Aua le Tuufaua Lau Tama!

O SE paluga o ele e foliga mai e leai sona tāua o loo i aao o se faiipu omea poto, e mafai ona liua e avea ma ipu matagofie. E toʻalaiti lava tagata atamamai i galuega faapitoa e mafai ona faia ni mea matagofie se tele, mai i ni mea faatauvaa. Mo le faitau afe o tausaga, sa faalagolago atu tagata i le ʻaufaiipu omea mo ipu ti, ipu mafolafola, ulo, fagu e teu ai mea, ma ipu tuu teu fugālaau mananaia.

O loo faia foʻi e mātua se sao tāua i le lautele i le auala e faatonutonuina ai amio ma ituaiga o tagata e iai a latou fanau. O loo faatusaina e le Tusi Paia i tatou uma taʻitoʻatasi i omea, ma ua tofia atu e le Atua i mātua le galuega tāua o le fausia aʻe o “le omea” (NW) o a latou fanau. (Iopu 33:6; Kenese 18:19) E pei lava o le gaosia aʻe o se ipu matagofie, o le liua o se tamaitiiti ia avea ma tagata matua maufaatuatuaina e lē o se galuega faigofie. O lenei faaliliuina e lē teʻiteʻi lava tupu.

E tele aafiaga malolosi o loo taumafai e faaliliuina loto o a tatou fanau. O le mea e leaga ai, ona o nisi o nei malosiaga e matuā faaleagaina ai. O lea na i lo le tuufau o a tatou fanau, o mātua atamamai e aʻoaʻoina le tamaitiiti “e tusa ma lona ala,” ma le faamoemoe “a oo ina toeaina lava o ia, e lē teʻa ese ai.”—Faataoto 22:6.

A o faagasolo le vaitaimi umi ma le tele o mea tutupu i le tausia aʻe o se tamaitiiti, o le a faaaluina ai e mātua atamamai le tele o le taimi e puipuia ai lona loto mai i ni aafiaga leaga e ono faamataʻuina ai. O le a tofotofoina atoatoa lo latou alofa a o avatua ma le onosai i le tamaitiiti “aʻoaʻiga ma apoapoaʻiga, lea e talafeagai mo le tausia aʻe o se Kerisiano.” (Efeso 6:4, The New English Bible) E moni, o le a faigofie le galuega a mātua pe a vave ona toleniina a o laʻitiiti.

Ia Vave Amata

E fiafia tagata faiipu omea e faaaogā le ele ua lelei ona paluina, ina ia faigofie ona faatino mea e pei ona manaʻomia e aunoa ma le taape, ae ia lava le malō ina ia tumau le tino mai pe a uma ona gaosia. Pe a uma ona faamamā le ele, e mananaʻo i latou ia faaaogā i totonu o le ono  masina. I le tulaga tutusa, o le taimi sili mo mātua e amata ai ona faatonutonuina le loto o le tamaitiiti, o le taimi a o laʻitiiti ma faigofie ona aʻoaʻo.

O tagata atamamai faapitoa i tamaiti ua faapea mai e oo atu le matua o le tamaitiiti i le valu masina, ua mafai ona ia mātauina le faaleoina mai o lana gagana, ua iai se faiā māfana atu i ona mātua, ua iai foʻi se atamai mo le mātauliaina o mea ma ua amata ona sogasogā e fia iloa lona siʻomaga. O le taimi sili e amata ai ona faatonutonuina lona loto, a o laʻitiiti lava. Maʻeu se aogā o le a maua e lau tama pe a pei o Timoteo, ‘na ia iloa Tusi Paia a o tamaitiiti’!—2 Timoteo 3:15. *

O le tulaga masani lava le faataʻitaʻi o pepe i o latou mātua. Na i lo le faataʻitaʻi na o le leo, foliga, ma tāga, latou te aʻoaʻoina e uiga i le alofa, agalelei, agamalu pe a vaai o faaalia e o latou mātua na uiga. Afai tatou te mananaʻo e toleni a tatou fanau e tusa ma tulafono a Ieova, ia faamaonia muamua lava ua i o tatou loto tulafono a le Atua. O lenā ituaiga o loto talisapaia o le a uunaʻia ai mātua e talanoa atu pea i a latou fanau e uiga iā Ieova ma lana Afioga. Ua fautua mai le Tusi Paia, ia “tautalatala aʻi, pe a e nofo i lou fale, pe a e savali foʻi i le ala, pe a e taoto, pe a e tulaʻi foʻi.” (Teuteronome 6:6, 7) Na faamatala mai e Falanisisi ma Rosa le auala na laʻua faia ai faapea i la laʻua fanau laiti e toʻalua. *

“E ese mai i talanoaga masani i aso taʻitasi, ma te taumafai e talanoa i tamaiti taʻitoʻatasi mo se taimi e lē itiiti mai i le 15 minute i le aso. Afai ma te mātauina se faafitauli, ma te faaaluina se taimi e sili atu—ma e mautinoa lava ma te fesagaʻi ma faafitauli. Mo se faaaʻoaʻoga, e leʻi mamao atu se taimi na sau ai la ma tama e lima tausaga mai le aʻoga ma taʻu mai iā i maʻua e lē talitonu iā Ieova. O le mea na tupu, o se tasi o lana vasega ua faalili iā te ia ma fai iai e leai se Atua.”

