‘Ia Outou Fua Tele Mai’

‘Ia outou fua tele mai; ona fai ai lea outou moʻu soo.’—IOANE 15:8.

1. (a) O le ā le manaʻoga i le avea ma soo na taʻu atu e Iesu i ona aposetolo? (e) O le ā le fesili e tatau ona tatou fesili ifo ai iā i tatou lava?

O LE afiafi a o lumanaʻi lona maliu. Sa lava le taimi na faaalu e Iesu e faalaeiauina ai ona aposetolo e ala i le saunoa saʻo atu ma le māfana iā i latou. O le taimi lea, pe tusa ua teʻa le vaeluaga o le pō, ae ona o le alofa o Iesu i ana uō pele, na faaauau ai ona ia saunoa atu. O lea, a o faagasolo lana saunoaga, sa ia toe faamanatu atu iā i latou le manaʻoga mulimuli e tatau ona latou ausia ina ia avea ai pea ma ona soo. Na ia fetalai e faapea: “E viia loʻu Tamā i lenei mea, pe a outou fua tele mai; ona fai ai lea outou moʻu soo.” (Ioane 15:8) Po ua tatou ausia ea i aso nei lenei manaʻoga i le avea ma soo? O le ā le uiga o le “fua tele mai”? Ina ia maua le tali, seʻi o tatou iloiloina le talanoaga na faia e Iesu i lenā pō.

2. O le ā le talafaatusa e faatatau i fua na taʻu atu e Iesu i le afiafi a o leʻi maliu?

² O le fautuaga ina ia fua mai, o le vaega o se talafaatusa lea na taʻu atu e Iesu i ona aposetolo. Na ia fetalai e faapea: “O aʻu nei o le vine moni, a o loʻu Tamā o lē galue vine ia. O la uma lava o iā te aʻu e lē fua, e aveeseina e ia; a o la uma e fua, e teuteu e ia, ina ia fua mai ai atili. Ua uma ona faamamāina o outou i le upu na ou tautala atu ai iā te outou. Inā tumau ia o outou iā te aʻu, o aʻu foi iā te outou. Faapei o le la e lē mafai ona fua pe a na o ia, pe afai e lē mau i le vine; e faapea foʻi outou, pe afai tou te  lē tumau iā te aʻu. O aʻu nei o le vine, o la outou. . . . E viia loʻu Tamā i lenei mea, pe a outou fua tele mai; ona fai ai lea outou moʻu soo. Faapei ona alofa mai o le Tamā iā te aʻu, e faapea lava ona ou alofa atu iā te outou; ia tumau pea outou i loʻu alofa. Afai tou te tausia aʻu poloaʻiga, ona tumau lea o outou i loʻu alofa.”—Ioane 15:1-10.

3. O le ā e tatau ona faia e soo o Iesu ina ia mafai ai ona fua mai?

³ I lenei talafaatusa o Ieova o loo avea ma Lē Galue Vine, o Iesu o le vine, a o aposetolo ia na fetalai atu i ai Iesu o la. Pe afai e taumafai aposetolo e “tumau” iā Iesu, ona latou fua mai ai lea. Ona faamatala lea e Iesu o le auala e taulau manuia ai aposetolo i le tausia o lenei autasi tāua: “Afai tou te tausia aʻu poloaʻiga, ona tumau lea o outou i loʻu alofa.” Mulimuli ane, na tusia e le aposetolo o Ioane faaupuga tai faapena i uso Kerisiano: ‘O lē tausi i poloaʻiga a Keriso, o loo tumau lea i totonu iā te ia.’ * (1 Ioane 2:24; 3:24) O lea, o le tausia o poloaʻiga a Keriso, o le a tumau ai ona soo iā te ia, ma o lenā autasi, o le a mafai ai ona fua mai. O le ā e iloa ai le fua lea e tatou te manaʻomia ona fuaina?

Avanoa e Tupu Aʻe Ai

4. O le ā e mafai ona tatou aʻoaʻoina mai le mea moni faapea e “aveeseina” e Ieova la uma e lē fua mai?

⁴ I le talafaatusa i le vine, e “aveeseina,” pe tipi ese e Ieova se la e lē fua. O le ā o loo taʻu mai e lenei mea iā i tatou? Ua taʻu mai iā i tatou faapea e lē gata ina manaʻomia ona fua mai soo uma, ae e tatau foʻi ona mafai ona fua mai, po o le ā lava le tulaga po o mea latou te mafaia. O le mea moni, e feteenaʻi ma uiga alofa o Ieova le “aveeseina” o se soo o Keriso ona o le lē taulau ona faataunuuina se mea sa lē mafai e lona malosi ona ausia.—Salamo 103:14; Kolose 3:23; 1 Ioane 5:3.

