O le ā le Uiga o le Talisuaga Afiafi a le Alii iā te Oe?
O le ā le Uiga o le Talisuaga Afiafi a le Alii iā te Oe?
“[O] sē ʻai i lenei areto, pe inu i le ipu a le Alii ma le faalētatau, e nofo sala o ia i le tino ma le toto o le Alii.”—1 KORINITO 11:27, LT.
1. O le ā le sauniga e aupito sili ona tāua ua fuafua mo le tausaga e 2003, ma o le ā lona amataga?
O LE sauniga e aupito sili ona tāua ua fuafua mo le tausaga e 2003 o le a faia pe a mavae le goto o le lā iā Aperila 16. O le a potopoto faatasi Molimau a Ieova e faamanatu le Faamanatuga o le maliu o Iesu Keriso. E pei ona faaalia i le mataupu ua mavae atu, na faavaeina e Iesu lenei faamanatuga, e taʻua foʻi o le Talisuaga Afiafi a le Alii, ina ua uma ona ia faamanatuina ma ona aposetolo le Paseka iā Nisani 14, 33 T.A. O le areto e lē faafefeteina ma le uaina mūmū o le faatusa lea o le tino lē agasala o Keriso ma lona toto na faamaligiina—e na o le pau lea o le taulaga e mafai ona togiolaina ai tagata mai le agasala tuufaasolo ma le oti.—Roma 5:12; 6:23.
2. O le ā le lapataʻiga o loo faamauina i le 1 Korinito 11:27?
2 O i latou e taumamafa i le areto ma le uaina e tatau ona faia ma le faaaloalo. Na faamaninoina lenā tulaga e le aposetolo o Paulo ina ua ia tusi atu i Kerisiano i Korinito anamua, lea na lē faaaloalo i le auala na faamanatuina ai le Talisuaga Afiafi a le Alii. (1 Korinito 11:20-22) Na tusi Paulo e faapea: “[O] sē ʻai i lenei areto, pe inu i le ipu a le Alii ma le faalētatau, e nofo sala o ia i le tino ma le toto o le Alii.” (1 Korinito 11:27, LT) O ā uiga o na upu?
Faamanatuina e Nisi ma le Faalētatau
3. Na faapefea ona amioaʻi le toʻatele o Kerisiano i Korinito i le faamanatuina o le Talisuaga Afiafi a le Alii?
3 E toʻatele Kerisiano i Korinito na taumamafa ma le faalētatau i le Faamanatuga. Sa iai fevaevaeaʻiga iā i latou, ma sa iai taimi na aumaia ai e nisi a latou meataumafa o le afiafi ma taumamafa ai a o leʻi faia le faamanatuga po o le taimi foʻi o loo faia ai, ae masani lava ona soona aai ma inu. Sa latou lē mataala faalemafaufau ma le faaleagaga. Na ‘nofo sala ai i latou i le tino ma le toto o le Alii.’ O i latou sa leʻi taumafaina le ʻaiga o le afiafi na lagonaina le fia aai ma ua oo ai ina tosina solo le mafaufau. Ioe, e toʻatele na taumamafa e aunoa ma se faaaloalo, faapea ma se iloa atoatoa o le tāua tele o lea sauniga. E lētioa ona aumaia ai le faasalaga iā i latou lava!—1 Korinito 11:27-34.
4, 5. Aiseā e tāua tele ai ona iloiloina e i latou e masani ona taumamafa i le areto ma le uaina o le Faamanatuga i latou lava?
4 A o latalata i le Faamanatuga i tausaga taʻitasi, e tāua tele ona iloiloina e i latou e masani ona taumamafa i le areto ma le uaina i latou lava. Ina ia taumamafa ma le tonu i lenei faamanatuga, e tatau ona lelei lo latou tulaga faaleagaga. So o se tasi e faaalia le lē faaaloalo, po o le manatu faatauvaa i le taulaga a Iesu o le a i se tulaga lamatia o le ‘vavaeeseina o lea tagata mai tagata o le Atua,’ e pei lava o se tagata Isaraelu o loo i se tulaga lē mamā, ae taumafa i se talisuaga lea e taumamafa faatasi ai.—Levitiko 7:20; Eperu 10:28-31.
