Po o Iai Moni Sou Faatuatua i le Tala Lelei?
Po o Iai Moni Sou Faatuatua i le Tala Lelei?
“Ua latalata mai le malo o le Atua; inā salamō ia, ma faatuatua i le tala lelei.”—MAREKO 1:15, LF.
1, 2. O le a faapefea ona e faamatala le Mareko 1:14, 15?
O LE tausaga e 30 T.A. na amata ai le faiva mataʻina a Iesu Keriso i Kalilaia. Na ia talaʻi “le tala lelei i le Atua,” ma e toʻatele tagata Kalilaia na faagaeetia i lana fetalaiga e faapea: “Ua oo mai ona pō, ua latalata mai le malo o le Atua; inā salamō ia, ma faatuatua i le tala lelei.”—Mareko 1:14, 15, LF.
2 “Ua oo mai ona pō” e amata ai le faiva a Iesu ma le taimi e faia ai e tagata se filifiliga e aumaia ai le faamaoniga a le Atua. (Luka 12:54-56) Ua “latalata mai le malo o le Atua” ona o loo iai i inā Iesu o Lē filifilia e avea mulimuli ane ma Tupu. O lana talaʻiga na uunaʻia ai tagata loto faamaoni e salamō. Ae na faapefea e i latou—faapea ma i tatou—ona faaalia le “faatuatua i le tala lelei”?
3. O le faia o le ā e faaalia ai e tagata ua latou faatuatua i le tala lelei?
3 I le pei o Iesu, sa faapena foʻi ona timaʻi e le aposetolo o Peteru tagata ia salamō. Ina ua lauga atu Peteru i tagata Iutaia i Ierusalema i le Penetekoso o le 33 T.A., na ia taʻu atu e faapea: “Inā salamō ia, ma ia taʻitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foaʻi fua mai, o le Agaga Paia lea.” E faitau afe na salamō, papatisoina, ma avea ma soo o Iesu. (Galuega 2:38, 41; 4:4) I le 36 T.A., na faia ai foʻi faapena e tagata o Nuu Ese na salamō. (Galuega 10:1-48) O le faatuatua i le tala lelei i o tatou aso, ua uunaʻia ai le faitau afe o tagata e salamō iā latou agasala, faia se tuuina atu i le Atua, ma papatisoina. Ua latou taliaina le tala lelei o le faaolataga ma ua faaalia le faatuatua i le taulaga togiola a Iesu. E lē gata i lea, ua latou faatatauina le amiotonu ma tumau mausalī i le itu o le Malo o le Atua.
4. O le ā le faatuatua?
4 Ae o le ā le faatuatua? Na tusi le aposetolo o Paulo e faapea: “A o le faatuatua, o le faalagolago lea i mea ua faamoemoe i ai, o le mautinoa lea o mea e lē o vaaia.” (Eperu 11:1) O lo tatou faatuatua ua tatou mautinoa ai e faapea, o mea uma ua folafola mai e le Atua i lana Afioga e mautinoa pei lava o lea ua uma ona faataunuuina. E pei ua iā i tatou se faamaoniga o lo tatou umia saʻoloto o se mea totino. O le faatuatua foʻi o le faaalia lea o “le mautinoa,” po o faamaoniga e mautinoa ai mea e lē o vaaia. O o tatou tomai faalemafaufau ma le lotofaafetai e faamaonia ai iā i tatou le moni o na mea, e ui lava tatou te leʻi vaai i ai.—2 Korinito 5:7; Efeso 1:18.
E Tatou te Manaʻomia le Faatuatua!
