Fesili Mai le ʻAufaitau

Pe e tumau pea tautōga e fai i le Atua?

I le Tusi Paia, o se tautōga o se folafolaga lē fefoʻifoʻiaʻi i le Atua ina ia faia se gaoioiga, o le ofoina atu o se mea, o le ulu atu i se auaunaga faapitoa po o se tulaga, po o le taofia mai i le faia o ni mea e lē faapea o solia ai ni tulafono. O loo taʻua i le Tusi Paia ni tautōga e iai tuutuuga, o le tautō lea e faia se mea patino pe a fai muamua e le Atua se mea. Mo se faaaʻoaʻoga, o Hana le tinā o le perofeta o Samuelu, “ua ia tautō foʻi, ua faapea atu, Ieova o ʻau e, afai e te silasila mai i le puapuaga o lau auauna fafine, ma e manatu mai iā te aʻu, a e lē faagalogalo mai i lau auauna fafine, ma e foaʻi mai i lau auauna fafine se tama tane, ona ou foaʻi atu lea o ia iā Ieova i aso uma o lona ola; e le oo foʻi se tafi i lona ulu.” (1 Samuelu 1:11) O loo faamatalaina foʻi e le Tusi Paia ni tautōga e faia faatauofo. Pe e tumau pea tautōga i le Atua?

Na faapea mai le tupu o Isaraelu anamua o Solomona: “Pe a e tautō i se tautōga i le Atua, aua e te faatuai ona avatua.” Na ia toe faaopoopo mai e faapea: “Inā e faia le mea ua e tautō ai. E sili ona lelei ona e lē tautō, i lou tautō a e lē avatua.” (Failauga 5:4, 5) O le Tulafono iā Isaraelu na auala atu iā Mose ua faapea mai: “Afai e te tautō i se tautōga iā Ieova lou Atua, aua neʻi e faatuai ona avatu ai; auā e matuā suʻeina atu ai iā te oe e Ieova lou Atua; e fai lea ma agasala iā te oe.” (Teuteronome 23:21) E manino lava, o le faia o se tautōga i le Atua o se mataupu e ao ona manatu mamafa i ai. E ao ona faia i se māfuaaga tatau, ma o lē ua faia le tautōga e tatau ona lē masalomia lona mafaia ona faataunuuina. Auā afai e leai, e sili ai la ona aua le faia se tautōga. Ae afai e fai, pe e tumau uma na tautōga?

Ae faapefea pe a fai e se tasi se tautōga ae mulimuli ane ona iloaina e lē ōgatasi ma le finagalo o le Atua? Ae ā pe afai o se tautōga o le a fesootaʻi atu ai amioga lē mamā faaleituaiga i le tapuaʻiga moni? (Teuteronome 23:18) O le mea moni, o lenā ituaiga o tautōga e lē tumau. E lē gata i lenā, i lalo o le Tulafono a Mose, e mafai ona faalēaogāina se tautōga a se fafine e lona tamā po o lana tane.—Numera 30:3-15.

Seʻi manatu foʻi i se tautōga e fai e se tasi i le Atua faapea o le a lē faaipoipo ae mulimuli ane ua iai ni tulaga faigatā e oo iai. O lana tautōga ua tuuina ai o ia i se tulaga e ono oo ai i le solia o tapulaa tau amio a le Atua pe a faaauau pea. Pe e tatau pea ona ia tauivi e tausia lana tautōga? Pe o le a lē sili ea ona puipuia o ia mai le faia o amioga lē mamā, ae talosaga atu i le Atua mo lana faamagaloga ona ua lē taulau lana tautōga? Ua na o ia lava e faia lenā filifiliga. E leai lava se isi tagata e mafai ona faia le filifiliga mo ia.

Ae faapefea pe a fai e se tasi se tautōga ae ua ia iloa mulimuli ane ua faataalise ona ia faia lenā folafolaga? Pe e tatau pea ona taumafai e faataunuu lana tautōga? Sa leʻi faigofie iā Iefata ona faaauau lana tautōga na fai i le Atua, ae na ia faataunuuina ma le faamaoni. (Faamasino 11:30-40) O le lē taulau ona faataunuuina e se tasi o lana tautōga e ono iʻu ai i le “toʻasa” o le Atua ma faalēaogā mea ua faia  e lenā tagata. (Failauga 5:6) O le lē manatu mamafa i le faataunuuina o se tautōga e ono iʻu ai i le lē mauaina o le finagalo malie o le Atua.

Na fetalai mai Iesu e faapea: ‘A ia faapea la outou upu, Ioe o lona uiga Ioe; ma Leai, o lona uiga e Leai; auā o le upu e sili i na upu, mai le leaga lava ia.’ (Mataio 5:37) E tatau i se Kerisiano ona manatu mamafa e lē gata i le avatuina i le Atua o mea na tautō ai, ae ia faamaoni foʻi i ana upu—i le Atua faapea ma tagata. Ae ā pe afai ua oo se tasi i se tulaga faigatā ona o le faia o se maliega na foliga e lelei ma se isi tagata, ae ina ua toe vaʻiliʻili māeʻaeʻa mulimuli i ai, ua iloa o se mea sa lē tatau ona fai? E lē tatau ona ia manatu mamā i lenā mataupu. Peitaʻi, a uma ona la talanoa lelei, e ono malie la le isi tagata e faamatuu mai o ia mai na avega tauave.—Salamo 15:4; Faataoto 6:2, 3.

E faatatau atu i tautōga ma isi mea, o le ā e tatau ona tatou manatu mamafa i ai? Ia tatou taumafai pea lava e faatumauina se faiā lelei ma Ieova le Atua.

[Ata i le itulau 30, 31]

E leʻi faatalatū Hana e faataunuu lana tautōga

[Ata i le itulau 30, 31]

E ui e faigatā ona fai, ae na lotomalie Iefata e faataunuu lana tautoga