‘Ia E Poto i Ou Tausaga Amulī’

“O le toʻatele o tagata, ua faaaogā o latou olaga talavou i se auala ua oo ai i faanoanoaga i se taimi mulimuli ane.” O le tala lenā a se tusitala Falani o lona 17 o senituri, o Jean de La Bruyère. O le mea moni, o se talavou e leʻi faia se filifiliga mautū atonu e faalotolotolua, e lē maua le lotomalie ma oo ai i faanoanoaga. I le isi itu, o le uia pea e se talavou lotomaaa o se auala lē atamai, e oo ai ina lē fiafia i taimi mulimuli o lona olaga. Po o le ā lava le tulaga, o le lē faia o le mea tonu po o le faia o se solitulafono, o ni agasala ia e iʻu ai i le tele o faanoanoaga.

E mafai faapefea ona ʻalofia sea iʻuga leaga? I le lapataʻi mai e faatatau i le lē faia o ni filifiliga mautū i taimi o le talavou, ua fautua mai ai le Afioga a le Atua e faapea: “Ia e manatua lē na faia oe i ona pō o lou tauleʻaleʻa, a o leʻi oo mai aso leaga, a o leʻi oo mai foʻi tausaga e te faapea ai, E leai soʻu fiafia i ai.” (Failauga 12:1) Pe afai o oe o se talavou, ua tatau ona e faia se gaoioiga mautinoa e aʻoaʻo ai e uiga i “lē na faia oe” a o e talavou.

E faapefea la ona fesoasoani le Tusi Paia i talavou e ʻalofia le faia o amioga leaga? Ua taʻua i le Tusi Paia e faapea: “Ia e faalogo i le faatonu mai, ma e talia le aʻoaʻo atu; ina ia e poto ai pe a oo i ou tausaga amulī.” (Faataoto 19:20) Ua faaalia manino foʻi i le Tusi Paia e faapea, o le teena o le atamai mai le Atua ona o le faatamala po o le fouvale i taimi o le talavou, ma po o le ā lava le matua, e iʻu i tigā ma faanoanoaga. (Faataoto 13:18) Ae peitaʻi, o le utagiaina o taʻiala tauatua e iʻu i le “faaopoopoina ai iā te oe o aso e tele, ma tausaga e te ola ai, atoa ma le manuia,” o se olaga e taulau ma faamalie loto.—Faataoto 3:2.