5. Aiseā e tāua tele ai le faatuatua?
5 Na tatou fananau mai ma se manaʻoga faaleagaga ae tatou te leʻi fananau mai ma se faatuatua. O le mea moni, “e lē o i tagata uma le faatuatua.” (2 Tesalonia 3:2) Peitaʻi, e tatau i Kerisiano ona faatuatua ina ia mauaina ai mea ua folafolaina mai e le Atua. (Eperu 6:12) Ina ua uma ona faasino atu i le tele o faaaʻoaʻoga o le faatuatua, ona tusi lea o Paulo e faapea: “O i tatou foʻi, o loo ua vagavagaia e le faapotopotoga o ē matamata mai e faapea ona toʻatele, inā tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma, ma ia vaavaai atu iā Iesu, o lē na te taʻitaʻiina ma lē na te faaatoatoaina le faatuatua.” (Eperu 12:1, 2) O le ā “le agasala e faalavelavegofie ai i tatou”? O le leai o se faatuatua, po o le leiloa o le faatuatua na iai muamua. Ina ia tausia se faatuatua malosi, e tatau ona tatou “vaavaai atu iā Iesu” ma mulimuli i lana faaaʻoaʻoga. E tatou te manaʻomia foʻi ona teena amioga lē mamā, ia tetee i galuega a le tino, ma ʻalofia le matapeʻapeʻa, filosofia a le lalolagi ma aganuu e lē faale-Tusi Paia. (Kalatia 5:19-21; Kolose 2:8; 1 Timoteo 6:9, 10; Iuta 3, 4) E lē gata i lea, e tatau ona tatou talitonu faapea o loo iā i tatou le Atua ma e aogā moni fautuaga o loo i lana Afioga.
6, 7. Aiseā e talafeagai ai le tatalo mo le faatuatua?
6 E lē mafai ona faatupuina aʻe se faatuatua iā i tatou lava e ala i a tatou taumafaiga. O le faatuatua o se fua o le agaga paia o le Atua, po o le malosi galue. (Kalatia 5:22, 23, LT ) O lea, o le ā le mea e fai pe a manaʻomia ona faamalosia lo tatou faatuatua? Ua fetalai Iesu e faapea: “O outou . . . afai ua iloa e outou ona avatu o mea lelei mā a outou fanau, e lē sili ea ona foaʻiina mai e lo outou Tamā o i le lagi le Agaga Paia i ē ole atu ai iā te ia?” (Luka 11:13) O lea, ia tatou tatalo mo le agaga paia, ona e na te faatupuina aʻe iā i tatou le faatuatua lea e manaʻomia e faia ai le finagalo o le Atua e oo lava i tulaga e sili ona faigatā.—Efeso 3:20.
7 E talafeagai ona tatalo mo le faateleina o le faatuatua. A o toetoe lava tuli ese e Iesu se temoni mai se tauleʻaleʻa, na ʻaiʻoi atu le tamā o le tama ua faapea atu: “Ua ou faatuatua! Ia fesoasoani mai iā te aʻu i le mea ou te manaʻomia ai le faatuatua!” (Mareko 9:24, NW) Ua faapea mai soo o Iesu: “Ia e faatuputeleina lo matou faatuatua.” (Luka 17:5) O lea, ia tatou tatalo mo le faatuatua, ma le mautinoa o le a tali mai le Atua i na tatalo.—1 Ioane 5:14.
E Tāua le Faatuatua i le Afioga a le Atua
8. E mafai faapefea e le faatuatua i le Afioga a le Atua ona fesoasoani iā i tatou?
8 A o latalata i lona maliu, na taʻu atu e Iesu i ona soo: “Aua le atuatuvale o outou loto; ia outou faatuatua i le Atua, ia faatuatua mai foʻi iā te aʻu.” (Ioane 14:1) I le avea ma Kerisiano, tatou te faatuatua i le Atua ma lona Alo. Ae faapefea le Afioga a le Atua? E mafai e lana Afioga ona aumaia se taaʻiga malosi mo le lelei o o tatou olaga pe afai tatou te suʻesuʻe ma faatatauina ma le mautinoa atoatoa, e na te saunia fautuaga ma taʻiala silisili o loo iai mo i tatou.—Eperu 4:12.
9, 10. Po o le a faapefea ona e faamatalaina le manatu e faatatau i le faatuatua o loo taʻua i le Iakopo 1:5-8?
9 Ua faatumulia o tatou olaga lē lelei atoatoa i faafitauli. Peitaʻi, o le faatuatua i le Afioga a le Atua e mafai moni lava ona fesoasoani iā i tatou. (Iopu 14:1) Mo se faataʻitaʻiga, seʻi faapea ua tatou lē iloa pe faapefea ona taulimaina se faafitauli. Ua aumaia iā i tatou e le Afioga a le Atua le fautuaga lenei: “Afai ua leai se poto i so outou, inā ole atu ia i le Atua, o lē foaʻi tele mai i tagata uma ma le lē toe taʻutaʻua; ona foaʻiina mai ai lea iā te ia. A ia ole atu ma le faatuatua, aua lava neʻi masalosalo; auā o lē masalosalo e tusa ia ma le peau o le sami ua sousou i le matagi ma felafolafoaʻiina. Aua lava neʻi manatu lea tagata na te maua se mea e tasi mai le Alii; o le tagata faalotolotolua e faalētumau ia i ona ala uma.”—Iakopo 1:5-8.
