Pe Tatau Ona Alu Laʻu Tama i le Aʻoga?

PE E mafai ona e manatunatu i lou lē iloa faitau upu o loo i lenei pepa? Ae faapefea pe afai e lē mafai ona e tautala i le gagana taatele a lou lava atunuu? Seʻi faapea e lē mafai ona e faasinoina mai lou lava atunuu i le faafanua o le lalolagi? E lē mafaitaulia tamaiti o loo ola aʻe i ni olaga faapena. Ae faapefea lau tama?

Pe e tatau ona alu lau tama i le aʻoga? I le tele o atunuu, e poloaʻia faamalosi ai le ō i aʻoga, o lea, e masani ai lava ona aʻooga fua ia tamaiti i aʻoga tulagalua, ma aʻoga maualuga. Na talanoaina i le Fonotaga i Aiā Tatau a Tamaiti le aʻoaʻoina o tamaiti i aʻoga masani, o se aiā tatau. E faapena foʻi la i le Taʻutinoga o Aiā Tatau a Tagata i le Lalolagi. O lea la, i nisi o atunuu, atonu e totogi ai aʻoga ma ua avea o se avega mamafa tautupe i mātua. Seʻi o tatou manatunatu i le mataupu e tusa ai ma le vaaiga a mātua Kerisiano o ē o loo mananaʻo e aʻoaʻoina a latou fanau e ala a lē i aʻoga masani, o isi auala.

Faaaʻoaʻoga a le Tusi Paia i le Aʻoaʻoina o le Faitau

Sa mafai ona faitau ma tusitusi le toʻatele o auauna a le Atua o loo taʻua i le Tusi Paia. O aposetolo o Iesu o Ioane ma Peteru, sa avea o ni faifaiva Iutaia ae sa la tusia ni tusi o le Tusi Paia i le gagana Eleni, ae lē o la laʻua gagana faa-Iutaia. * E foliga mai, sa faamautinoa e mātua o Peteru ma Ioane ua maua e a latou fanau se aʻoaʻoga faavae. Sa faapena foʻi tulaga o isi tusitala o le Tusi Paia e aofia ai le leoleo mamoe o Tavita, le fai faatoʻaga o Amosa, ma le ʻafa uso o Iesu o Iuta, o lē atonu o se kamuta.

Sa mafai foʻi ona faitau ma tusitusi Iopu, ma ua faaalia i le tusi o le Tusi Paia lea e faaigoaina i lona igoa e faapea, sa iai sona malamalamaga faasaienisi. Atonu sa tomai foʻi o ia i le tusiaina faafatusolo o ana faamatalaga na e sii mai i le tusi o Iopu. Ua tatou iloa foʻi sa iloa e uluaʻi Kerisiano ona faitau ma tusitusi talu ai, o mea atonu o ni a latou faamaumauga faale-Tusi Paia na maua o tusia i taʻega ʻele.

E Tāua Aʻoaʻoga mo Kerisiano

E manaʻomia ona agaʻigaʻi i luma Kerisiano uma lava i le poto o le Tusi Paia pe afai e latou te mananaʻo e faafiafia le Atua. (Filipi 1:9-11; 1 Tesalonia 4:1) O le faaaogāina ma le filigā o le Tusi Paia ma lomiga faale-Tusi Paia e mafai ona agaʻigaʻi ai i luma faaleagaga. Talu ai o le Atua na saunia lana Afioga tusia, ua ia faatalitalia foʻi la ona tagata tapuaʻi ina ia matuā aʻoaʻo i le mea e gata mai ai lo latou mafai. O le faitau o le Tusi Paia ma malamalama i ai, e faafaigofie ai ona faatatauina ana fautuaga. O le mea moni, e tatau ona tatou faitauina soo ni ona vaega ina ia malamalama atoatoa ai i le uiga o manatu, ma mafaufau loloto i ai.—Salamo 119:104; 143:5; Faataoto 4:7.

I tausaga taʻitasi, e maua ai e tagata o Ieova ia le tele o faamatalaga aogā tusitusia ua saunia e ala i le taʻitaʻiga a “le auauna faamaoni ma le mafaufau.” (Mataio 24:45-47) E talafeagai lelei lava na lomiga ma olaga faaleaiga, o aganuu, lotu, faasaienisi, ma le tele lava o isi mataupu. Ae o le mea e sili ona tāua, o loo iai ia fautuaga mai le Tusi Paia e faatatau i mataupu faaleagaga.  Afai e lē iloa e lau fanau faitau, o le a latou lē maua la faamatalaga e sili ona tāua.

