O Ieova—O le Atua e Tatau Ona Iloa Lelei

PE FAAMATA o loo iai se mea tāua i le olaga o loo e misia? Afai e itiiti lou iloa e uiga i le Atua, e mautinoa lava la o loo iai. Aiseā? Talu ai, e pei ona mātauina e le faitau miliona o tagata, o le iloaina o le Atua o le Tusi Paia e aumaia ai le tele o faamanuiaga i le olaga. O nei faamanuiaga e amata i le taimi nei ma faaauau ai lava i le lumanaʻi.

O Ieova le Atua, le Tusitala o le Tusi Paia, e finagalo e tatou te iloa o ia. Sa tusi le faisalamo: “Ina ia iloa e i latou, o oe, e ou le suafa o Ieova, na o oe lava o le Silisili Ese i le lalolagi uma.” Ua na silafiaina e mo lo tatou lelei lo tatou iloaina o ia. “O aʻu o Ieova, o lou Atua, o loo aʻoaʻo iā te oe i mea e aogā.” E faapefea ona tatou maua aogā mai le iloaina o Ieova le Atua, o le Silisili Ese?—Salamo 83:18; Isaia 48:17.

O se tasi o aogā moni, o le mauaina mai ai lea o taʻiala e faafesagaʻia ai faafitauli masani, se faamoemoe mausalī mo le lumanaʻi ma le mapusaga o le mafaufau. E lē gata i lea, o le iloaina lelei o Ieova e uunaʻia ai i tatou e atiina aʻe manatu e ese mai, i fesili tāua o loo fesagaʻi ma tagata i le lalolagi atoa i aso nei. O ā na fesili?

Pe e Iai se Fuafuaga i Lou Olaga?

E ui i le maoaʻe o le agaʻigaʻi i luma o le atamai faatekonolosi, o loo fesili pea tagata taʻitoʻatasi i aso nei i fesili masani: ‘O le ā le fuafuaga o le olaga? O le ā le lumanaʻi o tagata?’ Afai e lē o faamalieina se tasi i tali o na fesili, e lē o uigā la lona olaga. Pe e toʻatele nisi o iai lenā faalogona? I se suʻesuʻega sa faia i Siamani i le faaiʻuiʻuga o le vaitausaga 1990 na iloa ai o le ʻafa o i latou na tali mai e manatu faapea o le olaga e leai se fuafuaga. Atonu o le tulaga tutusa foʻi lenā i le vaipanoa o loo e soifua ai.

A aunoa ma se fuafuaga i le olaga, e laʻitiiti lava la se faavae mautū e fausia aʻe ai e se tagata ni ona sini totino. O nisi e toʻatele ua taumafai e maua ni galuega e faamanuiaina pe e faateleina ai foʻi ni tamaoaiga ina ia faatumu ai le lagona o loo iai se mea o misia. Ae ui i lea, e mafai pea ona faapopoleina i latou. O nisi ua matuā faapopoleina e lenei manatu o le leai o se fuafuaga o le olaga, ua iʻu ina oo ifo le faalogona ua lē o toe fia ola. E tusa ai ma le International Herald Tribune, o le mea lenā na tupu i se tasi tamaʻitaʻi talavou aulelei o lē sa tausia aʻe “i se siʻomaga matuā tamaoaiga ma na maua mea uma e manaʻomia.” E ui na ola i se olaga mauʻoa, ae na lagona e ia le tuua toʻatasi ma manatu e leai se uiga o lona olaga. Na ia inuina fualaau moe ma na maliu ai. Atonu ua e iloaina nisi na iʻu o latou soifua i se tulaga faanoanoa faapena.

