Faamāfanafanaga mo i Latou o Mafatia
Faamāfanafanaga mo i Latou o Mafatia
I LE faagasologa o senituri, ua iso ai le toʻatele o saienitisi ma aʻoaʻo o lotu i le fesili, pe aiseā ua faatagaina ai e le Atua ia mafatiaga. Ua manatu nisi e faapea, ona o le Atua e ona le malosi uma lava, o ia la e sili atu ona tuuaʻia i nei mafatiaga. Na taʻua e le tusitala o le tusi The Clementine Homilies, o se tusi faaapokalifa o lona lua o senituri e faapea, o loo pulea atoatoa e le Atua le lalolagi. I lona “aao tauagavale,” o loo umia ai le Tiapolo, lea na te faapogaia ia tigā ma mafatiaga, a o lona “aao taumatau,” o loo taofia ai Iesu, e na te faaolaina ma aumaia le fiafia i tagata.
E iai isi latou te lē ioe ua faatagaina e le Atua mafatiaga, ae e tusa lava pe na te lē o faapogaia, ae ua latou manatu, e leai ni mafatiaga. Na tusia e Mary Baker Eddy e faapea: “O le leaga ua na o ni mafaufauga, ma e leai sona faavae moni. Pe afai e malamalama tagata e leai se agasala, maʻi, ma le oti, o le a mou ese atu foʻi la na mea.”—Science and Health With Key to the Scriptures.
Ona o le tele o mea leaga ua tutupu i le talafaasolopito, aemaise lava talu mai le taua muamua a le lalolagi seʻia oo mai i o tatou aso, e toʻatele tagata ua manatu e faapea, e lē mafai e le Atua ona taofia mafatiaga. Na tusia e le tagata aʻoga Iutaia o David Wolf Silverman e faapea: “O loʻu manatu, o le Fasiotiga Tagata mataʻutia a le ʻAu Nasi, ua aveesea uma ai manatu i le iai o se mana e sili atu ona malosi, o se uiga e talafeagai ona iai i le Atua.” Ua ia faaopoopo mai: “I se isi itu, afai e poto le Atua, e tatau la ona ōgatasi Lona lelei ma le iai o le leaga, ma pe afai e lē o Ia o se Atua e ona le malosi uma lava, e mafai la ona tupu o lenei mea.”
Ae peitaʻi, ua manatu nisi e faapea, e foliga mai o le Atua lea e fesoasoani i le faapogaia o mafatiaga ma e lē mafai ona ia taofia, ia pe faapea, o mafatiaga e lē o ni mea moni, ua na o ni o tatou lava mafaufauga, ua lē mafai ai ona avatu sina faamāfanafanaga i ē o mafatia. Ma o le itu e sili ona tāua, e matuā feteenaʻi lava na talitonuga ma uiga o le Atua alofa, faamasinotonu, e ona le malosi uma lava lea o loo faailoa mai i le Tusi Paia. (Iopu 34:10, 12; Ieremia 32:17; 1 Ioane 4:8) O le ā la le mea o fai mai ai le Tusi Paia e uiga i le pogai ua faatagaina ai mafatiaga o tagata?
Na Faapefea Ona Amata Mafatiaga?
E leʻi foafoaina e le Atua tagata ina ia mafatia. I le isi itu, na ia foaʻi atu i le uluaʻi ulugalii o Atamu ma Eva ni mafaufau ma tino e lelei atoatoa, saunia se faatoʻaga matagofie e avea ma o la aiga, ma tofia atu iā i laʻua ni galuega aogā ma le faamalieloto. (Kenese 1:27, 28, 31; 2:8) Ae peitaʻi, o le faaauauina pea o lo la fiafia, sa faalagolago i lo la amanaʻiaina o le pule a le Atua ma lana aiā e filifili ai le mea e lelei ma le mea e leaga. O lenā poloaʻiga a le Atua, na suitulaga i se laau na taʻua “o le laau e iloa ai le lelei ma le leaga.” (Kenese 2:17) O le a faaalia ai le gauaʻi atu o Atamu ma Eva i le Atua pe afai la te usiusitai i lana poloaʻiga e aua la te aai i le fua o lenā laau. *
O se mea e faanoanoa ai, ona sa lē usiusitai Atamu ma Eva i le Atua. Na faatalitonu e se meafaiola agaga fouvale lea na iloa mulimuli Kenese 3:1-6; Faaaliga 12:9) Ua faasesēina i le manatu o le fia tutoʻatasi, na ʻai ai e Eva le fua o le laau faasāina, ma e leʻi pine ae faia foʻi e Atamu le mea lava lea e tasi.
