Su‘esu‘ega Totino e Saunia i Tatou e A‘oa‘o Atu
Suʻesuʻega Totino e Saunia i Tatou e Aʻoaʻo Atu
“Ia e mafaufau i ia mea, ia e faamasani ai; ina ia iloa ai e tagata uma lou alualu i luma. Ia oe lava iā te oe, atoa ma lau e aʻoaʻo atu.”—1 TIMOTEO 4:15, 16.
1. O le ā le mea moni e faatatau i le taimi ma suʻesuʻega totino?
UA FAAPEA mai le Tusi Paia i le Failauga 3:1: “O le mea ma lona tausaga i mea uma.” E moni lenei manatu e faatatau i suʻesuʻega totino. E toʻatele tagata e faigatā ona mafaufau i mea faaleagaga pe afai e sesē le taimi po o le nofoaga e faia ai. Mo se faaaʻoaʻoga, pe a uma se galuega faigatā ma se taumafataga mamafa i le afiafi, pe o le a e manaʻo ea e faia ni suʻesuʻega, aemaise o lenā ua e saofaʻi i le nofoa e sili ona malūlū i luma o le TV? E mautinoa e leai. O le ā la le vaifofō? E manino mai le tatau ona tatou filifili po o afea le taimi e fai ai ma le nofoaga e suʻesuʻe ai ina ia maua mai ai aogā atoatoa.
2. O le ā le taimi e masani lava ona sili ona lelei e faia ai suʻesuʻega totino?
2 E toʻatele nisi e fiafia e suʻesuʻe i le taeaopō, i le taimi e sili ona latou mataala ai. O isi e faaaogā mālōlōga i le aoauli e suʻesuʻe puupuu ai. Mātau le taimi tāua mo gaoioiga faaleagaga i le faaaʻoaʻoga o loo mulimuli mai. Na faapea mai le tupu o Isaraelu o Tavita: “Ia ou faalogologo i lou alofa i le taeao; auā ou te faatuatua iā te oe; ia e faasino mai le ala ou te savali ai; auā o loo naunau atu loʻu loto iā te oe.” (Salamo 143:8) Sa iloa foʻi e le perofeta o Isaia le tāua o le suʻesuʻe: “Ua foaʻi mai iā te aʻu e le Alii o Ieova le laulaufaiva o ē ua aʻoaʻoina, ina ia ou iloa ona faamāfanafana i se upu lē ua tigāina; na te fagua aʻu i lea taeao ma lea taeao; na te fagua oʻu taliga, ina ia ou faalogologo e pei o ē ua aʻoaʻoina.” O le manatu autū, e manaʻomia ona tatou suʻesuʻe ma fesootaʻi ma Ieova i taimi o le aso e sili ona ala ai o tatou mafaufau.—Isaia 50:4, 5; Salamo 5:3; 88:13.
3. O ā tulaga e manaʻomia ona iai ina ia uigā ai suʻesuʻega?
3 O se isi vala ina ia uigā ai suʻesuʻega, e lē tatau ona tatou saofaʻi i se nofoa e sili ona malūlū po o se sofa. E lē o le auala lenei e tumau ai ona mataala. A o faia a tatou suʻesuʻega, e ao ona tiotio le mafaufau, ma e foliga mai e lē lelei se suʻesuʻe pe afai e te saofaʻi i se nofoa e matuā lelei ai lau nofo ma tautulemoe gofie ai. E manaʻomia foʻi ona iai i se nofoaga e lē pisa tele ma leai ni mea e tosina i ai a o faia suʻesuʻega ma manatunatuga loloto. E leai ni iʻuga lelei e maua pe afai e suʻesuʻe a o ola le leitiō ma le TV, po o le faalavelave ane foʻi o le fanau. Ina ua manaʻo Iesu e manatunatu loloto, sa ia maliu atu i se vaipanoa paganoa. Na ia taʻua foʻi le tāua o le iai o se nofoaga tuufua e tatalo ai.—Mataio 6:6; 14:13; Mareko 6:30-32.
Suʻesuʻega Totino e Saunia i Tatou e Tali Atu
4, 5. I ā auala ua aogā tele ai le polosiua o le Manaomia?