10 O le a lē faitioina i tatou e Ieova ona o le leai o se poto ma tatalo atu ina ia mauaina. Na i lo lenā, o le a ia fesoasoani iā i tatou ina ia mauaina se vaaiga saʻo e faatatau i le faafitauli. Atonu e tatou te mauaina ni mau aogā mai i o tatou uso talitonu po o le taimi foʻi e tatou te suʻesuʻeina ai le Tusi Paia. A lē o lenā, e ono taʻitaʻiina i tatou e le agaga paia o Ieova i se isi auala. O le a aumaia e lo tatou Tamā faalelagi iā i tatou le poto e faafetaiaʻia ai faafitauli pe afai e tatou te “ole atu ma le faatuatua, aua lava neʻi masalosalo.” Afai e pei i tatou o peau o le sami e sousou i le matagi, e tatou te lē faatalitalia la e mauaina se mea mai le Atua. Aiseā? Ona o le uiga o lenei mea e tatou te faalotolotolua ma faalētumau iā tatou tatalo po o nisi o mea—e oo lava i le faaalia o le faatuatua. O lea, e manaʻomia ona iā i tatou se faatuatua malosi i le Afioga a le Atua ma le taʻitaʻiga o loo ia saunia mai. Seʻi o tatou iloiloina nisi o faaaʻoaʻoga i le auala o loo ia saunia ai le fesoasoani faapea ma le taʻitaʻiga.
Faatuatua ma le Tausia o le Ola
11. O le ā le faamautinoaga ua aumaia iā i tatou i le faatuatua i le Afioga a le Atua e tusa ai ma o tatou manaʻoga i aso taʻitasi?
11 E faapefea pe afai o lea ua tatou pagatia i le faalētonu o meaʻai, fale e nonofo ai po o le mativa? O le faatuatua i le Afioga a le Atua e aumaia ai iā i tatou le faamautinoaga e faapea, o le a tausia e Ieova o tatou manaʻoga i aso taʻitasi ma i le faiga fou o mea, o le a anoanoaʻi ana sauniuniga mo i latou uma e alolofa iā te ia. (Salamo 72:16; Luka 11:2, 3) Atonu e faamāfanafanaina i tatou pe a manatunatu loloto i le auala na saunia ai e Ieova meataumafa mo lana perofeta o Elia i le taimi o le oge. Mulimuli ane, na faatumauina faavavega e le Atua le falaoa ma le suāuu lea na faaauau ai le ola o le fafine ma lana tama ma Elia. (1 Tupu 17:2-16) Na faapena foʻi ona saunia e Ieova mea sa manaʻomia e lana perofeta o Ieremia i le taimi na siʻo ai e ʻautau a Papelonia Ierusalema. (Ieremia 37:21) E ui lava e itiiti meaʻai na maua e Ieremia ma Elia e aai ai, ae na tausia i laʻua e Ieova. Ua faapena foʻi ona saunia e Ieova mea e manaʻomia mo i latou o loo faaalia le faatuatua iā te ia i aso nei.—Mataio 6:11, 25-34.
12. O le a faapefea ona fesoasoani le faatuatua i le mauaina o meataumafa?
12 O le faatuatua e ō faatasi ma le faatatauina o mataupu silisili o le Tusi Paia e lē faapea o le a tatou mauʻoa ai faaletino, ae o le a fesoasoani iā i tatou e mauaina ai mea e manaʻomia. Ina ia faataʻitaʻi: Ua fautuaina i tatou e le Tusi Paia ina ia faamaoni, ia agavaa, ma ia galulue mamafa. (Faataoto 22:29; Failauga 5:18, 19; 2 Korinito 8:21) Ia aua lava neʻi o tatou manatu māmā i le tāua o le avea o se tagata faigaluega e iai se talaaga lelei. E oo lava i nofoaga e faigatā ona maua ai ni galuega e lelei totogi, e telē le avanoa e maua ai galuega a tagata e faamaoni, tomai, ma galue mamafa na i lo isi. E ui o na tagata faigaluega atonu e itiiti ni mea faitino o latou maua, ae e masani lava ona latou maua mea e manaʻomia ma faamalieina i le taumafa i meaʻai na mauaina e i latou lava.—2 Tesalonia 3:11, 12.