Pe na e faalogo i nisi o faapea mai e mafai e le faasaienisi ona taʻu mai e uiga i le olaga? Na faasino mai e le nusipepa faalevaiaso a Siamani o le Die Woche: “Atonu e saʻo le faasaienisi, ae vaivai tele i le itu faaleagaga. E foliga mai o le evolusione e mai ni māfuaaga e lē faavaea,  e oo lava i le poto lavelave faasaienisi o ona pō nei e ofoina mai so o se mea vaganā ai le saogalemu moni.” O le faasaienisi ua mafai ai ona faamatalaina le tele o mea e uiga i le olaga i ona vala eseese ina ia faatumauina le ola. Peitaʻi, e lē mafai e le faasaienisi ona faamatala le fuafuaga o le olaga ma le lumanaʻi o tagata. Afai tatou te faamoemoe tau lava o le faasaienisi, o le a lē taliina ai la a tatou fesili e uiga i fuafuaga o le olaga. O le iʻuga, e pei ona sa lipotia mai e le nusipepa o le Süddeutsche Zeitung, “le faateleina o le manaʻomia o se taʻiala.”

O ai se tasi e sili ona agavaa e avatua sea taʻiala na i lo Lē na Foafoaina Mea? Talu ai o ia na foafoaina tagata i le amataga, e tatau ai ona ia silafia le māfuaaga ua latou ola ai. O loo faamatala mai e le Tusi Paia o Ieova na faia tagata ina ia aināina le lalolagi ma tausi iai. O a latou gaoioiga uma, e latou te faaata mai ai ona uiga loloto, e pei o le faamasinotonu, atamai ma le alofa. A tatou malamalama loa i le māfuaaga na foafoaina ai e Ieova i tatou, ona iloa foʻi lea o le fuafuaga o o tatou olaga.—Kenese 1:26-28.

O le ā e Mafai Ona E Faia?

Ae faapefea pe afai e te leʻi mauaina ni tali e faamalieina i fesili: ‘O le ā le fuafuaga o le olaga? O le ā le lumanaʻi o tagata?’ O loo fautua mai le Tusi Paia e tatau ona iloa lelei Ieova. O le mea moni, na fetalai mai Iesu: “O le ola e faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” Ua faalaeiauina foʻi oe ina ia atiina aʻe uiga faale-Atua, aemaise lava o le alofa, ma ia fai ma ou sini totino le avea o se sui o le Malo faa-Mesia o le Atua o loo fotuaʻi mai. O le a e maua ai i inā se olaga e iai ni fuafuaga ma se faamoemoe mausalī matagofie mo le lumanaʻi. O le a taliina fesili tāua na faapopoleina ai oe.—Ioane 17:3; Failauga 12:13.

O le ā le tele o le eseesega o le a mafai ona faia e lenā mea? O Hans o se tamāloa e tatau ona ia iloaina. * I tausaga ua mavae sa lē lava lona iloaina o le Atua ma e leʻi aafia lona olaga i le lotu sa iai. Sa fiafia Hans i le faaaogāina o fualaau faasāina, fafine talitane, nai solitulafono laiti ma pasika uila afi. Na ia faamatala mai: “Ae o le olaga sa gaogao, e lē faamalieina.” I le pe a ma le 25 ona tausaga, na filifili ai Hans e iloa lelei le Atua e ala i le faitauina ma le faaeteete o le Tusi Paia. Ina ua ia iloa lelei Ieova ma malamalama i le uiga o le olaga, sa suia e Hans le olaga sa ola ai ma papatiso o se tasi o Molimau a Ieova. Ua sefulu nei tausaga o auauna pea i le faiva faataimi atoa. Na ia faapea mai ma le faamaoni: “O le auauna iā Ieova o le olaga sili lea. E leai se mea e faatusa i ai. O le iloaina lelei o Ieova ua aumaia ai iā te aʻu se olaga uigā.”

E moni, o le fuafuaga o le olaga e lē na o le pau lea o le mataupu o loo popole i ai le toʻatele. A o faasolo ina matuā leaga tele tulaga o mea i le lalolagi, ua faasolo pea ina toʻatele tagata ua popole tele foʻi i se isi vala tāua.

Aiseā na Tupu Ai?

