‘Ia Faalatalata Atu i le Atua, Ona ia Faalatalata Mai Lea’

Le Olaga Muamua ma Mulimuli Ane Ai—Ua Suia e le Tusi Paia Olaga o Tagata

AFAI na e feiloaʻi iā Toni i le vaitaimi o lona talavou, o le a e iloa ai o ia o se tama e lē faale-uō ma e sauā, ma e masani ona asiasi i nofoaga e lauiloa i faiga matagā i Sini Ausetalia. Sa auai o ia i se kegi faatasi ma ana uō. Sa masani ona aafia i latou i le talepe fale, kegi faatupu faalavelave, ma taugā fana i luga o le ala tele.

Na amata ona ulaula Toni i le iva o ona tausaga. E oo ane i le 14 o ona tausaga, ua fai ma ana masani le faaaogāina o le mariuana ma ola i se olaga lē māmā. E oo ane i le 16 o ona tausaga, ua pulea o ia e fualaau faasāina, ma taʻitaʻia atu ai i le faaaogāina o le cocaine, LSD ma na faapea mai Toni: “O le mea moni, ou te faia so o se mea e mafai ina ia faamalieina ai oʻu tuʻinanauga i fualaau faasāina.” Sa ia faatūina loa se pisinisi o fefaatauaʻiga o fualaau i lalo o fesootaʻiga ma ni vaega lauiloa se toʻalua i faiga tau solitulafono. Na lauiloa Toni i talafatai i sasaʻe o Ausetalia o sē e maufaatuatuaina i le saunia o fualaau faasāina.

O le tau mo heroin ma mariuana e faaaogā e Toni e i le va o le $160 (U.S.) ma le $320 (U.S.) i le aso. Ae peitaʻi, e sili atu ai aafiaga na oo i ai lona aiga. Fai mai Toni: “E tele taimi e faalālā mai ai iā i maʻua ma laʻu avā fana ma naifi e le ʻausolitulafono o ē na saʻilia fualaau faasāina ma tupe i lo ma fale.” Ina ua mavae lona faafalepuipuiina faatolu, sa maumauaʻi ai loa Toni e iloilo po o fea o agaʻi i ai lona olaga.

E ui lava e masani ona alu i le lotu, ae sa manatu Toni e lē mafai ona maua se la faiā lelei ma se Atua o lē e manatu i ai e faapea na te faasalaina tagata agasala i le susunuina e faavavau i seoli. Ae ina ua asiasi atu i ai se ulugalii Molimau a Ieova, na faateʻia o ia i lona aʻoaʻoina e lē faapena le Atua. Sa fiafia o ia e toe faasagatonu lona olaga ma maua ai faamanuiaga mai i le Atua. Na faagaeetia o ia i le faamatalaga a Iesu Keriso e faapea: “E mafaia mea uma e le Atua.” (Mareko 10:27) Ae na faapitoa lava ona pāʻia o ia i upu faalaeiau nei: “Ia outou faalatalata atu i le Atua, ona faalatalata mai lea o ia iā te outou.”—Iakopo 4:8.

Ua fesagaʻi nei Toni ma se luʻi faigatā, o le faaōgatusa lea o lona olaga ma tapulaa a le Tusi Paia. Fai mai lana faamatalaga: “O le mea muamua lava na ou tuua o le ulaula, o se mea na lē mafai ona ou faia i le taimi muamua, e ui lava sa ou taumafai mo le tele o taimi. O le mana o Ieova na mafai ai ona ou tuua le faaaogāina o le heroin ma le mariuana, o masaniga sa pulea ai aʻu mo le 15 tausaga. E leʻi iai soʻu manatu e mafai ona ou taofia nei masaniga.”

Na i lo le mataʻu i se Atua na te faapuapuagatia e faavavau tagata i seoli—o se aʻoaʻoga e lē o maua i le Tusi Paia—sa taliaina ai e Toni ma lana avā le faamoemoe o le ola e faavavau i le parataiso i le lalolagi. (Salamo 37:10, 11; Faataoto 2:21) Ua faapea mai Toni: “E matuā manaʻomia lava se taimi umi ma ni taumafaiga fitā mo aʻu ina ia faaōgatusa loʻu olaga ma tapulaa a le Atua, ae o le fesoasoani a Ieova na ou taulau manuia ai.”

Ioe, o lē na avea muamua ma sē na pulea e fualaau faasāina ua avea nei o ia o se Kerisiano. Ua la  tauofo atu o la taimi ma lana avā, o a lā alagaʻoa faaletino, ma faaaluina le faitau afe itula mo le galuega tauaʻoaʻoga faale-Tusi Paia. O loo pisi foʻi i laʻua i le tausiaina aʻe o se fanau toʻalua e matataʻu i le Atua. O lenei suiga mataʻina sa faataulauina ona o le malosi o le mana o le Afioga a le Atua, le Tusi Paia. Ua moni ai, e pei ona fai mai le aposetolo o Paulo, “o loo ola le afioga a le Atua, o loo matuā galue foʻi.”—Eperu 4:12.

E ese mai i nei faaaʻoaʻoga e faalaeiauina ai, e finau mai ma le lē saʻo nisi e faapea, o le galuega tau aʻoaʻoga faale-Tusi Paia a Molimau a Ieova, ua faaleagaina ai aiga ma tulaga tau amio a le ʻautalavou. E mautinoa, o le mea na tupu iā Toni e faamaonia mai ai le sesē o na manatu.

E pei o Toni, e toʻatele ua iloa e mafai ona foʻia masaniga leaga sa iai. E faapefea? E ala i le faaalia o le faatuatua i le Atua ma faalagolago iā te ia, ma lana Afioga, aemaise ai le lagolagosua ma le manatu mamafa mai o aumea Kerisiano alolofa. Na faaiʻu mai le faamatalaga a Toni ma le fiafia: “O lea ua ou iloa nei le auala e mafai ai e mataupu silisili o le Tusi Paia ona puipuia laʻu fanau. Ua faasaoina e aʻoaʻoga a le Tusi Paia laʻu faaipoipoga. Ma ua faigofie ona momoe oʻu tuaoi i le taimi nei, auā ua lē toe avea aʻu ma sē taufaamataʻu iā i latou.”

[Faamatalaga faaopoopo i le itulau 9]

‘O le mana o Ieova na mafai ai ona ou tuua le masaniga o le faaaogāina o fualaau faasāina sa pulea ai aʻu mo le 15 tausaga’

[Pusa i le itulau 9]

Mataupu Silisili o le Tusi Paia e Aogā

Ua fesoasoani mataupu silisili eseese o le Tusi Paia i ē na pulea e fualaau faasāina ina ia tuua lenei masaniga leaga. O nisi nei o mataupu silisili o loo mulimuli mai:

“Ia tatou faamamā iā te i tatou i mea uma e leaga ai le tino atoa ma le agaga, ia faaatoatoaina lo outou faapaiaina i le mataʻu i le Atua.” (2 Korinito 7:1) O le faaaogāina o fualaau faasāina o le tetee lenā i le tulafono a le Atua.

“O le mataʻu iā Ieova, o le amataga o le poto lea; ia iloa foʻi le Paia, o le atamai lava lea.” (Faataoto 9:10) O le faaalia o le migao iā Ieova, e faavae aʻe lea i le mauaina o le poto saʻo iā te ia ma ona ala, ua mafai ona fesoasoani i le toʻatele e saʻoloto mai ai i aafiaga o fualaau faasāina.

“Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) E mafai ona tuua ni masaniga e faaleagaina ai e ala i le faatuatua atoatoa i le Atua ma faalagolago iā te ia.