Taumafaiga ua Faaauiluma ai Tapulaa o Amioga Lelei

I le faaiʻuiʻuga o le 2001, na faalogoina ai e i latou na faalogologo i le faasalalauga a le faleualesi faasalalau a le malo o Mozambique le faasilasilaga lenei:

“Na asiasi atu le peresitene o le malo i fale o le lālā o Molimau a Ieova i Maputo. Sa ia faamalosiau atu i lenei faapotopotoga faalelotu ina ia faateleina a latou taumafaiga e siitia ai tapulaa o amioga lelei i aiga, ma i le aʻoaʻoina o tagata matutua e ala i la latou polokalame e aʻoaʻo ai le faitau ma le tusitusi. E tusa ma le 10,000 tagata ua mauaina aogā mai nei polokalame. E tusa ma le faamatalaga a le peresitene o Chissano, e tatau lava ona faamālō atu i nei taumafaiga, ona o se sao tāua lenei i le foʻiaina o le faafitauli tau aʻoaʻoga lea o loo fesagaʻi pea ma lenei atunuu.”

Na faaauau mai le faasalalauga i upu nei na puʻeina o le lauga a le peresitene: “O se mea e matuā faalaeiauina ai i matou i le vaai atu o loo naunau le toʻatele o tagata e aʻoaʻoina le faitau ma le tusitusi. Ua faailoa mai ai e lenei mea iā i tatou e faapea, o le a fesoasoani tagata o lo tatou lava atunuu iā i tatou ina ia faateleina tagata e iloa faitau ma tusitusi. O le mea lea ou te fia faalaeiau atu ai i Molimau a Ieova ina ia faamalosia la latou polokalame o le aʻoaʻoina o tagata ia iloa faitau ma tusitusi, po o le ā lava le gagana. O le mea e sili ona tāua, ona ua iloa e tagata faitau ma tusitusi, ua faigofie ai ona fesootaʻi, ma tele ai se sao e auai ai i aʻoaʻoga i le lumanaʻi.”

E 850 nofoaga i le atunuu atoa, e faia ai e Molimau a Ieova i Mozambique ia vasega e aʻoaʻo ai le faitau ma le tusitusi ina ia mafai ai e tagata ona faitau e i latou lava le Afioga a le Atua. E lē gata i lea, e 50,000 suʻesuʻega faale-Tusi Paia e latou te faia i le vaiaso e aunoa ma se totogi. O nei gaoioiga uma, o se vaega lea o le polokalame o aʻoaʻoga faale-Tusi Paia i le lalolagi aoao lea ua oo atu nei i atunuu e 235. (Mataio 24:14) E mafai foʻi ona aogā mo oe lava lenei polokalame. Faamolemole aua le faatalatū e faafesootaʻi atu Molimau a Ieova i lou vaipanoa.