Fesili Mai le ʻAufaitau

Pe e ōgatusa ma mataupu silisili o le Tusi Paia mo se Kerisiano ona tuu lona lima i luga o le Tusi Paia ma tautō e faapea, o le a tautala i le mea moni atoatoa i se faamasinoga?

E tatau i tagata taʻitoʻatasi ona faia lana lava filifiliga e tusa ai ma lenei mea. (Kalatia 6:5) Ae peitaʻi, e lē o faasāina i le Tusi Paia le faia o se tautōga e tautala i le mea moni i se faamasinoga.

O le tautō, o se faiga ua leva ona taatele. Mo se faataʻitaʻiga, i aso anamua e sii ai e tagata Eleni o latou lima i luga i le lagi pe paʻi atu foʻi i se fata faitaulaga a o faia se tautōga. Pe a faia e se tagata Roma se tautōga, sa ia uuina se maa i lona lima ma tautō: “Afai ou te taufaasesē ma le loto i ai, ae o loo faaolaina e le atua o Iupita le aai ma le olo, tau ina ia aveeseina atu e [le atua] o Iupita mea lelei uma mai iā te aʻu, e pei ona ou lafoaʻiina ese atu o lenei maa.”—Cyclopedia of Biblical, Theological, and Ecclesiastical Literature, a John McClintock ma James Strong, Tusi VII, itulau e 260.

O gaoioiga faapena, e faailoa ai faanaunauga o tagata e amanaia o loo iai se mana tauatua, o lē e mafai ona silafia mai tagata ma o sē e manaʻomia ona latou tali atu i ai. Mai lava i aso anamua, e iloa lelei e tagata tapuaʻi faamaoni o Ieova e faapea, na te silafia a latou faamatalaga ma mea latou te faia. (Faataoto 5:21; 15:3) Sa latou faia ni tautōga i luma o le Atua, sa avea foʻi le Atua ma molimau i a latou tautōga. Mo se faaaʻoaʻoga, na faia lenei mea e Poasa, Tavita, Solomona, ma Setekaia. (Ruta 3:13; 2 Samuelu 3:35; 1 Tupu 2:23, 24; Ieremia 38:16) E faataga foʻi e tagata tapuaʻi o le Atua moni isi e faatautōina i latou. Sa faia faapena e Aperaamo ma Iesu Keriso.—Kenese 21:22-24; Mataio 26:63, 64.

I nisi taimi, o le tagata lea na te faia se tautōga i luma o Ieova e faaopoopo i ai ma se tāga. Na taʻu atu e Aperamo (Aperaamo) i le tupu o Sotoma: “Ua sii loʻu lima [e tautō] iā Ieova, le Atua silisili ese, e ona le lagi ma le lalolagi.” (Kenese 14:22) O le agelu lea na tautala atu i le perofeta o Tanielu, na “sii i luga i le lagi lona lima taumatau ma lona lima tauagavale, ua tautō foʻi o ia i lē soifua e faavavau.” (Tanielu 12:7) E oo lava i le Atua, o loo taʻua faafaatusa e faapea, ua sii lona aao e tautō ai.—Teuteronome 32:40; Isaia 62:8.

E lē o teena e le Tusi Paia le faia o se tautōga. Ae peitaʻi, e lē tau faia e se Kerisiano se tautōga ina ia faamaonia ai faamatalaga uma na te faia. Na fetalai Iesu: “A ia faapea la outou upu, Ioe, ioe; E leai, e leai.” (Mataio 5:33-37) O le faamatalaga foʻi lenā a le soo o Iakopo. Ina ua ia faapea mai, “aua lava neʻi outou tautō,” sa ia lapataʻi mai e uiga i tautōga e faia faaulaula. (Iakopo 5:12) E leʻi faapea mai Iesu po o Iakopo e sesē le tautō i luma o se faamasinoga ina ia taʻu le mea moni.

O le ā la le mea e fai pe a faatonuina se Kerisiano i le faamasinoga ina ia tautō e faamaonia ai le moni o lana faamatalaga? Atonu na te lagona e mafai ona ia faia sea tautōga. A lē o lenā, e mafai lava ona faatagaina o ia e fai atu se faamautinoaga e lē o pepelo.—Kalatia 1:20.

Afai e aofia ai i taualumaga i le fale faamasino le sii i luga o le lima pe e tuu i luga o le Tusi Paia pe a tautō, e mafai lava ona faia faapea e se Kerisiano. E tatau ona ia manatua faaaʻoaʻoga faale-Tusi Paia o le faia o se tautōga faatasi ma se tāga. O le mea e sili ona tāua i se Kerisiano na i lo o le faia o se tāga pe a faia se tautōga, o lona manatua lea o loo tautō o ia i luma o le Atua e tautala i le upu moni. O le faia o sea tautōga, o se mataupu e tāua tele. Afai e lagona e se Kerisiano e mafai ma e tatau ona ia tali atu i se fesili ua fesiligia ai o ia e tusa ai ma lea tulaga, e tatau la ona ia manatua ua faatautōina o ia ina ia tautala i le upu moni, o le mea tonu lenā e manaʻo se Kerisiano e tautala ai i taimi uma lava.