O Kerisiano Solitū i Aso e Gata Ai
O Kerisiano Solitū i Aso e Gata Ai
“E lē ni ō le lalolagi i latou, faapei o aʻu foʻi, ou te lē so le lalolagi aʻu.”—IOANE 17:16.
1, 2. O ā fa a Iesu e faatatau i le faiā a ona soo ma le lalolagi, ma o ā fesili ua lāgā e ana fetalaiga?
I LE pō mulimuli o lona soifuaga o se tagata lelei atoatoa, na faia ai e Iesu se tatalo umi a o faafofoga lona ʻausoo. I lenā tatalo sa ia taʻua ai se manatu e faamatalaina ai soifuaga o Kerisiano uma lava. Na ia fetalai e uiga i ona soo: “Ua ou tuu atu lau afioga iā te i latou; ua ʻinoʻino foʻi le lalolagi iā te i latou, auā e lē ni ō le lalolagi i latou, faapei o aʻu, ou te lē so le lalolagi aʻu. Ou te lē ole atu ina ia e ave ese iā te i latou i le lalolagi, a ia e tausi iā te i latou ina neʻi leaga. E le ni ō le lalolagi i latou, faapei o aʻu foʻi, ou te lē so le lalolagi aʻu.”—Ioane 17:14-16.
2 E faalua ona fetalai Iesu o ona soo e lē ni o le lalolagi. E lē gata i lea, o lenā vavae ese mai o le a iʻu ai i faigatā, o le a inosia i latou e le lalolagi. Ae ui lava i lea, e lē tatau ona faanoanoa ai Kerisiano; o le a tausia pea i latou e Ieova. (Faataoto 18:10; Mataio 24:9, 13) I le manatu atu i fetalaiga a Iesu, tatou te ono fesili e faapea: ‘Aiseā e lē ni ō le lalolagi ai Kerisiano moni? O le ā le uiga o le lē ni ō le lalolagi? Afai e ʻinoʻino le lalolagi i Kerisiano, o le ā la latou vaaiga i le lalolagi? Aemaise lava la latou vaaiga i malo o le lalolagi?’ O tali a le Tusi Paia i nei fesili e tāua tele, ona e aafia ai i tatou uma.
‘E Mai le Atua i Tatou’
3. (a) O ā mea ua vavaeesea ai i tatou mai le lalolagi? (e) O ā ni faamaoniga e iloa ai o le lalolagi uma o “loo nofo toʻilalo i loo leaga”?
3 O se tasi o māfuaaga e lē ni ō le lalolagi ai i tatou ona o lā tatou faiā vavalalata ma Ieova. Na tusi le aposetolo o Ioane: “Ua tatou iloa e mai le Atua lava i tatou, a o le lalolagi uma o loo nofo toʻilalo i loo leaga.” (1 Ioane 5:19) E manino le moni o faamatalaga a Ioane e uiga i le lalolagi. O taua, solitulafono, o faiga sauā, lē faamaoni, ma amioga lē mamā faaleituaiga lea ua matuā taatele i aso nei, ua faamaonia ai aafiaga ma faatosinaga a Satani ae lē o le Atua. (Ioane 12:31; 2 Korinito 4:4; Efeso 6:12) Pe a avea se tasi ma Molimau a Ieova, o le a ia lē toe lolo atu pe faatagaina o ia e faia na gaoioiga leaga, ma o le faia faapea e lē toe avea ai o ia o se vaega o le lalolagi.—Roma 12:2; 13:12-14; 1 Korinito 6:9-11; 1 Ioane 3:10-12.