ane o Satani le Tiapolo, ia Eva e faapea, e lē lelei mo ia pe a usiusitai atu i le Atua. O le mea moni, sa manatu e faapea, ua taofia e le Atua mai iā te ia se mea e sili ona lelei: o le tutoʻatasi, le aiā e filifili ai e ia lava le mea lelei ma le mea leaga. Na faapea atu Satani, afai na te ʻaina le fua o le laau, ‘o le a pupula ona mata ona avea ai lea o ia e pei o le Atua, e iloa le lelei ma le leaga.’ (Na amata ai lava i le aso lenā ona tofo Atamu ma Eva i iʻuga o la laʻua fouvale. O le teena o le pule a le Atua, na la lē toe maua ai le puipuiga ma faamanuiaga ia na tuuina atu iā i laʻua pe afai e la te gauaʻi atu i le Atua. Na tutuliesea i laʻua e le Atua mai le Parataiso ma taʻu atu iā Atamu: “O le mea lea ua malaia ai le laueleele ona o oe; e te ʻai ai ma le tigā i aso uma o lou ola; e te ʻai foʻi au mea e ʻai ma le afu o ou mata, seʻia e toe foʻi atu i le eleele.” (Kenese 3:17, 19) Na oo ai iā Atamu ma Eva maʻi, tigā, le tino matua ma feoti ai. Ua avea ai mafatiaga ma vaega o le olaga o le tagata.—Kenese 5:29.
Foʻiaina o le Finauga
Atonu e fesili mai se tasi, ‘Pe e mafai ona lē amanaʻia e le Atua le agasala a Atamu ma Eva?’ E leai, auā o le a atili ai ona manatu māmā ma lē faaaloalo i lana pule, atonu o le a faamalosia atili ai le fouvale i lana pule i le lumanaʻi ma iʻu ai i ni mafatiaga e sili atu ona tigā. (Failauga 8:11) E lē gata i lea, o le manatu māmā i lea tulaga lē usiusitai o le a tuuaʻia ai le Atua e faapea, e faapalepale o ia i mea sesē e faia. Ua faamanatu mai e le tusitala o le Tusi Paia o Mose iā i tatou e faapea: “O le [Atua], e saʻo lava lana galuega; auā e tonu ona ala uma lava; o le Atua faamaoni, e lē o iā te ia se amiolētonu, o le amiotonu ma le amio saʻo lava ia.” (Teuteronome 32:4) Ina ia ōgatusa ma ona uiga masani, na faataga ai e le Atua mafatiaga e oo iā Atamu ma Eva ona o lo la lē usiusitai.
Aiseā na lē faaumatia ai loa e le Atua i le taimi lenā le uluaʻi ulugalii faatasi ma Satani, le pogai lē vaaia o lo laʻua fouvalega? E iai iā te ia le mana e faia ai faapea. Ae semanū e lē fanauina mai ai e Atamu ma Eva ni fanau o le a tuufaasolo mai i ai mafatiaga ma le oti. Ae peitaʻi, o le faatinoina o le mana o le Atua, o le a lē faamaonia ai la le tonu o lana pule i luga o ana foafoaga fai ola. E lē gata i lea, semanū e feoti Atamu ma Eva ae leai sa la fanau, o le a faailoa ai foʻi i lea le lē taulau o le fuafuaga a le Atua ina ia faatumuina le lalolagi i a la fanau lelei atoatoa. (Kenese 1:28) Ma “o le Atua e lē pei o tagata . . . O le mea ua ia folafola mai, e faia e ia; o le mea ua ia fetalai i ai e faataunuuina lava.”—Numera 23:19, Today’s English Version.
