Ia Faaaogā Tatau Fesuiaʻiga o Tulaga o le Olaga

O toeaina Kerisiano e toʻafā e nonofo i Polani e suafa iā Pum, Jan, Dries ma Otto, e tele ni mea e tutusa uma ai i latou. O i latou nei e toʻafā o ni tane faaipoipo ua fai fanau. E le gata i lenā, i ni tausaga ua mavae na avea uma ai i latou nei o ni tagata e faigaluega faaletino faasolo atoa ma sa nonofo i ni fale lelei. Peitaʻi sa lē toe faigaluega faaletino i latou uma nei, ae ua tuutoina atu lo latou taimi ma le malosi atoa i le faalauteleina o manaʻoga o le Malo. O le ā sa latou taulau manuia ai i le faia o nei suiga? Sa faaaogā tatau e nei tane e toʻafā ia fesuiaʻiga o tulaga o le olaga.

O fesuiaʻiga o tulaga o mea e mautinoa le aafia ai o le toʻatele o i tatou. O le tele o suiga e pei o le faaipoipo, o le faia o ni fanau po o le tausiaina foi o mātua ua matutua, ua faaopoopo mai ai tiute tauave. Peitaʻi o nisi suiga ua mafai ona ofoina mai ai iā i tatou le saʻolotoga e faalautele atu ai la tatou faiva faa-Kerisiano. (Mataio 9:37, 38) Mo se faataʻitaʻiga, pe a fai ua matutua le fanau ma tuua le aiga, ia pe ua tatou litaea foʻi mai galuega.

O le mea moni e ui atonu o o tatou tulaga e ono suia e tusa lava pe tatou te mananaʻo i ai pe leai, ae ua mātauina le taulau manuia o nisi Kerisiano i le faia o suiga o tulaga o le olaga lea e mafai ona maua ai avanoa e faalautele ai lo latou sao i le faiva. O le mea tonu lava lenā sa faia e Pum, Jan, Dries ma Otto. E faapefea?

Pe a Tuua e Tamaiti le Aiga

Sa faigaluega Pum o se tagata tausi tusi i se kamupani talavai. Sa masani lava ona galulue o ia ma lana avā o Anny o ni faifeʻau paeonia lagolago, faatasi ai ma la la fanau teine e toʻalua. Sa faatulagaina foʻi e Pum ma Anny le taimi e fai mālōlōga ai ma isi paeonia i le faiva. Na faapea mai i laʻua: “O lenei faiga o se puipuiga mo faafitauli lea e ono tulaʻi mai i isi ituaiga o aufaatasiga.” I le faagaeetia i le faaaʻoaʻoga na faataatia e o la mātua, na avea ai teine nei e toʻalua o ni paeonia sauatoa i le taimi lava na uma ai a la aʻoaʻoga.

Ina ua tuua e le la fanau le aiga, na iloa ai e Pum ma Anny o lenei suiga ua mafai ona faaopoopo atu ai iā i laʻua le saʻolotoga ma tupe e la te ono faaaogā e faimalaga atu ai i isi nofoaga matagofie, pe e olioli ai foʻi i isi ituaiga o faafiafiaga. Ae na i lo o le faaaogāina o nei avanoa, ua filifili ai le ulugalii e avea lenei suiga i tulaga o le olaga e faalauaʻitele ai la laʻua faiva faa-Kerisiano. O lea sa talanoa atu ai loa Pum i lona pule mo se faatagaga e faigaluega ai mo le tasi le aso i le vaiaso. Mulimuli ane, na faia ai e Pum ni faatulagaga e amata faigaluega i le fitu i le taeao ae manava i le lua i le afiafi. Ioe o le mea moni o le itiiti o le taimi e faigaluega ai o lona uiga o le tau faasoasoaina foʻi lea o se totogi laʻitiiti. Peitaʻi sa latou taulau manuia, ma i le 1991 na faatasi atu ai loa Pum i lana avā i le avea ai ma se paeonia sauatoa.