5. (a) Ua faapefea i le talafaatusa a Iesu ona faaalia ai e mafai ona tatou faaleleia atili le fuaina mai o fua? (e) O ā ituaiga e lua o fua o le a tatou iloiloina nei?

⁵ O le talafaatusa a Iesu i le vine ua faaalia ai foʻi faapea, e ui lava ina itiiti mea e mafai ona tatou faia ona o o tatou tulaga, ae tatau lava ona tatou vaai i avanoa e faia ai se agaʻigaʻi i luma i le avea ma soo. Mātau le auala na faaupu ai e Iesu: “O la uma lava o iā te aʻu e lē fua, e aveeseina e ia; a o la uma e fua, e teuteu e ia, ina ia fua mai ai atili.” (Ioane 15:2) A o faaiʻuiʻu le talafaatusa, na uunaʻia ai e Iesu ona soo ia “fua tele mai.” (Fuaiupu e 8) O le ā le manatu o loo iai i inei? I le avea ai ma soo, e lē tatau lava ona manatu māmā i le fuaina o fua. (Faaaliga 3:14, 15, 19) Na i lo lenā, e tatau lava ona tatou vaai i auala e faaleleia atili ai le fuaina mai o fua. O le ā le ituaiga o fua e tatau ona tatou taumafai e fua tele mai? E lua ituaiga fua (1) “le fua o le Agaga” ma le (2) o fua o le Malo.—Kalatia 5:22, 23; Mataio 24:14.

Le Fua o Uiga Faa-Kerisiano

6. Na faapefea ona faamamafa e Iesu Keriso le tāua o le fua muamua o le agaga na ia taʻua?

⁶ O loo taʻua muamua lava i “le fua o le Agaga” ia le alofa. Ua faatupuina aʻe e le agaga o le Atua le alofa i Kerisiano, ona ua latou usitaia le faatonuga a Iesu na faia a o toeitiiti lava oo i le taimi na ia fetalai ai i le talafaatusa i le vine lea e fuaina mai fua. Na ia taʻu atu i ona aposetolo: “O le poloaʻiga fou ou te tuu atu ai iā te outou, ia outou fealofani.” (Ioane 13:34) O le mea moni lava, i lana saunoaga atoa i lenā pō mulimuli o lona soifuaga faalelalolagi, na faamanatu soo atu ai e Iesu i aposetolo le manaʻoga ina ia faaalia le alofa.—Ioane 14:15, 21, 23, 24; 15:12, 13, 17.

7. Na faapefea ona faaalia e le aposetolo o Peteru faapea o le fuaina o fua, e fesootaʻi atu i le faaalia o uiga e pei o uiga o Keriso?

⁷ Na malamalama lelei Peteru ona sa iai i inā i lenā pō i le alofa e pei o le alofa o Keriso ma uiga e fesootaʻi atu i ai lea e tatau ona faaalia e soo moni o Keriso. I tausaga mulimuli ane, na faalaeiau e Peteru Kerisiano ina ia ati aʻe na uiga  e pei o le pulea totino, alofa faaleuso, ma le alofa. Na ia faapea mai atili o le faia faapea, e puipuia ai i tatou mai le ‘paiē, po o le lē fua mai.’ (2 Peteru 1:5-8) Po o le ā lava lo tatou tulaga o loo iai, e mafai lava ona tatou faaalia le fua o le agaga. O lea, seʻi o tatou taumafai nei e faaalia le alofa, agalelei, agamalu, ma isi uiga pei o uiga o Keriso i le tele e mafai ai, ona “e lē faatulafonoina mea faapena,” po o le faatapulaa foʻi. (Kalatia 5:23) O lea, seʻi o tatou fua ‘mai atili.’

Fuaina o le Fua o le Malo

8. (a) O le ā le sootaga i le fua o le agaga ma le fua o le Malo? (e) O ā fesili e manaʻomia ona tatou uaʻi atu i ai?