4. O ā auala e faaalia ai o Ieova e ona i tatou?
4 Na taʻua e Ioane e faapea o Kerisiano, i le faaeseesega ma le lalolagi, “e mai le Atua i latou.” E pule le Atua iā i latou uma ua tuuina atu iā te Ia. Fai mai le aposetolo o Paulo: “Auā afai tatou te ola, tatou te ola mo le Alii, pe afai e oti, e oti mo le Alii; o lenei, pe ola pe oti i tatou, o tagata lava o le Alii i tatou.” (Roma 14:8; Salamo 116:15) Ona o Ieova e ana i tatou, ua na o ia tatou te avatu i ai le tuutoina atoatoa. (Esoto 20:4-6) O lea la, e lē faaaluina e se Kerisiano moni lona olaga atoa e tuliloa ai sini faalelalolagi. Ma e ui e faaaloalo o ia i tagāvai a atunuu, e lē tapuaʻi i ai e ala i gaoioiga pe i uiga. E lē tapuaʻi se Kerisiano i tagata taʻutaʻua i taaloga po o isi mea ua tapuaʻia i aso nei. E moni e faaaloalo i aiā tatau a isi e fai le mea latou te mananaʻo ai, ae tapuaʻi o ia ua na o Lē na Foafoaina mea. (Mataio 4:10; Faaaliga 19:10) O le faia foʻi faapea e faaesea ai o ia mai le lalolagi.
“E Lē Mai le Lalolagi Nei Loʻu Malo”
5, 6. E faapefea i le gauaʻi i le Malo o le Atua ona faaesea ai i tatou mai le lalolagi?
5 O Kerisiano o ē mulimuli iā Iesu Keriso ma o tagata o le Malo o le Atua, lea foʻi ua lē ni ō le lalolagi ai i latou. A o faamasinoina Iesu e Ponotio Pilato, na fetalai o ia: “E lē mai le lalolagi nei loʻu malo; afai ana mai le lalolagi nei loʻu malo, po ua tau aʻu auauna, ina neʻi tuuina atu aʻu iā Iutaia; a o lenei, e lē mai inei loʻu malo.” (Ioane 18:36) E ala i le Malo, o le a faapaiaina ai le suafa o Ieova, o le a faaeaeaina ai lana pulega, ma le faia o lona finagalo i le lalolagi e pei ona faia i le lagi. (Mataio 6:9, 10) I le faiva atoa a Iesu, sa ia talaʻia ai le tala lelei o le Malo ma faapea mai o le a faaauau ona faalauiloa atu e ona soo e oo lava i le iʻuga o lenei faiga o mea. (Mataio 4:23; 24:14) I le 1914, na taunuu ai upu faavaloaga o le Faaaliga 11:15: “O malo o le lalolagi ua avea mo lō tatou Alii ma lona Keriso, e fai foʻi o ia ma tupu e faavavau faavavau lava.” Ua lē o toe mamao le taimi, o le a na o le Malo faalelagi ai lava lenā e pulea le fanau a tagata. (Tanielu 2:44) O le a iai le aso, e oo lava i ē o pulea malo, o le a faamalosia i latou e faailoa mai lenā pulega.—Salamo 2:6-12.
6 I le manatu atu i nei mea uma, o Kerisiano moni la i aso nei o tagatānuu o le Malo o le Atua, ma e latou te mulimuli i le fautuaga a Iesu ia ‘muaʻi saʻili le malo o le Atua ma lana amiotonu.’ (Mataio 6:33) E lē faapea o le a avea lenā ma māfuaaga e lē faamaoni ai i atunuu o loo latou soifua ai, peitaʻi latou te vavae ese ai faaleagaga mai le lalolagi. O le galuega autū a Kerisiano i aso nei, e pei lava ona sa iai i le uluaʻi senituri, o le ‘molimau atu i le malo o le Atua.’ (Galuega 28:23) E matuā leai lava se malo faaletagata e iai se aiā e faalavelavea lenā galuega na tofia mai e le Atua.
7. Aiseā e solitū ai Kerisiano moni, ma o faapefea ona latou faailoa mai lenei mea?
7 Ina ia ōgatasi ma le faapea o Ieova e pulea i latou, atoa ai ma le avea ma soo o Iesu, ma tagatānuu o le Malo o le Atua, ua tumau ai pea Molimau a Ieova i le solitū i faigātaua a atunuu i lona senituri luasefulu ma le luasefulu tasi. E latou te lē lagolagoina so o se itu pe tau faasaga i se tasi, pe faasalalauina foʻi ni faamatalaga taufaaleaga agaʻi i mataupu faale-lalolagi. Ua latou faataʻitaʻia mai i se auala mataʻina lo latou faatuatua a o fesagaʻi ai ma sauāga ogaoga, i lo latou mulimulitaʻi i le faalauiloaga na tuuina atu i taʻitaʻi Nasi o Siamani i le 1934 e faapea: “E leai so matou naunau i mataupu fai a malo, ae ua tuuina atu atoatoa i matou i le Malo o le Atua i le taʻitaʻiga a lona Tupu o Iesu. O le a matou lē faamanuʻaina pe faamataʻuina so o se tasi. E matou te olioli e nonofo faatasi i le filemu ma fai mea lelei i tagata uma i avanoa uma matou te maua.”
