Ua Faamataʻuina le Saogalemu ma le Fiafia i Galuega

NA TAʻUA i le Faalauiloaina Faalauitele o Aiā Tatau a Tagata lea na tuuina mai e Malo Aufaatasi e faapea: “O le aiā e faigaluega ai” e talafeagai mo tagata uma. Ae peitaʻi, e lē o aogā i taimi uma lenā aiā. E tele mea ua lamatia ai le saogalemu o galuega, e mai lava i le tulaga lelei o le tamaoaiga o se atunuu, e oo atu i le tulaga o maketi o fefaatauaʻiga i le lalolagi aoao. Ae peitaʻi, pe afai ua leai ni galuega po ua faamataʻuina foʻi, e masani lava ona iʻu i fouvalega, fevesiaʻiga, ma solo tetee. E laʻitiiti lava ni atunuu e lē o aafia ai. E oo lava i le upu “galuega” na taʻua e se tasi tusitala e faapea: “e masani ona mapuna aʻe ai ni faalogona malolosi.”

E tele māfuaaga e tāua ai galuega iā i tatou. E lē gata ina tatou maua ai tupe, ae e fesoasoani foʻi i le faafiafiaina o o tatou mafaufau, ma faaleleia ai o tatou faalogona. O le galuega e faamalie ai manaʻoga o tagata ina ia avea o ni ē e taulau manuia i le sosaiete ma maua ai se fuafuaga i le olaga. E tatou te maua ai foʻi se faaaloalo iā i tatou lava. O lea, e oo lava iā i latou e sili atu ona tele tupe e tausia ai mea e latou te manaʻomia, po o i latou ua tatau ona mālōlō litaea mai galuega, o loo mananaʻo lava e faigaluega pea. Ioe, e matuā tāua lava galuega, o lea, pe a leai ni galuega, e masani lava ona oo mai ai faafitauli matuiā i le olaga.

I le isi itu, o i latou e iai galuega, o loo fesagaʻi ma le tele o omiga ma ua lē maua ai se fiafia i a latou galuega. Mo se faataʻitaʻiga, ona o le tele o maketi o loo tauvā i aso nei, ua tele ai kamupani ua vāea a latou tagata faigaluega ina ia faaitiitia tupe faaalu. E ono faaopoopo atu ai e lenei tulaga le tele o galuega i tagata o loo faigaluega pea, o ē atonu ua latou tauaveina foʻi ma isi avega faaopoopo.

O faiga faatekinisi i aso nei lea na faapea o le a faafaigofie ai le olaga ma sili atu ona lelei ai galuega, o le mea moni, ua faateleina ai omiga i fale faigaluega. Mo se faaaʻoaʻoga, o komepiuta, o masini fax, ma le Initineti, ua mafai ai e tagata ona ave a latou galuega e fai i le fale pe a mānava, lea ua lē faatuaoia ai le va o le aiga ma le fale faigaluega. Na lagona e se tasi tagata faigaluega e faapea, ua avea le tamaʻi ualesi (pager) ma le telefoni feaveaʻi a lana kamupani ua pei o se filifili lē vaaia o loo taofia e lona pule le isi itu ma faatonu ai ana galuega uma e fai.

Ona o le vave o fesuiaʻiga i tulaga o le tamaoaiga ma galuega, ua lagona ai e le toʻatele o tagata matutua le popole, ina neʻi vave faamālōlō i latou mai galuega ae leʻi oo i o latou taimi ona o le manatu e lē o toe aogā. E tusa ai ma lenei manatu, na faapea mai ai ia lē na avea muamua ma Komesina o Aiā Tatau a  Tagata, o Chris Sidoti: “E foliga mai ua soona faamamafa ia tapulaa o galuega e faapea, seʻi iloga e i lalo ifo o le 40 ou tausaga, ona faatoʻā mafai lea ona e faia ia galuega faakomepiuta ma faiga fou faatekinisi.” O lea, o le toʻatele o tagata faigaluega maelega o ē sa manatu muamua i ai ua tulaga lelei i galuega, ua manatu nei i ai ua lē o toe aogā, ona ua matutua tele. Pagā se tulaga lē manuia!

O le mea moni, o le galue mamafa ma le faamaoni i le kamupani, ua matuā paʻū maulalo lava i nai tausaga ua mavae atu. Ua faapea mai le mekasini a Falani o le Libération: “Pe a faateʻaina e se kamupani ni tagata faigaluega ona o sina faalētonu i le maketi o fefaatauaʻiga, ua matuā lē aogā atoa lenā faamaoni i le kamupani. O le mea moni la, e tatau ona e galue mo lou lava lelei, ae lē mo le lelei o le kamupani.”

E ui lava i le faafaupuʻe mai o nei faafitauli, ae o loo faaauau pea ona mananaʻo tagata e faigaluega. O lea, e mafai faapefea e se tasi ona maua se vaaiga paleni i galuega i nei aso ua vave tele ai fesuiaʻiga o le taimi, ae i le taimi e tasi, o loo iai pea se lagona saogalemu ma le lotomalie i le galuega?

[Ata i le itulau 3]

O faiga faatekinisi i aso nei ua faateleina atu ai omiga i fale faigaluega