Ia Auauna Pea ma le Loto Gatasi
Ia Auauna Pea ma le Loto Gatasi
“O ona pō ia ou te liliu atu ai i nuu o le gagana lelei [“mamā, NW], ina ia latou valaau uma lava i le suafa o Ieova, ma auauna iā te ia ma le loto gatasi.” —SEFANAIA 3:9.
1. O le ā o loo tupu ona o le faataunuuina o le Sefanaia 3:9?
PE TUSA ma le 6,000 gagana o loo tautatala ai tagata i le lalolagi atoa. E ese mai i lenā, e iai foʻi vaega o gagana (dialect) e patino i nisi nofoaga o le lalolagi. Ae peitaʻi, e tusa pe tautatala tagata i gagana e sili ona eseese e pei o le faa-Arapi ma le faa-Zulu, ae ua faia e le Atua se mea e matuā mataʻina lava. Ua mafai ona ia aʻoaʻoina tagata i so o se nofoaga e tautatala i le gagana mamā e tasi. Ua tupu lenei mea ona o le faataunuuga o le folafolaga na ala mai i le perofeta o Sefanaia e faapea: “O ona pō ia ou te [Ieova le Atua] liliu atu ai i nuu o le gagana lelei [“mamā,” NW] [o lona uiga moni, “se laugutu mamā,”] ina ia latou valaau uma lava i le suafa o Ieova, ma auauna iā te ia ma le loto gatasi.”—Sefanaia 3:9.
2. O le ā le “gagana mamā,” ma o le ā le mea ua mafai ona ausia ai?
2 O le “gagana mamā” o le upu moni lea a le Atua i lana Afioga, le Tusi Paia. E taulaʻi faapitoa atu lenei upu moni i le Malo o le Atua, lea o le a faapaiaina le suafa o Ieova, faaeaeaina lana pule silisili ese ma aumaia faamanuiaga i le fanau a tagata. (Mataio 6:9, 10) Talu ai na pau lea o le gagana e mamā faaleagaga i le lalolagi, o loo tautatala ai tagata mai atunuu uma ma ituaiga eseese. Ua mafai ai ona latou auauna iā Ieova ma le “loto gatasi.” O lea ua latou auauna ai i le Atua “i le maliliega e tasi.”—The New English Bible.
E Lē Talia se Faailoga Tagata
3. O le ā ua mafai ai ona tatou auauna autasi iā Ieova?
3 I le avea o ni Kerisiano, ua tatou lotofaafetai i le agaga felagolagomaʻi o le ʻauuso e ui i le eseese o gagana e tautatala ai. E ui o loo tatou talaʻia le tala lelei o le Malo i le tele o gagana, ae o loo tatou auauna i le Atua ma le autasi. (Salamo 133:1) Ua mafaia lenei mea auā, po o fea lava o tatou nonofo ai, o loo tatou tautatala i le gagana mamā e tasi mo le viiaina o Ieova.
4. Aiseā e lē tatau ai i tagata o le Atua ona faailoga tagata?
4 E lē tatau ona faailoga tagata auauna a le Atua. Na faamanino lelei e le aposetolo o Peteru lenā manatu a o talaʻi atu i le aiga o le taʻitaʻiʻau o Nuu Ese o Konelio i le 36 T.A., ma na uunaʻia o ia e fai atu: “E moni, ua ou iloa e lē faailogaina tagata e le Atua; a e peitaʻi o lē mataʻu iā te ia i nuu uma lava, ma fai le amiotonu ua talia i latou e ia.” (Galuega 10:34, 35) Ona e moni lenā manatu, o le faapotopotoga Kerisiano la e lē o se nofoaga mo le faailoga tagata, se faiga vaega, po o le faaalia ai o le faaituʻau.
