“Tumau Pea i Laʻu Mataupu”

“Afai tou te tumau pea i laʻu mataupu, o oʻu soo moni outou.”—IOANE 8:31.

1. (a) Ina ua toe afio atu Iesu i le lagi, o le ā na ia tuua i le lalolagi? (e) O ā fesili o le a tatou iloiloina nei?

INA ua toe afio atu Iesu Keriso o Lē na Amataina le Faa-Kerisiano i le lagi, sa ia leʻi tuua i le lalolagi ni tusi na ia tusia, ni mea na ia fausia e faamanatu ai o ia, po o le tamaoaiga na ia faaputuina. Na ia tuua ona soo faatasi ai ma ni manaʻoga patino o le avea ma soo. O le mea moni, i le Evagelia a Ioane, ua tatou maua ai faapea na taʻua e Iesu ni manaʻoga tāua se tolu lea e tatau ona ausia e so o se tasi e manaʻo e avea ma ona soo. O ā nei manaʻoga? O le ā e mafai ona tatou faia ina ia ausia ai na manaʻoga? Ma e faapefea ona tatou faamautinoa ua tatou agavaa e avea ma soo o Keriso i aso nei? *

2. O le ā se manaʻoga tāua mo le avea ma soo, e pei ona faamauina i le Evagelia a Ioane?

² A o toe ono masina oo i lona maliu, na afio atu Iesu i Ierusalema ma talaʻi i le motu o tagata na faatasitasi ai i inā mo le faamanatuina o le Tausamiga o Faleapitaga e vaiaso atoa e fai ai. O le iʻuga, e oo ane i le ʻafa o lenā vaiaso o le tausamiga ua “toʻatele ua faatuatua iā te ia nai le motu o tagata.” Sa faaauau ona talaʻi Iesu, lea e oo ane i le aso mulimuli o le tausamiga, ua ‘toʻatele ē na faatuatua iā te ia.’ (Ioane 7:10, 14, 31, 37; 8:30) I lenā taimi, na uaʻi atu ai Iesu i tagata talitonu fou ma taʻua se manaʻoga tāua mo le avea ma soo, e pei ona faamauina e le aposetolo o Ioane: “Afai tou te tumau pea i laʻu mataupu, o oʻu soo moni outou.”—Ioane 8:31.

3. O le ā le uiga e manaʻomia e se tasi ina ia ‘tumau ai pea i le mataupu a Iesu’?

³ I na upu, e leʻi manatu Iesu faapea sa lē lava le faatuatua o soo fou. Na i lo lenā, na ia faasino atu faapea o loo iā i latou le avanoa e avea ai ma ona soo moni—e faalagolago i lo latou tumau pea i lana mataupu, ma faaalia le onosai. Na latou talia lana mataupu, ae o lea la ua manaʻomia nei ona tumau pea i ai. (Ioane 4:34; Eperu 3:14) O le mea moni, na manatu Iesu i le onosai faapea o se uiga e tāua tele mo ona soo, lea i lana talanoaga mulimuli ma ona aposetolo o loo faamauina i le Evagelia a Ioane, e faalua ona timaʻi atu Iesu e faapea: ‘Ia mulimuli mai pea iā te aʻu.’ (Ioane 21:19, 22) E toʻatele uluaʻi Kerisiano na faia faapea. (2 Ioane 4) O le ā na fesoasoani iā i latou e onosai ai?

4. O le ā na mafai ai ona tumau uluaʻi Kerisiano?

⁴ Na faasino atu le aposetolo o Ioane, o ia o se soo faamaoni o Keriso i le tusa ma le fitusefulu tausaga, i se vala tāua. Na ia faamālō i Kerisiano faamaoni i le faapea atu: “[Ua] malolosi outou, o loo tumau foʻi iā te outou le afioga a le Atua, ua outou manumalo foʻi i loo leaga.” Na onosai pe na tumau na soo o Keriso i le afioga a le Atua, ona na tumau pea le afioga a le Atua iā i latou. Sa latou matuā faatāuaina na afioga. (1 Ioane 2:14, 24) E pei foʻi o aso nei, ina ia “tumau seʻia oo i le gataaga,” e tatau ona tatou faamautinoa o loo tumau pea le afioga a le Atua iā i tatou. (Mataio 24:13) E faapefea ona tatou faia lenā mea? O loo aumaia le tali i se talafaatusa na taʻua e Iesu.