E tāua le iloaina o le talafaasolopito o le tagata, talu ai ua fesoasoani iā i tatou e malamalama ai i le māfuaaga e manaʻomia ai le Malo o le Atua. E lelei foʻi le iai o se malamalamaga faavae i tala o le lalolagi. O loo taʻua i le Tusi Paia le tele o nofoaga e pei o Isaraelu, Aikupito ma Eleni. Pe e mafai e lau tama ona suʻe na nuu i le faafanua o le lalolagi? Pe mafai ona ia faasino maia lona lava atunuu? O le lē iloa faitau le faafanua, e ono faatapulaa ai le tomai o se tagata e faataunuuina lana faiva i se nuu e tofia i ai o ia.—2 Timoteo 4:5.

Faaeaga i le Faapotopotoga

E tele tiute tauave o toeaina Kerisiano ma auauna o le faiva e aofia ai le faitauina o ni tusi. O se faataʻitaʻiga, e iai vaega e tatau ona sauniuni mo sauniga a le faapotopotoga. E manaʻomia ona faia ni faamaumauga e faatatau i le sapalai o mekasini ma meaalofa tauofo. O le a matuā faigatā mo se tagata ona taulimaina lelei nei tiute tauave pe afai e leʻi aʻoga.

O loo galulue ia tagata faigaluega tauofo i aiga Peteli i le lalolagi aoao. Ina ia mafai e nei tagata ona fesootaʻi lelei ma faia a latou tiute e pei o le faaliliuina o lomiga ma le toe faaleleia o masini, e tatau lava ona latou iloa faitau ma tusitusi i le gagana aloaʻia a le atunuu o loo latou nonofo ai. Afai e mananaʻo lau fanau e olioli i faaeaga faapenei, e masani lava ona manaʻomia ai ona ō i aʻoga. O ā nisi o māfuaaga aogā e alu ai lau tama i le aʻoga?

Mativa ma Faiga Faanuupō

O tagata o loo ola matitiva, atonu ua lē mafai ona maua ni fesoasoani i nisi o tulaga. Ae peitaʻi, i isi tulaga, o le aʻoaʻoina lelei, e mafai ona fesoasoani iā i tatou ma a tatou fanau e ʻalofia ai mafatiaga. E toʻalaʻitiiti lava ni nai tagata e lē iloa faitau ma tusitusi e mafai ona maua ni nai mea e ola ai. I nisi taimi, e maliliu ai tamaiti e oo lava i mātua ona o le lē lava po o le leai o ni tupe e mafai ona maua ai ni fesoasoani faafomaʻi. O le lē lava o meaʻai paleni ma le leaga o fale e nonofo ai, o le tulaga lenā e masani ona oo i tagata sa lē lelei pe sa leʻi aʻooga foʻi. O aʻoaʻoga ma le tomai e faitau ma tusitusi ai, e ono fesoasoani i nei vala.

O le iloa foʻi faitau ma tusitusi, e mafai ona faaitiitia ai le lolo atu i faiga faanuupō. O le mea moni, e taatele faiga faanuupō i tagata na aʻooga ma i latou e leʻi ō i ni aʻoga. Ae e ono faigofie ona faasesēina ma faaleagaina i latou e leʻi aʻooga na i lo o isi, talu ai latou te lē iloa faitau faamatalaga na o loo aumaia ai na faiga taufaasesē. I lea, ua sili atu ai ona latou naunau i faiga faanuupō ma talitonu e faapea, e mafai e se fai faamālōlōga faataulāitu ona faia togafitiga faavavega.—Teuteronome 18:10-12; Faaaliga 21:8.

Aʻoaʻoga e Lē mo na o le Saʻilia ai o se Galuega

Ua manatu le toʻatele e faapea, o le fuafuaga autū o aʻoaʻoga, ina ia maua ai ni tupe. Ae peitaʻi, e lē o maua ni galuega a isi tagata sa lelei aʻoga, ma e lē o mafai ona maua ni tupe e lava e faamalieina ai o latou manaʻoga masani. O lea, ua manatu ai nisi mātua, e lē aogā ona auina atu se tamaitiiti i le aʻoga. Ae e sili atu le aogā o le aʻoga, na i lo o le saunia ai o se tagata e maua ni tupe; ae e mafai ona saunia ai tamaiti mo le olaga i le lumanaʻi. (Failauga 7:12) Afai e mafai e se tagata ona tautala, faitau ma tusitusi i le  gagana masani a le atunuu lea o loo nofo ai, o le a faigofie lava ona feutagaʻi ma tagata o le falemaʻi, tagata maualuluga o le atunuu, po o tagata faigaluega i faletupe, o le a oo ina masani ma lē toe fefe ai.