4 E maua le faamalieloto i suʻesuʻega totino pe a tatou faaaogā lomiga eseese faale-Tusi Paia ina ia saʻiliʻili loloto ai i se mataupu, aemaise pe afai o loo faia ina ia tali ai ni fesili a se tasi o loo fia iloa moni. (1 Timoteo 1:4; 2 Timoteo 2:23) E toʻatele i latou e fou mai ua amata i le suʻesuʻeina o le polosiua O le ā e Manaomia e le Atua Mai ia i Tatou?, * lea ua maua i gagana e 261. O se lomiga e faigofie, e tuusaʻo ona manatu, ma e faavae atoa i le Tusi Paia. E fesoasoani le polosiua i le ʻaufaitau ia vave malamalama ai i mea o manaʻomia e le Atua mo le tapuaʻiga moni. Peitaʻi, e lē o fuafuaina mo suʻesuʻega auʻiliʻili o mataupu taʻitasi. Afai e lāgā e lau tagata suʻesuʻe o le Tusi Paia ni fesili loloto e uiga i mataupu faale-Tusi Paia o loo talanoaina, e mafai faapefea ona e maua nisi faamatalaga faale-Tusi Paia o le a fesoasoani iā te ia e taliina na fesili?
5 Ua mauagofie le tele o faamatalaga i le komepiuta e i latou ua iai i a latou gagana le Watchtower Library i le CD-ROM. Ae faapefea tagata e leai ni komepiuta? Seʻi tatou iloiloina ni mataupu se lua i le polosiua o le Manaomia ma tagaʻi i le auala e faateleina ai lo tatou malamalama ina ia mafai ona avatu se tali auʻiliʻili, aemaise pe a fesili se tasi, Po o ai le Atua, ma na faapeʻī le ituaiga o tagata sa iai moni Iesu?—Esoto 5:2; Luka 9:18-20; 1 Peteru 3:15.
O Ai le Atua?
6, 7. (a) O le ā le fesili ua lāgā e uiga i le Atua? (e) O le ā le mea matuā tāua e leʻi taʻua e se faifeʻau i lana lauga?
6 Ua taliina e le Lesona 2 o le polosiua o le Manaomia le fesili tāua, O Ai le Atua? O lenei manatu ua avea ma aʻoaʻoga faavae, auā e lē mafai e se tagata ona tapuaʻi i le Atua moni pe afai e na te lē iloa pe taumasalosalo foʻi o loo soifua o Ia. (Roma 1:19, 20; Eperu 11:6) Ae, e lē mafaitaulia taofi eseese o tagata o le lalolagi i le po o ai le Atua. (1 Korinito 8:4-6) E tofu uma lava aʻoaʻoga faalotu ma tali eseese i le fesili po o ai le Atua. E tele lotu ua faapea mai o Kerisiano e manatu i le Atua o se Tolutasi. Na iai se faifeʻau taʻutaʻua i le Iunaite Setete na lauga i le matua “Pe E te Iloa le Atua?” Ae, a o faagasolo lana mataupu, e augapiu ma se taimi na ia taʻua ai le suafa o le Atua, e ui e tele taimi sa ia faitau ai mau mai Tusitusiga Eperu. Sa ia faaaogāina se faaliliuga o le Tusi Paia o loo iai le taʻu “Alii,” lea e lasi ona uiga ma e lē iloa po o ai e faasino atu i ai, na i lo le suafa Ieova po o Iauē.
7 Na misi i le faifeʻau se manatu matuā tāua ina ua ia sii mai le Ieremia 31:33, 34: “E lē toe aʻoaʻo atu foʻi le tagata i lē la te tuaoi, ma le tagata i lona uso, e faapea atu, Ia outou iloa le Alii [Eperu, “Iloa Ieova”]; auā e iloa aʻu e i latou uma lava, o tagata nuu atoa ma alii, o loo fetalai mai ai le Alii [Eperu, Ieova].” Sa ia faaaogāina se faaliliuga o loo aveesea ai le suafa iloga o le Atua, o Ieova.—Salamo 103:1, 2.