5 Sa faatusaina e Paulo le Faamanatuga i se taumafataga lea e talisua faatasi ai i Isaraelu anamua. Na ia tautala e faatatau iā i latou e taumamafa e auai faatasi ma Keriso, ona ia faapea mai lea: “Tou te lē mafaia ona inu i le ipu a le Alii atoa ma le ipu a temoni; tou te lē mafaia ona faatofutofusia i le laoʻai a le Alii atoa ma le laoʻai a temoni.” (1 Korinito 10:16-21) Afai o se tagata e masani ona taumafaina le areto ma le uaina i le Faamanatuga ae ua faia se agasala matuiā, e tatau ona ia faailoa atu lea tulaga iā Ieova ma saʻilia le fesoasoani a toeaina i le faapotopotoga. (Faataoto 28:13; Iakopo 5:13-16) Afai e salamō moni lava o ia, ma ua fuaina mai fua e tatau ma le salamō, o le a lē faapea la ua taumafa ma le faalētatau lea tagata.—Luka 3:8.
Auai o ni Ē Maimoa ma le Faaaloalo
6. O ai i latou ua taofia i ai e le Atua le faaeaga faapitoa o le taumamafa i le Talisuaga Afiafi a le Alii?
6 Pe tatau ona taumamafa i le Talisuaga Afiafi a le Alii i latou o loo faia mea lelei i le vaega totoe o le 144,000 o uso o Keriso? (Mataio 25:31-40; Faaaliga 14:1) E leai. Ua taofia e le Atua lenā faaeaga faapitoa mo i latou ua ia faauuina i lona agaga paia e avea ma “suli faatasi ma Keriso.” (Roma 8:14-18; 1 Ioane 2:20) O le ā la le tulaga o i latou o loo faamoemoe e ola e faavavau i se lalolagi parataiso i lalo o le pulega o le Malo? (Luka 23:43; Faaaliga 21:3, 4) Talu ai e lē o i latou o ni suli faatasi ma Iesu o loo iai le faamoemoe faalelagi, e latou te auai o ni ē maimoaina ma le faaaloalo le Faamanatuga.—Roma 6:3-5.
7. Na faapefea ona iloa e Kerisiano i le uluaʻi senituri e tatau ona latou taumamafa i le areto ma le uaina i le Faamanatuga?
7 Na faauuina i le agaga paia Kerisiano moni i le uluaʻi senituri. O le toʻatele o i latou sa mafai ona faaaogā pe tasi pe sili atu foʻi ia meaalofa faavavega a le agaga, e pei o le tautala i gagana eseese. O lea la, e leʻi faigatā ona iloa e na tagata o i latou ua faauuagagaina, ma e tatau ona latou taumamafa i le areto ma le uaina o le Faamanatuga. Peitaʻi, i o tatou aso e mafai ona iloa po ua faauuina le tagata i le agaga paia e faavae i upu faagaeeina e pei o nei: “O i latou uma ua taʻitaʻiina e le Agaga o le Atua, o atalii i latou o le Atua. Auā ua outou lē maua le agaga o le pologa, e toe fefefe ai; a ua outou maua le Agaga o tamafai, tou te valaau atu ai, ‘Ava, le Tamā e!’”—Roma 8:14, 15.
8. O ai ua fai ma sui o “ le saito” ma “le titania” o loo faamatalaina i le mataupu e 13 o le Mataio?
8 I le faitau senituri, na tutupu aʻe ai ē ua faauuina moni e avea ma “saito” i le fanua o loo tutupu ai “titania,” po o Kerisiano pepelo. (Mataio 13:24-30, 36-43) Talu mai le 1870 seʻia oo i le 1879, na oo ina manino tele mai ai le “saito,” ma i tausaga mulimuli ane ai na taʻu atu i ovasia Kerisiano faauuina e faapea: “O toeaina . . . e tatau ona tuu atu iā i latou o loo faapotopoto faatasi [mo le Faamanatuga] āiāiga nei ma tuutuuga,—(1) faatuatua i le toto [o Keriso]; ma (2) tuuina atu i le Alii ma lana auaunaga, seʻia oo i le oti. Ona latou valaaulia lea o i latou uma ua manatu faapea ina ia auai i le faailogaina o le maliu o le Alii.”—Studies in the Scriptures, Tusi VI, The New Creation, itulau e 473. *
Saʻilia o “Isi Mamoe”
9. Na faapefea ona faamaninoina le tulaga o le “motu o tagata e toʻatele” i le 1935, ma na faapefea ona aafia ai nisi na taumafaina le areto ma le uaina o le Faamanatuga?
