Faaalia le ‘Agamalu i Tagata Uma’
Faaalia le ‘Agamalu i Tagata Uma’
“Ia e faamanatu atu iā i latou . . . ia faapalepale, ma ia faaali atu le agamalu uma i tagata uma lava.”—TITO 3:1, 2.
1. Aiseā e lē faigofie ai i taimi uma le faaalia o le agamalu?
NA TUSI le aposetolo o Paulo e faapea: “Ia outou faaaʻoaʻo mai iā te aʻu, pei o aʻu iā Keriso.” (1 Korinito 11:1) I aso nei o loo taumafai malosi auauna uma lava a le Atua ia utagia lenei apoapoaʻiga. O le mea moni, e lē faigofie, talu ai faanaunauga manatu faapito na tuufaasolo mai i o tatou uluaʻi mātua ma o tatou uiga e lē ōgatusa ma faaaʻoaʻoga a Keriso. (Roma 3:23; 7:21-25) Ae ui i lea, e mafai e i tatou uma lava ona taulau manuia pe a tatou faia taumafaiga e faaalia ai le agamalu. Peitaʻi e lē lava lou faalagolago i lou lava malosi. O le ā le isi mea e tatou te manaʻomia?
2. E faapefea ona tatou faaalia le “agamalu uma i tagata uma lava”?
2 O le agamalu faale-Atua o se vaega o fua o le agaga paia. O le tele o lo tatou mulimuli i le taʻitaʻiga a le malosi galue o le Atua, o le tele foʻi lenā o lo tatou fuaina mai o ona fua. O lea la, e na o le pau lenā o le auala, o le a mafai ai ona tatou faaalia le “agamalu uma” i tagata uma lava. (Tito 3:2) Seʻi o tatou iloiloina pe faapefea ona tatou faataʻitaʻi i le faaaʻoaʻoga a Iesu, ma mafai ai e i latou o auaumea faatasi ma i tatou ona “faafouina ai.” —Mataio 11:29; Kalatia 5:22, 23.
I le Aiga
3. O ā tulaga i le aiga e atagia mai ai le agaga o le lalolagi?
3 O le aiga, o le isi lea vala tāua e faaalia ai le agamalu. O le fua faatatau a le Faalapotopotoga o le Soifua Mālōlōina i le Lalolagi e uiga i sauāga i aiga, ua aumaia ai se lamatiaga tele i le soifua mālōlōina o fafine, na i lo faalavelave tau taavale ma le malalia pe a tuufaatasi. Mo se faaaʻoaʻoga, i Lonetona i Egelani, o le 25 pasene o lipoti o soligatulafono ma faiga sauā, e tutupu i totonu aiga. E masani ona fetaiaʻi leoleo ma tagata o ē matuā faaalia o latou faalogona e ala i le “leo tele ma upu leaga.” Ae o le mea e sili ai ona leaga, o nisi ulugalii ua latou faatagaina “upu faafiufiu” uma e aafia ai a latou faiā. E faanoanoa lava, ona o nei amioga e atagia mai ai ‘le agaga o le lalolagi’ ma o na amioga e lē faatagaina i aiga Kerisiano.—Efeso 4:31; 1 Korinito 2:12.
4. O ā ni aafiaga e mafai ona iai i le aiga ona o le agamalu?
4 Ina ia mafai ona tetee atu i faanaunauga faalelalolagi, tatou te manaʻomia le Agaga o le Atua. “O le mea o i ai le Agaga o le Alii, o i ai le saʻolotoga.” (2 Korinito 3:17) O le autasi o tane ma avā lē lelei atoatoa e faamalosia e le alofa, agalelei, puleaina e le tagata o ia lava, ma le onosai. (Efeso 5:33) O le agamalu e faatoʻafilemuina ai se aiga ma aumaia ai i se tulaga fiafia, e faafetaiaʻia ai misa ma fetauaʻiga lea ua faaleagaina ai le tele o aiga. Atonu o le mea o loo fai mai ai se tasi e tāua, ae o le auala o loo ia faailoa mai ai e faaalia ai le mea tonu o loo i lona loto. O atugaluga ma popolega e faaalia i se faaupuga agamalu e faaitiitia ai feteenaʻiga. Na tusi mai le tupu poto o Solomona e faapea: “O le tali filemu e liliueseina ai le ita; a o le upu faatigā e tupu ai le ita.”—Faataoto 15:1.
