Tatou te Manaʻomia Uma le Faamālō

O SE aso fiafia mo si teineitiiti. Sa lelei lava lana amio i lenei aso, peitaʻi o le tele o taimi e aʻoaʻia ai lava o ia. Ina ua oo i le taimi e moe ai i le pō, ua faalogo atu lona tinā o tagi. Ina ua fesili atu i ai pe aiseā ua faapela ai, na tagi masūsū si teineitiiti ma faapea ifo: “E ā, ou te leʻi teine lelei lava i lenei aso?”

Na matuā ootia lava faalogona o le tinā i le fesili a le teineitiiti. E faasaʻo lava e lenei tinā si ana tama teine i le tele o taimi. A o lea ua vaavaai atu i le taumafaiga a si ana tama e faaleleia lana amio, ae ua lē faamālō atu i ai.

Ua tutusa uma i tatou ma lenei teineitiiti, tatou te manaʻomia uma lava le faamālō ma le faamautinoaga e faapea, o loo alolofa mai isi iā i tatou. E faapena foʻi ona tatou manaʻomia uma aʻoaʻiga ma faasaʻoga.

O ā ni o tatou faalogona pe a faamālō mai isi iā i tatou mai i o latou loto? Pe e lē faamāfanafana ai ea o tatou loto ma aumai ai le fiafia? Ua tatou iloa ai o loo manatu mamafa mai isi iā i tatou. O loo faamautinoa mai ai e faapea sa alu lelei lo tatou malosi, ma ua uunaʻia ai i tatou e faaauau pea i na taumafaiga lelei. E masani lava ona tatou māfana atu iā i latou e faalaeiau mai.—Faataoto 15:23.

Na silafia lelei e Iesu le tāua o le faamālō atu i isi. I le faataoto i taleni, na faamālō atu ai ma le agalelei le alii (o loo faasino atu iā Iesu) i ana auauna faamaoni taʻitoʻatasi e toʻalua: “Ua lelei ia, le auauna lelei e, ma le faamaoni.” Maʻeu ni upu faamāfanafana loto! Na faamālō atu le alii i auauna uma e toʻalua, e ui lava na lē tutusa o la tomai ma a la taumafaiga.—Mataio 25:19-23.

Seʻi teu i o tatou mafaufau le tinā o le teineitiiti. Aua neʻi o tatou faatalitali seʻiloga e mafatia tele se tasi ona faatoʻā faamālō atu lea i ai. Ae seʻi o tatou taumafai e puʻepuʻe maua avanoa e faamālō atu ai i isi. Ioe, o se mea lelei ona tatou faamālō atu i isi i avanoa uma lava.