I nisi nofoaga, atonu e tuuina atu ai tamaiti e leʻi aʻooga i se tasi e faafaigaluegaina ai i le leiina o piliki, faiga faiva, suʻisuʻi, po o isi lava matātā. E aogā le aʻoaʻoina o se tomai, ae afai e leʻi ō lava nei tamaiti i se aʻoga, atonu o le a lē mafai la ona latou iloa faitau ma tusitusi lelei. Ae afai e ave muamua i latou i se aʻoga e aʻoaʻoina ai se tomai, e lē taumate o le a ʻalofia ai le faafaigaluegaina o i latou i ni nai totogi laiti ma o le a maua ai se olaga e sili ona faamalieina.

O Iesu le Nasareta sa avea o se kamuta ma e foliga mai sa ia aʻoaʻoina se tomai faapitoa mai lona tamāfai, o Iosefa. (Mataio 13:55; Mareko 6:3) Sa iloa foʻi e Iesu faitau, auā i le na o le 12 o ona tausaga, ae sa tomai o ia i le faia o se talanoaga uigā ma tagata popoto i le malumalu. (Luka 2:46, 47) I le tulaga o Iesu, sa leʻi faalavelavea le aʻoaʻoina o se tomai i isi ituaiga o aʻoaʻoga.

Pe Tatau Ona Aʻoaʻoina Foʻi ma Fanau Teine?

I nisi taimi, e auina atu ai e mātua a latou fanau tama i aʻoga, ae lē o fanau teine. Atonu e manatu nisi mātua e faapea, e taugatā tele pe a auina atu a latou fanau teine i aʻoga, ma e manatu foʻi e sili atu ona aogā teine i o latou tinā pe a nonofo i le aso atoa i le fale. Ae o le a faigatā  ai le olaga mo se tama teine, pe afai e lē iloa faitau ma tusitusi. Ua taʻua i se lomiga a le Faaputuga Tupe a Malo Aufaatasi mo Tamaiti e faapea: “Ua faaalia i le tele o suʻesuʻega, o le ave o teine i aʻoga, o se tasi lea o fuafuaga sili e taofia ai le mativa.” (Lesona mo le Mativa ma Tamaiti i Atunuu Tau Ati Aʻe Mai i Tausaga o le 1990) O teine e ō i aʻoga, e sili atu ona agavaa i le feagai ai ma faafitauli o le olaga ma faia filifiliga e sili ona atamai, ma e aogā mo tagata uma o le aiga.

I se suʻesuʻega na faia i Benin i Aferika i Sisifo e faatatau i le umi e ola ai se tamaitiiti, ua faaalia ai, o se vaega o tinā e leʻi ō i ni aʻoga, e tusa ma le 167 mai le 1,000 tamaiti e feoti ae leʻi aulia le taʻi lima tausaga, a o fafine na ō i ni aʻoga maualuga, e tusa ma le 38 tamaiti e feoti. Ua faapea mai le UNICEF: “O le tulaga o aʻoaʻoga, o se vala lea e iloa ai le umi o le ola o se tamaitiiti i Benin, e pei foʻi ona iai i le lalolagi atoa.” O lea la, o le ave o a outou fanau teine i le aʻoga, e maua ai le tele o aogā.

Pe e Lava le Tau Ina Aʻoaʻo o le Faitau ma le Tusitusi?

Pe afai e manaʻomia, e faia ai e Molimau a Ieova vasega e aʻoaʻo ai le faitau ma le tusitusi mo tagata o le faapotopotoga e lē iloa faitau. * Ua fesoasoani lenei sauniuniga aogā i tagata e iloa ai faitau, aemaise i la latou lava gagana. Po o se faiga talafeagai ea lea e maua ai se aʻoaʻoga lelei? Pe e tatau ona faatalitalia e saunia e le  faapotopotoga se aʻoaʻoga mo lau fanau e tusa lava po o iai ia ni aʻoga masani?