Na sosoo ai ma le valaauliaina o Pum ina ia avea o sē e fesoasoani i le tausiaina o le Maota Fono o le Malo o Molimau a Ieova. O lenei valaaulia sa aofia ai le tuua o lo la fale sa  nonofo ai mo le 30 tausaga, ae sifi atu i se nofoaga e i totonu o le lotoa o loo iai le Maota Fono. O lea sa latou siitia atu ai loa i lenā nofoaga. Pe sa faigatā ea mo i latou lenā tulaga? Ua tali mai Anny e faapea, o le taimi lava e na te misia ai lona aiga e fesili ifo lava iā te ia ‘Pe o aʻu ea o le avā a Lota?’ O lea na lē ‘toe mafaufau ai loa i lona aiga.’—Kenese 19:26; Luka 17:32.

Ua iloa e Pum ma Anny le tele o faamanuiaga ua maua i le filifiliga sa la faia. E aofia ai i le tele o nei faamanuiaga, ua latou olioli i la latou auaunaga i le Maota Fono o le Malo i le tapenaina mo fonotaga itumalo ma fesootaʻiga ma ovasia matagaluega o ē o loo taulimaina lauga i le maota. Mai lea taimi i lea taimi, e asiasi atu ai Pum i faapotopotoga eseese a o avea ma se ovasia suitulaga o matagaluega.

O le ā sa mafai ai e lenei ulugalii ona taulau manuia i le faalauteleina o la la auaunaga? Ua faapea mai Pum: “Pe a telē se suiga i lou olaga ia e taumafai e faaaogā tatau na suiga fou.”

Ia Atiina Aʻe se Olaga Faigofie

O Jan ma lana avā o Woth, e iai sa la fanau e toʻatolu. I le pei o Pum ma lona aiga, sa faaaogā tatau ai foʻi e Jan ia suiga i tulaga o le olaga. I le tele o tausaga, sa maua ai e Jan se galuega e lelei le totogi i le faletupe ma sa mafai ai ona ia maua se olaga tamaoaiga mo lona aiga. Ae e ui lava i lea, sa iai pea lona faanaunauga i le faalauteleina atu o lana faiva. Ua ia faapea mai: “I loʻu olaga, sa faalolotoina ai loʻu talisapaia o le upu moni ma sa faatuputeleina ai loʻu alofa mo Ieova.” O lea i le 1986, sa faia ai loa e Jan ia se suiga i tulaga o lona olaga. Ua ia faapea mai: “Sa ou faaaogāina le avanoa ina ua toe fetuunaʻi faatulagaga i le ofisa ma mafai ai ona faaitiitia oʻu itula faigaluega. Sa faaitiitia lou totogi i le 40 pasene. Sa ou faatauina atu loʻu fale ma faatau mai ai se vaa e fai ma fale ina ia mafai ona matou auauna ai i soo se mea o loo tele ai le manaʻoga mo tagata talaʻi o le Malo. Mulimuli ane sa ou maua le avanoa e vave litaea ai; ua faaitiitia laʻu tupe maua i le isi 20 pasene, ae i le 1993 sa mafai ai loa ona ou auauna o se paeonia sauatoa.”

I aso nei ua avea nei Jan o se sui o le Komiti o Mataupu Tau i le Falemai ma e tele foʻi taimi e avea ai ma ovasia o tauaofiaga. E ui i le tulaga lē lelei o le soifua mālōlōina o Woth, ae o loo auauna pea o ia o se paeonia lagolago mai i lea taimi i lea taimi. Ua faaipoipo uma foʻi tamaiti e toʻatolu ma o loo auauna faatasi ma a latou paaga o ni faifeʻau maelega o le Malo.

 Sa faapefea ona taumafai Jan e faamasani i le tulaga utiuti o mea e maua i le soifuaga? Ua tali mai Jan e faapea: “I le taimi sa tele ai le tamaoaiga faaletino, sa matou faamautinoa ai ia aua neʻi matuā faatāuaina na mea. Ae i aso nei ua lē o toe tutusa le tulaga o mea, ua faatali mo sina taimi ona faatoa maua lea o se mea o loo manaʻomia, ae peitaʻi o loo matuā faatamaoaigaina i matou i faaeaga ma faamanuiaga faaleagaga.”

I le pei o Jan ma Woth, sa faia foʻi e Dries ma lana avā o Jenny, se filifiliga e faafaigofie lo la olaga, ina ia mafai ai ona telē le taimi e faaalu i manaʻoga o le Malo. Sa auauna Dries ma Jenny o ni paeonia seʻia oo lava i le taimi na avea ai i laʻua o ni mātua. O lea ina ia tausia lona aiga, sa faigaluega ai Dries o se pule i se Kamupani telē lava. Sa fiafia lana pule iā te ia ma ofo atu ai se isi tulaga e maualuga atu. Ae e ui i lea sa teena e Dries le ofo ona e ono faaitiitia ai le taimi e faaalu mo gaoiga faa-Kerisiano.

