‘Ia Outou Loto Tetele ma Faamalolosi!’
‘Ia Outou Loto Tetele ma Faamalolosi!’
“Ia outou loto tetele, ua ou manumalo i le lalolagi.”—IOANE 16:33.
1. I le vaai atu i fili malolosi o loo faatalitalia mai Isaraelu i Kanana, o le ā le faalaeiauga na latou maua?
A O TOETOE lava sopoʻia e Isaraelu le vaitafe o Ioritana ma oo atu ai i le Nuu o le Folafolaga, na taʻu atu e Mose iā i latou e faapea: ‘Ia outou loto tetele, ma outou faamalolosi; aua tou te fefefe, aua foʻi neʻi matataʻu i o latou luma; auā o Ieova lou Atua, tou te ō faatasi ma ia.’ Ona valaau atu lea o Mose iā Iosua, o lē ua filifilia e taʻitaʻia Isaraelu i Kanana, ma saga fautua atu iā Iosua ina ia lototele. (Teuteronome 31:6, 7) Mulimuli ane, ona faalaeiau lea o Ieova iā Iosua i le fetalai atu e faapea: ‘Ia e loto tele ma faamalosi. Tau ina e matuā loto tele lava ma faamalosi.’ (Iosua 1:6, 7, 9) Sa talafeagai lelei na upu i lenā taimi. O le a manaʻomia e Isaraelu le lototetele e fesagaʻi ai ma fili malolosi o loo faatalitalia i latou i le isi itu o le Ioritana.
2. O le ā le tulaga ua tatou iai i aso nei, ma o le ā e tatou te manaʻomia?
2 I aso nei, ua toetoe lava ona sopoʻia atu lea e Kerisiano moni le lalolagi fou na folafolaina mai ma i le pei o Iosua, e manaʻomia ona latou lototetele. (2 Peteru 3:13; Faaaliga 7:14) Ae peitaʻi, e ese lo tatou tulaga mai le tulaga o Iosua. Na tau Iosua i pelu ma tao. Peitaʻi o la tatou taua, e faaleagaga ma e lē mafai ona tatou faaaogāina ni auupega faaletino. (Isaia 2:2-4; Efeso 6:11-17) E lē gata i lea, na tau Iosua i le tele o taua mataʻutia e ui lava ina ua mavae lona ulu atu i le Nuu o le Folafolaga. Peitaʻi, o lea ua tatou fesagaʻi nei ma se taua e sili ona mataʻutia—a o tatou leʻi ulu atu i le lalolagi fou. Seʻi o tatou talanoaina nisi o tulaga e manaʻomia ai ona tatou lototetele.
Aiseā e Tatau ai Ona Tatou Tauivi?
3. O le ā o loo faaalia i le Tusi Paia e faatatau i lē sili ona tetee iā i tatou?
3 Na tusi le aposetolo o Ioane e faapea: “Ua tatou iloa e mai le Atua lava i tatou, a o le lalolagi uma o loo nofo toʻilalo i loo leaga.” (1 Ioane 5:19) Ua faaalia mai i na upu le māfuaaga autū e tatau ai ona tauivi Kerisiano i le tausia o lo latou faatuatua. Pe a tausia e se Kerisiano lona faamaoni, e avea lenā tulaga o se toʻilalo iā Satani le Tiapolo. O lea, ua fealuaʻi solo Satani e pei “o se leona tagi” e taumafai e faamataʻu ma faaumatia Kerisiano faamaoni. (1 Peteru 5:8) O le mea moni, o loo ia tau le taua ma Kerisiano faauuina ma a latou aumea. (Faaaliga 12:17) I lenei taua, e na te faaaogāina tagata e faataunuuina ai ona sini pe latou te iloa pe lē iloa foʻi. O lea, e manaʻomia le lototele e tumau ai i gaoioiga a Satani ma ana ʻau uma.