Savali ma Avefeʻau mo Keriso
8, 9. O le ā le auala ua avea ai Molimau a Ieova i aso nei o ni savali ma ni avefeʻau, ma e faapefea i lenei mea ona aafia ai la latou faiā ma atunuu?
8 Sa faamatalaina e Paulo ia ma ana aumea Kerisiano faauuina “o sāvali . . . a Keriso, peiseaʻī ua ʻaiʻoi mai le Atua iā te outou e i matou.” (2 Korinito 5:20; Efeso 6:20) Talu mai le 1914, ua talafeagai ona taʻua Kerisiano faauuagagaina o savali mo le Malo o le Atua, lea o loo avea ai i latou o “atalii.” (Mataio 13:38; Filipi 3:20; Faaaliga 5:9, 10) E lē gata i lenā, ua aumaia e Ieova mai atunuu le “motu o tagata e toʻatele” o “isi mamoe,” o Kerisiano e faamoemoe e ola i le lalolagi ina ia lagolagosua i atalii faauuina i la latou galuega o ni savali. (Faaaliga 7:9; Ioane 10:16) O “isi mamoe” nei, e mafai ona taʻua o “avefeʻau” o le Malo o le Atua.
9 E lē aiā se savali ma lana ʻaufaigaluega i mataupu fai a le atunuu o loo latou galulue ai. E faapena foʻi Kerisiano, e leai sa latou vaega i mataupu faapolotiki a malo o le lalolagi. Latou te lē faaituʻau pe tetee foʻi i so o se atunuu, lanu, faiā a tagata lautele, po o vaega tau tamaoaiga. (Galuega 10:34, 35) Na i lo lenā, latou te ‘agalelei i tagata uma lava.’ (Kalatia 6:10) Talu ai le solitū o Molimau a Ieova, e leai la se tasi e mafai ona teena ma le saʻo la latou feʻau i le faapea mai o loo latou ʻauʻau faatasi ma se itu tetee i fevaevaeaʻiga tau lanu, atunuu, po o le va o ituaiga.
E Mātaulia i le Alofa
10. Mo se Kerisiano, o le ā le tāua o le alofa?
10 I le faaopoopo atu i manatu ua uma ona taʻua, e solitū Kerisiano i mataupu fai a le lalolagi ona o la latou faiā ma isi Kerisiano. Sa fetalai atu Iesu i ona soo: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) O le alofa faaleuso o se vala tāua lenā i le avea o se tasi ma Kerisiano. (1 Ioane 3:14) E tusa ai ma lana faiā iā Ieova ma Iesu, o le faiā e iai a se Kerisiano ma isi Kerisiano e vavalalata tele. E lē faatapulaaina lona alofa tau o i latou i le faapotopotoga o loo ia auai. E aofia ai le “au uso o i le lalolagi.”—1 Peteru 5:9.
11. Ua faapefea ona aafia amioga a Molimau a Ieova i lo latou alolofa o le tasi i le tasi?
11 I aso nei, e faataʻitaʻia e Molimau a Ieova lo latou alofa faaleuso e ala i le faataunuuina o upu o le Isaia 2:4: “Ona latou tuʻi ai lea i a latou pelu e fai ma uʻamea o suōtosina, o latou tao foʻi e fai ma polo e teu aʻi vine; e lē sii atu le pelu e le tasi nuu i le tasi nuu, latou te lē toe aʻoaʻo foʻi i taua.” Ona ua aʻoaʻoina e Ieova, e filemu Kerisiano moni i le va ma le Atua ma le va ma isi Kerisiano. (Isaia 54:13) Ona o lo latou alofa i le Atua ma o latou uso, e lē fetaui ma o latou manatu le faasagatau atu agaʻi i uso Kerisiano—pe o so o se isi lava—i isi atunuu. O lo latou filemu ma le autasi o se vaega tāua o lā latou tapuaʻiga, o se faamaoniga o loo iai moni iā i latou le agaga o le Atua. (Salamo 133:1; Mika 2:12; Mataio 22:37-39; Kolose 3:14) Latou te “saʻiliʻili atu i le filemu . . . ma tausisi i ai,” i le iloaina e faapea “o fofoga o Ieova o loo faasaga i ē amiotonu.”—Salamo 34:14, 15.