“Faalogo i le Upu”

5. (a) O ā ituaiga o eleele eseese o loo taʻua e Iesu i se tasi o ana talafaatusa? (e) O le ā o loo fai ma sui o le fatu ma le eleele i le talafaatusa a Iesu?

⁵ Na fetalai Iesu i se talafaatusa, o se tagata lūlū saito na alu atu e lūlū saito, ma o loo faamauina i le Evagelia a Mataio, Mareko ma Luka. (Mataio 13:1-9, 18-23; Mareko 4:1-9, 14- 20; Luka 8:4-8, 11-15) A o e faitauina faamatalaga, o le a e mātauina ai o le vala autū o le talafaatusa, o fatu laau lava e tasi, ae na pauu i eleele eseese, ma maua ai iʻuga eseese. O le ituaiga eleele muamua e malō, o le lona lua e itiiti le eleele, ma o le lona tolu ua faatumulia i vao tuitui. A e o le ituaiga lona fā o eleele, e “lelei” e lē pei o isi ituaiga eleele e tolu. E tusa ai ma le faamatalaga a Iesu lava ia, o le fatu, o le feʻau o le Malo o loo i le Afioga a le Atua, ma o le eleele o loo fai ma sui o tagata e eseese tulaga o o latou loto. E ui e iai ni mea e tutusa ai tagata o loo faaata mai e ituaiga o eleele eseese, ae o i latou na faaata e le eleele lelei e iai se uiga e ese ai i latou mai le toʻatele o tagata.

6. (a) E faapefea e le ituaiga eleele lona fā i le talafaatusa a Iesu ona ese mai i isi ituaiga e tolu, ma o le ā lona uiga? (e) O le ā e tāua mo le faaalia o le onosai i le avea ai ma soo o Keriso?

⁶ O faamaumauga o loo i le Luka 8:12-15 ua faaalia ai faapea o tagata i tulaga uma ia e fā, sa latou “faalogo i le upu.” Peitaʻi, o i latou na ‘loto faamaoni ma lelei,’ sa lē na ona “faalogo i le upu.” Sa ‘tausi i ai ona fua mai ai lea ma le onosai.’ O le eleele malū ma lelei e vaivai ma loloto, e mafai ai ona sosolo ifo i lalo aa o le laau, ma o le iʻuga, ua tupu aʻe le fatu ma maua mai ai fua. (Luka 8:8) I se tulaga tutusa, o i latou e iai le loto lelei e malamalama, e latou te faatāuaina, ma matuā faamasani i le afioga a le Atua. (Roma 10:10; 2 Timoteo 2:7) O loo tumau pea le afioga a le Atua i totonu iā i latou. O lea, ua latou fua mai ai ma le onosai. O lo latou talisapaia loloto o le Afioga a le Atua e tāua mo le faaalia o le onosai i le avea ai ma soo o Keriso. (1 Timoteo 4:15) E faapefea la ona tatou ati aʻe lea talisapaia loloto o le Afioga a le Atua?

Tulaga o le Loto ma le Manatunatu Loloto

7. O lē fea gaoioiga o loo faafesootaʻi vavalalata atu i se loto lelei?

⁷ Seʻi mātau po o lē fea gaoioiga o loo faafesootaʻi soo atu i ai e le Tusi Paia le loto lelei. “E manatunatu le loto o lē amiotonu, ina ia fai se tali.” (Faataoto 15:28) “Ia mālie foʻi iā te oe upu a loʻu gutu, ma mafaufauga o loʻu loto, Ieova e.” (Salamo 19:14) “E atamamai foʻi mafaufauga o loʻu loto.”—Salamo 49:3.

8. (a) A o faitauina le Tusi Paia, o le ā e tatau ona tatou ʻalofia, ae o le ā e tatau ona tatou faia? (e) O ā aogā e tatou te maua mai le manatunatu loloto i le tatalo e uiga i le Afioga a le Atua? (Ia faaaofia le pusa “Faatumauina i Lenei Lava Upu Moni.”)

