Le Auala e Ati Aʻe ai se Vaaiga Paleni i Galuega

I TAUVAGA lē faatuaoia o maketi i le lalolagi i aso nei, ma le anoanoaʻi o mea ua gaosia, ua lē naunau ai le toʻatele o tagata e ō e faigaluega i aso taʻitasi. Peitaʻi, e tatau ona tatou fiafia i a tatou galuega. Aiseā? Auā na faia i tatou i le faatusa o le Atua, ma e fiafia le Atua i ana galuega. Mo se faaaʻoaʻoga, ina ua silasila atu le Atua i mea na ia faia i le faaiʻuga o “aso” e ono o le foafoaga po o ni vaitaimi uumi, ua faapea mai le Kenese 1:31: “Ua silasila atu le Atua i mea uma ua na faia, faauta foʻi, ua matuā lelei lava.”

Ona o le fiafia o Ieova e galue, e mautinoa lava, o se tasi lea o māfuaaga ua taʻua ai o ia “o le Atua [“fiafia,” NW].” (1 Timoteo 1:11) Pe e lē tatau ea la ona faapea, o le tele o lo tatou faataʻitaʻi atu iā te ia o le tele foʻi lea o lo tatou fiafia? O le mea lea na tusi ai le tupu o Isaraelu anamua o Solomona, o se tufuga iloga ma o sē e faamaopoopoina mea e faapea: “Ia taʻitasi le tagata ma ʻai, ma inu, ma fiafia i mea lelei i ana galuega uma; o le mea foaʻiina mai lea e le Atua.”—Failauga 3:13.

E matuā faigatā tele ona atiina aʻe se vaaiga paleni atoatoa i galuega i nei aso ua vave tele ai fesuiaiga i fale faigaluega. Ae e faamanuia e Ieova le Atua i latou o ē e utagia lana taʻitaʻiga alofa. (Salamo 119:99, 100) Ua oo ina faatāuaina ma maufaatuatuaina na tagata faigaluega, ma e foliga mai e faigatā ona vāea mai i a latou galuega. Ua aʻoaʻoina i latou e tagaʻi i o latou olaga ma galuega e lē gata i le itu faaletino ae faapea foʻi i le faaleagaga. O le mea lea ua mafai ai ona latou faia ni filifiliga tatau i le olaga, ma iloa ai e lē o muta mai lo latou fiafia ma lagona saogalemu i a latou galuega po o galuega na e masani ona lē maufaatuatuaina ai. (Mataio 6:31-33; 1 Korinito 2:14, 15) Ua fesoasoani lenā mea iā i latou e atiina aʻe ai se vaaiga paleni ma talafeagai i galuega.

Ia Atiina Aʻe se Galuega Talafeagai e Faafiafia ai le Atua

O nisi tagata ua pulea e galuega, ua faamuamua a latou galuega i mea uma lava. A o isi tagata faigaluega e naunau i le iʻuga o le aso lea e  mānava ai ma ō atu loa i aiga. O le ā la le vaaiga paleni? Ua tali mai le Tusi Paia: “E sili ona lelei o se luutaga e tasi ma le filemu, i luutaga e lua ma le tigā, ma le ʻai i le matagi.” (Failauga 4:6) O le galue mamafa po o le faigaluega mo taimi uumi, o le mea moni, e lē aogā ma o “le ʻai i le matagi.” Aiseā? Auā atonu o le a faaleagaina ai mea tonu lava ia e mafai ona tatou maua ai le fiafiaga sili: o la tatou faiā ma aiga ma uō, lo tatou tulaga faaleagaga, lo tatou soifua mālōlōina, e oo lava i le faafualoaina o o tatou ola. (1 Timoteo 6:9, 10) O le vaaiga paleni, o le lotomalie lea i mea faitino itiiti ua maua, faatasi ai ma le olioli i le mauaina o se filemu, na i lo o le mafatia i le tele o galuega fitā ma le tigā.

I le faalaeiauina o sea vaaiga paleni, e lē taliaina e le Tusi Paia le paiē. (Faataoto 20:4) O le paiē e aveesea ai le faaaloalogia o oe lava, ma le faaaloalo atonu o iai i isi mo i tatou. A o le mea e sili ona leaga, o le faaleagaina ai lea o la tatou faiā ma le Atua. Ua taʻu saʻo mai lava e le Tusi Paia e faapea, o le tagata e lē fia galue, e lē tatau ona ʻai o ia i meaʻai a isi. (2 Tesalonia 3:10) O lea, e tatau ona suia ona ala ma ia galue malosi, ina ia maua ai ni mea e ʻai e lava mo tagata o lona aiga o loo faalagolago i lana tausiga. O le galue mamafa, atonu e mafai ai ona ia fesoasoani atu iā i latou o loo matuā matitiva, o se faiga o loo lagolagoina e le Afioga a le Atua.—Faataoto 21:25, 26; Efeso 4:28.