A tulaʻi mai mala mataʻutia, e masani lava ona taulaʻi atu manatu o tagata o loo aafia ai i le fesili e tasi: Aiseā na tupu ai? O le malosi e mafai ai ona faafetaiaʻia faalogona pe a oo mai mafatiaga e faalagolago i le tele o le iloaina o le tali i lenā fesili. Afai e lē maua se tali faamalieina, o le a tumau pea la faalogona ma atonu o le a faaseā ma faitio lē o aafia. Seʻi fai ma faataʻitaʻiga se mea na tupu iā Bruni.

Sa faamatalaina e Bruni o sē ua avea nei ma tinā ua matua: “I ni tausaga ua mavae atu na maliu ai laʻu pepe o se teine. Sa ou talitonu i le  Atua, o lea sa ou saʻili atu ai ni faamāfanafanaga mai le patele o le aai. Na faapea mai o ia, ua ave e le Atua Susanne i le lagi, lea ua avea ai nei o ia ma agelu. E lē gata ina oʻu matuā mafatia ona o le maliu o si aʻu tama, ae ua ou ita ai foʻi i le Atua i lona aveesea o ia.” Sa faaauau pea le mafatia o Bruni mo ni tausaga. “Ae na faasino mai iā te aʻu e se tasi o Molimau a Ieova mai le Tusi Paia e leai se māfuaaga o le a ou inoino ai i le Atua. E leʻi avea e Ieova Susanne i le lagi, ma e lē o ia foʻi o se agelu. O lona maʻi o se iʻuga o le tulaga lē lelei atoatoa o tagata. O loo moe Susanne i le oti ma faatali iā Ieova e toe faatūina mai o ia. Na ou aʻoaʻoina foʻi faapea na ia faia tagata e ola e faavavau i le parataiso i le lalolagi, ma e lē o toe umi se taimi ae taunuu lenā mea. Ina ua amata ona ou malamalama lelei e uiga iā Ieova, na ou tosina atu loa iā te ia ma na amata ona fai ifo oʻu tigā.”— Salamo 37:29; Galuega 24:15; Roma 5:12.

E faitau miliona tagata o loo aafia i faalavelave eseese: mafatiaga totino, taua, oge po o mala faalenatura. Na maua e Bruni le mapu ina ua iloa mai i le Tusi Paia e lē tuuaʻia Ieova mo mafatiaga, na te lē fuafuaina ia mafatia le fanau a tagata, ma e lē o toe mamao se taimi ae faamuta loa mea leaga uma. O le faateteleina o le amioleaga o le faamaoniga moni lenā tatou te iloa ai ua tatou iai i “aso e gata ai” o lenei faiga o mea. O lenei suiga mataʻina mo lo tatou lelei ua leva ona tatou faatalitalia ua latalata mai.—2 Timoteo 3:1-5; Mataio 24:7, 8.

Ia Iloa le Atua

Sa iā Hans ma Bruni le manatu taatele e uiga i le Atua. Na la talitonu iā te ia e aunoa ma le tele o se iloa e uiga iā te ia. Ina ua la faaaluina se taimi e iloa moni ai Ieova, na faamanuiaina a la taumafaiga. Na la mauaina tali talafeagai i fesili e sili ona tāua i o tatou aso. Na avatu ai iā i laʻua se mapusaga i o la mafaufau ma se faamoemoe mausalī mo le lumanaʻi. E faitau miliona auauna a Ieova e tali tutusa mea faapena na tutupu ai.

O le iloaina o Ieova e amata mai i le tagaʻi ma le faaeteete i le Tusi Paia, lea e taʻu mai ai iā i tatou mea e uiga iā te ia ma mea o loo moomia mai e ia iā i tatou. O mea na sa faia e nisi i le uluaʻi senituri. O le tagata tusitala i tala faasolopito ma o le fomaʻi o Luka na lipoti mai faapea o sui o le faapotopotoga Iutaia i Perea, Eleni, “ua latou talia le upu [mai iā Paulo ma Sila] ma le fiafia tele, ua saʻili i Tusi i lea aso ma lea aso, pe moni ia mea.”—Galuega 17:10, 11.