4. O le ā le lapataʻiga na fetalai i ai Iesu, ae o le ā le uiga ua faaalia e Kerisiano moni?
4 Ona na silafia e Iesu faapea o le a tetee malosi Satani ma ana ʻau i le tala lelei, ona ia lapataʻia lea o ona soo e faapea: “Ona latou tuuina atu ai lea o outou i le puapuaga, ma latou fasiotia outou; e inosia foʻi outou e nuu uma ona o loʻu igoa.” (Mataio 24:9) Na faamaonia na fetalaiga i le uluaʻi senituri, ma o loo faamaonia foʻi i aso nei. O le mea moni, o sauāga o loo onosaia e nisi o Molimau a Ieova i aso nei e ogaoga e pei lava o sauāga i taimi ua teʻa. Peitaʻi, ua lototetele Kerisiano moni a o fesagaʻi ai ma na omiga. Ua latou iloa faapea o le “fefe i tagata e tupu ai le mailei,” ma e latou te lē mananaʻo e puʻea i se mailei.—Faataoto 29:25.
5, 6. (a) O ā tulaga e manaʻomia ai lo tatou lototetele? (e) E faapefea ona tali atu Kerisiano faamaoni pe a tofotofoina lo latou lototetele?
5 O loo iai foʻi isi luʻi e ese mai i sauāga lea e manaʻomia ai ona tatou lototetele. O nisi o tagata talaʻi, o le talanoa atu i ni tagata ese e faatatau i le tala lelei o se luʻi. Ua tofotofoina le lototele o nisi o tamaiti aʻoga pe a faapea atu iā i latou e usuina le vii o le fuʻa po o le faalo i ai i le fuʻa a le atunuu. Ona o lenā taʻutinoga o se gaoioiga faaletapuaʻiga, ua matuā maumauaʻi ai tamaiti Kerisiano e gaoioi i se auala e faamalieina ai le finagalo o le Atua, ma o lo latou talaaga lelei ua avea ma mea e faafiafiaina ai.
6 E tatou te manaʻomia foʻi le lototele pe a taumafai tagata tetee e faaaogā tusitusiga i nusipepa, e faasalalau ai faamatalaga pepelo e faatatau i auauna a le Atua, po o lo latou taumafai foʻi e taofia le tapuaʻiga moni e ala i ‘tulafono faatigā.’ (Salamo 94:20) Mo se faataʻitaʻiga, o ā o tatou lagona e tatau ona iai pe a aumaia ni faamatalaga sesē po o ni tala pepelo e faatatau i Molimau a Ieova i nusipepa, leitiō, po o televise? Pe tatau ona faateʻia ai i tatou? E leai. O mea na e tatou te faatalitalia. (Salamo 109:2) E lē faateʻia i tatou pe a talitonu nisi i pepelo ma tala taufaasesē ua faasalalauina, ona “o lē ua faigofie, e talia e ia upu uma.” (Faataoto 14:15) Peitaʻi, e lē talitonu Kerisiano faamaoni i so o se faamatalaga e faia e faatatau i o latou uso, ma e mautinoa e latou te lē faatagaina faamatalaga sesē e faapogaia ai i latou e misia sauniga faa-Kerisiano, pe tau lē auai ai i le faiva i le fanua, po o le faavaivaia ai o lo latou faatuatua. I le isi itu, ua latou “faailoa ai i [latou], o auauna a le Atua i [latou], . . . i le viia ma le faaleagaina, i le taʻuleagaina ma le taʻuleleia; [e tusa ai ma tagata taufaasesē] O i matou ua peiseaʻī o ē faasesē, a e faamaoni lava.”—2 Korinito 6:4, 8.
7. O ā fesili faatupu manatu e tatou te fesili ifo ai iā i tatou lava?
7 Ina ua tusi atu Paulo iā Timoteo, na ia faapea atu: “Ua lē foaʻiina mai e le Atua iā te i tatou le agaga e mataʻu ai, a o le agaga e faamalosi ai . . . O lenei, aua e te mā i le molimau i lo tatou Alii.” (2 Timoteo 1:7, 8; Mareko 8:38) I le faitauina o na upu, e tatou te fesili ifo ai iā i tatou lava e faapea: ‘Po o oʻu mā i loʻu faatuatua po o oʻu lototele? I le nofoaga o loo oʻu faigaluega ai (po o le aʻoga), po o oʻu faailoa atu iā i latou o loo matou auaufaatasi o aʻu o le Molimau a Ieova, po o oʻu taumafai e natia loʻu tulaga moni o loo iai? Po o oʻu mā e faaesea aʻu mai isi pe ou te mitamita i le ese o aʻu ona o laʻu faiā ma Ieova?’ Afai e iai ni lagona fefe o se tasi e faatatau i le talaʻia o le tala lelei po o le iai o ni talitonuga e lē fiafia i ai tagata, ona manatua lea o fautuaga a Ieova iā Iosua e faapea: ‘Ia e loto tele ma faamalosi.’ Aua lava neʻi galo, e lē o le manatu o ē tou te faigaluega faatasi po o ē tou te aʻoʻoga e taulia, ae o le silafaga a Ieova ma Iesu Keriso.—Kalatia 1:10.