5. Aiseā e sesē ai le lagolagoina o le faia o faiga vaega i le faapotopotoga?
5 E tusa ai ma lana asiasiga i le Maota o le Malo, na faapea mai se teine aʻoga: “E masani lava i lotu ona faatosina mai sui o se ituaiga patino o tagata. . . . Ae o Molimau a Ieova e nonofo faatasi, ae lē i ni vaega faapitoa.” Peitaʻi, i Korinito anamua na amata ai e nisi o sui o le faapotopotoga ona fai ni vaega. O lo latou faia faapea, na māfua ai fevaevaeaʻiga, ma na latou tetee atu i gaoioiga a le agaga paia o le Atua, lea e faaauilumaina le autasi ma le filemu. (Kalatia 5:22) Afai tatou te faia ni vaega faapitoa i le faapotopotoga, o le a tatou tetee atu la i le taʻitaʻiga a le agaga. O lea, seʻi teu i manatu upu a le aposetolo o Paulo i le faapotopotoga i Korinito e faapea: “Le ʻau uso e, ou te ʻaiʻoi atu iā te outou i le suafa o lo tatou Alii o Iesu Keriso, ina ia tasi la outou upu uma lava, ina neʻi i ai ni maseiga iā te outou; a ia maopoopo lava i le loto e tasi ma le manatu e tasi.” (1 Korinito 1:10) Sa faamamafa foʻi e Paulo le autasi i lana tusi i uso i Efeso.—Efeso 4:1-6, 16.
6, 7. O le ā le fautuaga na avatu e Iakopo e faatatau i le faaituʻau, ma e faapefea ona faatatauina ana upu?
6 O le lē faailoga tagata, o se mea sa manaʻomia pea mai i Kerisiano. (Roma 2:11) Talu ai o nisi i le faapotopotoga i le uluaʻi senituri na faaalia le faaituʻau i ē mauʻoa, o lea na tusi ai Iakopo e faapea: “Oʻu uso e, aua tou te faailoga tagata i lo outou taofi i le mataupu o le faatuatua i lo tatou Alii mamalu o Iesu Keriso. Auā afai e ulu atu se tagata i la outou faapotopotoga ma ni mama auro i ona lima ma le ofu pupula, a e ulu atu ai foʻi se tagata mativa ma le ofu leaga, ona outou faaaloalo atu lea iā te ia ua ofu i le ofu pupula, ma faapea atu i ai, ‘Inā alaala ia oe i lenei mea lelei,’ a e fai atu i le tagata mativa, ‘Inā tū ia oe i inā,’ pe ‘Nofo ia i inei i lalo o le mea e tū ai oʻu vae,’ e lē ua filitaa ea outou iā te outou lava, ma outou fai ma faamasino e leaga o outou manatu?”—Iakopo 2:1-4.
7 Afai e ō mai ni tagata maumea lē talitonu ma ni mama auro ma ni ofu iila i sauniga faa-Kerisiano, faapea foʻi ma ni tagata matitiva e lē talitonu ma ni ofu palapalā, sa faapitoa le faiga o le ʻaumaumea. E alaala i latou “i mea lelei,” ae o ē e matitiva e fai atu i ai e tutū pe nonofo i lalo i le mea e tū ai vae. Ae na saunia ma le lē faailoga tagata e le Atua le taulaga togiola mo ē mauʻoa atoa ma ē matitiva. (Iopu 34:19; 2 Korinito 5:14) O lea, afai tatou te faafiafiaina Ieova ma auauna iā te ia ma le loto gatasi, e lē tatau la ona tatou faaalia le faaituʻau pe ‘faaneenee atu foʻi i alii e maua ai ni mea.’—Iuta 4, 16.
Ia Taumamao Mai le Muimui
8. O le ā na tupu ona o le muimui o le nuu o Isaraelu?
8 Ina ia tausia lo tatou autasi ma faaauau ona maua le finagalo malie o le Atua, e ao ona tatou utagia le fautuaga a Paulo e faapea: “Ia outou faia mea uma lava ma le lē muimui.” (Filipi 2:14, 15) O tagata Isaraelu lē faatuatua na faasaʻoloto mai i le faapologaina i Aikupito, na muimui faasaga iā Mose, Arona ma Ieova lava ia. Ona o lea tulaga, na lē ulu atu ai i le Nuu Folafolaina tane uma e taʻi 20 tausaga agaʻi i luga ae feoti i le vao a o faimalaga atu mo le 40 tausaga, seʻi vaganā ai Iosua, Kalepo ma le ʻau sā Levī. (Numera 14:2, 3, 26-30; 1 Korinito 10:10) Pagā se iʻuga o lo latou muimui!