Le Manatu o Kerisiano Faatatau i le Lalolagi
12. O le ā le uiga o Ieova agaʻi i tagata o le lalolagi o loo faataʻitaʻi iai Molimau a Ieova, ma e faapefea?
12 Ua faalauiloa mai e Ieova lana faamasinoga lē masuia i lenei lalolagi, peitaʻi e leʻi oo i le taimi na te faamasinoina ai tagata taʻitoʻatasi uma i le lalolagi. O le a Ia faia faapea e ala iā Iesu i Lana taimi atofaina. (Salamo 67:3, 4; Mataio 25:31-46; 2 Peteru 3:10) I le taimi nei, o loo ia faaalia lona alofa tele i le fanau a tagata. Ua ia auina mai foʻi lona Alo pele e toʻatasi ina ia maua ai e tagata uma le avanoa e maua ai le ola e faavavau. (Ioane 3:16) I le avea ma Kerisiano, tatou te faataʻitaʻi i le alofa o le Atua e ala i le taʻu atu i isi e uiga i le Atua ma ana faatulagaga mo le faaolataga, tusa lava pe teena e lē aunoa a tatou taumafaiga.
13. O le ā lo tatou manatu e ao ona iai agaʻi i taʻitaʻi o malo?
13 O le ā lo tatou manatu e ao ona iai i taʻitaʻi o malo a le lalolagi? Na tali e Paulo le fesili lenā ina ua ia tusi: “Ia usiusitai tagata uma i faipule silisili; auā e leai se pule pe a lē mai le Atua; o pule uma lava o loo fai nei, ua faatuina e le Atua.” (Roma 13:1, 2) Ua umia e tagata le pule i se tulaga “faatapulaa” (NW) (o nisi e maualuluga atu i isi pe a fefaatusatusaaʻi, ae maulalo uma lava iā Ieova) auā o loo faataga i latou e Lē Ona le Malosi Uma Lava. E gauaʻi se Kerisiano i pule o malo talu ai o se tasi lenā o vala o lona usitai iā Ieova. Ae faapefea pe a tulaʻi mai se feteenaiga i le va o mea e manaʻomia e le Atua ma pulega a tagata?
Tulafono a le Atua ma Tulafono a Kaisara
14, 15. (a) I le ā le auala na mafai ai e Tanielu ona ʻalofia ni feteenaʻiga e uiga i le mataupu o le usitai? (e) O le ā le filifiliga mausalī na faia e Eperu e toʻatolu ina ua lē mafai ona toe ʻalofia le tulaʻi mai o se feteenaʻiga e uiga i le mataupu o le usitai?
14 Sa saunia e Tanielu ma ana uō e toatolu se faaaʻoaʻoga lelei e faatulaga lelei ai le usiusitai paleni i pulega a tagata ma le usiusitai i le pule a le Atua. A o faaaunuua talavou Eperu e toʻafā i Papelonia, sa latou usitaʻia tulafono a le atunuu ma sa vave lava ona filifilia mo ni toleniga faapitoa. Ina ua iloa e Tanielu o nei toleniga e ono tulaʻi mai ai se feteenaiga ma Tulafono a Ieova sa vave ona talanoa atu i lē sa pule iā i latou. Ma o le iʻuga, sa faia ni fuafuaga faapitoa ina ia faaaloalogia ai loto fuatiaifo o talavou Eperu e toʻafā. (Tanielu 1:8-17) E mulimuli Molimau a Ieova i le faaaʻoaʻoga a Tanielu pe a latou faamatalaina ma le magafagafa lo latou tulaga i taʻitaʻi ina ia ʻalofia ai ni faafitauli lē manaʻomia e tulaʻi mai.
