Mea ua Aʻoaʻoina i Tala o le Fanau Mai o Iesu

UA MAOFA le faitau miliona o tagata i mea na tutupu i le fanau mai o Iesu. Ua vaaia lea i le anoanoaʻi o vaaiga o le Fanau Mai o Iesu o loo faaali solo, ma tala o loo faatinoina i le lalolagi atoa i le taimi o le Kirisimasi. E ui ina maofa i na mea na tutupu i le fanau mai o Iesu, ae e leʻi faamaumauina i le Tusi Paia ina ia faafiafia ai tagata. Na i lo lea, ua avea ma vaega o le Tusi Paia atoa lea na faagaeeina e le Atua ina ia aʻoaʻo ma faasaʻoina ai.—2 Timoteo 3:16.

Pe ana finagalo le Atua e faamanatu e Kerisiano le aso fanau o Iesu, semanū e faailoaina mai e le Tusi Paia lea aso tonu. Ae pe na faailoaina mai ea? Ina ua māeʻa ona taʻua le fanau mai o Iesu a o iai leoleo mamoe i fafo i le pō e leoleo a latou lafu, na faapea mai le tagata tomai o le Tusi Paia o le senituri lona 19 o Albert Barnes: “E manino mai i inei, na fanau mai lo tatou Faaola a o leʻi oo iā Tesema 25 . . . O se taimi mālūlū, aemaise lava nuu maualuluga ma le maugā e latalata i Peteleema. E lē o faailoa mai e le Atua le taimi na soifua mai ai [Iesu]. . . . E lē gata i lea e lē tāua le iloaina o le taimi; auā ana tāua, semanū e faamaumauina e le Atua lenā aso.”

I se faaeseesega, ua faaali manino mai e tusitala e toʻafā o Evagelia iā i tatou le aso na maliu ai Iesu. Na tupu lea i le aso o le Paseka na faia i le aso 14 o le masina faa-Iutaia o Nisani, i le tau e totogo ai mea. E lē gata i lenā, na faatonuina faapitoa e Iesu ona soo ina ia faamanatuina lea aso e fai ma faamanatuga iā te ia. (Luka 22:19) E lē o taʻua i le Tusi Paia se faatonuga ina ia faamanatu le aso na fanau mai ai Iesu, po o se aso fanau lava foʻi o so o se isi lava tagata. O le mea e  faanoanoa ai, ina neʻi avea le fefalōaʻi i le aso fanau o Iesu ma mea e misia ai mea e sili ona tāua na tutupu pe a i lenā taimi.

O Mātua na Filifilia e le Atua

O ā ituaiga o mātua na filifilia e le Atua ina ia tausia aʻe lona Alo mai le faitau afe o aiga i Isaraelu? Pe na Ia faatāuaina vala e pei o le tulaga taʻutaʻua ma le tamaoaiga? E leai. Na i lo lea, na silasila Ieova i uiga faaleagaga o mātua. Seʻi tagaʻi i le pese o viiga a Maria o loo faamauina i le Luka 1:46-55, lea na ia lagiina ina ua uma ona faailoa atu i ai le faaeaga e avea ma tinā o le Mesia. O nisi nei upu o lana pese: “Ua vivii atu loʻu loto i le Alii . . . auā ua silasila mai o ia i lana auauna fafine ua faamaulaloina.” Sa ia vaai iā te ia ma le lotomaulalo o sē “ua faamaulaloina,” o le auauna fafine a Ieova. Ae sili atu ona tāua faaupuga matagofie o le pese o viiga a Maria, e faailoa ai o ia o se tagata faaleagaga e malamalama lelei i le Tusi Paia. E ui lava o ia o se tagata agasala na tupuga mai iā Atamu, ae ua filifilia ma le saʻo lelei o ia o le tinā o le Alo o le Atua i le lalolagi.

Ae faapefea le tane a Maria lea na avea ma tamā fai o Iesu? O Iosefa, o se tagata sa lelei lona tomai faakamuta. Ona o lona naunau e galue mamafa faaletino, na mafai ai e ia ona tausia se aiga e toʻalima ona atalii ma ona afafine atonu e sili atu i le toʻalua. (Mataio 13:55, 56) O Iosefa e lē o se tagata mauoloa. Ina ua oo i le taimi e avatu ai e Maria lana tama ulumatua i le malumalu o le Atua, sa ono lē fiafia Iosefa i lona lē mafai ona avatu o se mamoe mo le taulaga. Na i lo lea, na latou avatu le mea na faatagaina mo ē sa lē tagolima. E tusa ai ma se tinā o se tama faatoʻā fanau, na faapea mai le tulafono a le Atua: “Afai foʻi na te lē maua se tamaʻi mamoe, ia au mai e ia le uluga manutagi, po o tamaʻi lupe e lua fua, o le tasi e fai ma taulaga mū, ma le tasi e fai ma taulaga mo le agasala; ona fai ai lea e le faitaulaga le togiola mo ia, ona mamā ai lea o ia.”—Levitiko 12:8; Luka 2:22-24.