O le Faatuatua e Fesoasoani iā i Tatou e Onosaia ai Faanoanoaga
13, 14. E faapefea ona fesoasoani le faatuatua iā i tatou e onosaia ai faanoanoaga?
13 Ua faaalia ma le talafeagai e le Afioga a le Atua e faapea, o se tulaga masani le faanoanoa pe a maliu sē e pele iā i tatou. Na matuā faavauvau le augātamā o Aperaamo i le maliu o lana avā pele o Sara. (Kenese 23:2) Na matuā faanoanoa Tavita ina ua faalogo ua maliu lona atalii o Apisaloma. (2 Samuelu 18:33) E oo lava iā Iesu e lelei atoatoa na tutulu i le maliu o lana uō o Lasalo. (Ioane 11:35, 36) Pe a maliu sē pele, atonu e oo iā i tatou le toetoe lava lofitūina atoatoa i le faanoanoa, ae o le faatuatua i folafolaga a le Afioga a le Atua e fesoasoani iā i tatou e onosaia ai na faanoanoaga.
14 Na faapea mai Paulo: “O loo iā te aʻu le faamoemoe i le Atua, . . . o le a toe tutū mai ē ua amiotonu atoa ma ē ua amiolētonu.” (Galuega 24:15, LF) E manaʻomia ona iā i tatou le faatuatua i sauniuniga a le Atua mo le toe faatutūina o le anoanoaʻi o tagata i le ola. (Ioane 5:28, 29) O le a faatasi iā i latou na ia Aperaamo ma Sara, Isaako ma Repeka, Iakopo ma Lea—o i latou uma na o loo momoe i le oti ma faatalitali atu i le toetutū i le lalolagi fou a le Atua. (Kenese 49:29-32) Maʻeu le olioli o le a iai pe a toe fafagu mai ē pele o loo momoe i le oti ina ia ola i inei i le lalolagi! (Faaaliga 20:11-15) I le taimi nei, o le a lē aveesea e le faatuatua faanoanoaga uma, ae o le a tatou latalata atu ai i le Atua, o Lē e fesoasoani iā i tatou ina ia onosaia faanoanoaga.—Salamo 121:1-3; 2 Korinito 1:3.
E Faamalosia e le Faatuatua Ē Lotomafatia
15, 16. (a) Aiseā e tatou te faapea atu ai o le lotomafatia e lē faapea o se mea e lē masani ai i latou o loo faaalia le faatuatua? (e) O le ā e mafai ona fai e gafatia ai le lotomafatia?
15 Ua faaalia foʻi i le Afioga a le Atua faapea, e oo lava iā i latou e faaalia le faatuatua i le Atua e ono aafia i le lotomafatia. I le taimi o le ogaoga o ona tofotofoga, na lagona ai e Iopu faapea ua tuulafoaʻia o ia e le Atua. (Iopu 29:2-5) O le tulaga faatamaʻia o Ierusalema ma ona pa na loto faanoanoa ai Neemia. (Neemia 2:1-3) Na matuā faanoanoa Peteru ina ua ia faafitia Iesu lea na ia “tagi lotulotu” ai. (Luka 22:62) Na timaʻi Paulo i uso talitonu i le faapotopotoga i Tesalonia ia “faamāfanafana i ē loto iti.” (1 Tesalonia 5:14) O lea, o le lotomafatia o i latou o loo faaalia le faatuatua i aso nei e lē faapea o se mea e lē masani ai. O le ā la e mafai ona tatou faia ina ia gafatia ai le lotomafatia?
16 Atonu e tatou te lotomafatia ona ua tatou feagai ma ni faafitauli tugā. O lea, na i lo le tatou manatu i ai e taulima uma i le taimi e tasi, atonu e mafai ona tatou foʻia auauaʻi e ala i le faatatauina o mataupu silisili o le Tusi Paia. E ono fesoasoani lea e faaitiitia ai lo tatou lotomafatia. O le faapaleni o mea e fai ma le lava o le mālōlō e mafai foʻi ona avea ma fesoasoani. E tasi le mea e mautinoa: O le faatuatua i le Atua ma lana Afioga e faaleleia ai le tulaga faaleagaga auā e faamalosia ai lo tatou mautinoa faapea, o loo manatu mamafa mai o ia iā i tatou.