I lona atamai atoatoa, na filifili ai Ieova le Atua e faataga pea ona faaauau le fouvalega mo se taimi puupuu. O le a lava ai le avanoa e tofo ai le ʻaufouvale i āuga o le fia tutoʻatasi mai le Atua. Ua faaalia manino i mea tutupu i le talafaasolopito le manaʻomia e le fanau a tagata o le taʻitaʻiga a le Atua ma le maualuga o lana pule na i lo o pulega a tagata ma Satani. I le taimi e tasi, na faia ai e le Atua ia laasaga ina ia faamautinoa ai ua faataunuuina lana uluaʻi fuafuaga mo le lalolagi. Na ia folafola le afio mai o se “fanau” o le a na ‘tuʻimomomoina le ulu o Satani,’ ma soloia ai e faavavau lana fouvalega ma ona āuga leaga.—Kenese 3:15.
O lenā fanau folafolaina, o Iesu Keriso. Ua tatou faitau ai i le 1 Ioane 3:8 e faapea, “o le mea lava lea na faaalia mai ai le Alo o le Atua, ina ia faaumatia e ia galuega a le tiapolo.” Na ia faia lenei mea e ala i le faataulagaina o lona soifua lelei atoatoa faaletagata ma totogia ai le tau o le togiola ina ia laveaʻiina ai fanau a Atamu mai le agasala tuufaasolo ma le oti. (Ioane 1:29; 1 Timoteo 2:5, 6) O i latou e faaalia moni le faatuatua i le taulaga a Iesu, ua folafola atu i ai le mapusaga tumau mai mafatiaga. (Ioane 3:16; Faaaliga 7:17) O afea o le a faataunuu ai lenei mea?
Iʻuga o Mafatiaga
O le teena o le pule a le Atua ua faapogaia ai le anoanoaʻi o mafatiaga. Ua talafeagai ai la i le Atua ona faatinoina lana pule i se auala faapitoa ina ia faaiʻuina ai mafatiaga o tagata ma faataunuuina ai lana uluaʻi fuafuaga mo le lalolagi. Na taʻua e Iesu lenei sauniuniga a le Atua ina ua ia aʻoaʻoina ona soo i le tatalo: “Lo matou Tama e, o i le lagi, . . . ia oo mai lou malo. Ia faia lou finagalo, i le lalolagi e pei ona faia i le lagi.”—Mataio 6:9, 10.
Ua toeitiiti lava ona faamutaina lea o le taimi ua faatagaina e le Atua mo tagata e faia ai a latou lava pulega. I le faataunuuina o le valoaga o le Tusi Paia, na faavaeina ai lona Malo i le lagi i le 1914 lea ua avea ai Iesu Keriso ma tupu. * E lē o toe umi se taimi, ona faaumatia loa lea e lenā Malo pulega uma faaletagata.—Tanielu 2:44.
I le vaitaimi puupuu o lana faiva i le lalolagi, na faailoa mai ai e Iesu se faataʻimuaga o faamanuiaga o le a aumaia mo le fanau a tagata pe a toe faafoʻisia le pulega a le Malo o le Atua. Ua aumaia i Evagelia faamaoniga e faailoa ai sa tigā alofa Iesu i tagata o ē na matitiva ma ē na agaleagaina. Na ia faamālōlōina maʻi, fafaga tagata na matelāina, ma toe faatutū ē na oti. E oo lava i le malosi faalenatura na usiusitai iā te ia. (Mataio 11:5; Mareko 4:37-39; Luka 9:11-16) Seʻi manatu i mea o le a faataunuuina e Iesu pe a ia faaaogāina le malosi e faamamāina ai o lana taulaga togiola ina ia maua ai e le fanau usiusitai a tagata ia aogā! Ua folafola mai e le Tusi Paia e faapea, e ala i le pulega a Keriso, o le a “soloiesea foʻi e le Atua loimata uma i o latou mata [fanau a tagata]; e leai foʻi se toe oti, po o se faanoanoa, po o se auē, e leai foʻi se toe puapuaga.”—Faaaliga 21:4.