Na iloa e nei mātua faapea e manaʻomia e tamaiti ona ati aʻe le faatuatua i Lē na Foafoaina i latou. O lenei faatuatua e mafai ona faavae i lo latou faatosinaga naunau masani i le foafoaga a le Atua. Maʻeu le fiafia o tamaiti e fetagofi i meaola, tauina fugālaau, pe taaalo i le oneone i le matafaga! E mafai e mātua ona fesoasoani i le fanau e faafesootaʻi atu mea o le foafoaga i Lē na Foafoaina Mea. (Salamo 100:3; 104:24, 25) O le mataʻu ma le faaaloalo latou te atiina aʻe mo foafoaga a Ieova e mafai ona tumau iā i latou i o latou olaga atoa. (Salamo 111:2, 10) Afai e malamalama i le tulaga lenā, e mafai ai e le tamaitiiti ona atiina aʻe le naunau e faafiafia le Atua ma mataʻu e faatigā iā te ia. O le a faamalosia e lenei mea o ia e ‘ʻalo ese ai i le leaga.’—Faataoto 16:6.

E ui o le toʻatele o tamaiti laiti e sogasogā ma vave ona aʻoaʻoina, ae atonu e lē faigofie ona usiusitai. (Salamo 51:5) O nisi taimi atonu e mananaʻo e fai lava le mea e loto latou i ai po o le mananaʻo foʻi e maua uma mea latou te fia maua. E manaʻomia e mātua ona maumauaʻi, onosai, ma pulea lelei ina ia lē taulau nei uiga i fanau. (Efeso 6:4) O le mea lenā na tupu iā Fili ma Paulo, o ē na taulau manuia i le tausia aʻe o se fanau e toʻalima.

Ua faapea mai Fili: “Ona o le eseese o uiga o tamaiti taʻitoʻatasi o lea e manaʻo ai lava le tamaitiiti ia e fai le mea e loto i ai. E leʻi faigofie,  ae na iʻu lava ina latou malamalama i le uiga o le upu ‘leai.’” Na faapea mai lana tane o Paulo: “E masani ona ma avatu māfuaaga mo a maʻua faaiʻuga pe afai ua lava le matutua e malamalama ai. E ui lava e ma te taumafai e faaali atu lo ma alolofa, ae sa ma aʻoaʻo i latou ina ia faaaloalo i le pule ua tuuina mai e lo tatou Atua.”

E ui e ono aumaia ni faafitauli i uluaʻi tausaga o le tamaitiiti, ae o le toʻatele o mātua ua latou iloaina o luʻi e aupito i sili ona faigatā, e aumaia i taimi o le talavou a o leʻi lava lo latou tomai e faafesagaʻia ai le tele o luʻi.

Pāʻia le Loto o le Talavou

E ao i le faiipu omea ona gaosia ipu a o leʻi malō le paluga o le ele. Ina ia toe faaumiumi teisi lona taimi, atonu e manaʻomia ona toe faaopoopo sina vai i le paluga ina ia faasūsū ai ma aua neʻi taʻe gofie. I le tulaga tutusa, e tatau i mātua ona galulue mamafa ina ia taofia mai a latou fanau mai le loto maaa. Ioe o la latou auupega autū, o le Tusi Paia, lea e mafai ai ona latou ‘aʻoaʻi ai, faasaʻo ai ma saunia ai le tamaitiiti mo galuega lelei uma lava.’—2 Timoteo 3:15-17.

Ae ui i lea, o talavou atonu latou te lē taliaina vave fautuaga e pei ona latou faia a o laiti. Ua amata ona uaʻi tele atu manatu i a latou uō, ma ua amata ona taofiofia ma faaitiitia fesootaʻiga ma o latou mātua. O le taimi lea ia lava le onosai ma le agavaa, a o ulu atu mātua ma fanau i se laasaga fou. E tatau ona faamasani talavou i suiga faaletino ma taufaalogona. E ao ona amata ona faia ni filifiliga ma faatutū ni sini lea e mafai ona aafia ai lona olaga atoa. (2 Timoteo 2:22) I le faagasologa o lenei vaitaimi faigatā, e tatau lava ona ia fesagaʻia omiga mai uō lea e mafai e ona aafiaga leaga ona faaleagaina ai lona loto.

