“Ia Outou ō Mai iā te aʻu, . . . o aʻu Foʻi e Mālōlō ai Outou”

“Ia Leoleo le Lafu Mamoe a le Atua”

Na faapea atu Pamela i toeaina: “E tou te iai pea e faalogologo lelei mai ma aumaia upu mai le Tusi Paia e faalaeiauina ai i matou.”

Na faapea atu Ropati: “Faafetai mo mea uma ua outou faia mo i matou uma. Ua matuā aogā tele lava iā i matou.”

NA UUNAʻIA Pamela ma Ropati e tusi mai nei upu e faaalia ai lo la talisapaia o toeaina Kerisiano o a la faapotopotoga. Ua faaalia foʻi e isi auauna a le Atua i le lalolagi aoao le lotofaafetai ona o le faaauau pea o le lagolagosua ma le tausiga a i latou o loo “leoleo i le lafu mamoe a le Atua.” (1 Peteru 5:2) O le mea moni, e matuā lotofaafetai tagata o Ieova mo le tele o mea ua faia e toeaina mo i latou ma le auala o latou faia ai na mea.

“Tele Mea e Fai”

E anoanoaʻi tiute tauave ua tuuina atu i toeaina Kerisiano. (Luka 12:48) E latou te sauniunia lauga mo sauniga a le faapotopotoga, ma faia se sao i le talaʻiina o le tala lelei o le Malo o le Atua i tagata lautele. E aofia ai i a latou tiute le faia o asiasiga faaleoleo mamoe i uso talitonu. E faaalu e toeaina le taimi iā i latou o iai ni manaʻoga faapitoa, aemaise tagata matutua ma isi o loo manaʻomia se fesoasoani. Ma e faia nei mea uma e aunoa ma le faagaloina ai o le lelei faaleagaga ma le faaletino o o latou lava aiga. (Iopu 29:12-15; 1 Timoteo 3:4, 5; 5:8) E fesoasoani foʻi nisi toeaina i le fausiaina o Maota o le Malo. O isi o loo auai i le Komiti o Fesootaʻiga Faafomaʻi pe e avea foʻi ma sui o Vaega e Asiasi i Tagata Mamaʻi. Ma o le toʻatele o i latou e faia galuega tauofo i fonotaga ma tauaofiaga. O le mea moni, o toeaina, e “tele mea e fai i le galuega a le Alii.” (1 Korinito 15:58, NW ) E lētioa ona matuā talisapaia toeaina galulue malolosi e i latou o loo i lalo o la latou tausiga!—1 Tesalonia 5:12, 13.

Ua avea ma faalaeiauga le asiasi atu e lē aunoa o toeaina i aiga o uso Kerisiano ma isi nofoaga ina ia faamalosiau iā i latou. Na faapea mai Tomasi o lē na ola aʻe e aunoa ma se tamā i le aiga, “Ana lē seanoa le lagolagosua alofa ma faalaeiauga mai toeaina, semanū, e pe nei ou te lē o auauna iā Ieova o se faifeʻau faataimi atoa.” Ua faailoa mai e le toʻatele o talavou na ola aʻe i aiga e taʻitoʻatasi mātua e faapea, o le uaʻi mai o toeaina iā i latou, na fesoasoani i le atiina aʻe o se faiā totino ma le Atua.

E matuā talisapaia foʻi e tagata ua matutua i le faapotopotoga ia asiasiga faaleoleo mamoe a toeaina. Ina ua uma ona asiasi atu ni toeaina se toʻalua i se ulugalii misionare matutua ua tusa ma le taʻi valusefulu lima o la tausaga, na tusi atu i laʻua: “E ma te fia faailoa atu lo ma talisapaia  o la oulua asiasiga. Ina ua lua ō ese atu, na ma toe faitauina ia mau ia na tatou talanoaina. E lē galo lava iā i maʻua a oulua upu faalaeiau.” Na tusi atu se fafine ua oti lana tane e 70 ona tausaga i toeaina: “Sa ou tatalo lava iā Ieova mo se fesoasoani, ma ua ia aauina mai oulua, i loʻu fale. Ua avea la oulua asiasiga o se faamanuiaga mai iā Ieova!” Pe na e maua ni aogā i se asiasiga talu ai nei a toeaina i lau faapotopotoga? E tatou te taufai talisapaia uma lava a latou taumafaiga e leoleo le lafu mamoe a le Atua o loo latou tausia!