O le tausia o lona aiga faatasi ma le tinā maʻi o lana avā o Jenny, sa faaaluina ai e le ulugalii le tele o lo la taimi ma le malosi. Ae sa faaauau pea ona atiina aʻe lo la faanaunauga o le avea o ni paeonia. O le ā sa fesoasoani iā i laʻua e faia ai faapea? Ua faamatala mai Jenny e faapea: “E iai ni paeonia e matou te nonofo faatasi, e valaaulia foʻi paeonia e matou te fai ʻaiga ma ofo atu foʻi api mo ovasia o le matagaluega.” Ua ia faaopoopo mai: “E matou te faafaigofieina lava le olaga ma ʻalofia le faia o ni aitalafu. E matou te filifili foʻi ina ia aua lava neʻi aafia i ni faiga faapisinisi tetele pe faatau se fale, ina ia lē saisaitia ai i le lumanaʻi.”

O le filifiliga a Dries ma Jenny i le faia o ni suiga i tulaga o le olaga ina ia maua ai le tele o le taimi mo manaʻoga o le Malo, sa mafai ona maua ai ni faamanuiaga. Ua avea nei la laʻua fanau tama e toʻalua o ni toeaina ma o loo galulue foʻi faatasi ma lana avā o ni paeonia. Sa auauna Dries ma Jenny o ni paeonia faapito ma mulimuli ane ai sa faatasi atu loa Jenny iā Dries i le galuega matagaluega. I le taimi nei o loo galulue i laʻua i Peteli, lea o loo auauna ai Dries o se sui o le Komiti o le Lālā.

Ia Vave Litaea

I le pei o Dries ma Jenny, sa avea foʻi Otto ma lana avā o Judy, o ni paeonia a o leʻi maua sa la fanau teine se toʻalua. Ina ua oo i le taimi e fanau ai Judy i le la tama muamua, sa maua ai e Otto se galuega o se faiaʻoga.

A o tuputupu aʻe tamaiti sa fai pea ma masani a Otto ma Judy le talimālō i paeonia i lo la fale, ina ia mafai ai e la la fanau teine ona iloa le olioli i le avea o ni ʻaufaigaluega Kerisiano faataimi atoa. Na ulufale la la tama teine ulumatua i le aʻoga paeonia. Ma mulimuli ane sa auai atu ai o ia ma lana tane i le Aʻoga i Kiliata, ma i  le taimi nei o loo auauna o ni misionare i laufanua o Aferika. Ae i le 1987 sa avea ai le la tama teine laʻitiiti o se paeonia ma ua faatasi atu ai foʻi ma Judy.

O suiga i tulaga o le olaga ua mafai ai e Otto ona faaitiitia itula e faigaluega ai i le aʻoga ma sa ia faaaogā le isi taimi na totoe e paeonia ai. E leʻi umi lava ae faamavae loa o ia mai i lana galuega. I aso nei i le galuega femalagaaʻi, ua faaaogā ai e Otto lona tomai o se faiaʻoga e faamalosia ai faapotopotoga o loo ia asia i le itu faaleagaga.

O le ā le fautuaga a Otto mo i latou o loo vave ona litaea mai i a latou galuega faaletino? “Pe a e litaea aua neʻi e mafaufau e faifai lemū mo se tausaga pe sili atu foʻi. O le faigofie ona faamasani i le faifai lemū, o le a galo ai iā te oe le avea ma paeonia. Na i lo o lenā ia amata loa lava ona faateleina au gaoioiga faaleauaunaga.”