O nei ituaiga o omiga, e seāseā lava faigofie ona iloaina i se auala mataʻina e tasi. Na i lo lenā, e masani ona faaalia mai e ala i ni faaupuga e faavaivaia ai, po o ni mea tutupu e ono faalotolotolua ai se tasi i se mea na talitonu i ai. E maua gofie nisi e nei osofaʻiga i lo latou vaivaiga—o le palaai loto e mumusu e teena i latou e isi talavou. I le tauivi ai ma lenei uiga o le matamuli ma le manaʻo ina ia taliaina e isi, e ono amata ai e se talavou ona lagolagoina “mea o iai i le lalolagi” lea e faaauilumaina e isi talavou.—1 Ioane 2:15-17; Roma 12:2.

A o le mea e sili ai ona leaga, o tuʻinanau masani o le loto e lē lelei atoatoa e ono faamalosia atili ai manatu o a latou uō. O nei ituaiga o faalaeiauga e pei o le “Ia fiafia” ma “Fai le mea e te manaʻo oe e fai” e foliga mai o se mea manaia tele. Na taʻua e Maria se mea na tupu iā te ia: “Sa ou faalogo i aʻu uō talavou o ē na talitonu faapea e iai le aiā tatau a talavou e matuā olioli ai ma le lē mataofiofia, ma po o le a lava le iʻuga e  oo i ai. Talu ai na ou manaʻo e faia mea na faia e aʻu uō i le aʻoga, toeitiiti lava a ou iʻu i ni tulaga mataʻutia.” I le avea o se matua, e te manaʻo e fesoasoani i lau tama talavou e manumalo i na ituaiga omiga, ae e mafai faapefea ona e faia?

E ala i au upu ma gaoioiga, faatalitonu ma saga faatalitonu o ia o loo e manatu mamafa mo ia. Taumafai e saʻili po o ā ona faalogona e uiga i mea, ma taumafai e malamalama i ona faafitauli, lea atonu e sili atu ona faigatā na i lo faafitauli sa oulua fesagaʻia a o lua aʻoʻoga. I lenei taimi patino, e tatau i lau tamaitiiti ona vaai iā te oe o se tasi e mafai ona ia faatuatuaina. (Faataoto 20:5) E ala i ana gaoioiga po o ni uiga faaalia, e te ono mātauina ai ona uiga faanoanoa po o le lē mautonu. Tali atu i ona manaʻoga e lē o faaleoina mai ma ‘faamāfanafana i lona loto.’—Kolose 2:2.

E ao lava ona manatua, e tāua tele ona maumauaʻi i le mea e tonu. E tele mātua latou te feagai ma ni feeseeseaʻiga o manatu ma a latou fanau mai lea taimi i lea taimi, peitaʻi afai e lelei ona faavae a latou faaiʻuga ona lē lolo gofie lea i manaʻoga o fanau. Ae i le isi itu, ia mautinoa ua e malamalama lelei i le mataupu a o e leʻi faia se faaiʻuga pe avatu se aʻoaʻiga alofa ma pe faapefea ona faia pe a manaʻomia.—Faataoto 18:13.

E Ala Mai Foʻi i le Faapotopotoga

O se ipu ele atonu e foliga mai ua māeʻa, ae afai e leʻi taoina i le ogaumu, atonu e mafai ona faaleagaina e le suāvai lea na gaosia ai ina ia malō lelei ai. Ua faatusaina e le Tusi Paia tofotofoga ma mea faigatā i le auala e pei ona taʻua i le gaosiaina o le ipu ele, talu ai e faaalia ai le ituaiga moni lava o tagata e iai i tatou. E moni o loo tautala faapitoa lava le Tusi Paia i tofotofoga o lo tatou faatuatua, ae i sona tulaga lautele, e mafai foʻi ona faatatau atu le manatu i isi tofotofoga. (Iakopo 1:2-4) Ae o se mea e faateʻia ai, o nisi o tofotofoga faigatā e fesagaʻi ma talavou atonu e sau lava mai totonu o le faapotopotoga.

E ui o lau tama talavou e foliga mai o loo lelei lona tulaga faaleagaga, ae atonu o loo tauivi ma se loto femoumouaʻi. (1 Tupu 18:21) Mo se faaaʻoaʻoga, sa feagai Megan ma ni manatu faalelalolagi na tupuga mai i ni talavou sa ō mai i le Maota o le Malo:

“Na aafia aʻu i se vaega o talavou sa manatu o le faa-Kerisiano o se mea ua fiu ai ma o se mea ua taofia mai ai i le faia o mea e fiafia i ai. Latou te fai mai tala e pei o le: ‘E 18 loa oʻu tausaga ou tuua loa le upu moni,’ po o ‘Ua ou fia alu ese lava ma le upu moni.’ E ʻalofia e na talavou i latou e faia ni faamatalaga e tetee atu i o latou manatu ma taʻua i latou ua fia agelu naʻuā.”