9. O le ā na tupu iā Miriama ona o le muimui?
9 Ua faaalia i inei le mea e mafai ona tupu i se nuu atoa e muimui. Ae faapefea tagata muimui taʻitoʻatasi? Sa muimui le tuafafine o Mose o Miriama, faatasi ma lona tuagane o Arona e faapea: “Ua na o Mose ea ua fetalai mai ai Ieova? E lē o i maʻua foʻi ea ua fetalai mai ai o ia?” Ua faaopoopo atili mai le faamatalaga e faapea: “Ua faafofoga mai foʻi Ieova.” (Numera 12:1, 2) O le ā le iʻuga? O Miriama, o lē foliga mai na taʻimua i lenei faitioga, na faamaulaloina e le Atua. E faapefea? I le taia o ia i le lepela ma nofo i fafo o le togālauapi mo aso e fitu seʻia faamamāina.—Numera 12:9-15.
10, 11. O le ā e mafai ona iʻu i ai muimuiga e lē pulea? Ia faataʻitaʻi mai.
10 O le muimui e lē na o se faitioga e uiga i ni gaoioiga sesē. O i latou e faaauau pea ona muimui, ua faatāuaina naʻuā o latou lava faalogona po o tulaga, i le faauaʻi atu o manatu iā i latou na i lo o le Atua. Afai e lē pulea, e ono tupu mai ai ni feeseeseaʻiga i le va o le ʻauuso ma faalavelavea ai a latou taumafaiga e auauna iā Ieova ma le loto gatasi. E māfua lenei mea ona e masani lava ona faaleo atu e ē muimui a latou faitioga ma faamoemoe e lagolago i latou e isi.
11 Mo se faataʻitaʻiga, atonu e faitio se tasi i le auala e tauaaoina ai e se toeaina ana vaega i le faapotopotoga po o le auala e faatinoina ai ona tiute. Afai tatou te faalogologo atu i lē o faitio, atonu o le a amata ona tatou mafaufau pei o ia. I le taimi muamua a o leʻi faalogo atu i le faitioga, atonu sa lelei lava iā i tatou gaoioiga a le toeaina, peitaʻi o lea ua leaga i le taimi nei. Mulimuli ane, e so o se mea lava la a le toeaina e fai, o le a lē saʻo i la tatou vaai ma atonu o le a amata ona tatou faitioina o ia. O lenei ituaiga o amioga e lē talafeagai i le faapotopotoga o tagata o Ieova.
12. E mafai faapefea e le muimui ona aafia ai la tatou faiā ma le Atua?
12 O le muimui i tane o loo leoleoina le lafu mamoe a le Atua e ono taʻitaʻia atu ai i le upuleagaina o i latou. O le muimui po o le taufaaleaga o i latou e mafai ona faaleagaina ai la tatou faiā ma Ieova. (Esoto 22:28) O ē fai upu leaga e lē salamō, e lē fai mo latou tofi le Malo o le Atua. (1 Korinito 5:11; 6:10) Na tusi le soo o Iuta e uiga i ē muimui sa “taʻufaatauvaa i alii, ma upu leaga i ē ua mamalu,” po o tane o loo feagai ma avega tauave i le faapotopotoga. (Iuta 8) O ē muimui faapena e lē mauaina le faamaoniga a le Atua ma e atamai lo tatou ʻalofia o o latou ala leaga.
