Sauāina Ona o le Lotu—Aiseā?

PE E te manatu e tatau ona sauāina tagata ona o a latou lotu? Atonu e leai, pau lava le mea, ia aua neʻi o latou isuisu fua i aiā tatau a isi tagata. Peitaʻi, o le sauāina ona o lotu ua matuā umi sona talafaasolopito, ma o loo faaauau pea e oo mai i le taimi nei. Mo se faaaʻoaʻoga, o le toʻatele o Molimau a Ieova i Europa ma isi vaega o le lalolagi, sa masani ona aveesea a latou aiā tatau ma saʻolotoga faalotu, ma i le faagasologa atoa o lona 20 o senituri, sa faileagaina ai i latou.

I lenā taimi, na pagatia ai Molimau a Ieova i faiga sauā ma le lē alofa, ma sauāga faaumiumi i lalo o pulega tautalatasi a malo malolosi i Europa. O le ā ua tatou iloa mai i mea na oo iā i latou e uiga i sauāga ona o lotu? Ma o le ā e mafai ona tatou aʻoaʻoina mai i le auala na latou tali atu ai i na mafatiaga?

“E Lē ni o le Lalolagi”

E taumafai lava Molimau a Ieova ina ia avea o ni tagata e tausisi i le tulafono, filemu, ma amio lelei. E latou te lē tetee pe faatavā i malo, latou te lē faapogaia foʻi ni faiga sauā ona faapea e latou te mananaʻo e fia avea ma maturo. E matuā solitū lava nei Kerisiano i mataupu faapolotiki. E ōgatusa lenei ma le fetalaiga a Iesu: “[O oʻu soo], e lē ni o le lalolagi i latou, faapei o aʻu foʻi, ou te lē so le lalolagi aʻu.” (Ioane 17:16) E tele malo ua iloa le tulaga solitū o Molimau a Ieova. Ae peitaʻi, e lē faaaloalogia e pulega fai faamalosi a malo mea e manaʻomia e le Tusi Paia e faapea, o Kerisiano, e lē ni o le lalolagi.

 Na faamalamalamaina le māfuaaga o lenei mea i se koneferenisi na faia i le Iunivesite o Heidelberg i Siamani iā Novema 2000. O le matua o le koneferenisi e faapea: “Ua Pulea Faamalosi Olaga ma Aiā Tatau a Tagata: Molimau a Ieova i Lalo o Pulega Pulepuletutū ma le Faa-Komunisi.” Na mātauina e Dr. Clemens Vollnhals, o le Faalapotopotoga mo Suʻesuʻega i Pulega Faatautalatasi i Hannah-Arendt e faapea: “E lē faatapulaaina e pulega faatautalatasi a latou gaoioiga sauā i faiga faapolotiki. E latou te mananaʻo e faaaofia ai le tagata atoa.”

E lē mafai e Kerisiano moni ona tuu atu lo latou “tagata atoa” i se malo faaletagata, talu ai ua uma ona latou tautō e na o Ieova lava le Atua e latou te faamaoni atoatoa atu i ai. Ua iloa e Molimau ia o loo ola i lalo o pulega fia faatautalatasi le feteenaʻi i nisi taimi o mea o loo tāpā e le malo ma mea e manaʻomia e lo latou faatuatuaga. O ā ni mea ua latou faia i le feagai ai ma na feteenaʻiga? I aso ua mavae, e tele taimi na faatatauina ai e Molimau a Ieova i o latou olaga mataupu silisili ia na faailoa mai e soo o Iesu Keriso e faapea: “E tusa ona sili o lo matou anaana i le Atua i lo matou anaana i tagata.”—Galuega 5:29.

E anoanoaʻi Molimau sa tausisia pea le faamaoni i lo latou faatuatuaga ma tumau ai ona solitū i mataupu faapolotiki, e ui lava i sauāga aupito sili ona ogaoga. Na faapefea ona latou tumau? Mai i fea na latou maua ai le malosi e faia ai faapea? Tuu atu pea iā i latou e tali mai. Seʻi o tatou vaai po o le ā e mafai ona aʻoaʻoina e tagata uma—Molimau pe lē o ni Molimau, mai mea na tutupu iā i latou.

[Faamatalaga faaopoopo i le itulau 4]

Na puapuagatia Molimau a Ieova i Siamani i sauāga lē alofa ma le faaumiumi i lalo o pulega uma faatautalatasi i lona 20 o senituri

[Faamatalaga faaopoopo i le itulau 4]

“E lē faatapulaaina e pulega faatautalatasi a latou gaoioiga sauā i faiga faapolotiki. E latou te mananaʻo e faaaofia ai le tagata atoa.”—Dr. Clemens Vollnhals

[Ata i le itulau 4]

Na aveesea le saʻolotoga o le aiga o Kusserow ona o le lē faagutugutulua i lo latou faatuatuaga

[Ata i le itulau 4]

Na faasalaina i le oti ia Johannes Harms, i le falepuipui a Nasi ona o ona talitonuga