Le Talisuaga Mulimuli—O le ā le Uiga?

O LE ā se mea e oo i lou mafaufau pe a e faalogo i le faaupuga, “le talisuaga mulimuli”? E toʻatele tagata o le a mafaufau i le ata matuā matagofie i Milan i Italia, lea na valiina e le tagata tusiata o Leonardo da Vinci (1452-1519). O le mea moni, na avea le Talisuaga Mulimuli ma mataupu sa matuā fiafia i ai le ʻautusiata, le ʻautusitala, ma le ʻaufaimusika i le faagasologa mai o senituri.

O le ā la le Talisuaga Mulimuli, ma o le ā le uiga mo tagata o loo soifua i lona 21 o senituri? O le a taʻu atu e encyclopedias ma lomifefiloi iā te oe e faapea, o le Talisuaga Mulimuli, ua taʻua foʻi o le Talisuaga a le Alii, o le taumafataga lea na faia e Iesu Keriso ma ona aposetolo i le pō a o leʻi oo i lona maliu faataulagaina. Talu ai o le talisuaga mulimuli lea na faia e Iesu ma ona soo faamaoni, ua masani ai ona taʻua o le Talisuaga Mulimuli. Ma talu ai na faatūina e le Alii o Iesu Keriso, ua talafeagai ai la ona taʻua o le Talisuaga a le Alii.

I le tele o senituri, na faataulagaina ai e le toʻatele o tagata o latou ola ona o le manatu o ni māfuaaga aogā. O nisi o nei maliu, sa aogā i nisi o tagata mo se vaitaimi. E leai lava se tasi o na maliu faataulagaina e ui ina viiviia, na mafai ona faatusatusa atu i le aogā ma le tāua o le maliu faataulagaina o Iesu Keriso. E lē gata i lea, e leai lava se maliu i le talafaasolopito o lenei lalolagi tumu i faalavelave e mafai ona aogā mo le lalolagi uma. Aiseā?

Ina ia taliina lenā fesili ma fesoasoani iā te oe e iloa ai po o le ā le uiga o le Talisuaga a le Alii mo oe, e matou te fautuaina oe ina ia e faitauina le mataupu lea e sosoo mai.