5. E mafai faapefea ona fesoasoani le faaalia o le agamalu i aiga e eseese tapuaʻiga?
5 E faapitoa lava ona tāua le faaalia o le agamalu i aiga e eseese tapuaʻiga. O gaoioiga agalelei, e mafai ona fesoasoani ai i ē finau mai ina ia latou iloa Ieova. Sa fautuaina e Peteru avā Kerisiano e faapea: “Ia usiusitai i a outou lava tane, afai foʻi e lē faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio mamā ma le faaaloalo. Aua neʻi faia i le tino a outou teuga, o le fili lea o le lauulu, ma le teuteu i auro, ma le oofu i ofu; a o le tagata lilo o le loto, ia teua lea i le mea e lē pala, o le loto agamalu ma le filemu, o le mea tau tele lava lea i luma o le Atua.”—1 Peteru 3:1-4.
6. E mafai faapefea i le faaalia o le agamalu ona faamalosia ai faiā i le va o mātua ma fanau?
6 E mafai ona oo i se tulaga faigatā se faiā i le va o mātua ma fanau, aemaise lava pe a leai se alofa mo Ieova. Ae peitaʻi o aiga Kerisiano uma lava, o loo iai se manaʻoga mo le faaalia o le agamalu. Na fautuaina e Paulo tamā e faapea: “Aua neʻi tou faaonoono atu i a outou fanau, a ia tausi atu i ai i aʻoaʻiga ma apoapoaʻiga a le Alii.” (Efeso 6:4) Pe afai e faaalia le agamalu i se aiga, o le a faamalosia ai le faiā vavalalata a mātua ma fanau. Na faapea mai Dean o se tasi o le fanau e toʻalima e uiga i lona tamā: “E ese ma le agamalu o loʻu tamā. Ou te lē manatuaina lava se taimi na ma faia ai se finauga ma ia, e oo lava i le taimi o oʻu talavou. E tusa lava pe iai se mea e lē fiafia ai, e tumau lava lona agamalu. O nisi taimi na te faasalaina ai aʻu i le faatonu mai ou te alu i loʻu potu ou te nofo ai mo sina taimi, pe faasāsā mai foʻi aʻu i ni mea ou te fiafia i ai, ae e lē taitai ma finau. Ua lē na o se tamā o ia iā i matou. O ia foʻi o la matou uō, ma matou te lē mananaʻo e faia se mea e lē fiafia ai o ia.” O le mea moni, e fesoasoani le agamalu e faamalosia ai faiā i le va o mātua ma fanau.
I la Tatou Faiva
7, 8. Aiseā e tāua ai le faaalia o le agamalu i le faiva i le fanua?
7 O le isi vala e tāua le faaalia ai o le agamalu o le faiva i le fanua. A o tatou tufa atu le tala lelei o le Malo i isi, tatou te feiloaʻi ai i tagata e eseese o latou uiga. O nisi e fiafia e faalogo i le feʻau o le faamoemoe o loo tatou avatua. O nisi, ona o ni māfuaaga eseese atonu e lē tali lelei mai. O i nei la, o le a fesoasoani ai le uiga lea o le agamalu iā i tatou, ia faataunuu la tatou tofiga o le molimau atu i tuluʻiga uma o le lalolagi.—Galuega 1:8; 2 Timoteo 4:5.
8 Na tusi le aposetolo o Peteru e faapea: “Ia paia le Alii le Atua i o outou loto. Ia saunia pea lava outou e tali atu ma le agamalu ma le āva iā i latou uma o ē fesili mai iā te outou i le uiga o le faamoemoe o loo iā te outou.” (1 Peteru 3:15) Ona o lo tatou faatāuaina o Keriso i o tatou loto o ia o lo tatou Faaaʻoaʻo, tatou te naunau ai e faaalia le agamalu ma le āva pe a molimau atu iā i latou e tautatala lē faaaloalo mai. O nei ituaiga o amioga e masani ona maua mai ai iʻuga lelei.
9, 10. Faamatala se mea na tupu e faaalia ai le tāua o le faaalia o le agamalu i le faiva i le fanua.
9 Sa iai Keith i lo la fale a o tatala atu e lana avā le faitotoʻa i le tagata na tuʻituʻi mai. Ina ua la iloaina o le tagata asiasi o se tasi o Molimau a Ieova, sa tuuaʻia ma le ita tele e le avā a Keith Molimau i le sauā i tamaiti. Sa toʻa pea le uso. Na ia tali atu ma le agamalu e faapea: “Ou te faamālūlū atu ona o lagona ua oo iā te oe. Ae faamolemole e mafai ona ou faasino atu iā te oe le talitonuga o Molimau a Ieova?” Sa faalogologo mai Keith i le talanoaga ma o lea na ia sau ai loa i le faitotoʻa ma faauma loa le asiasiga a le uso.