15 Ae ui lava i lea, i se mea na tupu mulimuli ane, sa tulaʻi mai ai se feteenaʻiga e uiga i le usiusitai e leʻi mafai ona ʻalofia. Na faatūina e le tupu o Papelonia se tupua tele i le laugatasi o Turu ma faatonuina alii sili, e aofia ai faipule o itumalo, ina ia potopoto atu mo le faapaiaina. O le taimi lea, ua uma ona tofia uō e toʻatolu a Tanielu e avea ma faipule o itumalo o Papelonia, sa aofia ai la ma i latou i le faatonuga. I se taimi faapitoa a o faagasolo le faapaiaga, sa ao i tagata uma na auai ona ifo i le tupua. Ae na iloa lelei e tauleleʻa Eperu e feteenaʻi lenei gaoioiga ma le tulafono a le Atua. (Teuteronome 5:8-10) Ina ua faapaʻūʻū ma ifo tagata uma, sa tutulaʻi pea i latou. I lo latou lē usitaia o le poloaʻiga a le tupu, na lamatia ai i latou i se oti mataʻutia ae na latou filifili lava ia lamatia o latou ola na i lo le lē usitai iā Ieova, ae na laveaʻiina i latou ona o se vavega.—Tanielu 2:49–3:29.
16, 17. Na faapefea ona tali atu le au aposetolo ina ua faatonuina e taofia la latou talaʻiga, ma aiseā?
16 I le uluaʻi senituri, na tulaʻi ai le au aposetolo o Iesu i luma o taʻitaʻi Iutaia i Ierusalema ma faatonuina ina ia aua neʻi toe talaʻi i le suafa o Iesu. O le ā la latou gaoioiga sa fai? Na tofia i latou e Iesu e fai nuu uma lava ma soo lea e aofia ai ma Iutaia. Na ia taʻu atu foʻi e fai i latou ma ana molimau e lē gata i Ierusalema ae faapea foʻi le lalolagi atoa. (Mataio 28:19, 20; Galuega 1:8) Na malamalama lelei le au aposetolo o le faatonuga a Iesu o le finagalo foʻi lea o le Atua mo i latou. (Ioane 5:30; 8:28) O lea na latou tali atu ai e faapea: “E sili o lo matou anaana i le Atua i lo matou anaana i tagata.”—Galuega 4:19, 20; 5:29.
17 E leʻi fouvale le au aposetolo. (Faataoto 24:21) Peitaʻi, pe a faasā e pule faaletagata i latou i le faia o le finagalo o le Atua, na pau la latou faamatalaga e fai, ‘Matou te anaana i le Atua, ae lē o tagata.’ Fai mai Iesu e tatau ona tatou “avatu . . . mea a Kaisara iā Kaisara; ia avatu foʻi mea a le Atua i le Atua.” (Mareko 12:17) Afai tatou te lē usitai i faatonuga a le Atua ona ua faatonu mai e tagata, ua tatou avatu la i tagata mea a le Atua. Na i lo lea, tatou te avatu uma mea o tatou nofo aitalafu ai iā Kaisara, peitaʻi tatou te amanaʻia le pule silisili ese a Ieova. O Ia o le Pule Silisili Ese Aoao, o Lē na Foafoaina mea, o ia e Pogai mai ai le pule.—Faaaliga 4:11.
O le a Tatou Tutumau
18, 19. O ā faaaʻoaʻoga lelei sa faia e le toʻatele o ō tatou uso, ma e mafai faapefea ona tatou mulimuli i a latou faaaʻoaʻoga?
18 I le taimi nei, o le tele lava o faiga malo ua latou masani i le tulaga solitū o Molimau a Ieova, ma e tatou te olioli i lenā itu. Ae peitaʻi i nisi o atunuu o loo fesagaʻi ai Molimau ma ni teteega ogaoga. I le senituri atoa lona luasefulu ma faasolo mai ai i le taimi nei, o nisi o ō tatou uso o loo tauivi malosi, e “tau le taua lelei i la le faatuatua” i le itu faaleagaga.—1 Timoteo 6:12.