Na faapotopoto faatasi foʻi Kerisiano o le uluaʻi senituri i faapotopotoga. (Galuega 2:41, 42, 46; 1 Korinito 1:1, 2; Kalatia 1:1, 2; 2 Tesalonia 1:1) E tutusa lelei foʻi ma aso nei. E faapotopoto faatasi faapotopotoga a Molimau a Ieova mo sauniga ina ia fesoasoani ai i tagata taʻitoʻatasi e faalatalata iā Ieova ma olioli e auauna iā te ia. E iai ni aogā faaopoopo i le auaufaatasi ma le faapotopotoga a Molimau a Ieova. Talu ai o tagata e faasolosolo ina faaatagia le Atua o loo latou tapuaʻi i ai, e latou te faaalia atu uiga loloto—e pei ona faaalia e Ieova lava ia—e ui lava i se tulaga faatapulaa. O lea o le faatasitasi ma uso Molimau e fesoasoani iā i tatou e saga iloa atili ai pea Ieova.—Eperu 10:24, 25.

Pe e foliga mai ea ua tele naʻuā nei taumafaiga ina ia iloaina le Atua? E manaʻomia moni lava ni taumafaiga. Ae pe lē moni ea lenā i le tele o mea i le olaga e te manaʻo e ausia? Ia mafaufau i taumafaiga e tuuina atu e se tagata taalo taʻutaʻua i toleniga. O se faaaʻoaʻoga, na faapea mai se tagata Falani na manumalo i se pine auro i faaseega i le aisa o Jean-Claude Killy e uiga i le mea e fai e se tasi ina ia taulau i taaloga faavaomalo: “E tatau ona e amata i le 10 tausaga o muamua atu ma sauniuni ai mo  le tele o tausaga ma mafaufau i ai i aso uma lava . . . O se galuega faalemafaufau ma faaletino mo le 365 aso o le tausaga.” O na taimi ma taumafaiga uma ina ia tausinio i se tuuga pe a ma le sefulu minute e fai ai! E lē sili ea le tele ma le umi o aogā e maua i le iloaina lelei o Ieova.

O se Faiā Māfana e Tupu Pea

O ai e manaʻo e misia aogā mai se mea e tāua i le olaga? E leai se tasi. O lea, afai e te manatu o loo misia i lou olaga le fuafuaga moni po o loo e naunau atu mo se faamatalaga pe aiseā ua tutupu ai faalavelave, ia taumafai malosi la e iloa lelei Ieova le Atua o le Tusi Paia. O le aʻoaʻoina e uiga iā te ia e mafai ona suia lou olaga mo le lelei e faavavau.

Pe o le a muta ea lo tatou aʻoaʻoina e uiga iā Ieova? O i latou o loo auauna iā te ia mo le tele o tausaga ua maofa e uiga i mea ua latou aʻoaʻoina ma mea fou o loo faaauau pea ona latou aʻoaʻoina e uiga iā te ia. O le aʻoaʻoina o na mea e tatou te olioli ai ma e matuā vavalalata ai ma ia. Seʻi o tatou loto gatasi ma le aposetolo o Paulo e pei ona ia tusi: “Aue! le loloto o le tamaoaiga o le poto atoa ma le silafaga a le Atua. E lē masuʻesuʻeina ana faamasinoga; e lē mafai foʻi ona iloa ona ala. Auā ‘o ai ea sē ua iloa le finagalo o le Alii? Po o ai foʻi sē ua pulega faatasi ma ia?’”—Roma 11:33, 34.

[Faamatalaga pito i lalo]

[Faamatalaga faaopoopo i le itulau 5]

O loo tuufesili pea tagata taʻitoʻatasi i nei fesili tāua: ‘O le ā le fuafuaga o le olaga? O le ā le lumanaʻi o tagata?’

[Faamatalaga faaopoopo i le itulau 6]

“Ina ua amata ona ou malamalama lelei e uiga iā Ieova, na ou tosina atu loa iā te ia”

[Faamatalaga faaopoopo i le itulau 7]

“O le auauna iā Ieova o le olaga sili lea. E leai se mea e faatusa i ai. O le iloaina lelei o Ieova ua aumaia ai iā te aʻu se olaga uigā”