13. Aiseā e lē sesē ai faitioga uma?
13 Peitaʻi, e lē inosia e le Atua faitioga uma. Na ia amanaʻia le ‘alaga o le faitio’ e uiga iā Sotoma ma Komoro ma faaumatia na aai amioleaga. (Kenese 18:20, 21; 19:24, 25) I Ierusalema ina ua faatoʻā mavae lava le Penetekoso 33 T.A., “ua tupu ai le muimui o Elenisi iā Eperu, auā ua galo o latou fafine ua oti a latou tane i le tufatufaina o mea i aso fai soo.” O lea la, na foʻia ai “e le toʻatinoagafulu ma le toʻalua” lenei faafitauli e ala i le tofiaina o le “toʻafitu e taʻuleleia” ‘i lenei galuega’ o le faasoasoaina o mea taumafa. (Galuega 6:1-6) O toeaina i aso nei e lē tatau ona ‘punitia o latou taliga’ i ni faitioga talafeagai. (Faataoto 21:13) E na i lo le faitioina o uso tapuaʻi, e tatau i toeaina ona avea ma faalaeiauga ma ē e atiina aʻe isi.—1 Korinito 8:1.
14. Ina ia saʻoloto mai le muimui, o le ā le uiga e matuā manaʻomia?
14 E tatau iā i tatou uma ona saʻoloto mai le muimui, talu ai o le uiga faitio e faaleagaina ai faaleagaga. O lenā ituaiga o amioga e ono faavaatuʻia ai lo tatou autasi. Na i lo lenā, ia tatou faatagaina pea le agaga paia e fuaina mai iā i tatou le alofa. (Kalatia 5:22) I le usitaia o le ‘tulafono silisili o le alofa’ o le a fesoasoani lea iā i tatou e auauna pea iā Ieova ma le loto gatasi.—Iakopo 2:8; 1 Korinito 13:4-8; 1 Peteru 4:8.
Puipui Faasaga i le Taufaaleaga
15. E faapefea ona e faamatala le eseesega o le faitala ma le taufaaleaga?
15 Talu ai o le muimui e mafai ona taʻitaʻi atu ai i le faitala, e ao ai la ona tatou faaeteete i faamatalaga tatou te faia. O le faitala, o talanoaga faasamasamanoa e uiga i tagata ma a latou mea o fai. Ae o le taufaaleaga, o ni lipoti lē saʻo ia e fai ma le faamoemoe e faaleaga ai le talaaga lelei o se tasi. O na ituaiga o talanoaga e lē faale-Atua. O le mea lenā na fetalai atu ai le Atua iā Isaraelu e faapea: “Aua e te fealuaʻi i lou nuu ma ē feaveaveaʻi.”—Levitiko 19:16.
16. O le ā na taʻua e Paulo e uiga i nisi na faitatala, ma e faapefea ona aafia i tatou i lana fautuaga?
16 Talu ai o talanoaga faasamasamanoa e ono taʻitaʻia atu ai i le taufaaleaga, sa aʻoaʻia malosi ai e Paulo ni tagata faitatala. Ina ua uma ona ia taʻua fafine ua oti a latou tane e agavaa mo se fesoasoani a le faapotopotoga, sa ia faasino atu i fafine ua feoti a latou tane “e masani foʻi i latou ma le paiē, e feoaʻi i lea fale ma lea fale; e lē gata foʻi ina latou paiē, a e soona tautala, ma matamata fua i galuega a nisi, ma tautalatala i mea lē tatau.” (1 Timoteo 5:11-15) Afai e iloa e se fafine Kerisiano o lona vaivaiga o le faia o talanoaga e ono tataʻi atu ai i le taufaaleaga, e tatau ona ia utagia le fautuaga a Paulo ina ia “faamatuāfafine i latou, e lē ni faatuaupua.” (1 Timoteo 3:11) Ae, e ao foʻi i tane Kerisiano ona puipuia i latou mai le faitala e faaleagaina ai.—Faataoto 10:19.
Aua le Faamasino Atu!
17, 18. (a) O ā fā a Iesu e uiga i le faamasinoina o o tatou uso? (e) E faapefea ona tatou faatatauina fetalaiga a Iesu e uiga i le faamasino atu?