8. O le ā ua faaalia ai le tāua o le faaaogāina o le suafa o le Atua?
8 Ua faaalia i le Salamo 8:9 le māfuaaga tāua e ao ai ona faaaogā le suafa o Ieova: “Ieova e, lo matou Alii, e silisili lava lou suafa i le lalolagi uma lava.” Seʻi faatusatusa la le faaliliuga lenā ma lea: “Le ALII e, lo matou Alii, e silisili lava lou suafa i le lalolagi uma lava.” (Le Tusi Paia, Lomiga 1969) Ae, e pei ona taʻua i le mataupu na muamua atu, e mafai ona tatou maua le ‘poto o le Atua’ pe a faatagaina lana Afioga e faamalamalamaina i tatou. Peitaʻi, o le ā le lomiga faale-Tusi Paia o le a vave taliina a tatou fesili e faatatau i le tāua o le suafa o le Atua?—Faataoto 2:1-6.
9. (a) O lē fea lomiga e fesoasoani iā i tatou e faamatala le tāua o le faaaogāina o le suafa o le Atua? (e) Ua faapefea ona lē faaaloalo le toʻatele o tagata faaliliu i le suafa o le Atua?
9 E mafai ona faaaogā le tusi o Le Poto e Taʻitaʻia ai i le Ola e Faavavau, lea ua faaliliuina i gagana e 154. * I le mataupu “O Ai le Atua Moni?” i lalo o le tamaʻi ulutala “E Iai le Suafa o le Atua Moni” (itulau 24), ua faaali manino mai ai le toetoe lava 7,000 taimi e aliaʻi mai ai i tusitusiga Eperu anamua le Tetakalamatone faa-Eperu (uiga faa-Eleni, “fā mataʻitusi”). Ae, ua aveesea ma le loto i ai e tagata faaliliu o le lotu Iutaia ma lotu ua faapea mai o Kerisiano lenā suafa mai le tele o a latou faaliliuga o le Tusi Paia. * E faapefea ona latou faapea mai e iloa le Atua ma iai sa latou faiā faamaonia ma ia pe afai e mumusu e taʻu lona suafa? O lona suafa moni e maua ai le malamalamaga i ana fuafuaga ma le ituaiga o Atua e iai o ia. E lē gata i lenā, o le ā le tāua o le vaega o le tatalo faataʻitaʻi a Iesu “lo matou Tamā e, o i le lagi, ia paia lou suafa” pe afai e lē faaaogāina le suafa o le Atua?—Mataio 6:9; Ioane 5:43; 17:6.
O Ai Iesu Keriso?
10. O ā auala e mafai ona maua ai se ata atoa o le soifuaga ma le faiva a Iesu?
10 O le matua o le Lesona 3 i le polosiua o le Manaomia e faapea, “O Ai Iesu Keriso?” E na o le ono lava palakalafa o loo faamatala puupuu ai Iesu, lona tupuaga, ma le fuafuaga na afio mai ai i le lalolagi. Peitaʻi, afai e te fia maua le tala atoa i lona soifuaga, e leai se tala e sili atu ona lelei, e ese mai tala a Evagelia, lea o loo i le tusi Le Tagata Silisili o Ē Uma na Soifua Mai, lea ua faaliliuina i gagana e 111. * O loo talanoaina faasolosolo i lenei tusi le soifuaga o Keriso ma ana aʻoaʻoga, e faavae i Evagelia e fā. O loo talanoaina i mataupu e 133 mea na tutupu i le soifuaga ma le faiva a Iesu. Mo se isi faiga ese e iloilo ai, ia suʻe i le Insight, Tusi 2, i lalo o le ulutala “Iesu Keriso.”
11. (a) Aiseā e ese ai Molimau a Ieova i lo latou talitonuga e uiga iā Iesu? (e) O ā nisi o mau o le Tusi Paia e taʻusesēina ai le aʻoaʻoga o le Tolutasi, ma o le ā le lomiga ua sili ona aogā e faatatau i lenei mataupu?
