Ia Faamalosia o Outou Lima

I LE Tusi Paia, e faitau selau taimi o loo taʻua ai le upu lima. O alagāupu e aofia ai le lima ua faaaogāina i auala eseese. O se faataʻitaʻiga, o lima mamā e faailoa mai ai le tulaga taʻu mamaina. (2 Samuelu 22:21; Salamo 24:3, 4) O le limamafola o lona uiga o le faaalia lea o le agalelei i isi. (Teuteronome 15:11; Salamo 145:16) O se tasi ua tuu e ia lona lava ola i se tulaga e lamatia ai, e tusa ua i ona lava lima lona ola. (1 Samuelu 19:5) O le tuuina i lalo o lima o se tasi o lona uiga ua ia faavaivai. (2 Nofoaiga a Tupu 15:7 ) O le faamalosia o lima o se tasi o le faalototeleina lea mo ni gaoioiga.—1 Samuelu 23:16.

I aso nei ua iai se manaʻoga faanatinati ina ia faamalosia o tatou lima. Ua tatou ola nei i “aso e gata ai e oo mai ai aso faigatā.” (2 Timoteo 3:1) Pe a oo ina tatou lotovaivai, o le faanaunauga faaletagata o le tuu loa, e pei lenā ua tuu i lalo o tatou lima. O se vaaiga e masani ai le lē toe aʻoʻoga o le ʻautalavou, o tane ua tuua o latou aiga, ma tinā ua lafoaʻia a latou fanau. I le avea ma Kerisiano, tatou te manaʻomia ai ona faamalolosi o tatou lima ina ia mafai ai ona tatou tumau i tofotofoga tatou te fetaiaʻi i la tatou auaunaga i le Atua. (Mataio 24:13) O le faia faapea, ua tatou faafiafiaina ai le finagalo o Ieova.—Faataoto 27:11.

Le Auala e Faamalosia ai Lima

Sa manaʻomia e tagata Iutaia i aso o Esera ona faamalolosi o latou lima ina ia faaumaina le toe fausia o le malumalu o Ieova i Ierusalema. Sa faapefea la ona faamalosia o latou lima? Ua fai mai le faamatalaga: “[Na] latou faia le tausamiga o areto e lē faafefeteina i aso e fitu ma le fiafia; auā sa faafiafiaina i latou e Ieova, na ia liliu foʻi le loto o le tupu o Asuria iā te i latou e faamalolosi ai o latou lima i le faiga o le fale o le Atua, o le Atua o Isaraelu.” (Esera 6:22) E manino mai, o le malosi galue o Ieova sa uunaʻia ai le “tupu o Asuria” e faataga tagata o le Atua e toe foʻi, ma na Ia faaosofia ai le loto naunau o tagata e faamaeʻa le galuega sa latou amataina.

Mulimuli ane, ina ua toe fausia pa o Ierusalema, sa faamalosia e Neemia lima o tagata Iutaia mo le galuega. Tatou te faitau ai e faapea: “Ua ou taʻu atu foʻi iā te i latou i le aao o loʻu Atua sa lelei lava i luga iā te aʻu, atoa ma upu a le tupu na ia fai mai iā te aʻu. Ona faapea mai lea o i latou, Inā tulaʻi ia, inā tatou faia ia. Ona latou faamalolosi ai lea i lenei galuega lelei.” Sa mafai e Neemia ma tagata Iutaia ona toe fausia pa o Ierusalema i le na o le 52 aso ona o le faamalolosi o o latou lima!—Neemia 2:18; 6:9, 15.

O le auala lava foʻi lenā, o loo faamalosia ai e Ieova o tatou lima ina ia talaʻia le tala lelei o le Malo. (Mataio 24:14) Ua ia faia faapea e ala i le ‘faaatoatoaina o i tatou i galuega lelei uma lava ina ia faia lona finagalo.’ (Eperu 13:21) Ua ia saunia mo i tatou meafaigaluega e silisili ona lelei. Ua iā i tatou le Tusi Paia ma lomiga faale-Tusi Paia, o mekasini, polosiua, sāvali, o kaseti puʻe leo ma vitiō ina ia faaoo atu ai le feʻau i tagata i le lalolagi aoao. O le mea moni e sili atu i le 380 gagana  ua lomia ai a tatou lomiga. E lē gata i lea, e ala i sauniga a faapotopotoga, fonotaga, ma tauaofiaga, ua saunia ai e Ieova aʻoaʻoga ma toleniga faale-Atua i le auala tatou te faaaogāina ai nei sauniuniga matagofie i le faataunuuina o la tatou faiva.