⁸ O le lanu ma le susua o fua, e faamatagofieina atili ai se laau. Peitaʻi, o le aogā o ia fualaau e sili atu na i lo lenā faamatagofie. O fualaau e tāua foʻi mo le faateleina o laau e ala i o latou fatu. E faapena foʻi ona sili atu mea e mafai ona fai e le fua o le agaga na i lo le faamatagofieina ai o o tatou uiga faa-Kerisiano. O uiga e pei o le alofa ma le faatuatua e uunaʻia ai foʻi i tatou e faasalalauina le feʻau o le Malo e pei o ni fatu o loo mauaina i le Afioga a le Atua. Mātau le auala o loo faamamafa ai e le aposetolo o Paulo lenei sootaga tāua. Ua ia faapea mai: “O i matou foʻi ua matou faatuatua [o se vaega o le fua o le agaga], o le mea lea ua matou tautala atu ai.” (2 Korinito 4:13) I lenei auala, ua faamatala atili ai e Paulo faapea, e tatou te “avatu soo ai le taulaga o le viiga i le Atua, o le fua lea o tatou laugutu” —le ituaiga lona lua o le fua lea e manaʻomia ona tatou faaalia. (Eperu 13:15) Po o iai ea se avanoa i o tatou olaga e “fua tele mai” ai i le avea ma ē e faalauiloa le Malo o le Atua?

9. Po o le fuaina ea o fua, e tutusa ma le faia o soo? Faamatala.

⁹ Ina ia taliina ma le saʻo, e manaʻomia ona tatou malamalama muamua po o le ā e aofia ai i le fua o le Malo. Pe e saʻo ea le manatu faapea o le fuaina o fua o lona uiga o le faia o soo? (Mataio 28:19) Po o le fua ea o le a tatou fuaina, e faatatau atu na o tagata lava e tatou te fesoasoani atu i ai ina ia avea ma tagata tapuaʻi papatisoina a Ieova? E leai. Ana faapea o le tulaga moni lea, o le a matuā faalotovaivaia ai la Molimau pele uma o ē ua autausagā o faalauiloa ma le faamaoni le feʻau o le Malo i oganuu e itiiti lava se tali mai. Ioe, ana faapea o le fua o le Malo o loo tatou fuaina mai ua fai ma sui o soo fou, o le a pei la na Molimau galulue mamafa o la e lē fua mai i le talafaatusa a Iesu! O le mea moni lava, e lē o le tulaga lenā. O lea la, o le ā le fua autū o la tatou faiva?

Fua Mai e Ala i le Faasalalauina o Fatu o le Malo

10. E faapefea i le faataʻitaʻiga a Iesu i le tagata lūlū saito ma ituaiga o eleele eseese ona faaalia ai le fua moni o le Malo, ae o le ā foʻi e lē o uiga atu i ai?

¹⁰ O le talafaatusa a Iesu i le tagata lūlū saito ma ituaiga o eleele eseese e fā e faasino atu i le tali—o se tali faamāfanafana loto mo i latou o loo molimau i oganuu e itiiti le tali mai. Na fetalai Iesu faapea o le fatu, o le feaʻu lea o le Malo  o loo i Afioga a le Atua ma o le eleele e fai ma sui o le loto o le tagata. O nisi o fatu na ‘paʻū i le eleele lelei; ua tupu, ua fua mai.’ (Luka 8:8) O le ā le fua? Ioe, pe a tātupu le lālā saito ma matua, e maua mai ai fua, e lē o ni tamaʻi lālā saito, ae o fatu saito fou. E faapena foʻi, ona fuaina e se Kerisiano ni fua, e lē o ni soo fou, ae o fatu fou o le Malo.

11. E faapefea ona faamatalaina fua o le Malo?

¹¹ O lea la, o le fua i le tulaga lenei, e lē o soo fou ma e lē o faasino atu foʻi i uiga lelei faa-Kerisiano. Talu ai o le fua o loo totōina o le upu o le Malo, o fua la e tatau ona faasino atu i ni fatu se tele. O le fuaina o fua i le tulaga lenei e faasino atu i le talanoa e faatatau i le Malo. (Mataio 24:14) Po o le fuaina ea o na fua o le Malo—le faalauiloa o le tala lelei o le Malo—o se mea e tatou te mafai ona fai, po o le ā lava lo tatou tulaga o loo iai? Ioe, e mafai ona tatou fuaina mai! I le talafaatusa lava lenā, ua faamatala ai e Iesu le māfuaaga.