9 A o faagasolo taimi, na amata ona taulaʻi atu le faalapotopotoga a Ieova i isi e ese mai i soo faauuina o Keriso. E mataʻina le tulaga na tuputupu aʻe i le taulotoaʻiga o vaitausaga mai le 1930 seʻia oo i le 1939. A o leʻi oo mai i lenā taimi, na vaai tagata o le Atua i le “motu o tagata e toʻatele” o le Faaaliga 7:9 faapea o se vasega lona lua faaleagaga o le a aufaatasi ma le 144,000 o ē faauuina ua toetutū i le lagi—pei o ni aumea mamae po o ni uō a le faatoʻā nofotane a Keriso. (Salamo 45:14, 15; Faaaliga 7:4; 21:2, 9) Ae iā Me 31, i le 1935, i se lauga na faia i le tauaofiaga a Molimau a Ieova i Washington, D.C., i le Iunaite Setete o Amerika., na faamatalaina mai ai i le Tusi Paia e faapea o le “motu o tagata e toʻatele” e faatatau atu i “isi mamoe” o loo soifua i le taimi o le iʻuga. (Ioane 10:16) Ina ua mavae lenā tauaofiaga, ona taofia lea e nisi na taumamafa muamua i le areto ma le uaina o le Faamanatuga le toe taumamafa i le faamanatuga ona ua latou iloa o lo latou faamoemoe o le lalolagi ae lē o le lagi.
10. E faapefea ona e faamatalaina le faamoemoe ma le tiute tauave a “isi mamoe” i aso nei?
10 E faapitoa lava talu mai le 1935 na saʻilia ai i latou o le a avea ma “isi mamoe,” o loo faatuatua i le togiola, ma tuuina atu i latou i le Atua, ma lagolagosua i le “lafu mamoe itiiti” faauuina i le galuega o le talaʻia o le Malo. (Luka 12:32) O isi mamoe nei o loo faamoemoe e ola e faavavau i le lalolagi, ae i isi vala uma lava, e latou te pei lava o le vaega totoe o suli o le Malo. I le pei o tagata ese i Isaraelu anamua na tapuaʻi atu iā Ieova ma usiusitai i Tulafono, e faapena foʻi i isi mamoe i aso nei ona taliaina tiute tauave faa-Kerisiano, e pei o le talaʻiina o le tala lelei faatasi ai ma sui o le Isaraelu faaleagaga. (Kalatia 6:16) Peitaʻi, e pei lava ona lē mafai ona avea se tagata ese ma tupu po o se faitaulaga i Isaraelu, e faapena foʻi ona lē mafai e isi mamoe ona iai i le pulega a le Malo faalelagi po o le avea foʻi ma faitaulaga.—Teuteronome 17:15.
11. E faapefea i le aso na papatisoina ai se tagata ona iai sona sootaga i lona faamoemoe?
11 E oo ane i tausaga mai le 1930 seʻia oo i le 1939, ua oo ina manino mai, ua uma ona filifilia le vaega mo le lagi. Mo le faitau sefulu o tausaga, ua taulaʻi atu ai nei le saʻiliga i isi mamoe o loo iai le faamoemoe i le lalolagi. Afai e faamaonia le lē faamaoni o se tagata faauuina, e foliga mai o le a valaaulia se tasi o isi mamoe ua loa ona auauna ma le faamaoni i le Atua e faatumuina le avanoa ua tulaʻi mai o le 144,000.