⁸ I le pei o nei tusitala o le Tusi Paia, e tatou te manaʻomia foʻi ona manatunatu ma le loto faafetai ma tatalo e uiga i le Afioga a le Atua ma ana galuega. Pe a faitauina le Tusi Paia po o lomiga faale-Tusi Paia, e lē tatau ona tatou gaoioi e pei o ni turisi o loo faatopetope ona tapuʻeina le tele o ata mai lea nofoaga manaia i le isi nofoaga, ae lē o lava le taimi e olioli ai i nei nofoaga mananaia. Na i lo lenā, pe a suʻesuʻeina le Tusi Paia, e tatou te mananaʻo e faaalu le taimi e olioli ai i mea o loo tusia i le Tusi Paia.  * A o tatou manatunatu loloto i mea o loo tatou faitauina, e aafia o tatou loto i upu o le Afioga a le Atua. E pāʻia o tatou faalogona ma toe fetuunaʻi ai o tatou mafaufauga. E uunaʻia ai foʻi i tatou e taʻu atu o tatou mafaufauga loloto i  le Atua i le tatalo. O le iʻuga, e faamalosia ai lo tatou pipii atu iā Ieova, ma o lo tatou alofa i le Atua e uunaʻia ai i tatou e faaauau ona mulimuli atu iā Iesu e ui lava i tulaga faigatā. (Mataio 10:22) E manino mai, e tāua le manatunatu loloto i mea ua fetalai mai ai le Atua pe afai e tatou te mananaʻo e tumau ma le faamaoni seʻia oo i le iʻuga.—Luka 21:19.

9. E mafai faapefea ona tatou faamautinoa o loo tumau pea ona talia e o tatou loto le afioga a le Atua?

⁹ O le talafaatusa a Iesu e faaalia ai foʻi faapea e iai faafitauli i le tupu aʻe o le fatu po o le afioga lea a le Atua. O lea, ina ia tumau o ni soo faamaoni, e tatau ona tatou (1) iloa lelei faafitauli lea o loo fai ma sui o tulaga lē lelei o le eleele e pei ona taʻua i le talafaatusa ma (2) uia laasaga e faasaʻo ai po o le ʻalofia o na tulaga. O le faia faapea, o le a tatou faamautinoa ai o loo tumau pea ona taliaina e o tatou loto fatu o le Malo ma faaauau pea ona fua mai.

“I le Auala”—Ua Pupū i Mea e Fai

10. Faamatala le ituaiga muamua o eleele i le talafaatusa a Iesu, ma faamatala lona uiga.

¹⁰ O le ituaiga muamua o eleele na paʻū i ai le fatu o “le auala,” ona “solia lea” o le fatu. (Luka 8:5) O le eleele i le auala lea e ui atu ai i se tosaito, e malō ona e soli i taimi uma e tagata savavali. (Mareko 2:23) E faapena foʻi iā i latou e faatagaina le pupū i mea e fai a le lalolagi e alu uma ai lo latou taimi ma le malosi atonu e latou te iloa faapea, ua pisi naʻuā ua lē mafai ai ona ati aʻe se lotofaafetai mo le afioga a le Atua. Ua latou faalogo i ai, ae ua lē taulau ona manatunatu loloto i ai. O lea ua tumau pea ona lē gaoioi o latou loto. A o latou leʻi ati  aʻe se fiafia i le Afioga a le Atua, “ona alu ane ai lea o le tiapolo, ma aveeseina le upu nai o latou loto, neʻi faatuatua ma faaolaina i latou.” (Luka 8:12) Pe e mafai ona puipuia lenei tulaga?

11. E faapefea ona tatou puipuia o tatou loto mai le oo ina pei o se eleele malō?

¹¹ E tele mea e mafai ona fai e puipuia ai le loto mai le oo ina pei o se eleele i le auala e lē fua mai. O le eleele e soli i taimi uma ma malō e mafai ona avea ma eleele e malū ma fua mai, pe afai e sua faamalū ma toe sui le auala e ui ai tagata savavali. I se tulaga tutusa, o le faatulaga o se taimi e suʻesuʻe ma manatunatu loloto ai i le Afioga a le Atua e mafai ona iʻu atu ai i le avea o le loto e pei o le eleele lelei e fua mai. O le manatu tāua, o le aua le soona pupū i mea masani o le olaga. (Luka 12:13-15) Na i lo lenā, ia mautinoa o loo maua le taimi e mafaufau loloto ai i “mea e sili ona tāua” i le olaga.—Filipi 1:9-11, NW.