Le Auala e Atiae ai le Lototele
8, 9. (a) I se tasi o mea na tupu, na faapefea ona tofotofoina le lototele o uluaʻi Kerisiano? (e) Na faapefea ona gaoioi Peteru ma Ioane ina ua faamataʻuina i laʻua ma o le ā na oo iā i laʻua faapea ma le ʻauuso?
8 E faapefea ona tatou atiae le ituaiga lototele lea e tatou te mafai ai ona tausia lo tatou faamaoni i nei taimi faigatā? O lea, na faapefea ona atiae e uluaʻi Kerisiano le lototele? Seʻi manatu i le mea na tupu ina ua taʻu atu e le ʻaufaitaulaga sili ma toeaina i Ierusalema iā Peteru ma Ioane e aua neʻi toe talaʻi i le suafa o Iesu. Sa teena e soo lenā tulaga ma sa faamataʻuina i laʻua, ona toe faasaʻoloto lea. Ina ua mavae lenā mea na tupu, ona la toe faatasi lea ma le ʻauuso, ma latou tatalo faatasi, ma faapea atu: “Le Alii e, ia e silasila i lo latou faamataʻu mai; ma ia e foaʻi mai i au auauna, ina ia [matou] matuā tautala i lau afioga ma le loto tele.” (Galuega 4:13-29) Na tali atu Ieova e ala i lona faamalosia o i latou i le agaga paia, ma e pei ona faamaonia mulimuli ane e ni taʻitaʻi o Iutaia e faapea, ua latou “faatumu i Ierusalema” i a latou aʻoaʻoga.—Galuega 5:28.
9 Seʻi o tatou iloiloina le mea na tupu. Ina ua faafefe e taʻitaʻi Iutaia ia soo, sa leʻi taofia ai e soo la latou talaʻiga ona o omiga mai taʻitaʻi Iutaia. Na i lo lea, na tatalo soo mo le lototele e faaauau ai le talaʻiga. Ina ua mavae lenā ona latou gaoioi lea e ōgatusa ma la latou tatalo, ona faamalosia lea o i latou e Ieova i lona agaga. O le mea na tupu iā i latou e faaalia ai o mea ia na tusia e Paulo i nai tausaga mulimuli ane ai i se isi mea na tupu, e faatatau atu i Kerisiano pe a oo i ai sauāga. Na faapea mai Paulo: “Ou te mafaia mea uma lava ona o ia ua faamalosi mai iā te aʻu.”—Filipi 4:13.
10. E faapefea i le mea na tupu iā Ieremia ona fesoasoani iā i latou e matamumuli?
10 Seʻi faapea o le tagata e iai ni ona lava uiga matamuli. Pe e mafai ona ia auauna iā Ieova ma le faamalosi a o feagai ai ma teteega? E mautinoa lava e mafai! Seʻi manatu i le tali atu a Ieremia ina ua tofia o ia e Ieova e fai ma perofeta. Na faapea atu lenei tama talavou: “O aʻu o le tama itiiti.” E manino mai i inei, sa ia lagonaina lona lē agavaa. Ae sa faalototele o ia e Ieova i upu nei: “Aua e te faapea, O aʻu o le tama itiiti; auā o i latou uma ou te auina atu i ai oe, e te alu lava i ai, o mea uma foʻi ou te fai atu ai iā te oe, e te fai atu ai lava. Aua e te fefe iā te i latou; auā ou te iā te oe e laveaʻi iā te oe.” (Ieremia 1:6-10) Sa talitonu Ieremia iā Ieova, ma o le iʻuga, o le malosi mai iā Ieova na ia foʻia ai lona faatalatū ma avea ai o se molimau e mataʻina le lototele i Isaraelu.