E ui lava o vasega ia e aʻoaʻo ai le faitau o se fuafuaga agalelei ua faia e faapotopotoga a Molimau a Ieova, ae ua fuafuaina na vasega mo tagata matutua o ē e leʻi ō lava i ni aʻoga a o laiti. Atonu sa leʻi iloa e o latou mātua le tāua o aʻoaʻoga, ia pe sa leai foʻi ni aʻoga na iai i na aso. O le auai i vasega e aʻoaʻo ai le faitau ia e saunia e faapotopotoga, e mafai ona fesoasoani i tagata faapena. Ae o nei vasega, e lē suia ai le aʻoga masani ma e lē o fuafuaina e faia ai ni aʻoga tulaga lua. E lē o aʻoaʻoina ai i nei vasega ia mataupu e pei o le faasaienisi, matematika, ma le talafaasolopito o le lalolagi. Ae peitaʻi, atonu o loo aʻoaʻoina mataupu na i aʻoga masani.

I Aferika, e tele lava ina faia vasega e aʻoaʻo ai le faitau i gagana a ituaiga, ae seāseā i le gagana aloaʻia a le atunuu. I aʻoga masani, e masani lava ona faia i le gagana aloaʻia a le atunuu. Ua saunia ai i lenei mea isi aogā mo tamaiti talu ai o le tele o tusi ma isi tusi faitau eseese o loo maua i le gagana taatele a le atunuu. E ui lava ua saunia e faapotopotoga vasega e aʻoaʻo ai le faitau e faaopoopo i aʻoaʻoga masani a le tamaitiiti, ae e lē mafai e na vasega ona suia le tulaga o le aʻoga. Pe afai la e aogā nei mea uma, pe e lē tatau ea la ona maua e tamaiti ni aʻoaʻoga masani?

Tiute Tauave a Mātua

O tane ia e taʻimua i le tausia o manaʻoga faaleagaga o le faapotopotoga, e tatau ona avea o ni Kerisiano e fai ma faaaʻoaʻoga lelei. O tane e tatau ona “pule lelei” i o latou aiga ma fanau. (1 Timoteo 3:4, 12) O le “pule lelei” e aofia ai le faia o mea uma e mafai e fesoasoani ai i a tatou fanau e ʻalofia ni faigatā e oo iā i latou i le lumanaʻi.

Ua tuuina mai e le Atua i mātua Kerisiano se tiute tauave tāua. E tatau ona tausia aʻe a latou fanau e ōgatusa ma lana Afioga ma fesoasoani iā i latou ina ia ‘fiafia i le poto.’ (Faataoto 12:1; 22:6; Efeso 6:4) Na tusi le aposetolo o Paulo e faapea: “A e afai e lē tausi e se tasi i lona aiga, afai foʻi e lē sili ona tausi i ē mau ma ia, ua faafitia e ia le faatuatua, e sili foʻi lona leaga i lē ua lē faatuatua.” (1 Timoteo 5:8) E tatau foʻi ona saunia ni aʻoaʻoga talafeagai mo a tatou fanau.

I nisi taimi, e lē mafai ai e le auala o loo faia ai aʻoaʻoga ona faamalieina ia manaʻoga tauaʻoaʻoga ona o le matuā toʻatele o tamaiti, lē lava tupe e faagaoioia ai, ona o le lē fiafia po o le laʻitiiti foʻi o totogi o faiaʻoga. O le mea lea, e tāua tele le matuā naunau o mātua i mea o loo aʻoaʻoina e a latou fanau i le aʻoga. O se faiga atamai le faamasani i faiaʻoga, aemaise lava i le amataga o tuuaga taʻitasi, ma fesili foʻi mo se fautuaga i le auala e mafai ona faalelei ai tomai o lau fanau. Atonu e lagona ai e faiaʻoga lou agaga talisapaia o i latou, ma uunaʻia ai e faia ni taumafaiga sili ina ia faamalie ai manaʻoga tauaʻoaʻoga o tamaiti.