E na o le toʻatasi pe toʻalua lava ni ē e iai uiga leaga faapena e mafai ona faasesēina isi. O tagata taʻitoʻatasi i se vaega e masani lava ona lolo atu i mea e faia e le toʻatele. O le valea ma le fia malosi e ono lē amanaʻia ai le atamai ma le faaaloalo. I le tele o atunuu, e tele lava ni tulaga  faanoanoa i talavou Kerisiano ua pagatia talu ai le faataʻitaʻi i mea o faia e isi.

E moni, e manaʻomia e talavou ni nai faatasitasiga e olioli ai. E mafai faapefea e oe le matua ona fai lenā mea? Ia manatunatu loloto i a latou faafiafiaga, ma fuafua ni mea fai talafeagai ma le aiga po o le tuufaatasia o talavou ma ē matutua. Ia e iloa uō a lau tama. Valaaulia i latou i se taumafataga, pe faaalu faatasi se afiafi ma i latou. (Roma 12:13) Faalaeiau lau tama e sailia ni gaoioiga aogā, e pei o le aʻoaʻo e tāina se meafaifaaili po o le aʻoaʻoina o se isi gagana po o se matātā. I le tele e mafai ai, atonu e na te faia lenei mea i le siʻomaga malupuipuia o lona aiga.

E Mafai Ona Avea Aʻoga o se Puipuiga

E fesoasoani aʻoaʻoga i le tamaitiiti ina ia faatulaga saʻo ai taimi mo faafiafiaga. Ua faapea mai Loli, o se pule aʻoga mo le 20 tausaga i se aʻoga telē: “Na ou vaaia le toʻatele o Molimau talavou o aʻoʻoga. O le toʻatele e matuā viiviia i a latou amio, a o nisi e leai lava se eseesega ma isi tamaiti aʻoga. E masani lava o i latou ia e aumai faataʻitaʻiga lelei, o i latou na e tinoū ma naunau moni e fai a latou meaaʻoga. Ou te fautuaina malosi mātua ina ia matuā naunau i le agaʻigaʻi i luma o aʻoga a a latou fanau, ia faamasani i a latou faiaʻoga, ma faatalitonuina a latou fanau i le tāua o le lelei o aʻoaʻoga. O le a tulaga ese mai nisi, ae e mafai e tamaiti uma ona oo i se taunuuga fiafia ma faaaloalogia ai e a latou faiaʻoga.”

E mafai foʻi e na aʻoga ona fesoasoani i talavou ina ia agaʻigaʻi ai i luma faaleagaga. E mafai ona aʻoaʻoina ai auala lelei e fai ai suʻesuʻega, puleaina o o latou mafaufau, ma le manatu mamafa i tiute tauave. O lo latou agavaa e faitau lelei ma puʻea manatu, o le a mautinoa le faamalosiau ai iā i latou e avea o ni tagata aʻoga sili ona lelei ma o ni faiaʻoga o le Afioga a le Atua. (Neemia 8:8) O le manaʻomia o le faia o a latou meaaʻoga ma suʻesuʻega faaleagaga o le a fesoasoani e faatulaga saʻo ai taimi mo faafiafiaga.

E Faamamalu ai Oe ma Ieova

I Eleni anamua e tele ipu mo le teuina i ai o fugālaau e sainia ai suafa o le faiipu omea ma lē na teuteuina. I le faatusatusa atu i ai, i le aiga e masani lava e toʻalua e aafia i le sauniunia o fanau. O le tamā ma le tinā, o i laʻua uma e faia se sao i le faatonutonuina o le loto o le tamaitiiti, ma i se tulaga faafaatusa, o loo tauaveina e la oulua tama a oulua “saini.” E pei lava o se faiipu omea ua faamanuiaina, po o se e teuteuina, e te faalogoina le mitamita i au galuega i le faatonutonuina o le talavou i lona tāua ma le matagofie.—Faataoto 23:24, 25.

O le faataulauina o nei taumafaiga tetele o le a matuā faamoemoe i le tele na e sauniunia ai le loto o lau tama. E faamoemoe, o le a mafai ona e faapea mai: “O loo i lona loto le tulafono a lona Atua, e lē mapeva foʻi ona vae.” (Salamo 37:31) O le tulaga o le loto o le tamaitiiti e matuā tāua ma e lē tatau ona tuufauina.

[Faamatalaga pito i lalo]