11. O le ā e fesoasoani i Kerisiano i aso nei ia pei ai o Ieremia?
11 Ua iai i Kerisiano faauuina i aso nei se tofiga e talitutusa ma le tofiga o Ieremia, ma e lagolagosua i ai le “motu o tagata e toʻatele” o “isi mamoe,” ua latou faaauau ona folafola atu fuafuaga a Ieova, e tusa lava pe feagai ma tulaga faalēano mai, aamu, faapea ma sauāga. (Faaaliga 7:9; Ioane 10:16) Ua faalaeiauina i latou i fetalaiga a Ieova iā Ieremia e faapea: “Aua e te fefe.” E lē galo iā i latou faapea ua tofia i latou e le Atua ma o loo latou talaʻia lana feʻau.—2 Korinito 2:17.
Faaaʻoaʻoga o le Lototele e Tatau Ona Tatou Faataʻitaʻi i Ai
12. O le ā le faaaʻoaʻoga e sili ona lelei o le lototele na faataatia e Iesu, ma na faapefea ona ia faalaeiau i ona soo?
12 E mafai ona tatou maua le fesoasoani i a tatou taumafaiga e atiae le lototele pe a tatou manatunatu loloto i faaaʻoaʻoga a isi e pei o Ieremia na gaoioi ma le lototele. (Salamo 77:12) Mo se faaaʻoaʻoga, a o tatou iloiloina le faiva a Iesu, e tatou te maofa i lona lototele ina ua tofotofoina o ia e Satani faapea ma le taimi na feagai ai ma teteega malolosi mai taʻitaʻi Iutaia. (Luka 4:1-13; 20:19-47) O le malosi mai iā Ieova, na lē maluelue ai Iesu, ma a o latalata i lona maliu, na ia fetalai atu ai i ona soo e faapea: “E maua outou e le puapuaga i le lalolagi, a ia outou loto tetele, ua ou manumalo i le lalolagi.” (Ioane 16:33; 17:16) Afai e mulimuli soo o Iesu i lana faaaʻoaʻoga, o le a latou manumalo foʻi i le lalolagi. (1 Ioane 2:6; Faaaliga 2:7, 11, 17, 26) Peitaʻi e latou te manaʻomia ona “loto tetele.”
13. O le ā le faalaeiauga na saunia e Paulo mo uso i Filipi?
13 I nai tausaga talu ona mavae le maliu o Iesu, na faafalepuipuiina ai Paulo ma Sila i Filipi. Mulimuli ane, na faalaeiau e Paulo le faapotopotoga i Filipi ia “tumau i le agaga e tasi, ma le manatu e tasi, o loo finau faatasi mo le faatuatuaga ua i le tala lelei; o loo lē faamatataʻuina outou i se mea e tasi e i latou o ē tetee mai.” Ina ia faamalosia i latou ia tumau i le agaga e tasi, na faapea mai Paulo: “Auā o le faailoga lea [o Kerisiano ua sauāina] iā te i latou o le malaia [o ē o loo faia sauāga], a o le faailoga o le ola iā te outou, e mai le Atua foʻi lea. Auā ua foaʻifuaina iā te outou ona o Keriso, e lē na ona ia faatuatua iā te ia, a ia faatigāina foʻi outou ona o ia.”—Filipi 1:27-29.
14. O ā aafiaga o uso i Roma ona o le lototele o Paulo?
14 Ina ua tusi atu Paulo i le faapotopotoga i Filipi, o le taimi lea ua toe iai foʻi o ia i le falepuipui, ae o le taimi lea ua iai o ia i Roma. Peitaʻi, sa ia faaauau pea ona talaʻi atu ma le lototele i isi. O ā iʻuga na maua mai ai? Na tusi Paulo e faapea: ‘Ua faaalia loʻu noanoataga ona o Keriso, i le fale uma o le ʻau e leoleo atoa ma isi mea uma. O le toʻatele foʻi o le ʻau uso o i le Alii o loo matuā faatuatua ona o loʻu noanoataga; ua atili ai ona latou faamalosi e tautala i le upu ma le lē mataʻu.’—Filipi 1:13, 14.