11 I lotu o loo faapea mai o Kerisiano, o le finauga lea e iai e uiga iā Iesu, pe o ia o “le Alo o le Atua” ma o “le Atua le Alo.” I se isi ona faaupuga, o le finauga e faatatau i le mea ua taʻua e le tusi Catechism of the Catholic Church “o le misiterio lilo o le faatuatuaga faa-Kerisiano,” le Tolutasi. I le ese mai nei lotu, e talitonu Molimau a Ieova o le Atua na foafoaina Iesu, ae e lē o ia o le Atua. E matagofie le auala o loo talanoaina ai lenei mataupu i le polosiua Pe Ao ona E Talitonu i le Tolutasi?, lea ua faaliliuina i gagana e 95. * O loo iai mau e taʻusesēina ai le aʻoaʻoga o le Tolutasi e pei o le Mareko 13:32 ma le 1 Korinito 15:24, 28.
12. O le ā le isi fesili ua tatau ona tatou uaʻi atu i ai?
12 Ua faaalia i le talanoaga faatoʻā mavae atu e uiga i le Atua ma Iesu Keriso, le auala e fai ai suʻesuʻega totino ina ia fesoasoani i ē e lē o iloa upu moni o le Tusi Paia ia maua le poto saʻo. (Ioane 17:3) Ae faapefea i latou ua tele tausaga o iai i le faapotopotoga Kerisiano? Talu ai le tele o lo latou poto ua iai i le Tusi Paia, pe e manaʻomia pea ona latou taulaʻi atu i le faia o suʻesuʻega totino i le Afioga a Ieova?
Aiseā e ‘Uaʻi Atu ai Pea’?
13. O le ā le manatu sesē e ono iai i nisi e uiga i suʻesuʻega totino?
13 O i latou ua loa ona avea ma sui o le faapotopotoga, atonu e tele ina faalagolago atu i lo latou poto o le Tusi Paia sa maua i nai tausaga amata talu ona avea ma Molimau a Ieova. E faigofie lava ona manatu e faapea: “E lē manaʻomia fua ona tele ni aʻu suʻesuʻega e fai e pei o le vaega lea e fou mai. Seʻi manatu foʻi i le tele o taimi ua ou faitauina ai le Tusi Paia ma lomiga faale-Tusi Paia i nei tausaga e tele.” E talitutusa nei faaupuga ma le faapea atu: “Ona ua tele tausaga o oʻu ʻai, e lē o toe manaʻomia la ona fuafua lelei po o ā aʻu mea e ʻai.” Ua tatou iloa e manaʻomia ona fafagaina e lē aunoa le tino i meataumafa paleni ma lelei ona saunia ina ia tausia ai le soifua mālōlōina ma le malosi. E sili atu la ona tāua le tausia o lo tatou soifua mālōlōina ma le malosi faaleagaga!—Eperu 5:12-14.
14. Aiseā e ao ai ona tatou uaʻi atu pea iā i tatou lava?
14 O lea, e tatau iā i tatou uma, pe ua loa ona avea ma tagata aʻoga o le Tusi Paia pe leai, ona utagia fautuaga a Paulo iā Timoteo, o lē ua avea ma ovasia taʻumatuaina ma maufaatuatuaina i lenā taimi, e faapea: “Ia oe lava [“Ia uaʻi atu pea,” NW ] iā te oe, atoa ma lau e aʻoaʻo atu, ia e tumau pea i ai; auā a e fai lenā mea, e faaolaina ai oe e oe atoa ma ē ua faalogologo iā te oe.” (1 Timoteo 4:15, 16) Aiseā e ao ai ona tatou ave i fale upu a Paulo? Ia manatua, na taʻua foʻi e Paulo o loo tatou tau faasaga i “togafiti a le tiapolo” ma “agaga leaga i mea o i le lagi.” Na lapataʻi mai le aposetolo o Peteru o loo “saʻili [e le Tiapolo] se tasi e ʻaina e ia,” ma e mafai ona avea i tatou ma “se tasi” o na tagata. E mafai ona avea uiga lē popole po o le faifai mālie ma avanoa tonu o loo ia saʻilia.—Efeso 6:11, 12; 1 Peteru 5:8.