“Le Mea Papa”—O le Fefe

12. O le ā le māfuaaga moni ua magumagu ai le tātupu i le ituaiga lona lua o eleele lea na fetalai i ai Iesu i le talafaatusa?

¹² Ina ua paʻū le fatu i le ituaiga lona lua o eleele, sa lē na ona tumau i luga o le eleele, e pei o le fatu muamua. Ae ua tutupu ona aa ma amata ona tātupu. Ae ina ua alu aʻe le lā, ona velasia ai lea ma magumagu. Peitaʻi, mātau le faamatalaga tāua lenei. O le māfuaaga moni lava ua magumagu ai le tātupu, e lē o le vevela. Talu ai o le fatu lea e tupu aʻe i le eleele lelei o loo susulu foʻi i ai le lā, ae lē o magumagu—o le mea moni lava, ua uluola. O le ā ua eseese ai? Ua fetalai Iesu e faapea ua magumagu le tātupu, “ona o le eleele ina itiiti” ma “e lē sū.” (Mataio 13:5, 6; Luka 8:6) O “le mea papa,” lea e i lalo ifo o le eleele malū, e taofia le sosolo maulalo atu o aa o le fatu ina ia maua le susū ma mau lelei ai. Ua magumagu le tātupu ona o le itiiti o le eleele.

13. O ā ituaiga o tagata e pei o le eleele papaʻu, ma o le ā le māfuaaga autū ua faapea ai?

¹³ O lenei vaega o le talafaatusa o loo faasino atu i tagata ua ‘talia le upu ma le fiafia’ ma mulimuli atu ma le naunau iā Iesu “i ni nai aso.” (Luka 8:13) Ina ua lāina i le susulu o le lā o “puapuaga, po o le sauāga,” ona latou fefefe ai lea ma ua mou atu lo latou fiafia ma le malosi ma lē toe mulimuli ai iā Keriso. (Mataio 13:21) Peitaʻi, o le māfuaaga autū o lo latou fefefe, e lē o teteega. E ui lava i na mea, ae e faitau miliona soo o Keriso o loo onosaia puapuaga eseese, peitaʻi o loo tumau pea lo latou faamaoni. (2 Korinito 2:4; 7:5) O le māfuaaga moni lava ua oo ai ina fefefe nisi ma ō ese mai le upu moni, ona ua pei o le mea papa le tulaga o o latou loto lea ua taofia ai i latou mai le manatunatu loloto i mea e ati aʻe ai faaleagaga. O lea, o le fiafia lea na latou ati aʻe mo Ieova ma lana afioga e papaʻu tele, ma matuā vaivai lea ua lē mafai ai ona tatalia teteega. E faapefea ona ʻalofia e se tasi lea tulaga?

14. O ā laasaga e tatau ona faia e se tagata e puipuia ai lona loto mai le oo ina pei o se eleele e papaʻu?

¹⁴ E manaʻomia e se tagata ona faamautinoa e leai ni toʻatugā pei o se mea papa, pei o le ita faamoemoe mo se taimi umi, le manatu faapito, po o ni ituaiga o lagona lē lelei tai faapena o loo i totonu, ua tumau i le loto. Afai ua mauaa na faalogona faigatā, e mafai e le malosi o le afioga a le Atua ona aveesea. (Ieremia 23:29; Efeso 4:22; Eperu 4:12) Mulimuli ane, o le manatunatu loloto ma le tatalo o le a tupu aʻe ai “le upu ua totōina” i totonu o le loto o se tagata. (Iakopo 1:21) O lenā tulaga o le a mauaina ai le malosi e faafetaiaʻia ai taimi o le lotovaivai ma lototele ai e tumau i le faamaoni e ui i puapuaga.

