O le Taimi Sili Lenei e Soifua Ai

PE A fesagaʻi ma tulaga faigatā, pe e te toe moomoo ea “i aso lelei ua mavae”? Afai o le tulaga lenā, e lelei ona manatunatu i upu a le tupu poto o Solomona: “Aua e te faapea, Se ā le mea na sili ai ona lelei o ona pō anamua i nei ona pō? auā e lē o le poto ua e fesili ai i lea mea.”—Failauga 7:10.

Aiseā na aumaia ai e Solomona lea fautuaga? Talu ai sa ia iloa lelei o le iai o se vaaiga saʻo i aso ua mavae, o se fesoasoani aogā lea mo le faafetaiaʻia ma le manuia o tulaga faigatā o loo iai i le taimi nei. O ē o loo moomoo “i aso lelei ua mavae” atonu e galo iā i latou o aso foʻi la sa iai faafitauli ma faalavelave, ma sa lē lelei atoatoa le tulaga o mea sa iai. Atonu sa lelei atu nisi mea i aso ua mavae na i lo o aso nei, ae e foliga mai o isi foʻi mea sa lē lelei. E pei ona taʻua e Solomona e lē o se gaoioiga atamai le toe mafaufau i mea ua tuanaʻi, talu ai e lē mafai ona tatou toe faafoʻi i tua le tulaga o mea i le taimi sa iai muamua.

Pe e iai ea se afāina o le toe moomoo i taimi ua teʻa? Ioe, pe afai o le a faafaigatā ai ona tatou taumafai e faamasani i tulaga o mea o loo iai i le taimi nei, po o le lē talisapaia ai foʻi o le taimi o loo tatou ola ai ma le faamoemoe lea e mafai ona tatou maua.

O le mea moni, o le taimi sili lenei e soifua ai e ui i le faatuputupulaʻia o faafitauli i le lalolagi. Aiseā? Ona ua tatou tulata atu nei i le faataunuuina o fuafuaga a le Atua i lo tatou lalolagi ma faamanuiaga o le a maua i lalo o le pulega filemu a lona Malo. Ua folafola mai e le Tusi Paia e faapea: “E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.” (Faaaliga 21:4) O lea, i le tulaga e sili atu ona lelei o mea o le a iai, o le a lē toe iai se tasi e toe moomoo i “aso lelei ua mavae.”