Le Māfuaaga ua Sesē ai Nisi
12. O ā tulaga e tatau ai i se tagata ona taofia le taumafaina o le areto ma le uaina i le Faamanatuga, ma aiseā?
12 Ua matuā mautinoa atoatoa e Kerisiano faauuina ua latou maua le valaau faalelagi. Ae faapefea pe afai e iai nisi o taumafaina le areto ma le uaina i le Faamanatuga ae leʻi mauaina lenei valaau faalelagi? O lea ua latou iloaina nei e leʻi valaaulia i latou i le faamoemoe faalelagi, e ao ona uunaʻia i latou e o latou lotofuatiaifo e taofia nei loa lo latou taumafaina o le areto ma le uaina. O le a lē faamaonia e le Atua so o se tasi e faapea mai ua valaauina e avea ma tupu ma faitaulaga i le lagi ae o loo ia iloa lelei e leʻi valaauina moni o ia. (Roma 9:16; Faaaliga 20:6) Sa faaumatia e Ieova le sa Levī o Koru ona o lona saʻilia ma le faamaualuga o le faiva faaositaulaga faa-Arona. (Esoto 28:1; Numera 16:4-11, 31-35) Afai e iloa e se tasi o Kerisiano faapea sa ia taumafaina sesē le areto ma le uaina o le Faamanatuga, e tatau iā te ia ona taofia nei loa, ma tatalo ma le lotomaulalo iā Ieova mo le faamagaloga.—Salamo 19: 13.
13, 14. Aiseā e ono sesē ai manatu o nisi faapea ua latou maua le valaau faalelagi?
13 Aiseā e ono sesē ai manatu o nisi faapea ua latou maua le valaau faalelagi? O le maliu o se paaga po o nisi o mala, e ono māfua ai ona mou atu le fiafia o se tasi i le ola i le lalolagi. Ia po o le manaʻo foʻi i le faamoemoe faalelagi e pei o lana uō lea e la te māfana lelei o loo faapea mai o se tasi o Kerisiano faauuina. O le mea moni, e lē o tofiaina e le Atua se tasi e faalaeiau isi mo lenei faaeaga. Ma e na te lē o faauuina suli o le Malo e ala i le faapogaia o i latou e faalogoina ni leo e aumaia ai ni feʻau e faamautinoa ai lo latou faauuina.
14 O le talitonuga sesē faalotu faapea e ō tagata lelei uma i le lagi e ono taʻitaʻiina ai nisi e manatu faapea ua latou maua le valaau faalelagi. O lea la, e manaʻomia ona tatou puipuia i tatou i le aafia i vaaiga sesē na iai muamua po o nisi foʻi o itu. Mo se faataʻitaʻiga, ua fesili ifo nisi iā i latou lava e faapea: ‘Po o oʻu faaaogāina ni fualaau e aafia ai oʻu faalogona? Po o aafia tele aʻu i oʻu faalogona lea e mafai ona sesē ai aʻu faaiʻuga?’
15, 16. Aiseā ua sesē ai le faaiʻuga a nisi faapea o i latou o ē faauuina?
15 E ono fesili ifo nisi iā i latou e faapea: ‘Pe ou te manaʻo i le tulaga maualuga? Po o oʻu faanaunau mo le pule i le taimi nei po o le avea ma suli faatasi ma Keriso i le lumanaʻi?’ Ina ua valaauina suli i le uluaʻi senituri, e lē o i latou uma sa iai ni tofiga i le faapotopotoga. O tagata ua iai le valaau faalelagi, e lē saʻilia ni tulaga maualuluga po o le mitamita i lo latou avea ma ē faauuina. E latou te faaalia le lotomaulalo lea e faatalitalia mai iā i latou o loo maua “le finagalo o Keriso.”—1 Korinito 2:16.
16 Atonu ua fai le faaiʻuga a nisi faapea ua latou mauaina le valaau faalelagi ona ua latou mauaina le tele o le poto o le Tusi Paia. Ae peitaʻi e lē faapea ua maoaʻe le malamalama o se tasi ona ua faauuagagaina, ona sa tatau ona aʻoaʻoina ma faatonuina nisi o i latou e Paulo. (1 Korinito 3:1-3; Eperu 5:11-14) Ua iai se faatulagaga a le Atua mo le saunia o meaʻai faaleagaga mo ona tagata uma. (Mataio 24:45-47) O lea e leai se tasi e tatau ona manatu faapea o le avea ma Kerisiano faauuina ua avatu ai iā te ia le atamai e maoaʻe atu na i lo i latou e iai le faamoemoe faalelalolagi. O i latou e faauuagagaina e lē faapea o i latou ia e tomai tele i le taliina o fesili faale-Tusi Paia, i le molimau atu, po o le faia o lauga faale-Tusi Paia. Ua matuā agavaa foʻi nisi o loo iai le faamoemoe faalelalolagi i nei vala.