Tuuina Atu le Mea Sili Tatou te Mafaia ia Viia ai le Atua

12. Pe e mafai e Kerisiano uma ona fuaina mai fua o le Malo? Faamatala.

¹² “O le mea sa lūlūina i le eleele lelei,” o le faamatalaga lea a Iesu, “ua fua mai lava ia, e taʻiselau i nisi, e taʻionogafulu i nisi, e taʻitolugafulu foʻi i nisi.” (Mataio 13:23) O saito e lūlūina i se faatoʻaga e ono eseese lava fua e maua e faalagolago i tulaga o loo iai. I se tulaga talitutusa, o le mea e mafai ona tatou faia i le  folafolaina o le tala lelei e ono eseese e tusa ai o o tatou tulaga, ma na faaalia e Iesu faapea o loo ia silafia lenei mea. E ono tele avanoa o isi; o isi atonu e lelei atu lo latou soifua mālōlōina ma sili atu lo latou malolosi. O lea o le mea e mafai ona tatou fai atonu e sili atu pe itiiti ifo na i lo mea e mafaia e isi, ae afai o loo faailoa ai le mea sili e tatou te mafaia, ua faafiafia la Ieova. (Kalatia 6:4) E tusa lava foʻi po ua oo ina tulaga matua po ua aafia i se maʻi ua lē atoatoa ai le malosi o le tino ua tapulaa ai lo tatou sao i le galuega talaʻi, e lē taumatea e tagaʻi mai iā i tatou ma le agalelei lo tatou Tamā o Ieova faapea, o se tasi o loo “fua tele mai.” Aiseā? Talu ai ua tatou avatu iā te ia ‘mea uma ua iā i tatou’—la tatou auaunaga ma le lotoatoa iā te ia. *—Mareko 12:43, 44; Luka 10:27.

13. (a) O le ā le māfuaaga autū e tatou te “ō” ai ma fua mai fua o le Malo? (e) O le ā e fesoasoani iā i tatou e faaauau ona fua mai fua i oganuu e itiiti le tali mai? (Tagaʻi i le pusa i le itulau e 21.)

¹³ Po o le ā lava le tele e mafai ai ona tatou fuaina fua o le Malo, o le a uunaʻia i tatou e ‘ō ma ia tatou fua mai ni fua,’ pe a teu i o tatou mafaufau le māfuaaga ua tatou faia ai. (Ioane 15:16) Na taʻua e Iesu le māfuaaga autū: “E viia loʻu Tamā i lenei mea, pe a outou fua tele mai.” (Ioane 15:8) Ioe, o la tatou galuega talaʻi e faamamaluina ai le suafa o Ieova i tagata uma. (Salamo 109:30) Na taʻua e Honor o se Molimau faamaoni ua silia i le 70 ona tausaga e faapea: “E oo lava i oganuu e lē lelei le tali mai a tagata, o se faaeaga le fai ma sui o Lē Silisili Ese.” O Claudio, o se Molimau maelega talu mai le 1974 na fesiligia po o le ā le māfuaaga ua faaauau ai pea ona ia talaʻi e ui lava ina toʻaitiiti e tali mai i lana oganuu, ma na tali mai i le siiina mai o le Ioane 4:34, lea e tatou te faitau ai i fetalaiga a Iesu e faapea: “O laʻu mea e ʻai, ia ou faia le finagalo o lē na auina mai aʻu, ma faaiʻu lana galuega.” Na toe faaopoopo mai Claudio e faapea: “I le pei o Iesu, ou te manaʻo e lē gata ina ou amataina ae ia faaumaina laʻu galuega o sē e faalauiloa le Malo.” (Ioane 17:4) E ioe i ai Molimau a Ieova i le lalolagi atoa i lenā faamatalaga.—Tagaʻi i le pusa “Le Auala e ‘Fua Mai ai ma le Onosai,’” i le itulau e 21.

Ia Talaʻi ma Aʻoaʻo Atu

14. (a) O ā fuafuaga e lua na iai o le galuega a Ioane le Papatiso ma Iesu? (e) O le a faapefea ona e faamatalaina galuega a Kerisiano i aso nei?