17 E tusa lava pe tatou te lē o taufaaleaga i se tasi, ae atonu e tatau ona tatou faia ni taumafaiga malolosi e ʻalofia le faamasinoina o isi. Sa taʻusalaina e Iesu lenā uiga i lona faapea mai: “Aua tou te faamasino atu, ina neʻi faamasinoina outou. Auā o le faamasinoga tou te faamasinoina atu ai, e faamasinoina ai outou; o le fua foʻi tou te fuaina atu ai, e toe fuaina mai ai iā te outou. Se ā le mea e te vaai atu ai i si fasi laau i le mata o lou uso, a e te lē iloa e oe le utupoto i lou lava mata? Pe faapefea foʻi ona e fai atu i lou uso, Tuu mai ia, soʻu ʻeu ese le fasi laau i lou mata; faauta foʻi, o i lou lava mata le utupoto? O oe na le tagata faafiaamiotonu, ia e muaʻi tiaʻi le utupoto i lou lava mata, ona e iloa lelei ai lea e ʻeueseina atu le fasi laau i le mata o lou uso.”—Mataio 7:1-5.
18 E lē tatau ona tatou ofo atu e ʻeueseina le tamaʻi “fasi laau” mai le mata o lo tatou uso ina ia fesoasoani iā te ia, ae e lē o mafai ona tatou faia ni faaiʻuga saʻo ona o loo nenefu la tatou vaai i se “utupoto” faafaatusa. O le mea moni, afai tatou te malamalama moni i le alofa mutimutivale o le Atua, o le a tatou lē mātele atu i le faamasinoina o o tatou uso ma tuafāfine faaleagaga. E faapefea ona tatou malamalama lelei iā i latou e pei o lo tatou Tamā i le lagi? E lētioa lapataʻi mai Iesu e ‘aua tatou te faamasino atu neʻi faamasinoina i tatou’! O le suʻesuʻe ma le faamaoni i o tatou lava tulaga lē lelei atoatoa, e ao ona taofia ai i tatou mai le faia o ni faamasinoga e lē tonu i le silafaga a le Atua.
E Vaivai ae Taʻuleleia
19. O le ā le vaaiga e tatau ona iā i tatou e faatatau i o tatou uso talitonu?
19 Afai tatou te maumauaʻi e auauna i le Atua i le loto gatasi ma o tatou uso talitonu, o le a lē na o le ʻalofia o le faamasinoina o isi e tatau ona faia. O le a tatou tausolomua e ava iā i latou. (Roma 12:10) O le mea moni, o le a tatou saʻilia lo latou lelei, ae lē o o tatou lava, ma fiafia e fai ni galuega maulalo mo i latou. (Ioane 13:12-17; 1 Korinito 10:24) E faapefea ona tatou tumau i na uiga lelei? E ala i le teu i manatu e faapea e tāua iā Ieova tagata talitonu uma ma e tatou te manaʻomia isi uso, e pei lava ona felagolagomaʻi itu tino o le tagata.—1 Korinito 12:14-27.
20, 21. O le ā le uiga o upu o loo i le 2 Timoteo 2:20, 21 mo i tatou?
20 E tatou te ioe o Kerisiano o ni ipu omea vaivai ua tuuina atu i ai se oloa matagofie, o le faiva lea. (2 Korinito 4:7) Afai o le a tatou faia lenei galuega paia mo le viiga o Ieova, e ao ona tatou tumau i se tulaga taʻuleleia i luma o ia ma lona Alo. O le a tumau ona faaaogā i tatou e le Atua o ni ipu omea taʻuleleia, pe a tatou tumau i le mamā tau amio ma le faaleagaga. E tusa ai ma lenei manatu, na tusi Paulo e faapea: “Ua lē na o ipu auro ma le ario ua i le fale tele, a o ipu laau ma omea; o isi ua taʻuleleia, a o isi ua taʻuleagaina. O lenei, ai se tasi e faamamā iā te ia ai nei mea ua taʻuleagaina, e fai o ia ma ipu e taʻuleleia, e faasāina, e aogā foʻi mo le alii, ua saunia mo galuega lelei uma.”—2 Timoteo 2:20, 21.