17. O le ā e faalagolago i ai le faauuagagaina ma e mai iā te ai?
17 Afai e fesili se uso talitonu e faatatau i le valaauina faalelagi, e mafai e se toeaina po o isi Kerisiano taʻumatuaina ona talanoaina le mataupu ma lea tagata. Peitaʻi, e lē mafai ona faia e se tagata lenei filifiliga mo se isi tagata. O le tagata ua valaauina moni, e lē tatau ona fesili atu i isi pe afai o loo iā te ia lea faamoemoe. O ē faauuina ‘ua fanaufouina i latou e lē o le fua e pala, a o le fua e lē pala lava, o le afioga a le Atua lea ua ola ma ua tumau e oo i le faavavau.’ (1 Peteru 1:23) E ala i lona agaga ma lana Afioga, ua totōina ai e le Atua le “fua” lea e faia aʻe ai lea tagata ma “tagata fou,” e iai le faamoemoe faalelagi. (2 Korinito 5:17) Ma e faia e Ieova le filifiliga. O le faauuina “e lē mai lē ua manaʻo, e lē mai lē ua tausinio, a e mai le Atua.” (Roma 9:16) E faapefea la ona mautinoa e se tagata ua valaauina o ia i le lagi?
Le Māfuaaga ua Latou Mautinoa Ai
18. E faapefea ona molimau le agaga o le Atua i agaga o i latou ua faauuina?
18 O le molimau a le agaga o le Atua e faamautinoa ai i Kerisiano faauuina faapea ua iā i latou le faamoemoe faalelagi. Na tusi Paulo e faapea: “Ua outou maua le Agaga o tamafai, tou te valaau atu ai, ‘Ava, le Tamā e!’ O loo molimau mai lea lava Agaga i o tatou agaga, o fanau i tatou a le Atua. Afai foʻi o fanau i tatou, o suli foʻi, o suli lava o le Atua, o suli faatasi ma Keriso; pe afai tatou te tigā faatasi ma ia, ina ia faamanuiaina foʻi i tatou faatasi ma ia.” (Roma 8:15-17) O le taaʻina a le agaga paia, e uunaʻia ai e agaga po o loto o ē faauuina i latou e faatatauina iā i latou mea o loo fai mai ai le Tusi Paia e faatatau i fanau faaleagaga a Ieova. (1 Ioane 3:2) E avatu e le agaga o le Atua iā i latou se lagona faapea o i latou o atalii o le Atua ma faatupu aʻe iā i latou se faamoemoe tutasi. (Kalatia 4:6, 7) Ioe, o le ola e faavavau i le lalolagi o ni tagata lelei atoatoa e siʻomia e ʻauaiga ma uō, o le a avea ma tulaga e matuā matagofie lava, ae e lē o lo latou faamoemoe lenā mai le Atua. E ala i lona agaga, ua faatupu aʻe ai e le Atua iā i latou se faamoemoe malosi faalelagi lea ua latou lotomalilie ai e faataulaga o latou sootaga ma faamoemoega uma faalelalolagi.—2 Korinito 5:1-5, 8; 2 Peteru 1:13, 14.
19. O le ā le vaega a le feagaiga fou o loo faia i le olaga o se Kerisiano faauuina?
19 Ua mautinoa e Kerisiano faauuina lo latou faamoemoe faalelagi, i lo latou aveina atu i le feagaiga fou. Na taʻua e Iesu lenā feagaiga ina ua ia faavaeina le Faamanatuga i lona fetalai atu e faapea: “O lenei ipu o le feagaiga fou lea i loʻu toto, ua faamaligiina mo outou.” (Luka 22:20) O i latou ua iai i le feagaiga fou, o le Atua faapea ma ē faauuina. (Ieremia 31:31-34; Eperu 12:22-24) O Iesu o le puluvaga o le feagaiga. Ina ua faagaoioia le feagaiga e ala i le toto masaa o Keriso, ona aumaia lea e le feagaiga fou e lē gata o tagata mai Iutaia ae faapea foʻi ma tagata mai nuu ese ina ia maua ai tagata mo le suafa o Ieova ma avea ai i latou ma vaega o le “fanau” a Aperaamo. (Kalatia 3:26-29; Galuega 15:14) O lenei “feagaiga [e] faavavau” ua mafai ai e Isaraelu uma faaleagaga ona maua le toetū faalelagi i le ola e lē mafai ona oti.—Eperu 13:20.