Ia Faaaogā Tatau Mea e Tutupu i le Olaga

E mautinoa o uso e pei o Pum, Jan, Dries, ma Otto e lē o toe maua e i latou le malosi lea sa iai muamua a o talavou. Ae o loo sili atu lo latou taʻumatuaina, le iloa ma lo latou poto. (Faataoto 20:29) Ua latou iloa le tulaga o le avea ai ma tamā ma o le galulue ma a latou avā ua latou iloa ai le tele o mea e aofia ai i le avea ma tinā. I le galulue ai ma a latou avā ua mafai ona latou taulimaina faafitauli ma faataatitia ia sini faatiokarate mo a latou fanau. Ua faapea mai Otto: “Pe a ou avatuina ia fautuaga o se ovasia matagaluega i mataupu tau i le aiga, e telē se fesoasoani o loʻu tomai i le avea ai ma se tagata tausi aiga i fautuaga o loo oʻu avatuina.” O le tulaga foʻi lenā iā Dries i le avea ai o se tamā lea ua mafai ai nei ona avea o ia o se tasi o vaega tāua i le aiga Peteli i le galulue faatasi ma le toʻatele o talavou.

Ioe e mafai e le tomai ona fesoasoani i uso faapena i le tausia aʻe o ni manaʻoga se tele i faapotopotoga. O mea na tutupu iā i latou e fesoasoani e faaleleia atili ai lo latou tomai i le faaaogāina o lo latou malosi mo ni iʻuga lelei. (Failauga 10:10) O le mea moni e masani ona sili atu mea latou te faataunuuina i se taimi puupuu na i lo o i latou e malosi faaletino ae lē lava se tomai.

Ua mafai ona avea na uso faatasi ai ma a latou avā o ni faaaʻoaʻoga lelei mo ē talavou i tagata o Ieova. E mātauina e talavou na ulugalii o ni tagata na fesagaʻia totino le tele o luʻi ma faamanuiaga e pei ona lipotia mai i a tatou lomiga faa-Kerisiano. O se faalaeiauga le vaaia o tane ma fafine o ē o loo atiina aʻe le agaga lea sa iā Kalepo o lē ua matua i tausaga, ae sa fesagaʻi ma se tofiga sa avea ma luʻi.—Iosua 14:10-12.

Ia Faataʻitaʻi i lo Latou Faamaoni

Pe e mafai ona e faataʻitaʻi i le faamaoni ma gaoioiga a ulugalii o loo taʻua i lenei mataupu? E ao ona manatua sa avea le upu moni ma taulaiga i o latou olaga. Sa latou atiina aʻe i loto o a latou fanau se faanaunauga i le avea o ni paeonia. Sa latou faia faapea e pei ona sa faia e Jan “i le avea ai ma faaaʻoaʻoga o le alofa iā Ieova ma lana faalapotopotoga, le filifilia o aumea lelei ma le aʻoaʻoina o le fanau ina ia galue lava le tagata mo ia.” Sa galulue foʻi ma taaalo faatasi o se aiga. Ua faapea Pum: “E fai ma masani a lo matou aiga i taimi o faigāmālōlōga ona ō i le galuega talaʻi i le taeao ae fiafia faatasi i mālōlōga o le aoauli.”

E lē gata i lea, o nei Kerisiano ua latou fuafua mamao ina ia oo atu i le taimi e faia ai suiga i tulaga o le olaga, ua nofosauni e faaaogā tatau avanoa o ia suiga fou. Latou te faatutūina sini ma faia filifiliga ina ia vave ona ausia. E latou te tilofaʻia ia auala e faaitiitia ai le faigaluega i galuega faaletino ma e lotomalilie i ni tupe itiiti latou te mauaina. (Filipi 1:10) E avatu foʻi e avā i a latou tane le lagolagosua malosi. O le galulue faatasi o le a maua ai e i latou se faanaunauga malosi i le ulufale atu i le “faitotoʻa vatele lea e tataʻi atu ai i gaoioiga” ma o le iʻuga o le a olioli ai i le faatamaoaigaina i faamanuiaga mai iā Ieova.—1 Korinito 16:9; Faataoto 10:22.

Po o iai sou faanaunauga e faatele sou sao i le faiva? Afai o lea, o le faaaogā tatau o fesuiaʻiga i tulaga o le olaga o le auala lea e faia ai faapea.

[Ata i le itulau 20]

O Pum ma Anny o loo tausia le Maota Fono o le Malo

[Ata i le itulau 20]

O Jan ma Woth o loo faia lo la sao i le galuega talaʻi

[Ata i le itulau 21]

O Dries ma Jenny o loo auauna i Peteli

[Ata i le itulau 21]

O Otto ma Judy o loo sauniuni mo le asiasiga i le faapotopotoga o loo sosoo ai