 “I le Vao Tuitui”—Ua Vaeluaina le Loto

15. (a) Aiseā e tatau ai ona tatou uaʻi faapitoa atu i le ituaiga eleele lona tolu lea na taʻua e Iesu? (e) O le ā e oo ina tupu i le ituaiga o eleele lona tolu, ma aiseā?

¹⁵ O le ituaiga lona tolu o eleele, e iai vao tuitui, e tatau ona tatou uaʻi faapitoa atu lava i ai, ona i nisi o auala e talitutusa ma le eleele lelei. I le pei o le eleele lelei, o le eleele e iai le vao tuitui e ola ai le fatu ma tātupu. I le taimi muamua, e leai se eseesega o le ola o le laau fou i nei ituaiga o eleele e lua. Peitaʻi a o faagasolo le taimi, ua tupu aʻe se tulaga lea e oo ai ina fetinaiina le laau. I le lē pei o le eleele lelei, e oo ina faatumulia lea eleele i le vao tuitui. A o tupu aʻe le tamaʻi laau mai lenei eleele, ona tauivi lea ma le ‘vao tuitui ua tutupu faatasi.’ Mo sina taimi e taumafai ai pea nei laau mo le mauaina o meaʻai, le malamalama, ma le avanoa, ae oo lava ina manumalo le vao tuitui ona “fetinaiina ai lea.”—Luka 8:7.

16. (a) O ā ituaiga tagata e faatusa i le eleele e iai le vao tuitui? (e) E tusa ai ma faamaumauga a Evagelia e tolu, o le ā o loo fai ma sui o le vao tuitui?—Tagaʻi i le faaopoopoga i lalo.

¹⁶ O ā ituaiga tagata e faatusa i le eleele e iai le vao tuitui? Ua faamatalaina e Iesu e faapea: “O i latou ia ē ua faalogo, ua ō atu ai, ona fetinaiina ai lea i mea e popole ai, ma oloa, ma mea faafiafia o le olaga nei, ona lē oo lea ina matua o latou fua.” (Luka 8:14) E pei lava ona taufai ola le fatu a le lūlū saito ma le vao tuitui i le eleele i le taimi e tasi, ua faapena i nisi o tagata ona taumafai e ave i fale le afioga a le Atua ma “mea faafiafia o le olaga nei” i le taimi e tasi. Ua lūlūina le afioga a le Atua i o latou loto, ae ua fesagaʻi foʻi ma isi mea fai o le olaga lea e manaʻomia ona uaʻi atu i ai. Ua vaeluaina o latou loto. (Luka 9:57-62) Ua taofia e nei mea i latou mai le tuu atu o se taimi talafeagai e uaʻi atu ai i le tatalo ma mafaufau loloto i le afioga a le Atua. Ua lē taulau ona latou malamalama atoatoa i le afioga a le Atua ma ua leai ai se loto talisapaia lea e manaʻomia ina ia tumau ai. E faasolosolo lava ona ufitia lo latou fiafia i mea faaleagaga e gaoioiga e lē faaleagaga ua oo atu ai lava ina “fetinaiina” atoatoa ai. * Pagā se faanoanoa mo i latou e lē alolofa iā Ieova ma o latou loto atoa!—Mataio 6:24; 22:37.

17. O ā filifiliga e manaʻomia ona tatou faia i le olaga ina ia lē fetinaiina ai i le vao tuitui faafaatusa na taʻua i le talafaatusa a Iesu?

¹⁷ O le faamuamua o mea faaleagaga i mea faaletino, ua tatou ʻalofia ai le fetinaiina i mea e tigā ai ma mea e faafiafia ai o lenei lalolagi. (Mataio 6:31-33; Luka 21:34-36) O le faitauina o le Tusi Paia ma mafaufau loloto i mea o loo tatou faitau i ai e lē tatau ona tatou tuulafoaʻia. O le a tatou mauaina atili taimi e uaʻi atu ai ma manatunatu loloto i le tatalo pe afai e tatou te matuā faafaigofie o tatou olaga. (1 Timoteo 6:6-8) O auauna a le Atua ua latou faia faapea—ua pei ua liaʻi ese atoatoa le vao tuitui mai le eleele ina ia maua atili ai meaʻai, malamalama, ma se avanoa e fua mai ai le laau—ua latou mauaina faamanuiaga mai iā Ieova. Ua faapea mai Sandra, ua 26 ona tausaga: “Pe a ou manatunatu loloto i oʻu faamanuiaga i le upu moni,  ona ou iloa lea e leai se mea e aumaia e lenei lalolagi e faatusatusa atu i ai!”—Salamo 84:11.