20. O le ā le feagaiga ua avea i ai e Keriso ē faauuina?
20 Ua mautinoa e le vaega faauuina lo latou faamoemoe. Ua aveina atu i latou i se feagaiga faaopoopo, le feagaiga lea o le Malo. E tusa ai ma lo latou auai faatasi ma Keriso, na fetalai Iesu e faapea: “Ua outou tumau iā te aʻu i oʻu tofotofoga. E faapei ona tofia mai e loʻu Tamā o le malo iā te aʻu, e faapea foʻi ona ou tofia outou.” (Luka 22:28-30) O lenei feagaiga a Keriso ma ana tupu lagolago e tumau pea e faavavau.—Faaaliga 22:5.
Le Vaitaimi o le Faamanatuga—O se Taimi e Olioli Ai
21. E faapefea ona tatou mauaina aogā e tele mai le vaitaimi o le Faamanatuga?
21 E tele faamanuiaga i le vaitaimi o le Faamanatuga. E mafai ona tatou maua aogā mai le faitauga Tusi Paia ua faatulaga mo lea vaitaimi. O se taimi e faapitoa foʻi ona lelei mo le tatalo, mo le mafaufau loloto ai i le soifuaga o Iesu i le lalolagi ma lona maliu, ma le auai i le galuega talaʻi o le Malo. (Salamo 77:12; Filipi 4:6, 7) O le faamanatuga lava ia e faamanatu mai ai iā i tatou le alofa na faaalia e le Atua ma Keriso e fesootaʻi atu i le taulaga togiola a Iesu. (Mataio 20:28; Ioane 3:16) Ua aumaia iā i tatou e lenei fuafuaga le faamoemoe ma le toʻafimālie ma e tatau ai ona faamalosia lo tatou maumauaʻi e tuliloaina ala e pei o ala o Keriso. (Esoto 34:6; Eperu 12:3) E tatau foʻi ona faamalosia i tatou e le Faamanatuga e faataunuuina lo tatou tuuina atu o ni auauna a le Atua ma ia avea ma soo faamaoni o lona Alo pele.
22. O le ā le meaalofa silisili a le Atua i tagata, ma o le ā se auala e faaalia ai le loto faafetai mo lea meaalofa?
22 Maʻeu ni meaalofa lelei ua aumaia e Ieova iā i tatou! (Iakopo 1:17) Ua tatou maua le taʻitaʻiga a lana Afioga, le fesoasoani a lona agaga, ma le faamoemoe o le ola e faavavau. O le meaalofa silisili a le Atua, o le taulaga a Iesu mo agasala a ē faauuina ma isi uma e faaalia le faatuatua. (1 Ioane 2:1, 2) O le ā le tāua o le maliu o Iesu iā te oe? Po o le a e iai faatasi ma i latou e faaalia le loto faafetai i le maliu o Iesu e ala i le faapotopoto faatasi pe a mavae le goto o le lā iā Aperila 16, 2003 mo le faamanatuina o le Talisuaga Afiafi a le Alii?
[Faamatalaga pito i lalo]
^ pala. 8 Lomia e Molimau a Ieova ae e lē o toe lomia.
O ā Au Tali?
• O ai e tatau ona taumamafa i le areto ma le uaina o le Faamanatuga?
• Aiseā e auai ai “isi mamoe” i le Talisuaga Afiafi a le Alii, na ona avea ma ē maimoa ma le faaaloalo?
• E faapefea ona iloa e Kerisiano faauuina e tatau ona latou taumamafa i le areto ma le uaina i le Faamanatuga o le maliu o Keriso?
• O le vaitaimi o le Faamanatuga o se taimi lelei mo le faia o le ā?
[Fesili mo le Suʻesuʻega]
[Siata/Ata i le itulau 18]
(Tagaʻi i le lomiga mo le ata atoa)
O Ē na Auai i le Faamanatuga
E FAITAU MILIONA
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Ata i le itulau 18]
Po o le a e iai i le Talisuaga Afiafi a le Alii i lenei tausaga?
[Ata i le itulau 21]
O le vaitaimi o le Faamanatuga o se taimi sili mo le faateleina ai o le faitauina o le Tusi Paia ma le auai i le galuega talaʻi o le Malo