O Leoleo Mamoe e Faataʻitaʻi i le Atua ma Keriso

O Ieova, o le Leoleo Mamoe alofa. (Salamo 23:1-4; Ieremia 31:10; 1 Peteru 2:25) O Iesu Keriso foʻi, o se Leoleo Mamoe mataʻiina faaleagaga. O le mea moni, ua taʻua o ia o “le leoleo mamoe lelei,” “le Leoleo mamoe sili,” ma “le Leoleo mamoe silisili.” (Ioane 10:11; Eperu 13:20; 1 Peteru 5:4) Na faapefea ona feutagaʻi Iesu ma i latou na mananaʻo e avea ma ona soo? Sa ia valaaulia ma le māfana i latou: “Ia outou ō mai iā te aʻu, o outou uma o ē tigāina ma mafatia i avega, o aʻu foʻi e mālōlō ai outou.” —Mataio 11:28.

Ua faapena foʻi ona tauivi toeaina i aso nei ina ia avea ma puna e mālōlō ai ma puipuia le lafu. Ua avea na tane ma “lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foʻi o le papa tele i le nuu ua lē o i ai se vai.” (Isaia 32:2) Ua tatau ai ona faaaloalogia e le lafu mamoe na leoleo agalelei ua pei o ni mea e mālōlō ai, ma maua ai le finagalo malie o le Atua.—Filipi 2:29; 1 Timoteo 5:17.

Lagolagosua Tāua Mai a Latou Avā

E faaalia e tagata o le Atua le lotofaafetai i toeaina Kerisiano faapea le lagolagosua alofa a a latou avā iā i latou. O le lagolagosua, e masani lava ona manaʻomia ai ni faataulagaina e faia e na fafine. I nisi taimi, e nonofo ai i latou i le fale a o ō atu a latou tane mo le faatinoina o mataupu faalefaapotopotoga po o le faia o asiasiga faaleoleo mamoe. I nisi taimi, e faataatitia ese ai ni a latou lava fuafuaga tāua ona ua tulaʻi mai ni faafitauli faafuaseʻi i le faapotopotoga. Na faapea mai Michelle: “E ui lava la ina ou iloa le pisi o laʻu tane e sauniuni mo sauniga pe faia asiasiga faaleoleo mamoe, ou te manatua pea o loo ia faia le galuega a Ieova, ma ou te taumafai lava ou te lagolagosua i le mea ou te mafaia.”

Na taʻua foʻi e Cheryl, o lē ua faaipoipo i se toeaina e faapea: “Ou te iloa e manaʻomia e uso ma tuafāfine i le faapotopotoga ia toeaina e talanoa atu i ai, ma ou te manaʻo ia latou lagona e mafai ona ō mai i laʻu tane i so o se taimi e latou te manaʻomia ai o ia.” Ua faia ma le lotomalie e nei fafine o loo lagolagosua e pei o Michelle ma Cheryl ni faataulagaina ina ia mafai ai e a latou tane ona tausia mamoe a le Atua. E talisapaia lava avā a toeaina ona o lo latou uiga lagolagosua.

Peitaʻi, e lē tatau ona avea le pisi o se toeaina ma auala e lē amanaʻia ai manaʻoga faaleagaga ma isi manaʻoga o lana avā ma le fanau. E tatau i se toeaina ua faaipoipo ona “lē mataʻuleagaina, o le tane a le fafine e toʻatasi, o i ai ana fanau e faatuatua, e leʻi taʻua i latou ua ulavavale pe soli i tulafono.” (Tito 1:6) E tatau ona ia tausia lona aiga i le amioatua faale-Tusi Paia lea e manaʻomia mai e ovasia Kerisiano.—1 Timoteo 3:1-7.

E tāua tele i se toeaina e tele galuega e fai le lagolagosua a se avā! O lagona na o toeaina magafagafa ua faaipoipo. E pei lava ona taʻua i le Tusi Paia: “O lē ua maua le avā, ua maua e ia le mea lelei.” (Faataoto 18:22) E faailoa atu e na toeaina i a latou avā le matuā talisapaia e ala i upu ma gaoioiga. E lē gata i tatalo faatauanau ma le suʻesuʻe fiafia faatasi, ae ua faataatitia ese foʻi e nei ulugalii Kerisiano se taimi e olioli ai i mea e pei o le savalivali i se matafaga, feoaʻi i le togāvao, pe evaeva i se paka. O le mea moni, e fiafia toeaina e tausia ma le alofa a latou avā.—1 Peteru 3:7.

O toeaina o ē e leoleo ma le lē manatu faapito le lafu mamoe a le Atua, ua avea ma puna e mālōlō ai faaleagaga tagata o Ieova. O i latou moni o “mea alofa i tagata,” o se faamanuiaga i le faapotopotoga!—Efeso 4:8, 11-13.