Faamāfanafanaga mo i Latou o Mafatia
Maʻeu le faalaeiauina ai i le iloa o loo manatu mai Ieova lo tatou Atua alofa e ona le malosi uma lava iā i tatou, ma e lē o toe umi se taimi ona ia aumaia lea o le mapusaga mo le fanau a tagata! E masani lava ona talia e se tagata ua maʻi tigāina se togafitiga o le a mālōlō ai o ia e tusa lava pe matuā tigā. E faapena foʻi i tatou, afai e tatou te iloa o le auala lea e taulimaina ai e le Atua mataupu o le a aumaia ai faamanuiaga e faavavau, o le a mafai e lenā iloa ona faatumauina ai i tatou e tusa lava po o ā faigatā e tatou te fesagaʻia i se taimi puupuu.
Sa iloa e Ricardo lea na taʻua i le mataupu ua mavae atu le auala e maua ai faamāfanafanaga mai i folafolaga a le Tusi Paia. Ua faapea mai o ia: “Ina ua maliu laʻu avā, sa ou lagona loʻu lē fia faatasi ma tagata, ae sa ou iloa e lē mafai e lenei mea ona toe aumaia ai o ia ma o le a na ona atili ai ona lē lelei oʻu faalogona ootia.” O lea, sa tausisia ai e Ricardo lana faasologa masani o le auai i sauniga Kerisiano ma talaʻi atu le feʻau o le Tusi Paia i isi. Ua faapea mai Ricardo: “A o ou lagona le lagolagosua alofa mai o Ieova ma mātauina le auala na ia taliina ai aʻu tatalo i nai mea laiti, sa ou mafuta vavalalata atu ai iā te ia. O le mātauina o le alofa o le Atua, na mafai ai ona ou tumau i se tofotofoga e foliga mai e aupito sili ona faigatā ua
ou fesagaʻia.” Ua faapea mai o ia: “O loo ou matuā misia lava laʻu avā, ae ua ou matuā mautinoa nei e faapea, e lē faatagaina e Ieova se mea e tupu e mafai ona afāina ai i tatou e faavavau.”Pe e pei oe o Ricardo ma le faitau miliona o isi tagata o loo moomoo mo le taimi “e lē toe manatua [ai] mea na muamua, e lē alu ae foʻi i le loto” ia mafatiaga o le fanau a tagata i le taimi nei? (Isaia 65:17) Ia mautinoa e mafai ona e mauaina ia faamanuiaga o le Malo o le Atua pe afai e te mulimuli i le fautuaga a le Tusi Paia e faapea: “Ia outou saʻili iā Ieova manū o mafai ona maua o ia; ia outou valaau iā te ia manū o latalata mai o ia.”—Isaia 55:6.
Ina ia fesoasoani iā te oe e faia lenei mea, ia faamuamua i lou olaga le faitauina ma le suʻesuʻeina lelei o le Afioga a le Atua. Ia iloa lelei le Atua ma lē na ia auina mai, o Iesu Keriso. Ia tauivi ina ia ola e ōgatasi ma tapulaa a le Atua ma ia faaalia i lea mea lou naunau e gauaʻi atu i lana pule silisili ese. O se olaga faapena o le a maua ai le fiafiaga e sili atu i le taimi nei e ui lava i tofotofoga atonu o lua fesagaʻi. Ma o le a e ola olioli ai i le lumanaʻi i se lalolagi e aunoa ma ni mafatiaga.—Ioane 17:3.