18. E mafai faapefea ona tatou tumau i le afioga a le Atua o ni Kerisiano?

¹⁸ E manino mai la, o i tatou uma lava, pe laiti pe matutua, o le a tumau i le afioga a le Atua ma faaauau ona avea o ni soo o Keriso pe afai e tumau le afioga a le Atua iā i tatou. O lea, seʻi o tatou faamautinoa le eleele o o tatou loto e lē taitai ona malō, papaʻu, po o le fetinaiina ae ia tumau pea ona malū ma loloto. I lenā tulaga, o le a mafai ai ona goto atoatoa i o tatou loto le afioga a le Atua ma ‘fua mai ma le onosai.’—Luka 8:15.

[Faamatalaga pito i lalo]

O ā Au Tali?

• Aiseā e tatou te manaʻomia ai ona ‘tumau i le mataupu a Iesu’?

• E faapefea ona tatou faatagaina le afioga a le Atua e tumau i o tatou loto?

• O ā ituaiga o tagata o loo fai ma sui o ituaiga eseese e fā o eleele na taʻua e Iesu?

• E faapefea ona e maua le taimi e mafaufau loloto ai i le afioga a le Atua?

[Fesili mo le Suʻesuʻega]

[Pusa/Ata i le itulau 10]

“FAATUMAUINA I LENEI LAVA UPU MONI”

O LE toʻatele lava o soo o Keriso ua loa ona iai, ua latou faamaonia mo le tele o tausaga lo latou ‘tumau i le upu moni.’ (2 Peteru 1:12) O le ā na fesoasoani iā i latou e tumau ai? Seʻi mafaufau i nisi o a latou faamatalaga.

“E faaumaina aso taʻitasi i loʻu faitauina o se vaega o le Tusi Paia ma faia se tatalo. Ona ou mafaufau lea i mea na ou faitauina.”—Jean, papatiso i le 1939.

“O le manatunatu loloto faapea o Ieova o se tasi e matuā maualuga, ae e alofa loloto iā i tatou e aumaia ai iā te aʻu se lagona o le saogalemu ma le malosi e tumau ai i le faamaoni.”—Patricia, papatiso i le 1946.

“O le pipii atu i se masaniga lelei o le faitauina o le Tusi Paia ma malamalama i ‘mea loloto a le Atua,’ o loo mafai ai pea ona faaauau ona auauna iā Ieova.”—1 Korinito 2:10, LT; Anna, papatiso i le 1939.

“Ou te faitau i le Tusi Paia ma lomiga faale-Tusi Paia ma le fuafuaga, ia iloiloina loʻu loto ma uunaʻiga o loo iai.”—Zelda, papatiso i le 1943.

“O oʻu taimi e sili ona lelei, o le taimi ou te savalivali ai ma talanoa iā Ieova i le tatalo ma taʻu atu iā te ia oʻu lagona moni o loo iai.”—Ralph, papatiso i le 1947.

“E amata loʻu aso i le iloiloina o le mau i aso taʻitasi ma faitau se vaega o le Tusi Paia. E aumaia ai iā te aʻu se mea fou e manatunatu loloto i ai a o faagasolo le aso.”—Marie, papatiso i le 1935.

“Iā te aʻu, o le talanoaina auauaʻi o fuaiupu o se tusi o le Tusi Paia e faagaeetia moni ai lava.”—Tanielu, papatiso i le 1946.

O fea le taimi e te mafaufau loloto ai i le tatalo i le afioga a le Atua?—Tanielu 6:10e; Mareko 1:35; Galuega 10:9.

[Ata i le itulau 13]

O le faamuamuaina o mea faaleagaga, e mafai ai ona ‘fua mai ma le onosai’