19 E faapefea ona tatou tutumau e pei o i latou? Muamua, ia tatou manatua e ao ona tatou faatalitalia teteega. E lē tatau ona tatou faanoanoa pe faateʻia ai pe a feagai ma teteega. Na lapataʻi Paulo iā Timoteo e faapea: “O i latou uma foʻi o ē loto ina nonofo ma le amio Atua iā Keriso Iesu, e sauāina i latou.” (2 Timoteo 3:12; 1 Peteru 4:12) Aiseā o le a tatou lē fetaiaʻi ai ma teteega i se lalolagi o loo pulea e Satani? O le tumau lava o lo tatou faamaoni, o le iai foʻi lea o i latou e ‘ofo ma faifai iā i tatou.’—1 Peteru 4:4.
20. O ā mea moni e faalaeiauina ai ua faamanatu mai iā i tatou?
20 O lona lua, ua tatou talitonu o le a lagolagoina i tatou e Ieova ma ana agelu. E pei ona fai mai Elisaia anamua, “e toʻatele ua iā te i tatou i ē ua iā te i latou.” (2 Tupu 6:16; Salamo 34:7) Atonu o se fuafuaga lelei ua faataga ai e Ieova omiga ma teteega e faaauau mo sina taimi. Ae i le taimi e tasi, na te foaʻi mai ma le lē aunoa le malosi e manaʻomia e mafai ai ona tumau. (Isaia 41:9, 10) O nisi ua uma ai o latou soifua, ae e lē o se mea e tatou te faanoanoa ai. Na fetalai Iesu: “Aua foʻi tou te matataʻu i ē fasioti le tino, a e latou te lē mafaia ona fasioti le agaga; a e lelei ona outou matataʻu i lē ua mafai ona fano iā te ia le agaga atoa ma le tino i Kena.” (Mataio 10:16-23, 28) O i tatou ua na o ni “tagata aumau” i lenei faiga o mea. E tatou te faaaogā o tatou taimi i inei e ‘fetagofi atu ai i le ola moni lava,’ le ola e faavavau i le lalolagi fou a le Atua. (1 Peteru 2:11; 1 Timoteo 6:19) E leai se tagata e mafai ona faoa lenā taui mai iā i tatou a o tatou tumau i le faatuatua i le Atua.
21. O le ā e ao ona tatou manatua e lē aunoa?
21 O lea la, seʻi tau ina manatua pea le faiā tau tele ua iā i tatou ma Ieova le Atua. Seʻi o tatou talisapaia e lē aunoa faamanuiaga i le avea ma soo o Keriso ma avea ma tagata nuu o le Malo. Seʻi o tatou alolofa ma le loto atoa i ō tatou uso, ma ia tatou olioli e lē aunoa i le alofa ua tatou maua mai iā i latou. Ae sili atu i lenā, seʻi o tatou utagia upu a le fai salamo ua faapea mai: “Inā faatalitali atu ia iā Ieova, inā loto tele ia, e faamalosia foʻi e ia lou loto; inā faatalitali lava ia iā Ieova.” (Salamo 27:14; Isaia 54:17) Ona avea ai lea o i tatou, e pei o le toʻatele o Kerisiano na muamua iā i tatou, o le a tumau mausalī ma lo tatou faamoemoe mautinoa—o ni Kerisiano faamaoni solitū o ē e lē ni o le lalolagi.
Pe Mafai Ona E Faamatala?
• E faapefea i la tatou faiā ma Ieova ona faaesea mai ai i tatou i lenei lalolagi?
• I le avea ma tagatānuu o le Malo o le Atua, e faapefea ona tatou tausia se tulaga solitū mai lenei lalolagi?
• O ā auala e tatou te solitū ma faaesea ai mai le lalolagi talu ai lo tatou alolofa i o tatou uso?
[Fesili mo le Suʻesuʻega]
[Ata i le itulau 15]
E faapefea i lo tatou gauaʻi i le Malo o le Atua ona aafia ai la tatou faiā ma le lalolagi?
[Ata i le itulau 16]
O se Hutu ma se Tutsi o loo galulue fiafia faatasi
[Ata i le itulau 17]
O uso Kerisiano Siū ma Arapi
[Ata i le itulau 17]
O Kerisiano Serbian, Bosnian, ma Croatian o loo olioli faatasi
[Ata i le itulau 18]
O le ā le gaoioiga saʻo e fai pe a poloaʻia i tatou e taʻitaʻi o malo e solia tulafono a le Atua?