17. E faapefea ona tatou iloa e manatu mamafa mai Ieova iā i tatou?
17 Ua aumai e Peteru iā i tatou le faamautinoaga e faapea: ‘Ia faamaulalo outou i lalo o le aao malosi o le Atua, ina ia faamaualugaina outou e ia i ona pō e tatau ai. Ia tuuina atu ia te ia mea uma tou te popole ai, auā o loo manatu mai o ia iā te outou.’ (1 Peteru 5:6, 7) Na pese le faisalamo e faapea: “E taofia i luga e Ieova atoa uma ē pauu; o ia foʻi lē faatusaʻoina o ē ua faanoʻunoʻu uma lava.” (Salamo 145:14) E tatau ona tatou talitonu i nei faamautinoaga, ona o loo maua i le Afioga a le Atua. E ono faaauau ona iai le lotomafatia, ae maʻeu le faamalosia ai o lo tatou faatuatua i le iloa faapea, e mafai ona tatou tuu atu mea uma e tatou te popolevale ai i lo tatou Tamā alofa i le lagi!
Faatuatua ma Isi Puapuaga
18, 19. E faapefea ona fesoasoani le faatuatua iā i tatou e gafatia ai maʻi ma faamāfanafana ai i uso talitonu o loo mamaʻi?
18 E ono oo iā i tatou se tofotofoga tele o lo tatou faatuatua pe a tatou mafatia i ni maʻi mataʻutia po o ē foʻi e pele iā i tatou. E ui lava e lē o taʻu maia e le Tusi Paia ni vaifofō faavavega mo Kerisiano e pei o Epaferoti, Timoteo, ma Tofimo, ae e lē taumatea na fesoasoani Ieova iā i latou ina ia gafatia na tulaga. (Filipi 2:25-30; 1 Timoteo 5:23; 2 Timoteo 4:20) E lē gata i lea, o se “tagata ua manatua lē ua mativa,” na pese le faisalamo e faapea: “E lagolago ane Ieova iā te ia i le taotoga o lona maʻi; e te liua lona moega uma lava i lona maʻi.” (Salamo 41:1-3) E mafai faapefea ona fesoasoani upu a le faisalamo iā i tatou e faamāfanafana ai i uso talitonu o loo mamaʻi?
19 O se tasi o auala e saunia ai le fesoasoani faaleagaga o le tatalo faatasi ma ē mamaʻi ma tatalo mo i latou. E tatou te lē o talosagaina se vaifofō faavavega i aso nei, ae e mafai ona tatou tatalo ina ia avatu e le Atua le malosi iā i latou e gafatia ai o latou faafitauli atoa ai ma le malosi faaleagaga e manaʻomia e tumau ai i na taimi o le vaivai o le tino. O le a tausia i latou e Ieova, ma o le a faamalosia lo latou faatuatua e ala i le taulaʻi atu i le lumanaʻi lea “e lē fai mai foʻi se tasi ua mau ai, Ou te maʻi.” (Isaia 33:24) Maʻeu se faamāfanafanaina i le iloa faapea e ala iā Iesu Keriso ua toe faatūina ma le Malo o le Atua, o le a mauaina ai e tagata usiusitai le saʻolotoga mai le agasala, faamaʻi, ma le oti! O nei faamoemoega matagofie, tatou te faafetai ai iā Ieova, ‘o lē faamālōlōina o tatou maʻi atoa uma.’—Salamo 103:1-3; Faaaliga 21:1-5.
20. Aiseā e faapea atu ai e mafai e le faatuatua ona fesoasoani iā i tatou e tumau ai i “aso leaga” o le tulaga matua?
20 E mafai foʻi e le faatuatua ona fesoasoani iā i tatou e tumau ai i “aso leaga” o le tulaga matua, le taimi ua fāiifo ai le soifua mālōlōina ma le malosi. (Failauga 12:1-7) E mafai ona tatalo i latou e matutua e pei ona tatalo le faisalamo e faapea: “O oe lava o loʻu faamoemoega, le Alii e Ieova . . . Aua e te lafoaʻi iā te aʻu i ona pō ou te toeaina ai; aua e te tuulafoaʻi mai ia te aʻu pe a mavae atu loʻu malosi.” (Salamo 71:5, 9) Na lagona e le faisalamo le manaʻomia o le lagolagosua a Ieova, e pei foʻi o le toʻatele o o tatou uso Kerisiano o ē ua tele tausaga o auauna i le Atua a o lea ua afu lo latou soifua. Ona o lo latou faatuatua, ua mafai ai ona latou mautinoa le lagolagosua lē mavae a Ieova.—Teuteronome 33:27.