[Faamatalaga pito i lalo]
^ pala. 7 I le faamatalaga i le pito i lalo o le Kenese 2:17, ua faamatala ai e le Jerusalem Bible “le iloa o le lelei ma le leaga” e faapea, o “le tomai e filifili ai . . . le mea lelei ma le mea leaga, ma gaoioi ia ōgatasi ma lea tomai, ae ona o le fia tutoʻatasi, ua lē fia iloa ai e le tagata lona tulaga e faapea, o ia o se mea na foafoaina.” Ua faaopoopo atili mai lea tusi: “O le agasala muamua lava, o le teena lea o le pule silisili ese a le Atua.”
^ pala. 17 Mo se talanoaga auʻiliʻili o lea valoaga faale-Tusi Paia e fesootaʻi atu ma le 1914, tagaʻi i le mataupu e 10 ma le 11 o le tusi Le Poto e Taʻitaʻia ai i le Ola e Faavavau, na lomia e Molimau a Ieova.
[Pusa i le itulau 6, 7]
E MAFAI FAAPEFEA ONA TATOU FESAGAʻIA MAFATIAGA?
“Ia tuuina atu [i le Atua] mea uma tou te popole ai.” (1 Peteru 5:7) E masani lava ona oo mai faalogona o le lē mautonu, le ita, ma le tuulafoaʻiina a o tatou taumafai e onosaia ni mafatiaga pe vaai atu foʻi o mafatia se tasi e pele iā i tatou. Ae ia mautinoa, o loo malamalama Ieova i o tatou faalogona. (Esoto 3:7; Isaia 63:9) I le pei o tane faamaoni anamua, e mafai ona tatala atu o tatou loto iā te ia ma faailoa atu iā te ia mea o tatou mafatia ma popole ai. (Esoto 5:22; Iopu 10:1-3; Ieremia 14:19; Sapakuka 1:13) Atonu e na te lē aveesea faavavega o tatou puapuaga, ae i le tali mai i a tatou tatalo faatauanau, e mafai ona ia foaʻiina mai le atamai ma le malosi e fesagaʻia ai na mafatiaga.—Iakopo 1:5, 6.
“Aua tou te ofo i le tofotofoga tigā ua oo iā te outou, . . . peiseaʻī o se mea ese ua oo iā te outou.” (1 Peteru 4:12, New International Version) I inei, o loo talanoa ai Peteru e uiga i sauāga, ae peitaʻi, o loo faatatau atu foʻi ana upu i so o se mafatiaga o loo onosaia e se uso talitonu. O loo mafatia tagata i le mativa, maʻi, ma le maliliu o ē pele. Ua faapea mai le Tusi Paia, “a o le tausaga ma le mea e tupu ai” e oo i tagata uma. (Failauga 9:11) O na mea, o se vaega o le tulaga ua i ai le fanau a tagata i le taimi nei. I le iloaina o lenei mea, o le a fesoasoani iā i tatou e feagai ai ma mafatiaga ma mea lē manuia e tutupu mai. (1 Peteru 5:9) Ae o le sili o na mea uma o le manatuaina o le faamautinoaga e faapea, “o fofoga o Ieova o loo faasaga i ē amiotonu, e liliu mai foʻi ona taliga i a latou alaga,” o le a avea o se puna faapitoa o faamāfanafanaga.—Salamo 34:15; Faataoto 15:3; 1 Peteru 3:12.
“Ia olioli i le faamoemoe.” (Roma 12:12) Na i lo o le nofoaʻi ma mafaufau i le fiafiaga na tatou maua i le taimi muamua, e mafai ona tatou mafaufau loloto i le folafolaga a le Atua e na te faaiʻuina mafatiaga uma lava. (Failauga 7:10) O lenei faamoemoe mautū, o le a puipuia i tatou e pei ona puipuia e se pulou malō le ulu o se tagata. Ua faaitiitia e le faamoemoe mafatiaga o le olaga, ma fesoasoani e faamautinoaina o le a lē faaleagaina ai e faavavau lo tatou soifua mālōlōina faalemafaufau, faalogona, po o le faaleagaga.—1 Tesalonia 5:8.
[Ata i le itulau 5]
Na teena e Atamu ma Eva le pulega a le Atua
[Ata i le itulau 7]
Ua folafola mai e le Atua se lalolagi e aunoa ma ni mafatiaga