10 Mulimuli ane, na fasia le ulugalii i o laʻua lava mafaufauga ona o le auala lē faaaloalo na la feutagaʻi ai ma le tagata asiasi. O uiga agamalu o le uso na aafia ai le ulugalii. I le vaiaso mulimuli ane, na faateʻia ai i laʻua ina ua toe foʻi ane le uso, ma na faatagaina ai loa e Keith ma lana avā o ia e faamatala atu faavae faale-Tusi Paia o ona talitonuga. Na la faapea mai mulimuli ane: “I tausaga e lua na sosoo ai, sa ma faalogo ai i mea na taʻu mai e isi Molimau.” Sa la malilie e suʻesuʻe i le Tusi Paia, ma na oo ina papatisoina i laʻua o le faailoga o lo la tuuina atu iā Ieova. Maʻeu le faafiafiaina o le Molimau lea na uluaʻi asiasi iā Keith ma lana avā! I tausaga mulimuli ane, na feiloaʻi atu ai le Molimau i le ulugalii ma iloa ai ua avea nei i laʻua o se uso ma se tuafafine faaleagaga iā te ia. E taulau manuia la le agamalu.
11. I le ā le auala e mafai ai e le agamalu ona faafaigofie ai i se tasi ona taliaina upu moni faa-Kerisiano?
11 O le mea na tupu iā Harold a o avea ma fitafita na māfua ai ona lē fiafia ma masalosalo po o soifua le Atua. Na faateleina ona faafitauli, sa aafia i se faalavelave tau taavale ona o se ave taavale onā, na iʻu ai ina tumau i le lē atoatoa o le malosi o lona tino. Ina ua asiasi atu Molimau a Ieova i lona fale, sa faatonuina e Harold ina ia aua neʻi toe asiasi atu iā te ia. Ae peitaʻi i se tasi aso, na alu atu ai se Molimau e suafa iā Bill e asiasi i se tagata loto fiafia e lua fale e va ai ma Harold. Na tuʻituʻi sesē e Bill le fale o Harold. Sa tau tootoo atu Harold ma tatala le faitotoʻa, na vave lava ona faatoese Bill ma faamatala atu o ia sa fuafua e asiasi atu i lona tuaoi. Na faapefea ona tali atu Harold? E leʻi iloa e Bill, na matamata Harold i tala fou a le televise sa lipotia mai ai le auala na galulue soosootauau ai Molimau, i le fausia o se Maota fou o le Malo i se taimi puupuu lava. Ona o le faagaeetia i le vaai atu i le toʻatele o tagata o loo galulue ma le autasi, na ia suia ai ona uiga agaʻi i Molimau. Ona o le faatoesega agalelei a Bill ma ona uiga fiafia ma le agamalu, na ootia ai Harold ma filifili ai loa e taliaina asiasiga a Molimau. Sa ia suʻesuʻeina le Tusi Paia, faia ni agaʻigaʻi i luma, ma avea ai ma auauna papatisoina a Ieova.
I le Faapotopotoga
12. O ā uiga faalelalolagi e tatau i sui o le faapotopotoga Kerisiano ona teena?
12 O le vala lona tolu e tāua ai le faaalia o le agamalu o totonu o le faapotopotoga Kerisiano. I le sosaiete o tagata i aso nei, o se faiga masani le iai o feteenaʻiga. O fefaaaliaʻiga o manatu, o fefinauaʻiga ma feavauaʻiga o se faiga masani i le va o i latou o ē e iai se vaaiga faalelalolagi i le olaga. Mai lea taimi i lea taimi e sosolo mālie mai ai uiga faalelalolagi na i le faapotopotoga Kerisiano ma iʻu ai i maseiga ma feupuaʻiga. Pe a faasaʻoina e uso maufaatuatuaina nei tulaga, latou te lagona le faanoanoa. Ae ui i lea, o le alofa mo Ieova ma o latou uso e uunaia ai i latou e fesoasoani i tagata fai mea sesē ia salamō ma liliu ese. —Kalatia 5:25, 26.
13, 14. O le ā e mafai ona iʻu i ai pe a “aʻoaʻi atu ma le agamalu i ē o finau mai”?