Tausia le Faatuatua i le Afioga a le Atua
21, 22. Afai e iā i tatou le faatuatua, e faapefea i lenā tulaga ona aafia ai la tatou faiā ma le Atua?
21 O le faatuatua i le tala lelei ma le Afioga atoa a le Atua e fesoasoani iā i tatou e faalatalata atili atu ai iā Ieova. (Iakopo 4:8) E moni, o ia o lo tatou Alii Silisili, ae o ia foʻi o Lē na Foafoaina i tatou ma o lo tatou Tamā. (Isaia 64:8; Mataio 6:9; Galuega 4:24, LF) Na pese le faisalamo e faapea: “O loʻu Tamā lava oe, o loʻu Atua, ma le papa o loʻu olataga.” (Salamo 89:26) Afai tatou te faaalia le faatuatua iā Ieova ma lana Afioga faagaeeina, e mafai foʻi ona tatou vaai iā te ia o ‘le papa o lo tatou olataga.’ Maʻeu se faaeaga faafiafia loto!
22 O Ieova o le Tamā o Kerisiano faauuagagaina ma a latou aumea o loo iai le faamoemoe faalelalolagi. (Roma 8:15) O lea, o le faatuatua i lo tatou Tamā faalelagi e lē mafai ona faanoanoa ai. Na faapea mai Tavita: “E ui lava ina tuua aʻu e loʻu tamā ma loʻu tinā, a e talia aʻu e Ieova.” (Salamo 27:10) E lē gata i lea ua iā i tatou lenei faamautinoaga e faapea: “E lē lafoaʻi e Ieova i lona nuu ona o lona suafa mamalu.”—1 Samuelu 12:22.
23. O le ā e manaʻomia mai iā i tatou ina ia olioli ai i se faiā tumau ma Ieova?
23 Ina ia olioli i se faiā tumau ma Ieova, o le mea moni, e ao ona iā i tatou le faatuatua i le tala lelei ma talia le Tusi Paia i lona tulaga moni lava—o le Afioga a le Atua. (1 Tesalonia 2:13) E tatau ona tatou faatuatua atoatoa atu iā Ieova ma ia faamalamalamaina e lana Afioga o tatou ala. (Salamo 119:105; Faataoto 3:5, 6) O le a tupu aʻe lo tatou faatuatua a o tatou tatalo atu iā te ia ma le mautinoa o lona alofa, alofa mutimutivale, ma lana fesoasoani.
24. O le ā le manatu faafiafia loto o loo aumaia i le Roma 14:8?
24 Na uunaʻia i tatou e le faatuatua ina ia faia se tuuina atu i le Atua e faavavau. O le iai o se faatuatua malosi, e tusa lava pe tatou te oti, o i tatou o ana auauna tuuina atu o loo iai le faamoemoe i le toetū. Ioe, “pe ola pe oti i tatou, o tagata lava o le Alii i tatou.” (Roma 14:8) Seʻi o tatou teuina lenā manatu faafiafia loto a o tatou talitonu i le Afioga a le Atua ma faaauau ona faatuatua i le tala lelei.
O le a Faapefea Ona E Tali?
• O le ā le faatuatua, ma aiseā tatou te manaʻomia ai lenei uiga?
• Aiseā e tāua ai lo tatou faatuatua i le tala lelei ma le Afioga atoa a le Atua?
• E faapefea ona fesoasoani le faatuatua iā i tatou e faafetaiaʻia ai puapuaga eseese?
• O le ā o le a fesoasoani iā i tatou e tausia ai le faatuatua?
[Fesili mo le Suʻesuʻega]
[Ata i le itulau 12]
Na tausia e Ieova Ieremia ma Elia ona o lo la faatuatua
[Ata i le itulau 13]
Sa iai se faatuatua malosi o Iopu, Peteru ma Neemia
[Ata i le itulau 15]
Ina ia olioli i se faiā tumau ma Ieova, e tatau ona tatou faatuatua i le tala lelei