O le aʻoga, o se vaega tāua i le olaga tuputupu aʻe o se tamaitiiti. Ua faapea mai le Faataoto 10:14: “O ē popoto latou te teua le poto; a o le gutu o le vale, ua latalata i ai le malaia.” E moni lenei mea, aemaise lava i le poto o le Tusi Paia. E tatau ona matuā popoto tagata o Ieova, o ē laiti ma ē matutua, ina ia mafai ai ona avatu le fesoasoani faaleagaga i isi, ma ‘ina ia avea ai ma ē ua fiafia i ai le Atua, e leai se mea e mā ai, e talaʻitonuina le upu moni.’ (2 Timoteo 2:15; 1 Timoteo 4:15) O lea la, pe e tatau ona ō lau fanau i le aʻoga? E mautinoa lava o le a e faia se faaiʻuga e tatau ona ave i latou i le aʻoga, e ui lava e tele ina faalagolago i mea o loo maua i lou atunuu. Ae e tatau i mātua Kerisiano ona taliina lenei fesili e sili atu ona tāua, ‘Pe e tatau ona aʻoaʻoina laʻu fanau?’ E tusa lava po o fea o e nofo ai, pe e te lē malie ea o le tali manino lava o le ioe?

[Faamatalaga pito i lalo]

[Pusa/Ata i le itulau 12, 13]

PE AFAI E LĒ MAFAI ONA AUAI I SE AʻOGA

I nisi o tulaga, e faigatā ai ona auai i se aʻoga. O se faaaʻoaʻoga, na lipotia mai e le mekasini, Refugees e faapea, e na o le toʻatasi se tamaitiiti ua filifilia mai le toʻa 5 e mafai ona auai i se aʻoga i nofoaga o tagata sulufaʻi. I nisi o tulaga, ua tapunia aʻoga mo se taimi umi ona o solo tetee. Atonu o le mamao tele po o le leai foʻi o ni aʻoga i se isi vaipanoa. O le sauāina foʻi o Kerisiano e iʻu ai ina tutuli tamaiti mai aʻoga.

E mafai faapefea ona e fesoasoani i lau fanau i na tulaga? O le ā e mafai ona fai pe afai e toʻatele lau fanau ma o loo tou nonofo i se vaipanoa e taugatā ai le soifuaga ua lē mafai ai ona latou auai uma i se aʻoga masani? Ia, e mafai la ona e auina atu se toʻatasi po o se toʻalua o lau fanau i le aʻoga e aunoa ma le lamatia ai i le itu faaleagaga? Afai e mafai, atonu e mafai e i latou na ona fesoasoani i le aʻoaʻoina o isi o lau fanau i mea ia la te aʻoaʻoina i le aʻoga.

I nisi atunuu, e iai aʻoga e taʻua o aʻoaʻoga i le aiga. * I le faatulagaga lenei, e masani lava ona faaalu e se tasi o mātua ni nai itula e aʻoaʻoina ai le tamaitiiti i aso taʻitasi. I taimi o tamā matutua, sa matuā taulau lava mātua i le aʻoaʻoina o a latou fanau. E foliga mai ona o le lelei o le toleniga a mātua, na maua ai e Iosefa le atalii o Iakopo le tomai e vaavaaia ai isi a o talavou.

Atonu e faigatā ona maua se polokalame masani mo le aʻoaʻoina i na nofoaga e pei o le nofoaga o tagata sulufaʻi, ae e mafai ona faaaogā e mātua lomiga a Molimau a Ieova e faavae ai faatonuga. O se faaaʻoaʻoga, e mafai ona aogā Laʻu Tusi o Tala o Le Tusi Paia i le aʻoaʻoina o le fanau laiti. O loo i ai i le mekasini o le Ala Mai! ia faamatalaga e faatatau i le tele o mataupu eseese. E mafai foʻi ona faaaogā le tusi, Life—How Did It Get Here? By Evolution or by Creation? i le aʻoaʻoina o mataupu faasaienisi. O loo iai i le Yearbook of Jehovah’s Witnesses se faafanua laʻitiiti o le lalolagi ma o loo faamatala mai ai e uiga i olaga o tagata ma le galuega talaʻi i le tele o atunuu eseese.

E tele mea lelei e mafai ona faia pe a sauniuni lelei faatonuga ma faafesootaʻi faatasi e tusa ma le tulaga o le malamalama o le tamaitiiti. Afai e faaauau pea ona faitau ma aʻoaʻo, o le a sili atu ona faigofie ona latou faamasani atu i aʻoga masani pe afai e iai. O lou tausolomua ma faia taumafaiga, e mafai ai ona e fesoasoani i le aʻoaʻoina lelei o lau fanau. Maʻeu le taulau manuia e oo i ai!

[Faamatalaga pito i lalo]

[Ata]

O le ā e mafai ona faia pe afai e lē ō lau fanau i ni aʻoaʻoga masani i le nofoaga lea tou te nonofo ai?