E ui lava o loo faamalosia e Ieova o tatou lima i le tele o auala, ae na te faatalitalia foʻi i tatou ia faamalolosi. Seʻi mātau mai le mea sa taʻu atu e le perofeta o Elisaia i le tupu o Ioasa, ina ua sau iā te ia mo se fesoasoani e tau faasaga iā Suria. Ona fai atu ai lea o Elisaia i le tupu ina ia tago i ū ma sasa i le eleele. Ua fai mai le Tusi Paia: “Ona sasa ai lea e ia faatolu, ona tuua ai lea. Ona ita ai lea iā te ia o le tagata o le Atua; ua faapea atu ai, Ana e sasa faalima pe faaono po o pe na e te fasia Suria seʻia e faaumatia ai; ao lenei, na o le faatolu e te fasia Suria.” (2 Tupu 13:18, 19) Ona e leʻi faaalia lona filigā, e leʻi atoatoa le manumalo o Ioasa i le taua ma Suria.

E mafai foʻi ona faatatau le mataupu silisili lea iā i tatou pe afai tatou te mananaʻo e faataunuu le tofiga na aumaia e Ieova iā i tatou e fai. Na i lo le soona popole i faafitauli o loo tatou fesagaʻia, po o le manatu foʻi faapea e faigatā se tofiga, e tatau ona tatou faia ma le maelega ma le lotoatoa. E manaʻomia ona faamalolosi o tatou lima ma faalagolago atu iā Ieova mo se fesoasoani.—Isaia 35:3, 4.

O le a Faamalosia e Ieova o Tatou Lima

E mautinoa le fesoasoani mai o Ieova ma faamalosia o tatou lima e faia lona finagalo. O le mea moni, o le a ia lē toe faia ni vavega pe faia mea uma lava mo i tatou. Na te faatalitalia i tatou e fai la tatou vaega, o le faitauina o le Tusi Paia i aso taʻitasi, sauniuni ma le auai e lē aunoa i sauniga, auai i le faiva i le tele e mafai ai, ma tatalo e lē aunoa iā te ia. Pe afai tatou te fai la tatou vaega i le filigā ma le faamaoni a o maua le avanoa, o le a aumaia e Ieova le malosi tatou te faia ai le mea o loo ia faatalitalia mai iā i tatou.—Filipi 4:13.

Seʻi manatu i le mea na tupu i se Kerisiano o lē na maliliu lana avā ma lona tinā i le tausaga e tasi. A o faavauvau pea o ia ae tuua loa e le avā a lona atalii lona atalii ma lafoaʻia le ala faa-Kerisiano. Ua faapea mai lenei uso: “Ua ou iloaina nei e lē mafai ona tatou filifilia ni o tatou lava tofotofoga, po o afea o le a tutupu ai, ma pe faafia foʻi ona oo mai.” Sa faapefea ona ia maua le malosi e faaauau ai? “O le tatalo ma suʻesuʻega totino sa pei o se ofu faasao ola na mafai ai ona ou manumalo. O le lagolagosua foʻi a oʻu uso ma tuafāfine Kerisiano sa faamāfanafanaina ai aʻu. E laualuga i mea uma lava, ua ou iloa ai le tāua o le ati aʻe o se faiā lelei ma Ieova a o leʻi oo i tulaga faigatā.”

Po o le ā lava le mea e tupu i le olaga, ia maumauaʻi e tuu atu lo tatou faatuatua atoatoa iā Ieova ma faaaogā tatau sauniuniga ua ia faia mo le faamalosiaina o o outou lima. O le a mafai ai ona e avatu le auaunaga sili ona lelei iā Ieova ma o le a viia ma faamamaluina ai lona suafa.—Eperu 13:15.

[Ata i le itulau 31]

Ona e leʻi faaalia lona filigā, e leʻi atoatoa le manumalo o Ioasa i le taua ma Suria