15. O fea e tatou te maua ai faaaʻoaʻoga lelei o le faatuatua lea o le a faamalosia ai lo tatou faanaunauga ia lototele?
15 Ua faalaeiauina i tatou e le faaaʻoaʻoga a Paulo. Ma ua faapena foʻi ona faalaeiauina i tatou e faaaʻoaʻoga lelei a Kerisiano i aso nei, o ē na onosaia sauāga i atunuu e iai pulega faatautalatasi po o pulega a taʻitaʻi lotu. O le tele o tala faapena o loo faamatalaina i mekasini o Le Olomatamata ma le Ala Mai! ma Yearbooks of Jehovah’s Witnesses. A o e faitauina na faamatalaga, ia manatua o tagata e ana ia faamatalaga, o tagata e pei lava o i tatou; ae ina ua latou oo i tulaga faigatā, na avatu e Ieova iā i latou le malosi e sili atu i lo latou malosi ma mafai ai ona latou tumau. E mafai foʻi ona tatou mautinoa o le a ia aumaia iā i tatou le malosi lava lenā e tasi pe a tatou oo i tulaga ua manaʻomia ai.
O lo Tatou Lototetele e Faafiafiaina ma Faamamaluina ai Ieova
16, 17. E faapefea ona tatou atiae se uiga lototele i aso nei?
16 Afai e tumau se tasi i le upu moni ma le amiotonu, o lona uiga ua lototele lenā tagata. Ae afai e tumau se tasi e ui lava i ona lagona fefe o loo iai, o lona uiga la ua sili atu le lototele o lenā tagata. O le mea moni, e mafai ona lototele so o se Kerisiano pe afai e manaʻo moni o ia e faia le finagalo o Ieova, pe afai e maumauaʻi e tumau i le faamaoni, pe afai e faalagolago pea i le Atua, ma pe afai e na te manatua pea na faamalosia e Ieova le tele o tagata e pei o ia i taimi muamua atu. E lē gata i lea, afai e tatou te iloa faapea o a tatou gaoioiga lototele e faafiafiaina ma faamamaluina ai Ieova, o le a tatou maumauaʻi atili ai ia aua neʻi faavaivai. Ua tatou nofosauni e onosaia tauemuga po o faiga leaga, ona e tatou te alolofa loloto iā te ia.—1 Ioane 2:5; 4:18.
17 Ia aua lava nei galo iā i tatou, afai e tatou te pagatia ona o lo tatou faatuatua, e lē faapea ai ua tatou faia se mea sesē. (1 Peteru 3:17) Ua tatou pagatia ona o loo tatou lagolagoina le pule silisili ese a Ieova, mo le faia o le mea lelei, ma le leai o sa tatou vaega i le lalolagi. E tusa ai ma lenei tulaga, na faapea mai le aposetolo o Peteru: “A e afai tou te onosai pe a tigāina outou a o amio lelei, o le mea lava lea e mālie i le Atua.” Na toe faapea mai foʻi Peteru: “O i latou ua tigāina e tusa ma le finagalo o le Atua, ia latou tuuina atu ma le amio lelei o latou lava ola i lē na faia mea uma, o ia e faamaoni.” (1 Peteru 2:20; 4:19) Ioe, e faafiafiaina lo tatou Atua alofa o Ieova, ma faamamaluina ai o ia. Maʻeu se māfuaaga e tatau ai ona tatou lototetele!
Pe a Talanoa Atu i Ē e i Tulaga Maualuluga i le Malo
18, 19. Pe a tatou tulaʻi ma le lototele i luma o se faamasino, o le ā le feʻau o loo tatou momoliina atu?