15. O le ā le puipuiga faaleagaga o loo iā i tatou, ma e faapefea ona tausia i se tulaga lelei?
15 O lea, e faapefea ona puipuia i tatou? Ua faamanatu mai e Paulo e faapea: “O le mea lea ia outou tago ai i ofutau atoatoa mai le Atua, ina ia outou mafaia ona tutū ma tetee atu pe a oo i le aso vale, pe a uma foʻi ona outou faia o mea uma, tou te tutumau ai lava.” (Efeso 6:13) E faalagolago le aogā o lenā ofutau faaleagaga e lē gata i le tulaga lelei na iai muamua, ae e faalagolago foʻi i le tausia lelei e lē aunoa. O lea, e ao ona aofia i lenā ofutau atoatoa mai le Atua le faafouina o le poto i le Afioga a le Atua. Ua faamamafa i inei le tāua o le faafouina pea o lo tatou malamalamaga o le upu moni lea e faaalia mai e Ieova e ala i lana Afioga ma le vasega o le auauna faamaoni ma le mafaufau. E matuā tāua le suʻesuʻe totino i le Tusi Paia ma lomiga faale-Tusi Paia ina ia tausia i se tulaga lelei lo tatou ofutau faaleagaga.—Mataio 24:45-47; Efeso 6:14, 15.
16. O le ā tatou te faia ina ia faamautinoa o loo lelei le tulaga o la tatou “talipupuni o le faatuatua”?
16 Na faamatilatila mai e Paulo se vaega tāua o le ofutau “le talipupuni o le faatuatua,” lea e tatalia ma tineia ai tuuaʻiga pepelo ma aʻoaʻoga taufaasesē a Satani e pei o ni ū fanafana mū. (Efeso 6:16) O lea, e matuā tāua le faamautinoa po o le ā le malosi o loo iai la tatou talipupuni o le faatuatua atoa ma laasaga e uia ina ia tausia ai i se tulaga lelei ma faamalosia atili. Mo se faaaʻoaʻoga, e te ono fesili faapea: ‘E faapefea ona ou sauniuni mo le suʻesuʻega faale-Tusi Paia i vaiaso taʻitasi lea e faaaogā ai Le Olomatamata? Po ua lava ona faia aʻu suʻesuʻega ina ia “taufaatupu ai le alofa ma galuega lelei” e ala i le faia o ni tali ua saunia lelei i le sauniga? Pe ou te tatalaina le Tusi Paia ma faitau i mau faasino, mau e lē o siiina mai i le palakalafa? Pe ou te faalaeiau i isi e ala i le tele o loʻu sao e fai i sauniga?’ O loo tatou taumafaina meaʻai aano faaleagaga, ma e manaʻomia ona faamalūina lelei ina ia aogā atoatoa iā i tatou.—Eperu 5:14; 10:24.
17. (a) O le ā le vai oona o loo faaaogā e Satani e taumafai ai e faaleagaina lo tatou tulaga faaleagaga? (e) O le ā le vaifofō i le vai oona a Satani?
17 E iloa e Satani vaivaiga o le tino lē lelei atoatoa, ma e iloagatā ana togafiti. O se tasi o auala ua faasalalau atu ai ana taaʻiga leaga o le faafaigofie lea ona maua o ata ma faamatalaga o faiga matagā faaleituaiga i le TV, le Initineti, vitiō, ma tusi. Ua faatagaina e nisi Kerisiano lenei mea oona e ati atu iā latou talipupuni, ma ua iʻu ai i le aveesea o faaeaga i le faapotopotoga po ua iʻu i nisi tulaga e matuiā atu. (Efeso 4:17-19) O le ā le vaifofō i vai oona faaleagaga a Satani? E lē tatau ona tatou tuulafoaʻia le faia pea o suʻesuʻega totino o le Tusi Paia, o a tatou sauniga faa-Kerisiano, ma le laʻeiina o le ofutau atoatoa mai le Atua. O nei mea o le a tatou maua ai le tomai e iloa ai le mea saʻo mai mea sesē ma ia ʻinoʻino i mea e inosia e le Atua.—Salamo 97:10; Roma 12:9.