Ua faapea mai le Tusi Paia o Iosefa o “le tagata amiotonu ia.” (Mataio 1:19) Mo se faaaʻoaʻoga, sa leʻi feusuaʻi o ia ma lana avā taupou seʻia oo ina mavae le fanau mai o Iesu. Na ʻalofia e lenei mea ni lē femalamalamaaʻiga po o ai le Tamā moni o Iesu. E lē faigofie mo se ulugalii faatoʻā faaipoipo o loo nonofo faatasi ona ʻalofia le faia o ni feusuaʻiga, ae ua faaalia ai i nei lo la faatāuaina o lo la faaeaga o le avea ma ē ua filifilia e tausiaina aʻe le Alo o le Atua.—Mataio 1:24, 25.

O Iosefa o se tagata e fiafia i mea faaleagaga e pei lava o Maria. I tausaga taʻitasi e tuua ai e ia ana galuega, ae ave lona aiga i se malaga e tolu aso le umi mai Nasareta i Ierusalema ina ia auai i le tausamiga o le Paseka. (Luka 2:41) E lē gata i lenā, atonu sa aʻoaʻoina foʻi e Iosefa Iesu a o laʻitiiti i se mea e masani ai faalevaiaso, ina ia auai i le tapuaʻiga i le sunako i lo latou nuu, lea sa faitauina ma faamatalaina ai le Afioga a le Atua. (Luka 2:51; 4:16) O lea, e lē masalomia ai le saʻo o le filifilia e le Atua o le tinā ma le tamā fai i le lalolagi mo lona Alo.

Se Faamanuiaga Sili mo Leoleo Mamoe Lē Taualoa

E ui lava ina faigatā mo lana avā ina ua atoa le iva masina o lona maʻitaga, ae na malaga atu Iosefa i le aai o ona augātamā e tusa ai o le poloaʻiga a Kaisara mo le tusiga igoa. Ina ua taunuu le ulugalii i Peteleema, sa lē maua e i laʻua se mea e faamautū ai ona o le tumutumu o le aai. Ona o lenā tulaga na faamalosia ai i laʻua e nonofo i le fale o manu lea na fanau ai Iesu ma faataoto i totonu o le pusa e tuu ai meaʻai a manu.  Ina ia faamalosia lo la faatuatua, na avatu ai e Ieova se faamautinoaga i ia mātua lē taualoa e faapea o lona finagalo na māfua ai ona fanau mai lenei pepe. Pe na ia auina atu se vaega o toeaina taʻutaʻua mai Peteleema ina ia faamautinoa atu lea tulaga i le ulugalii? E leai. Na i lo lea, na faailoa atu e Ieova le Atua lea mea i leoleo mamoe galulue mamafa o ē na nonofo i fafo i le pō atoa e leoleo a latou lafu.

Na faailoa atu e le agelu a le Atua iā i latou ma taʻu atu i ai ina ia ō atu i Peteleema, i le mea o le a latou maua ai le Mesia faatoʻā fanau mai lea ‘o loo taoto i le fale o manu.’ Pe na faateʻia pe avea ma mea na mamā ai nei tamāloloa lē taualoa ina ua faalogo o loo i le fale o manu le Mesia faatoʻā fanau mai? E mautinoa lava e leai! E aunoa ma se faatuai, na latou tuua ai a latou lafu ma agaʻi atu loa i Peteleema. Ina ua latou maua Iesu, na latou faamatala atu iā Iosefa ma Maria mea na taʻu atu e le agelu iā i latou. E lē taumatea na faamalosia e lenā mea le faatuatua o le ulugalii e faapea, ua faataunuuina mea uma i le auala na finagalo i ai le Atua. Ina ua faataunuu le mea na faatonu ai i latou, “ona foʻi mai lea o leoleo mamoe, o vivii ma faafetai i le Atua, ona o mea uma ua latou faalogo ai ma vaai i ai.” (Luka 2:8-20) Ioe, i le faailoaina atu o na mea i leoleo mamoe matataʻu i le Atua, na tonu ai le faaiʻuga na faia e Ieova.

Ua tatou aʻoaʻoina e ala i mea o taʻua i luga, ituaiga o tagata e ao ona tatou iai, ina ia maua ai le finagalo malie o Ieova. E lē manaʻomia ona tatou saʻili ina ia avea ma tagata taʻutaʻua po o sē e tamaoaiga. Na i lo lea, i le pei o Iosefa, Maria, ma leoleo mamoe, e manaʻomia ai ona tatou usiusitai i le Atua ma faamaonia atu tatou te alolofa iā te ia e ala i le faamuamua o manaʻoga faaleagaga na i lo o mea faaletino. O le mea moni, tatou te aʻoaʻoina mai ai ni mea lelei e ala i le manatunatu loloto i mea na tutupu pe ā i le taimi na fanau mai ai Iesu.

[Ata i le itulau 7]

O le ā ua faailoa mai i le taulaga a Maria i lupe e lua?

[Ata i le itulau 7]

Na filifili le Atua e faailoa atu le fanau mai o Iesu i ni leoleo mamoe lē taualoa