18 Ina ua taʻu atu e Iesu i ona soo faapea o le a sauāina i latou, na ia faapea atu foʻi: “Auā latou te tuuina atu outou i fono, ma latou sasa iā te outou i o latou sunako. E taʻitaʻiina atu foʻi outou i luma o alii ma tupu ona o aʻu, e fai ma molimau iā te i latou atoa ma nuu ese.” (Mataio 10:17, 18) Pe a tulaʻi i luma o se faamasino po o se pule ona o se tuuaʻiga sesē, e manaʻomia ona tatou lototetele. Peitaʻi, afai e tatou te faaaogā na avanoa e molimau ai i na tagata, ua tatou faaaogāina la le tulaga faigatā e avea ma avanoa e faataunuu ai se mea tāua. O le iʻuga, ua tatou faailoa atu iā i latou o loo faamasinoina i tatou ia afioga a Ieova, o loo faamauina i le Salamo e 2: “O lenei, outou tupu e, ia outou atamamai; ia aʻoaʻoina foʻi outou faamasino o le lalolagi. Ia auauna iā Ieova ma le mataʻu.” (Salamo 2:10, 11) E masani lava, pe a molia sesē Molimau a Ieova i se faamasinoga, e lagolagoina e faamasino le saʻolotoga e tapuaʻi ai, ma e tatou te lotofaafetai mo lenā tulaga. Peitaʻi, o nisi o faamasino, ua taaʻina i latou e tagata tetee. Ma o faamasino na, ua faapea mai le Tusi Paia: “Ia aʻoaʻoina foʻi outou.”
19 E tatau ona iloa e faamasino faapea, o le tulafono silisili, o le tulafono lea a Ieova le Atua. E tatau ona latou manatua o tagata uma lava, e aofia ai ma faamasino, e tali atu iā Ieova le Atua ma Iesu Keriso. (Roma 14:10) Ma o i tatou, pe tatou te maua le faamasinoga tonu mai faamasino pe leai, ua iā i tatou māfuaaga uma e lototetele ai ona o loo lagolagoina i tatou e Ieova. Ua faapea mai le Tusi Paia: “Amuia i latou uma o ē faatuatua iā te ia.”—Salamo 2:12.
20. Aiseā e tatou te fiafia ai pe a tatou tumau i sauāga ma le taufaaleaga?
20 I le Lauga i luga o le Mauga, na fetalai ai Iesu e faapea: “Amuia outou pe a latou upu leaga, ma faasauā iā te outou, ma latou tuuaʻiina pepelo outou i mea leaga uma ona o aʻu. Ia outou olioli ma fiafia lava; auā o i le lagi lo outou taui e tele; auā na faapea ona latou faasauā i perofeta ē na muamua iā te outou.” (Mataio 5:11, 12) O le mea moni, o sauāga e lē o se mea e fiafia ai, ae o lo tatou tumau e ui i sauāga lea e aofia ai faamatalaga taufaaleaga a nusipepa, e avea lea o se mea e olioli ai. O lona uiga o loo tatou faafiafiaina Ieova ma maua ai faamanuiaga. Ua faaalia e lo tatou lototetele le iai o lo tatou faatuatua moni ma faamautinoa ai iā i tatou le faamaoniga a le Atua. Ioe, e faaalia ai o loo tatou faatuatua atoatoa iā Ieova. O lenā faatuatua e tāua tele i se Kerisiano, e pei ona o le a faaalia e le mataupu o loo sosoo mai.
O ā Mea sa E Aʻoaʻoina?
• O ā tulaga i aso nei e manaʻomia ai le lototele?
• E faapefea ona tatou atiae le uiga o le lototele?
• O ai nisi o faaaʻoaʻoga lelei o le lototele?
• Aiseā e tatou te mananaʻo ai e gaoioi ma le lototele?
[Fesili mo le Suʻesuʻega]
[Ata i le itulau 9]
O Simone Arnold (lea ua Liebster i le taimi nei) i Siamani, Widdas Madona i Malawi, ma Lydia ma Oleksii Kurdas i Ukraine na faaalia le lototetele e teena ai lē e amiolega
[Ata i le itulau 10]
E tatou te lē mā i le tala lelei
[Ata i le itulau 11]
O le lototele o Paulo i le falepuipui na faaauilumaina ai le tala lelei
[Ata i le itulau 12]
Afai e tatou te faamatalaina ma le lototele lo tatou tulaga faale-Tusi Paia i se faamasino, ua tatou aveina atu se feʻau tāua tele