18. E faapefea ona fesoasoani le “pelu a le Agaga” i la tatou taua faaleagaga?
18 Afai e tumau pea la tatou masani o le suʻesuʻeina o le Tusi Paia, e lē gata o le a malosi le puipuiga e ala i le poto saʻo o le Afioga a le Atua, ae o le a taulau foʻi i le faasagatau atu e ala i le faaaogāina o le “pelu a le Agaga, o le afioga lea a le Atua.” O le afioga a le Atua e “sili foʻi lona maai i pelu uma e faatau maai itu, o loo vaevae foʻi e oo lava i le vavaeeseina o le loto ma le agaga, o gaugātino foʻi ma aano o ivi, o loo faamasino foʻi i manatu ma filifiliga o le loto.” (Efeso 6:17; Eperu 4:12) Afai e iai le tomai i le faaaogāina o lenā “pelu,” o le a lē faavaleaina la i tatou i faaosoosoga e foliga mai e lē afāina, pe tosina foʻi i ai, ae o le a iloa ai o lenā faaosoosoga o se mailei e oti ai a lē o loo leaga. O le a fesoasoani lo tatou poto ma le malamalama i le Tusi Paia e tetee atu ai i le mea leaga ae fai le mea lelei. O lea, e tatau ona fesili ifo iā i tatou lava: ‘Po o maai pe ua matatupa laʻu pelu? Pe e faigatā ona ou manatuaina mau o le Tusi Paia e faamalosia ai le osofaʻiga?’ Ia tausi pea i la tatou masani lelei o le faia o suʻesuʻega totino i le Tusi Paia ma tetee atu i le Tiapolo.—Efeso 4:22-24.
19. O ā aogā e maua pe afai tatou te finafinau i suʻesuʻega totino?
19 Na tusi Paulo e faapea: “O tusi paia uma lava e mai le Agaga o le Atua ia, e aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” Afai tatou te ave i fale upu a Paulo iā Timoteo, e mafai ona faamalosia ai lo tatou tulaga faaleagaga ma atili uigā ai la tatou faiva. O le a tele se aogā i le faapotopotoga o toeaina faaleagaga atoa ma auauna o le faiva, ma e mafai ona tatou tutumau mausalī uma i le faatuatua.—2 Timoteo 3:16, 17; Mataio 7:24-27.
[Faamatalaga pito i lalo]
^ pala. 4 O le mea e masani ai, a māeʻa ona suʻesuʻeina e se tagata fiafia le polosiua o le Manaomia, ona suʻesuʻe lea o le tusi Le Poto e Taʻitaʻia ai i le Ola e Faavavau, ua lomia uma e Molimau a Ieova. O fautuaga o loo taʻua i inei o le a fesoasoani e aveesea ni mea e faalavelavea ai le agaʻigaʻi i luma faaleagaga.
^ pala. 9 Lomia e Molimau a Ieova. O ē o loo maua le Insight on the Scriptures i la latou gagana, e mafai ona tilofaʻia le Tusi 2, i lalo o le ulutala “Ieova.”
^ pala. 9 E tele faaliliuga i gagana Sepania ma le Catalonia ua mātauina mo le faaliliuina o le Tetakalamatone faa-Eperu, i le faaaogāina o le “Yavé,” “Yahveh,” “Jahvè,” ma le “Jehová.”
^ pala. 10 Lomia e Molimau a Ieova.
^ pala. 11 Lomia e Molimau a Ieova.
Pe E te Manatua?
• O ā tulaga e saosaolaumea i suʻesuʻega totino aogā?
• O le ā le mea sesē ua faia i le tele o faaliliuga o le Tusi Paia e faatatau i le suafa o le Atua?
• O ā mau o le Tusi Paia o le a e faaaogāina e taʻusesēina ai le aʻoaʻoga o le Tolutasi?
• O le ā e ao ona tatou faia e puipuia ai i tatou mai togafiti a Satani, e ui ua loa ona avea ma Kerisiano faamaoni?
[Fesili mo le Suʻesuʻega]
[Ata i le itulau 19]
Ina ia aogā suʻesuʻega totino, e manaʻomia se siʻomaga lelei ma toʻafilemu
[Ata i le itulau 23]
Po o maai pe ua matatupa lau “pelu”?