‘Ia Faalatalata Atu i le Atua, Ona Ia Faalatalata Mai Lea’

Le Olaga Muamua ma Mulimuli Ane Ai—Ua Matuā Suia Lona Olaga

PAGĀ le lē fiafia ma le lē aogā o le olaga o Matsepang! O ia o se teine talavou mai i Lesotho, o se atunuu i le vaega tutotonu o Aferika i Saute. Sa tausia aʻe Matsepang o se Katoliko. Ae peitaʻi, na i lo le fesoasoani iā te ia e faalatalata atu i le Atua, na faaleagaina tau amio o ia mo ni tausaga e taupousa o ē na faalataina o ia i ni tupe e faia ai ni gaioioiga lē mamā.

O le iʻuga, na lē fiafia ai Matsepang i lotu ma lē talitonu ai i Lē na Foafoaina Mea faapea e alofa ma manatu mai i ana foafoaga faaletagata. Ona o le tuulafoaʻia ma le faileagaina sa mafatia ai o ia, na matuā faamanuʻalia ai faalogona o Matsepang ma oo ai iā te ia se lagona ua lē o toe aogā. Sa ola aʻe o ia ma ni uiga sauā ma le fia malosi. Na iʻu ai i le faia o amioga solitulafono.

Na iʻu ina avea Matsepang o se tasi o se kegi faomea i luga o nofoaafi. Sa puʻea faapagota o ia ma faasala i le falepuipui i Aferika i Saute. Mulimuli ane, na toe faafoʻi atu o ia i lona atunuu i Lesotho, o i inā sa ia toe faaauau ai i se olaga solitulafono, onā, sauā ma le lē mamā.

Na matuā mafatia o ia, o lea na ia tatalo ai ma le faatauanau i le Atua mo se fesoasoani. Na ia folafola atu e faapea, “Le Atua e, afai e faasaoina aʻu, o le a ou faia le mea ou te mafaia e auauna ai iā te oe.”

E leʻi leva lava, ae asiasi ane loa ni misionare Molimau a Ieova iā Matsepang. Sa la ofoina atu se suʻesuʻega faale-Tusi Paia iā te ia. Sa ia iloaina mai i lana suʻesuʻega, o le Atua e lē o se Atua lē manatu mamafa ma lē silasila alofa mai. Sa ia iloa o Satani, “o le tamā o le pepelo,” o loo ia faaaogāina togafiti ma auala taufaaʻoleʻole e faatupu ai se manatu i nisi e faapea, e lē aogā i latou ma faatalitonuina ai e lē taitai alofa mai Ieova iā i latou.—Ioane 8:44; Efeso 6:11.

Maʻeu le faamāfanafana loto iā Matsepang ina ua ia aʻoaʻoina e mafai ona iā i tatou ni lagona mautinoa lelei, pe afai tatou te salamō i a tatou agasala ua tuanaʻi, saʻili le faamagaloga a le Atua, ma tauivi e faafiafia o ia! Na fesoasoani iā te ia e malamalama ai, “ua sili lava le Atua i o tatou loto” ma o loo silasila mai iā i tatou i le auala atonu e ese mai i la tatou vaaiga.—1 Ioane 3:19, 20.

Na matuā fiafia Matsepang ina ua faitau i upu a le faisalamo o Tavita e faapea: “Ua latalata mai Ieova i ē ua loto momomo; ua ia faaola foʻi i ē ua loto nutimomoia.” (Salamo 34:18) I le avea ma se tasi o ē “loto nutimomoia,” na ia iloaina ai e lē o tuulafoaʻia e Ieova ana auauna, e ui ina ua loto vaivai  nisi pe ua lagona le lē toe aogā. Na faamāfanafanaina o ia i le iloaina faapea o loo manatu mai Ieova i ana mamoe ma tausia i latou i taimi faigatā. (Salamo 55:22; 1 Peteru 5:6, 7) Na uunaʻia lava o ia i upu nei: “Ia outou faalatalata atu i le Atua, ona faalatalata mai lea o ia iā te outou.”—Iakopo 4:8.

O le mana o le Afioga a le Atua, le Tusi Paia, sa vave ona faaalia i le olaga o Matsepang. Sa amata ona ia auai e lē aunoa i sauniga faa-Kerisiano ma lafoaʻia ana masaniga e lē faale-Tusi Paia. O le ā le iʻuga? Ua ia lē toe lagona faapea e lē talafeagai ona ia maua le alofa ma le finagalo malie o le Atua. Talu mai lona papatisoga e avea o se tasi o Molimau a Ieova, sa ia faaaluina le faitau afe o itula i le faiva faa-Kerisiano o sē e folafola le tala lelei o le Malo. Ua soifua nei Matsepang i se olaga fiafia ma uigā e ui lava i āuga leaga i le taimi ua tuanaʻi. Maʻeu se faamaoniga o le mana o le Tusi Paia e faaleleia ai olaga!—Eperu 4:12.

[Faamatalaga faaopoopo i le itulau 9]

“Le Atua e, afai e faasaoina aʻu, o le a ou faia le mea ou te mafaia e auauna ai iā te oe”

[Pusa i le itulau 9]

Mataupu Silisili o le Tusi Paia e Aogā

O mataupu silisili o le Tusi Paia sa faamāfanafanaina ai ē na faileagaina e aofia ai ma nei:

“O le tele o manatunatu i loʻu loto ua fiafia ai loʻu agaga ona o faamāfanafanaga mai iā te oe [le Atua].” (Salamo 94:19) O “faamāfanafanaga” a Ieova o loo maua i lana Afioga o le puna sili lea e faamāfanafanaina ai. O le mafaufau loloto a o iloiloina na mea ma tatalo, o le a fesoasoani e faatoʻafilemuina ai oe ma ati aʻe le faatuatua i le Atua o se Uō e malamalama.

“E faamālōlōina e [Ieova] ia ē ua loto momomo; e fufusi e ia o latou manuʻa.” (Salamo 147:3) Pe afai tatou te talisapaia le alofa o Ieova ma lana sauniuniga e ufiufi i a tatou agasala e ala i le taulaga togiola a Iesu, e mafai ona tatou faalatalata ma le mautinoa i le Atua e aunoa ma ni lagona taʻusalaina. O le a lē mafaatusalia faamāfanafanaga tatou te maua ma le filemu o le mafaufau.

“E lē mafai se tasi ona sau ia te aʻu [Iesu Keriso], pe a lē tosina mai e le Tamā ua auina mai aʻu; ou te toe faatūina foʻi o ia i le aso gataaga.” (Ioane 6:44) E ala i lona agaga paia ma le galuega talaʻi o le Malo, ua tosina atu ai e Ieova i tatou i lona Alo ma aumaia iā i tatou le faamoemoe o le ola e faavavau.