13 I le uluaʻi senituri, sa fetaiaʻi Paulo ma lana aumea o Timoteo ma ni tulaga faigatā mai nisi o le faapotopotoga. Sa lapataʻia e Paulo Timoteo ina ia leoleo faasaga i uso o ē pei o ipu “ua taʻuleagaina.” Na faapea mai Paulo: “E lē tatau ona faamisa o le auauna a le Alii, a ia agamalu [lē gaoiā] i tagata uma, ia mafaia ona aʻoaʻo atu, ma ia onosai, ia aʻoaʻi atu ma le agamalu i ē o finau mai.” A tatou tausia le agamalu e ui lava i tulaga faatigā e masani lava ona uunaʻia ai i latou e ese o latou manatu e toe iloilo a latou faitioga. O le iʻuga, e pei ona tusi atili mai Paulo, atonu e foaʻi atu e Ieova, ‘iā i latou le salamō, ina ia latou iloa lelei le upu moni.’ (2 Timoteo 2:20, 21, 24, 25) Mātau mai sa faafesootaʻi atu e Paulo le lē gaoiā ma le onosai i le agamalu.
14 Sa faatatauina e Paulo mea na ia talaʻia. Pe a feutagaʻi ma “aposetolo silisili” i le faapotopotoga i Korinito, sa ia faalaeiau le ʻauuso e faapea: “O aʻu lava o Paulo, o lē faamaulalo pe a aʻu i ai iā te outou, a e faamalosi pe a ou lē i ai iā te outou, ou te ʻaiʻoi atu iā te outou ona o le agamalu ma le alofa o Keriso.” (2 Korinito 10:1; 11:5) Sa faataʻitaʻi moni lava Paulo iā Keriso. Mātau sa ʻaiʻoi atu Paulo i nei uso ona o “le agamalu” o Keriso. Sa ia ʻalofia uiga fia pule ma le fia tautalatasi. E lē taumatea sa logolelei ana faalaeiauga iā i latou i le faapotopotoga o ē na tali fiafia mai. Sa ia faaleleia faiā na leaga ma faataatia le faavae mo le filemu ma le autasi o le faapotopotoga. Pe lē o se gaioioiga ea lea e tatau iā i tatou uma ona taumafai e faataʻitaʻi i ai? E faapitoa lava i toeaina le tatau ona faataʻitaʻi i gaoioiga a Keriso ma Paulo.
15. Aiseā e tāua ai le faaalia o le agamalu pe a avatu fautuaga?
15 O le tiute tauave lea o le fesoasoani i isi, e lē faatapulaaina na o taimi ua lamatia ai le saogalemu ma le autasi o le faapotopotoga. E manaʻomia e uso ni taʻitaʻiga alofa a o leʻi taitai oo a latou faiā i se tulaga leaga. Na timaʻi mai Paulo e faapea: “Le au uso e, afai e maua se tagata i se tasi agasala, o outou o i la le Agaga, ia outou faafoʻi mai lē ua faapeaina.” Ae peitaʻi, e faapefea ona toe faafoʻi mai? ‘I le loto agamalu, ia faaeteete foʻi oe ina neʻi faaosoosoina oe.’ (Kalatia 6:1) E masani ona lē faigofie le tausia o le “loto agamalu,” talu ai o Kerisiano uma, e aofia ai ma toeaina tofia, e aafia i uunaʻiga agasala. Ae ui i lea, o le agamalu, o le a faigofie ai i lē fai mea sesē ona faia ni fetuunaʻiga manaʻomia.
16, 17. O le ā atonu e fesoasoani e taofia ai le faatalatū e faatatauina fautuaga?
16 O le upu Eleni ua faaliliuina ai le “faafoʻi mai” e mafai ona faatatau atu i le toe faasaʻosaʻo po o le toe faasagatonu lelei o ni ponaivi ua gaui, o se gaioioiga e mautinoa lava le tigā. E talanoa ma le mautinoa le fomaʻi lea na faia le taotoga o le ponaivi i aogā o le a maua mai i lea gaoioiga. O ona uiga toʻafimālie e faalaeiauina ai. O nai faamatalaga faalaeiau lea e muamua talanoa mai ai e fesoasoani lea e faamālūina ai faalogona mafatia. O le tulaga foʻi lenā e tasi, atonu e tigā le faia o ni toe fetuunaʻiga faaleagaga. Ae peitaʻi, o le agamalu o le a fesoasoani ai ia taliagofie na fetuunaʻiga, ma toe faafoʻisia ai le faiā fiafia ma saunia ai le auala mo lē fai mea sesē e suia ai ona ala. E tusa lava pe muamua ona tetee mai se tasi i fautuaga, ae o le faaalia o le agamalu e lē o loo ofoina atu le fesoasoani, e mafai ona taofia ai le faatalatū e mulimuli atu i fautuaga faale-Tusi Paia.—Faataoto 25:15.