¹⁴ O le uluaʻi tagata na folafola le Malo o loo taʻua i tusi o Evagelia o Ioane le papatiso. (Mataio 3:1, 2; Luka 3:18) O lana fuafuaga autū “ina ia molimau,” ma na ia faia faapea ma le faatuatua atoatoa ma le faamoemoe ina ia “talitonu i ai o tagata uma lava.” (Ioane 1:6, 7, LT) O le mea moni, o nisi sa talaʻi i ai Ioane na avea ma soo o Keriso. (Ioane 1:35-37) O lea la, o Ioane o sē sa talaʻi faapea ma le faia o soo. O Iesu foʻi o sē sa talaʻi ma aʻoaʻo atu. (Mataio 4:23; 11:1) E lē faateʻia ai la, i le faatonuina e Iesu o ona soo e lē gata ina talaʻi le feʻau o le Malo ae fesoasoani foʻi i tagata ua taliaina le feʻau e avea ma ona soo. (Mataio 28:19, 20) O la tatou galuega i aso nei o le talaʻi ma aʻoaʻo atu.

15. O le ā le tulaga talitutusa o loo iai i le tali atu i le galuega talaʻi na faia i le uluaʻi senituri T.A. ma le tali mai i le galuega o loo faia i aso nei?

¹⁵ O i latou i le uluaʻi senituri T.A. na faalogo iā Paulo o talaʻi ma aʻoaʻo atu, “ua talitonu foi nisi i upu ua fai atu, a ua lē talia e nisi.” (Galuega 28:24) I aso nei, e faapena foʻi le tali mai a tagata. E faanoanoa lava, ona o le tele o fatu o le Malo ua paʻūʻū i le eleele malō. E ui i lea, e paʻūū lava nisi fatu i le eleele lelei, mauaa, ma tātupu aʻe, e pei lava na valoia e Iesu. O le mea  moni, i le lalolagi aoao, o se fua faatatau e silia i le 5,000 tagata ua avea ma soo faamaoni o Keriso i vaiaso taʻitasi o le tausaga! O nei soo fou ua ‘talitonu i upu na fai atu,’ e ui o le toʻatele o isi tagata ua lē talitonu. O le ā na fesoasoani i o latou loto ina ia taliaina le feʻau o le Malo? O le tulaga masani lava o le fiafia totino na faaalia e Molimau—le faasūsūina o fatu fou ua totōina—e iai ni aogā. (1 Korinito 3:6) Seʻi manatu i ni faataʻitaʻiga se lua mai le tele o faataʻitaʻiga.

E Telē se Aogā o le Faaalia o le Fiafia Totino

16, 17. Aiseā e tāua ai le faaalia o le fiafia totino iā i latou tatou te feiloaʻi i la tatou faiva?

¹⁶ O se talavou Molimau e suafa iā Karolien i Peleseuma, na asiasi atu i se fafine matua e leʻi faaalia se fiafia i le feʻau a le Malo. Ona sa fusi le lima o le fafine i se fusi, sa ofoina atu e Karolien ma lana paga se fesoasoani, ae na teena e le fafine. Lua aso mulimuli ane na toe foʻi atu ai Molimau lava ia e toʻalua i le fafine ma fesili atu po o ā mai o ia. Na taʻua e Karolien e faapea, “sa telē se aogā o lenei asiasiga, sa faateʻia o ia i le iloa o loo ma fiafia moni iā te ia. Na ia valaaulia i maʻua i lona fale, ma amata loa se suʻesuʻega faale-Tusi Paia.”

¹⁷ O se Molimau i le Iunaite Setete e suafa iā Sandi, na ia faaalia foʻi le fiafia totino iā i latou na ia talaʻi atu i ai. E vaai o ia i se nusipepa i le itulau lea o loo iai faasilasilaga o pepe fou ua fananau ona ia asiasi lea i mātua o nei pepe ma Laʻu Tusi o Tala o Le Tusi Paia. * Talu ai e masani lava ona maua le tinā i le fale ma e fiafia e faailoa i tagata asiasi lana pepe, e masani lava ona sosoo ai ma se talanoaga. Ua faamatala e Sandi e faapea, “Ou te talanoa atu i mātua e faatatau i le tāua o le ati aʻe o se faiā māfana ma le pepe fou e ala i le faitau i ai, mulimuli ane ona ou talanoa atu lea i faigatā o le tausia aʻe o se tamaitiiti i le lalolagi i aso nei.” Ona o se asiasiga faapena talu ai nei, na amata ona auauna ai se tinā ma le fanau e toʻaono iā Ieova. O le tausolomua ma faaalia o le fiafia totino e ono taʻitaʻia ai i iʻuga olioli i la tatou faiva.

18. (a) Aiseā e mafai ai e i tatou uma lava ona ausia le manaʻoga o le “fua tele mai”? (e) O ā manaʻoga e tolu o le avea ma soo o loo taʻua i le Evagelia a Ioane o loo e naunau e ausia?