Aʻoaʻoina a o Laiti Ina ia Faatāuaina Galuega

E lē teʻiteʻi lava maua le tomai e faia ai galuega; e aʻoaʻoina le faia o galuega mai lava i le taimi a o laiti. O lea, ua apoapoaʻia ai e le Tusi Paia mātua: “Aʻoaʻo ia i le tama [po o le teine] e tusa ma lona ala; a oo ina toeaina [pe loʻomatua] lava o ia, e le teʻa ese ai.” (Faataoto 22:6) E lē gata ina faataatitia ni faaaʻoaʻoga lelei o ni ē e galulue, ae o mātua atamamai, e amata lava ona toleni a latou fanau iti i le tuu atu iā i latou o galuega e fai i le aiga e talafeagai ma lo latou matutua. E ui lava e lē fiafia tamaiti e faia nisi o feʻau, ae o le a oo ina latou iloa, o i latou o ni tagata e tāua tele i le aiga, aemaise lava pe a faamālō atu i ai le tamā ma le tinā mo se galuega sa lelei ona faia. E faanoanoa lava ona o nisi mātua, e latou te faia mea uma mo a latou fanau, atonu ona o le alofa faavalea. E lelei mo na mātua ona manatunatu i le Faataoto 29:21, (NW) lea e faapea mai: “Afai e faapelepele se tasi i lana auauna [po o lana fanau] mai le laʻitiiti, o le a oo ina lē loto faafetai o ia pe a matua.”

 O mātua lelei, e naunau foʻi i aʻoga a a latou fanau, i le faalaeiauina o i latou ina ia uaʻi i aʻoaʻoga ma toʻaʻaga e galulue a o iai i le aʻoga. E mafai ona aogā lenā faiga i talavou i tausaga mulimuli ane pe a ō atu e faigaluega.

Ia Atamai i le Filifilia o Sau Galuega

Ona e lē o taʻu mai e le Tusi Paia iā i tatou po o ā galuega e saʻilia, ae o loo aumaia ai ni taʻiala lelei ina ia lē lamatia ai lo tatou agaʻigaʻi i luma faaleagaga, la tatou auaunaga i le Atua ma isi tiute tauave tāua. Mo se faaaʻoaʻoga, na tusi le aposetolo o Paulo e faapea: “Ua itiiti ona aso ua totoe; o lenei, o ē ua . . . fetagofi i mea a le lalolagi nei, ia peiseaʻī ua lē fetagofi i ai; auā o le a mavae atu le tū o le lalolagi nei.” (1 Korinito 7:29-31) E leai se mea e tumau pe mausalī atoatoa i lenei faiga o mea. O le faaalu uma ai o lo tatou malosi ma taimi, e pei lava ua teu uma a tatou tupe faaagaaga na maua i lo tatou olaga atoa i se fale o loo fausia i se vaipanoa e masani ona lologa i taimi uma. Pagā se lē faautauta i le faia o sea teuga tupe!

Ua faaaogā e isi faaliliuga o le Tusi Paia ia fuaiupu e pei o lenei, “ia peiseaʻī ua lē fetagofi atoatoa i ai,” “aua le uaʻi atoatoa i ai,” “aua le aafia atoatoa ai.” (The Jerusalem Bible; Today’s English Version) O tagata atamamai, e lē taitai ona lē amanaʻia le mea moni e faapea, ua “itiiti” ona aso ua totoe o lenei faiga o mea ma o le “aafia atoatoa ai” po o le “uaʻi atoatoa” i ai, e mautinoa lava o le a iʻu ai i le lē fiafia ma faanoanoaga.—1 Ioane 2:15-17.

‘O le a Lē Tuua Lava Oe e le Atua’

E silafia lelei e Ieova o tatou manaʻoga na i lo o i tatou lava. Ua ia silafia foʻi le mea ua tatou iai i le faagasologa o taimi e faataunuuina ai lana fuafuaga. O lea, ua ia faamanatu mai ai iā i tatou: “Ia aunoa a outou amio ma le matapeʻapeʻa; ia gata ia o outou manaʻo i mea ua iā te outou; auā ua fetalai mai [le Atua], Ou te lē tuua lava oe, ou te lē tuulafoaʻi lava iā te oe.” (Eperu 13:5) Maʻeu le faamāfanafanaloto o na upu! O le faataʻitaʻi i le manatu alofa mai o le Atua i ona tagata, na faaalu ai e Iesu se vaega tele o lana Lauga taʻutaʻua i luga o le Mauga e aʻoaʻo ai ona soo, i le vaaiga saʻo e faatatau i galuega ma meafaitino.—Mataio 6:19-33.

