Pe Tatou te Manaʻomia Maota mo Tapuaʻiga?

‘Sa matuā faatumulia le faapaologa o le falesā ma magāala o siʻomia ai i le faitau afe o tagata lotu o laʻei i ofu felanulanuaʻi ua faimalaga mai i vaega eseese o le atunuu, o tagata Initia o loo sisiva i le paʻō o tagipalau i siva anamuā a Sipaniolo, ma tagata mapolotu o loo taumafai malolosi e ō tootutuli i luma o le falesā.’

O LE faamatalaga lenā a le nusipepa El Economista e faatatau i le motu o tagata e toʻatele sa iai iā Tesema 2001. E pe ā ma le tolu miliona tagata na asiasi atu i le falesā i le aai o Mekisikō, e faaali ai lo latou faaaloalo i le Taupou o Guadalupe. E faitau afe tagata e asiasi atu foʻi i isi falesā tetele, e pei o le Falesā o Sagato Peteru i Roma.

O le tele o tagata o naunau e tapuaʻi i le Atua, latou te vāai i falesā o se nofoaga tāua ma o se maota e faaaloalogia. Ua faapea mai Maria mai Pasili, “o le falesā o se nofoaga e mafai ona ou faalatalata ai i le Atua. O se maota paia. Na iā te aʻu le vaaiga faapea o le auai i le lotu e faamamāina ai le agaga ma o se agasala le lē auai i le Misasā ma le kofesio i Aso Sa uma.” Sa faamatala e Consuelo mai Mekisikō e faapea: “E faagaeetia loʻu nei tagata i le alu atu i le falesā, o le pogai lenā e tāua tele ai iā te aʻu. Sa pei ua ou oo i le lagi pe a ou iai i le falesā.”

E ui lava e tāua falesā i isi tagata, ae ua tau masalosalo isi pe faamata e manaʻomia moni na maota ina ia fai ai tapuaʻiga. E tusa ai ma le toʻaitiiti o tagata e ō i lotu, na taʻua e se patele Katoliko i Egelani e suafa iā Peter Sibert e faapea: “E filifili e tagata vaega o aʻoaʻoga a le lotu e latou te fiafia i ai. O le toʻatele o tagata matutua e lotu Katoliko ma e faamaoni tele i mea o fai mai ai le lotu, ae ua lē faapena le faamaoni o le ʻautalavou i aso nei.” Na mātauina e le nusipepa o le Daily Telegraph o Novema 20, 1988 i Lonetona: “Mai le 1979, e tusa ma le 1,500 falesā na  tapunia i Egelani, ae e na o le 495 falesā na tatalaina ma le 150 na toe faafou.”

I le 1997 na lipotia ai e le nusipepa Süddeutsche Zeitung i Siamani e faapea: “Ua liua falesā e avea ma faletifaga ma fale e mautotogi ai tagata: Ua lē toe auai tagata tapuaʻi i lotu, ma ua lē toe faaaogāina falesā e faia ai lotu. . . . Ua faapena foʻi le tulaga ua oo i falesā i Siamani, e pei o le tulaga masani ua oo i falesā i Holani ma Egelani. Ma i ni nai tausaga ua tuanaʻi i Siamani, e pe ā ma le 30 i le 40 falesā ua toe faatauina atu.”

Pe e manaʻomia ea falesā e tapuaʻi atu ai i le Atua? Pe faamata o faavae fausaga o malumalu ma falesā tetele, i mea o fai mai ai le Tusi Paia? O ā ituaiga o maota na faaaogā i le tapuaʻiga i le Atua moni o loo soifua? O ā ni mea e mafai ona tatou aʻoaʻoina mai maota nei e tusa ai ma nofoaga e faia ai le tapuaʻiga i le Atua, ma o ā mea e tatau ona fai i totonu o na maota?