Ia Foaʻi Atu Au Mea Uma

“OU TE lē popole lava pe e te taʻua aʻu o se tagata ʻaisi. O lea ou te ʻaisi mo Iesu.” O upu na a se faifeʻau Porotesano, ua faamatilatila ai se fefinauaʻiga o loo faia pea e faatatau i le faatupeina o lotu. E foliga mai, e na o le pau le auala o loo olaola ai lotu autū, o le tele o tupe. E manaʻomia ona totogi tagata, fauina ma le tausia o le tulaga lelei o falesā, ma le faatupeina o le galuega faaevagelia. E faapefea ona maua nei tupe uma e manaʻomia?

O le tele lava o lotu, e faalagolago i sefuluaʻi. * Ua faapea mai se faievagelia o Norman Robertson: “O le sefuluaʻi, o le auala lea a le Atua e faatupeina ai Lona Malo i le lalolagi. O Lana faatulagaga tau tamaoaiga lea ua mafai ai ona talaʻia le tala lelei.” E lē faatalatū o ia e faamanatu atu i ona soo e uiga i lo latou tiute tauave o le foaʻi atu, o lea na ia faamamafa mai e faapea: ‘O le sefuluaʻi, e lē o se mea e te faia ona e te gafatia, ae ona o le usiusitai. O le lē faia o se sefuluaʻi, o le solia tuusaʻo lea o poloaʻiga a le Atua. E tutusa lava lea ma le aveina o tupe e lē o ni au tupe ma faaaogā mo au lava fuafuaga.’—O le Sefuluaʻi—O le Fuafuaga a le Atua e Maua ai Tupe.

E lē taumatea, e te ioe o le foaʻi atu, e ao ona o se vaega o le tapuaʻiga faa-Kerisiano. Ae peitaʻi, po ua lē fai ea ma faalavelave, pe atonu e te lagona ai foʻi lou lē malie pe a talosaga soo atu mo ni tupe? Ua faitioina e le faifeʻau Pasili o Inácio Strieder ia lotu ona o le manatu i le sefuluaʻi e fai ma auala e “foʻia ai o latou faafitauli faalelotu” ma taʻua ai na faiga o se “mea sesē, o ni faiga faapiʻopiʻo, ma se faiga lē saʻo faalotu.” Ua ia faapea mai o le iʻuga o “tagata e leai ni galuega, o fafine ua oti a latou tane, o ē e lē lelei fale e nonofo ai, ma i latou e lē mafaufau lelei e faapea, ua tuulafoaʻiina i latou e le Atua, ma ua fai ma a latou avega tauave le foaʻi atu o le tele o tupe i ‘le faifeʻau’ ae e lē o lava mea e tausi ai o latou lava aiga.”

Atonu o le a e manatu e faapea: ‘Po o saʻo ona faatatauina le Tusi Paia e lotu ia latou te faamalosia le faia o le sefuluaʻi? Po o le mea ua faaaogā e nisi lotu ia o loo ʻaisi atu mo ni tupe le mataʻu i le faasalaga a le Atua e faoa ai mea mai mamoe? Pe e moni ea e faatalitalia i tatou e le Atua e foaʻi atu a tatou mea uma, e pei ona fai mai ai nisi?’

[Faamatalaga pito i lalo]