe faapefea foʻi ona loto gatasi o Keriso ma Pelialo? Pe faapefea foʻi ona tofusia faatasi o lē talitonu ma lē ua lē talitonu? Pe faapefea foʻi ona loto faatasi o le malumalu o le Atua ma tupua? . . . O lea ia ō mai ai outou nai totonu iā te i latou, ma ia outou vavae mai, ua fetalai mai ai le Alii [o Ieova], aua foʻi tou te papaʻi atu i se mea leaga; ona ou talia ai lea o outou.” (2 Korinito 6:14-17) O le ā sa i le manatu o Paulo i lona faaaogāina o le upu “faatasi” ma le “mafuta”?

O le faatasi lea e taʻua e Paulo i inei, e manino lava e aofia ai le faia o ni feutagaʻiga faaleagaga ma tau tapuaʻiga ma tagata ifo i tupua ma ē lē talitonu. Sa ia lapataʻia Kerisiano i Korinito ina ia aua neʻi “tofusia faatasi i le . . . laoʻai a temoni.” (1 Korinito 10:20, 21) I lea la, o le faifaimea faatasi ma lotu, o le tofusia faatasi lea i tapuaʻiga po o le faia o ni aufaatasiga faaleagaga ma isi faalapotopotoga faalelotu. (Esoto 20:5; 23:13; 34:12) Pe a faatauina la se fale sa faaaogāina e se isi lotu, ua faia faapea ina ia maua ai se fale e manaʻomia mo se Maota o le Malo. A o leʻi faaaogāina la e avea ma Maota o le Malo, e muamua lava ona faamamā ese ni faatusa faalotu a tapuaʻiga sesē sa iai. Pe a uma ona faafouina, ona faapaiaina loa lea mo Ieova. O le fuafuaga autū, ina ia tapuaʻi atu ai iā te ia. E lē faifaimea faatasi pe e faia ni aufaatasiga a le tapuaʻiga moni ma lotu sesē.

I le talanoaina auʻiliʻili o le auala e faia ai lea faatau, e tatau ona matuā faatapulaa ia feutagaʻiga ma le isi itu, ma e tatau lava ona taulima o se feutagaʻiga faapisinisi. E tatau i sui o le faapotopotoga Kerisiano ona manatua le lapataʻiga a Paulo ina ia aua neʻi “amo faalēgatasi ma ē lē talitonu.” E ui lava e tatou te lagona e lē sili aʻe i tatou i tagata o isi faatuatuaga, ae ia tatou ʻalofia le faifaimea faatasi ma i latou pe taaʻina atu i a latou tapuaʻiga. *

Ae faapefea pe afai e totogi e se faapotopotoga se fale o se lotu e faia ai a latou sauniga? O le totogiina o se fale, e masani ona feiloaʻi soo ai ma ni sui o le lotu, ma e tatau ona ʻalofia lenā mea. E tusa lava pe e na o le tasi se sauniga ua totogiina ai lenā fale, ae e tatau i le ʻautoeaina ona iloiloina mea nei: Po o le a iai ni faatusa po o ni faailoga faalotu i totonu ma fafo o le fale? O le ā le manatu o tagata o le nuu i lo tatou faaaogāina o le fale? Po o le a tausuai nisi o le faapotopotoga i lo tatou faaaogāina o lea fale? (Mataio 18:6; 1 Korinito 8:7-13) O le ʻautoeaina e iloiloina nei vala ma faia i ai se faaiʻuga talafeagai. E tatau ona manatunatu i o latou lava lotofuatiaifo faapea le lautele o le faapotopotoga pe a filifili e faatau sea fale ma avea ma Maota o le Malo.

[Faamatalaga pito i lalo]

[Ata i le itulau 27]

O le fale lenei, sa avea muamua o se sunako, ae na faatauina ma toe faafou e avea ma Maota o le Malo