¹⁸ Maʻeu le faalaeiauina i le iloa faapea, o le manaʻoga ia “fua tele mai” o se mea e mafai ona fai! Pe e tatou te laiti pe matutua, pe e lelei lo tatou soifua mālōlōina pe leaga, pe tatou te talaʻi i oganuu e talia ma le fiafia pe e lē talia foʻi, ae o i tatou uma lava e mafai ona fua tele mai. E faapefea? E ala i le faaalia o le fua o le agaga i le tele e mafai ai ma le faasalalauina atu o le feʻau o le Malo o le Atua i le mea sili e tatou te mafai. I le taimi e tasi e tatou te taumafai e ‘tumau i le mataupu a Iesu’ ma ia ‘tatou fealofani.’ Ioe, e ala i le ausia o nei manaʻoga tāua e tolu o le avea ma soo e pei ona taʻua i le Evagelia a Ioane, e tatou te faamaonia ai faapea o ‘soo moni i tatou o Keriso.’—Ioane 8:31; 13:35.

[Faamatalaga pito i lalo]

Fesili Autalu

• O ā ituaiga o fua e manaʻomia ona tatou fuaina tele mai?

• Aiseā e mafai ai ona tatou ausia le sini o le “fua tele mai”?

• O ā manaʻoga tāua e tolu mo le avea ma soo na taʻua i le Evagelia a Ioane na tatou iloiloina?

[Fesili mo le Suʻesuʻega]

[Pusa/Ata i le itulau 21]

LE AUALA E ‘FUA MAI AI MA LE ONOSAI’

O LE ā e fesoasoani iā te oe e faaauau ai ona talaʻi ma le faamaoni le feʻau o le Malo i oganuu e lē tali mai? O nisi nei o tali lelei i lenei fesili.

“O le iloa faapea o loo lagolagoina atoatoa i tatou e Iesu ua uunaʻia ai le mautinoa ma le finafinau, po o le ā lava le tali mai i le oganuu.”—Heli, 72 tausaga; papatiso i le 1946.

“O le mau i le 2 Korinito 2:17 e faalaeiauina ai pea aʻu. Ua faapea mai e tatou te auai i le faiva i lalo o le vaaiga a le ‘Atua ma Keriso.’ Pe a ou iai i le faiva, ou te olioli i le auaufaatasi ma aʻu uō pele.”—Claudio, 43 tausaga; papatiso i le 1974.

“O le mea moni o le galuega talaʻi o se tauiviga fitā mo aʻu. Peitaʻi, ua ou iloa le moni o upu o loo i le Salamo 18:29: “O loʻu Atua na ou osopuna ai i le pa.”—Gerard, 79 tausaga; papatiso i le 1955.

“Afai e mafai ona ou faitau na o se mau se tasi i le faiva, e faamalieina aʻu ona ua iloiloina le loto o se tasi e le Tusi Paia.”—Elenoa, 26 tausaga; papatiso i le 1989.

“Ou te taumafai e fai auala eseese e amata ai aʻu talanoaga. E tele naʻuā taulimaga o le a lē mafai ona ou faaaogāina uma i taimi o loo totoe o loʻu ola.”—Paulo, 79 tausaga; papatiso i le 1940.

“Ou te lē amanaʻia le tali lē lelei mai. Ou te taumafai ia toʻa lelei i le taimi ou te talanoa atu ai i tagata ma faalogo atu i o latou manatu.”—Tanielu, 75 tausaga; papatiso i le 1946.

“Ua ou feiloaʻi atu i tagata papatiso fou na faapea mai iā te aʻu sa telē se vaega o laʻu galuega talaʻi na fai i lo latou avea ma Molimau. Ou te leʻi iloa, na latou suʻesuʻeina mulimuli ane le Tusi Paia ma se tasi ma fesoasoani iā i latou ia agaʻigaʻi i luma. Ua aumaia iā te aʻu le olioli i le iloa faapea o la tatou faiva o se taumafaiga a se ʻau.”—Ioana, 66 tausaga; papatiso i le 1954.

O le ā na fesoasoani iā te oe e ‘fua mai ai ma le onosai’?—Luka 8:15.

[Ata i le itulau 20]

O le faaalia o le fua o le agaga ma le folafolaina o le feʻau o le Malo, tatou te fua tele mai ai

[Ata i le itulau 23]

O le ā na uiga i ai Iesu ina ua ia fetalai atu i ona aposetolo: ‘Ia outou fua tele mai’?