“Tamāloloa Atamamai e Toʻatolu”—O Ai i Latou?

I vaaiga o le fanau mai o Iesu, e masani ona faaataina mai ai ni tamāloloa e toʻatolu e oofu i ofu talaloa ma a latou kamela, ua taunuu atu i le fale o manu o loo taoto ai le pepe o Iesu i totonu o se pusa. E masani ona taʻua nei tagata ofu lelei na asiasi atu o tamāloloa atamamai e toʻatolu. O le ā ua fai mai ai le Tusi Paia e uiga iā i latou?

E tusa ai o le Tusi Paia, o nei tagata ua taʻua o tamāloloa atamamai e ō mai “mai sasae,” ma o i inā na latou iloaina ai le fanau mai o Iesu. (Mataio 2:1, 2, 9) Atonu na alu se taimi umi o malaga atu nei tamāloloa i Iutaia. Ina ua latou maua Iesu, ua lē o toe avea o ia ma pepē faatoʻā fanau mai i le fale o manu. Na i lo lea, na maua e nei tamāloloa Maria ma “le tama itiiti” i le fale.—Mataio 2:11.

Ua taʻua e le Tusi Paia nei tamāloloa o “makoi” po o le ʻau saʻili i fetu, ma e lē o taʻua ai pe toʻafia i latou. Ua faamatalaina mai e le Oxford Companion to the Bible e faapea: “Ua faaalia mai i le mataʻituina e tagata na asiasi atu o le fetu lea na taʻitaʻia i latou i Ierusalema, le fesootaʻiga o faiga faamaneta ma le saʻili i fetu.” O loo taʻusalaina ma le manino i le Tusi Paia so o se ituaiga o faiga faamaneta ma faiga faa-Papelonia o le saʻili i faailoga i fetu.—Teuteronome 18:10-12; Isaia 47:13.

Sa leʻi iʻu lelei mea na faailoa atu i nei tamāloloa. Sa faatupuina ai le toʻatamaʻi ma le fuā o le tupu amioleaga o Herota. O le iʻuga, na sosola atu ai Iosefa, Maria ma Iesu i Aikupito ma le fasiotia o tama tane uma i Peteleema “e afua i ē ua lua o latou tausaga atoa ma ē ua pito ane i ai.” Na faamautinoa lelei e Herota le taimi na fanau ai Iesu i mea na ia iloa mai i le ʻau saʻili i fetu. (Mataio 2:16) I le iloaina o faafitauli na tutupu mai i la latou asiasiga, e talafeagai ai ona faapea o le fetu lea na latou vaaia ma le feʻau e uiga i “lē ua fanau mai o le tupu o tagata Iutaia” e mai le fili o le Atua, o Satani le Tiapolo lea na manaʻo e fasioti iā Iesu.—Mataio 2:1, 2.