O loo tauivi Molimau a Ieova ina ia utagia na aʻoaʻoga. Mo se faaaʻoaʻoga, ina ua valaaulia e se pule o se galuega ia se Molimau e faieletise ina ia galue ovataimi faalausosoo, na teena e le faieletise lea tulaga. Aiseā? Talu ai, sa lē manaʻo o ia e faalavelave lana galuega totogi i le taimi ua ia tuutoina atu mo lona aiga ma mea faaleagaga. Talu ai o ia o se tagata faigaluega e sili ona lelei ma maufaatuatuaina, na talia ai e lona pule lona fanoga. O le mea moni, e lē o le iʻuga lenā o le tele o mea, ma e ono saʻili ai e se tasi se isi galuega ina ia tausisia ai pea se olaga paleni. Ae peitaʻi, o i latou e faatuatua atoatoa atu iā Ieova, e masani lava ona iloa faapea, o a latou amioga ma le faigaluega lelei e masani lava ona fiafia i ai pule o galuega iā i latou.—Faataoto 3:5, 6.

Pe a Tauia Galuega Uma

I lenei faiga o mea lē lelei atoatoa, o le a lē mafai lava ona aunoa ia galuega ma faamoemoega mo galuega i le lumanaʻi ma ni faafitauli ma mea e tutupu e leʻi faatalitalia. O le mea  moni, ua agaʻi ina leaga tele le tulaga o mea a o faasolo ina lē mautū ma femoumouaʻi le tulaga o le tamaoaiga, ma oo lava ina lē taulau. Ae e lē tumau lenei tulaga. E lē o toe umi se taimi, ae tofu galuega tagata uma. Ae sili i lenā, o galuega uma o le a faafiafiaina ai ma maua ai le lotomalie. E mafai faapefea lenā mea? O le ā o le a na aumaia sea suiga?

E ala i lana perofeta o Isaia, na faasino atu ai Ieova i se taimi faapena i le lumanaʻi. Na fetalai o ia: “Auā faauta mai, ou te faia le lagi fou ma le lalolagi fou; e lē toe manatua mea na muamua, e lē alu aʻe foʻi i le loto.” (Isaia 65:17) Sa fetalai o ia e uiga i se faigāmalo fou o le a ia faavaeina, lea o le a pule mai i se sosaiete faaletagata moni e matuā fou lava ma ese mai.—Tanielu 2:44.

E faatatau i le auala o le a ola ma galulue ai tagata i lenā taimi, ua faaauau mai le valoaga e faapea: “Latou te faia fale, ma latou mau ai; latou te totō tovine, ma latou aai i o latou fua. Latou te lē fai fale ina ia mau ai nisi; latou te lē totō ina ia ʻai ai nisi; auā e pei o aso o le laau aso o loʻu nuu; e uma lava i ē ua filifilia e aʻu o mea na faia e o latou lima. Latou te lē galulue fua, latou te fananau, a e lē tupu ai le atuatuvale; auā o le fanau ua faamanuia e Ieova i latou, atoa ma i latou e tutupu mai iā te i latou.”—Isaia 65:21-23.

Maʻeu se suiga mataʻina o le a faia e lenā lalolagi fou ua fuafuaina e le Atua! Pe e te fia soifua ai i se lalolagi faapena, se lalolagi e te ‘lē toe galue fua’ ae o le a olioli atoatoa i “fua” o au galuega? Seʻi mātau la po o ai o le a olioli i na faamanuiaga: “O le fanau ua faamanuia e Ieova i latou.” E mafai ona avea oe ma se tasi o na ‘fanau ua faamanuiaina’ e ala i le aʻoaʻo e uiga iā Ieova ma ia ausia mea na te faafinagaloina. Na fetalai Iesu: “O le ola e faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) O le a fiafia Molimau a Ieova e fesoasoani atu iā te oe ina ia mauaina lenā poto e maua ai le ola, e ala i le suʻesuʻeina o le Afioga a le Atua, le Tusi Paia.

[Pusa i le itulau 6]

“E SAʻILIA PEA E TAGATA”

Ua faapea mai le Tusi Paia: “O mea uma lava tou te faia, ia faia ma le loto, peiseaʻī ua faia [iā Ieova, NW], a e lē o tagata.” (Kolose 3:23) E manino lava, o se tasi e pulea e lenei mataupu silisili, o le a saʻilia e pule o galuega e faafaigaluegaina. O le māfuaaga lenā ua fautuaina ai e J. J. Luna, i lana tusi, How to Be Invisible, i latou o saʻilia ni tagata faigaluega ina ia vaai ni tagata maelega o se lotu faapitoa, ae ua ia toe faapea mai: “Ae o le mea moni, e masani lava ona matou filifilia Molimau [a Ieova].” O se tasi o māfuaaga na ia faailoa mai e faapea, ona e lauiloa i latou i lo latou faamaoni, lea ua “saʻilia pea e tagata” ia molimau e faafaigaluega i so o se matātā.

[Ata i le itulau 5]

O le faapaleni o galuega ma gaoioiga faaleagaga faapea faafiafiaga, e maua ai le lotomalie