Fesili Mai le ʻAufaitau

Faamata e tatau ona tatou faia se faaiʻuga mai le Faaaliga 20:8 faapea o le a iai ni tagata e matuā toʻatele lava o le a faasesēina e Satani i le tofotofoga mulimuli?

O loo faamatalaina i le Faaaliga 20:8 le osofaʻiga mulimuli a Satani i tagata o loo nonofo i le lalolagi i le iʻuga o le pulega e afe tausaga o le Malo Faa-Mesia. E faatatau iā Satani, ua faapea mai le fuaiupu: “E alu atu foʻi o ia e faasesē i nuu o i itu e fā o le lalolagi, o Koku ma Makoku, e faapotopoto iā te i latou i le taua, ua pei o le oneone o le sami i latou ona toʻatele.”

E ui ina maoaʻe auala ma masini faasaienisi, ae e lē o mafai lava ona faitaulia “o le oneone o le sami.” O lea, e mafai ona tatou faapea atu o lenei faaupuga o loo suitulaga i se fuainumera e lē iloa ma e lē mautinoa. Ae pe e uiga atu ea i se fuainumera e matuā mataʻutia le telē, pe ua na o se fuainumera e lē o iloa ae e telē?

I le Tusi Paia, o le faaupuga “ua pei o le oneone o le sami” ua faaaogāina i le tele o auala. Mo se faaaʻoaʻoga, i le Kenese 41:49, tatou te faitau ai: “E tele lava saito na faaputuina e Iosefa pei o le oneone i le sami, ua iʻu ina tuua o le faitau, auā ua le masino lava.” O loo faamamafa i inei le lē mafaitauina. E faapena foʻi le fetalaiga a Ieova faapea: “E pei ona lē mafaitauina o ʻau a le lagi, ma ona lē mafuatia le oneone o le sami; e faapea ona ou faatoʻateleina o le fanau a Tavita laʻu auauna.” E pei lava ona mautinoa le lē mafaitaulia o fetu o le lagi ma oneone o le sami, e faapena le mautinoa o le faataunuuina o folafolaga a Ieova iā Tavita.—Ieremia 33:22.

E masani lava i le faaupuga “oneone o le sami” ona faasino atu i se mea e matuā uiga ese le telē. Sa matuā faapopoleina lava tagata Isaraelu i Kilikala e ʻau a Filisitia na faapotopoto i Mekemase lea na “pei o le oneone i le matafaga ona toʻatele.” (1 Samuelu 13:5, 6; Faamasino 7:12) E lē gata i lenā, “ua foaʻiina mai e le Atua iā Solomona le poto ma le loto matala e matuā tele lava, ma le loto e oo i mea e tele, e faapei o le oneone o i le matafaga.” (1 Tupu 4:29) E ui o mea ia na taʻua i mataupu taʻitasi e matuā tele lava, ae e faatapulaaina.

“O le oneone o le sami” e mafai foʻi ona uiga i se fuainumera e lē iloa, na i lo le faapea atu e telē. Na tulei atu Ieova iā Aperaamo e faapea: “Ou [te] matuā faatoʻateleina lava lau fanau e pei o fetu o le lagi, e pei o le oneone foʻi i le matafaga.” (Kenese 22:17) I le toe taʻua o lenei folafolaga iā Iakopo le atalii o le atalii o Aperaamo, sa faaaogā ai e Ieova le faaupuga “efuefu o le eleele,” lea na toe taʻua e Iakopo e pei “o le oneone i le sami.” (Kenese 28:14; 32:12) E pei ona aliaʻi mai, e ese mai iā Iesu Keriso, o le “fanau” a Aperaamo e toʻa 144,000, lea na taʻua e Iesu o le “lafu mamoe itiiti.”—Luka 12:32; Kalatia 3:16, 29; Faaaliga 7:4; 14:1, 3.

O le ā ua tatou aʻoaʻoina mai i nei faaaʻoaʻoga? O le faaupuga “e pei o le oneone o le sami” e lē uiga pea i se numera e lē mafaitaulia, po o se numera e matuā telē lava; e lē faaaogā foʻi i taimi uma e faamatalaina ai se mea e matuā lapoʻa. E masani ona suitulaga i se numera e lē iloa ae telē. O lea, e talafeagai ai ona tatou talitonu o le motu o tagata fouvale e lagolagoina Satani i lana osofaʻiga mulimuli o tagata o le Atua, e lē matuā mafaitaulia pe toʻatele, ae peitaʻi e lava lo latou toʻatele e ono faamataʻuina ai. Ae o le faitau aofaʻi e lē o iloaina tonu i le taimi nei.