21 O ē e lē gaoioi e tusa ai ma mea o manaʻomia e le Atua, o i latou ‘o ipu ua taʻuleagaina.’ Peitaʻi, o le mulimuli i ala o le Atua o le a avea ai i tatou ‘ma ipu e taʻuleleia, e faasāina, pe ua tuuesea, mo le auaunaga iā Ieova ma ua saunia mo galuega lelei uma.’ O lea, e talafeagai ona fesili ifo iā i tatou lava: ‘Pe o aʻu o se “ipu ua taʻuleleia”? Pe o aʻu o se faataʻitaʻiga lelei i uso talitonu? Pe o aʻu o se sui o le faapotopotoga e galulue ma le loto gatasi ma uso tapuaʻi?’
Ia Faaauau Ona Auauna ma le Loto Gatasi
22. O le ā e ono faatusatusa i ai le faapotopotoga Kerisiano?
22 O le faapotopotoga Kerisiano e pei o se faatulagaga faaleaiga. O se aiga e tapuaʻi uma ona tagata iā Ieova, e iai i se tulaga matagofie, felagolagomaʻi ma fealofani. E ono faia aʻe se aiga i ni tagata e eseese uiga, ae e tāua uma i latou. E talitutusa lava lenā ma le faapotopotoga. E ui e eseese uma i tatou—ma e lē lelei atoatoa—ae ua tosina atu i tatou e le Atua iā te ia e ala iā Iesu Keriso. (Ioane 6:44; 14:6) E alolofa Ieova ma Iesu iā i tatou, ma e pei o se aiga autasi, e matuā manaʻomia ona tatou alolofa atu i isi o tatou uso.—1 Ioane 4:7-11.
23. O le ā e tatau ona tatou manatua ma maumauaʻi e fai?
23 O le faapotopotoga Kerisiano lea e pei o se aiga, e avea foʻi o se nofoaga e ao ona tatou faatalitalia le iai o le faamaoni. Na tusi le aposetolo o Paulo e faapea: “O loʻu manaʻo ia tatalo o tane i mea uma lava, o loo sisii i luga o lima lē agasala, ma ia lē ita, ma ia lē femisaʻi.” (1 Timoteo 2:8) Na faafesootaʻi atu e Paulo le faamaoni i le tatalo i le lautele ‘i mea uma lava’ e faapotopoto faatasi ai Kerisiano. E na o tane faamaoni e tatau ona avea ma sui o le faapotopotoga e faia tatalo i le lautele. Peitaʻi, e faatalitalia e le Atua i tatou uma ina ia faamaoni iā te ia atoa ma le tasi i le isi. (Failauga 12:13, 14) O lea, ia tatou maumauaʻi e galulue faatasi ma le autasi, e pei o itu tino o le tagata. Seʻi o tatou auauna autasi foʻi o se vaega o le aiga o tagata tapuaʻi o Ieova. Ae sili atu i lenā, ia manatua e tatou te manaʻomia isi o tatou uso ma o le a maua le finagalo malie o le Atua ma faamanuiaga pe a tatou faaauau ona auauna atu iā te ia ma le loto gatasi.
O le a Faapefea Ona E Tali?
• O le ā ua mafai ai e tagata o Ieova ona auauna iā te ia ma le loto gatasi?
• Aiseā e ʻalofia ai e Kerisiano le faailoga tagata?
• Aiseā e sesē ai le muimui?
• Aiseā e tatau ai ona tatou ava i uso talitonu?
[Fesili mo le Suʻesuʻega]
[Ata i le itulau 15]
Na iloa e Peteru e ‘lē faailoga tagata le Atua’
[Ata i le itulau 16]
E te silafia le pogai na faamaulalo ai e le Atua Miriama?
[Ata i le itulau 18]
O Kerisiano faamaoni e auauna fiafia iā Ieova ma le loto gatasi