17 Pe a fesoasoani e toe faafoʻi mai isi, e masani lava ona iai lamatiaga i le manatu i fautuaga faapea o ni faitioga. Na taʻua e se tasi tusitala e faapea: “Pe a fautuaina isi e masani lava ona iai le uunaʻiga e avatu i se auala malosi, e tāua ai tele la le faaalia o le agamalu.” O le atiina aʻe o le agamalu lea e pogai mai i le lotomaulalo o le a fesoasoani i Kerisiano o loo ofoina atu fautuaga e ʻalofia lenei lamatiaga.
“I Tagata Uma Lava”
18, 19. (a) Aiseā atonu e faigatā ai i Kerisiano ona faaalia le agamalu i feutagaʻiga ma faipule silisili? (e) O le ā o le a fesoasoani i Kerisiano e faaalia le agamalu iā i latou o iai le pule, ma o ā iʻuga lelei e tulaʻi mai ai?
18 O le isi vala e faigatā i le toʻatele ona faaalia ai le agamalu, o feutagaʻiga ma faipule silisili. E mautinoa lava, o le auala o loo gaoioi ai nisi o ē o loo iai le pule, o loo faaalia mai ai le finauvale ma le leai o se manatu mamafa. (Failauga 4:1; 8:9) Ae peitaʻi, o lo tatou alofa mo Ieova o le a fesoasoani ai iā i tatou e iloa lana pule silisili ese ma tatou usiusitai faatatau ai i faipule silisili faalemalo. (Roma 13:1, 4; 1 Timoteo 2:1, 2) E oo lava iā i latou o i tulaga maualuga latou te saʻilia auala e faatapulaa ai la tatou tapuaiga iā Ieova, ae tatou te fiafia e saʻili ni auala o loo tatala pea mo i tatou e ofo atu ai le tatou taulaga o viiga iā te ia.—Eperu 13:15.
19 Po o ā lava tulaga e tulaʻi mai, e lē tatau ona tatou faaalia se uiga tetee. Tatou te taumafai ia fetuutuunaʻi ae e lē mafai ona tatou lafoaʻia mataupu silisili amiotonu. I lenei auala, o loo taulau manuia ai o tatou uso i le faia o la latou faiva i atunuu e 234 o le lalolagi. Ia tatou utagia le fautuaga a Paulo e faapea, ‘ia tatou usiusitai i alii sili ma faipule, ia gauaʻi i alii, ia nofo sauniuni foʻi i tatou i galuega lelei uma lava, aua neʻi upu leaga i se tasi, aua neʻi faamisa, a ia faapalepale, ma ia faaali atu le agamalu uma i tagata uma lava.’—Tito 3:1, 2, LT.
20. O ā faamanuiaga ua iai mo i latou o ē faaalia le agamalu?
20 E anoanoaʻi faamanuiaga o le a olioli ai i latou uma o ē faaalia le agamalu. Na folafola mai e Iesu e faapea: “Amuia e agamalu; auā e fai mo latou tofi le nuu.” (Mataio 5:5) Mo uso faauuagagaina o Iesu, o le tausia o le agamalu ua faamaonia ai lo latou olioli ma le mauaina o le faaeaga o le pule faatasi ma ia i lona Malo agaʻi mai iā i latou o i luga o le lalolagi. Ae mo le “motu o tagata e toʻatele” o “isi mamoe” e faaauau pea ona latou faaalia le agamalu ma faamoemoe atu e ola i le Parataiso i inei i le lalolagi. (Faaaliga 7:9; Ioane 10:16; Salamo 37:11) Maʻeu se faamoemoe matagofie o loo i le lumanaʻi mo i tatou! O lea la, seʻi aua lava neʻi faagaloina le faamanatu atu a Paulo i Kerisiano Efeso e faapea: “O lenei, o aʻu o lē ua noanoatia ona o le Alii, ou te ʻaiʻoi atu iā te outou, ia outou savavali ia tusa ma le valaau ua valaauina ai outou. Ia outou loto maulalo ma agamalu.”—Efeso 4:1, 2.
Ia Autalu
• O ā faamanuiaga e maua mai i le faaalia o le agamalu
• i le aiga?
• i le faiva i le fanua?
• i le faapotopotoga?
• O ā faamanuiaga ua folafola mai iā i latou o ē agamalu?
[Fesili mo le Suʻesuʻega]
[Ata i le itulau 21]
E tāua le faaalia o le agamalu i aiga e eseese tapuaiga
[Ata i le itulau 21]
E faamalosia e le agamalu faiā i aiga
[Ata i le itulau 23]
Ia saunia pea lava outou e tali atu ma le agamalu ma le ava
[Ata i le itulau 24]
O le agamalu o lē o loo fautua atu e mafai ona fesoasoani i le tagata fai mea sesē